“ᖃᐅᔨᓇᓪᓚᕆᑦᑐᖅ ᓯᕿᓂᖅ ᓴᓐᖏᓂᖅᓴᓪᓚᕆᐊᓘᓕᖅᑐᖅ. ᐆᓇᖅᑐᐊᓘᒐᑎᒃ ᑭᓯᐊᓂ ᐸᓐᓂᖅᑎᑦᓯᕙᓪᓕᐊᔪᑦ ᐅᕕᓐᓂᒥᒃ. ᐅᕕᓂᒃ ᖃᐅᖅᑎᐸᓪᓕᐊᓂᖅᓴᐅᓕᖅᑐᖅ. ᑕᐃᑦᓱᒪᓂᓕ, ᐸᓕᑐᐃᓐᓇᖅᐸᔪᒐᓗᐊᖅᑐᒍᑦ. ᐅᓪᓗᒥ, ᐃᓄᐃᑦ ᐆᑉᐸᓕᖅᑐᑦ ᖃᐅᖅᑎᖅᓱᑎᒃ. ᐅᓪᓗᒥ ᐊᑲᐃᓪᓕᐅᕈᑎᑕᖃᖅᓂᖅᓴᐅᓕᖅᑐᖅ ᐅᕕᓂᒃ ᐸᓂᐊᓗᒧᑦ ᓄᑦᑕᓕᖅᓱᓂ ᖃᐅᖅᑎᖅᓱᓂᓗ.”

“ᓯᓚ ᐊᔾᔨᒋᓐᖏᓯᐊᓕᖅᑕᖓ ᐅᓪᓗᒥ. ᐅᑭᐅᖅ ᑮᑕᑲᐃᓐᓈᕐᓂᖅᓴᐅᓕᖅᓱᓂ ᐱᒋᐊᕐᓂᖓ ᐃᓱᓕᓐᓂᖓᓗ ᑕᖅᑭᖏᓪᓗ. ᐊᓯᔾᔨᖅᑐᑦ ᑕᑯᑦᓴᐅᓪᓚᕆᑦᑐᑦ ᐊᒻᒪᓗ ᐅᐱᕐᖏᕙᓕᖅᑐᖅ, ᑐᐊᕕᖅᑐᐊᓗᒻᒥᒃ ᐊᐳᓪᓗ ᐊᐅᑉᐸᓪᓕᐊᔪᖅ ᓄᓇᒥᒃ ᓱᑲᑦᑐᐊᓗᒻᒥᒃ, ᐱᖃᓯᐅᑦᓱᓂ ᐃᓘᓐᓇᓂ ᓯᑯ ᐃᒪᕐᒦᑦᑐᖅ, ᑕᒪᒃᑯᐊ ᐊᓯᔾᔨᖅᓯᒪᓪᓚᕆᑦᑐᑦ ᑕᐃᑦᓱᒪᓂᐅᕙᔪᒻᒪᓂᑦ.”

“ᐅᑭᐅᖅ ᐃᒻᒥᓂᒃ ᑕᕐᕋᕆᔫᔮᑐᐃᓐᓇᓕᖅᑐᖅ ᐊᑑᑎᕙᔪᔭᒥᓂᒃ. ᓇᐃᑦᑐᐹᓘᓕᖅᑐᖅ ᐊᒻᒪᓗ ᑖᖃᑦᑕᓲᖑᑦᓱᓂ ᓯᑯᖃᖅᑎᓪᓗᑕ ᐃᖏᕐᕋᕕᑦᓴᒥᒃ, ᐱᒋᐊᖅᓱᓂ ᓅᕙᐃᕝᕙᒥ ᕿᒧᑦᓯᖅᐸᔪᔪᒍᑦ ᓯᑯᑯᑯᑦ. ᐅᓪᓗᒥᓕ ᑏᓴᕝᕙᕈᕋᑕᖅᐸᓕᖅᑐᖅ ᖁᕕᐅᓱᕝᕕᕈᕋᑕᖅᓱᓂ ᐃᓄᐃᑦ ᓱᓕ ᐅᒥᐊᖅᑐᖅᑐᖅ ᑲᖏᖅᓱᒥ. ᑕᐃᒫᑎᒋᑦ ᐊᓯᔾᔨᖅᓯᒪᓕᖅᑐᖅ ᒪᒃᑯᑉᐸᔪᒐᒪᒥᓂᑦ. ᒫᓐᓇ ᐅᒥᐊᖅᑐᕈᓐᓇᓕᖅᑐᑎᑦ ᐅᓪᓗᓂᒃ 12-ᓂᒃ ᖁᕕᐊᓱᕝᕕᒻᒥ. ᑕᐃᑦᓱᒪᓂ ᑕᒪᓐᓇᓘᓐᓃᑦ ᑐᓴᐅᒪᔭᐅᕙᔪᓐᖏᑦᑐᖅ.”

“ᐊᓄᕆ ᑕᐃᑲᓐᖔᕐᑯᒋᔭᖓ ᓴᕿᔭᓐᓂᖅᓴᐅᓕᖅᑐᖅ ᐊᓄᕆᕙᓕᖅᓱᓂ ᓇᑭᑐᐃᓐᓇᑦᓯᐊᖅ. ᐊᓄᕇᑦ ᓴᕿᑐᐃᓐᓇᖅᐊᓕᖅᑐᑦ ᓇᑭᑐᐃᓐᓇᑦᓯᐊᖅ. ᐊᓄᕆ ᓇᑭᓐᖔᓪᓚᕆᑦᑑᔮᕈᓐᓃᖅᑐᖅ ᑎᑭᑉᐸᑦᓱᓂ ᓄᖅᑲᑲᓪᓚᐸᑦᓱᓂ.”

“ᖃᓐᓂᐅᓂᐅᑉ ᒥᑦᒫᓄᓗᑦ, ᑕᑯᑦᓴᐅᕙᓕᖅᑐᖅ ᖃᓐᓂᖏᓐᓂᖅᓴᐅᕙᓕᖅᑐᖅ ᑕᐃᑦᓱᒪᓂᓂᑦ. ᐆᑦᑑᑎᖃᕋᔭᕈᒪ, ᑕᕆᐅᑉ ᓯᑯᖓ ᒫᓂ ᐊᐳᑎᖃᕐᓂᖅᓴᐅᕙᔪᒐᓗᐊᕐᒪᑦ ᕐᑳᖓᒍᑦ ᐅᓪᓗᒥᓗ ᐊᐳᑎᖃᒡᒐᐃᓐᓇᓕᖅᓱᓂ.”

“ᐅᓪᓗᒥᐅᓕᖅᑐᖅ, ᓯᓚ ᐊᔾᔨᒋᒻᒪᕆᓕᖅᑕᖓ ᑕᑯᖃᑦᑕᖅᓯᒪᔭᒃᑯᑦ. ᑕᐃᒫᒃ ᐅᖃᖅᑕᐅᒐᒪ ᐃᓕᓐᓂᐊᖅᓯᒪᔪᐊᓘᓐᖏᒃᑲᓗᐊᖅᑐᖓ, ᑭᓯᐊᓂ ᐊᓄᕆ ᓇᑭᑐᐃᓐᓇᖅ ᓴᖅᑭᕐᔫᒥᔭᑐᐃᓐᓇᖅᑑᔮᓕᕐᒪᑦ ᐊᒻᒪᓗ ᓄᕗᔭᐃᑦ ᐊᓯᔾᔨᐸᓪᓕᐊᓕᑐᐊᕐᒪᑕ, ᑕᕝᕙᓴᐃᓐᓇᐅᓪᓗᓂ ᐊᓄᕆᓕᕇᖅᓱᓂᓗ, ᐅᐱᕐᖔᒃᑯᑦ ᐊᓪᓛᑦ ᑕᐃᒪᐃᓕᖅᑐᖅ.

“ᐅᓪᓗᒥᐅᓕᖅᑐᖅ ᐊᐳᑎᖃᓐᖏᓂᖅᓴᓪᓚᕆᐅᓕᕐᒪᑦ ᑕᐃᑦᓱᒪᓂᓂᑦ. ᐊᐱᔪᐹᓘᕙᔪᒐᓗᐊᕋᑦᑕ ᑭᓯᐊᓂ ᐅᓪᓗᒥ ᐊᐳᑎᖃᓐᖏᓂᖅᓴᐅᓕᖅᑐᒍᑦ. ᐊᐳᑎ ᓄᓇᒥ ᐊᐅᓴᕋᐃᓐᓂᖅᓴᐅᓕᖅᓱᓂ. ᑕᐃᑦᓱᒪᓂᓕ ᐊᐅᓴᕋᐃᑉᐸᔪᓐᖏᒃᑲᓗᐊᕐᒪᑦ ᐅᓪᓗᒥᑎᑐᑦ. ᐃᒻᒪᖃ ᐊᐳᑎᖃᑦᓯᐊᖏᓗᐊᕐᓂᑯᖓᓄᑦ ᓄᓇᒥ. ᐱᐅᕙᔪᔫᒐᓗᐊᖅ ᖃᒧᑎᑦᑎᓐᓄᑦ, ᐊᐳᑎᖃᑯᑖᓐᓂᖅᓴᐅᖃᑦᑕᑎᓪᓗᒍ. ᐅᓪᓗᒥᐅᓕᖅᑐᖅ ᓱᓕ ᐱᐅᔫᒐᓗᐊᖅ ᑭᓯᐊᓂ ᐊᑯᓂᐅᓐᖏᓂᖅᓴᐅᖃᑦᑕᓕᖅᑐᖅ.

“ᐊᓯᔾᔨᐸᓪᓕᐊᔪᓪᓕ ᑕᑯᓯᒪᔭᒃᑲ ᓯᑯᒥ 1962 ᒥᑦᓯᑎᓐᓂ ᓯᑯᐃᑦ ᐱᐅᕙᔪᒐᓗᐊᕐᒪᑕ. ᓯᑯ ᐊᓯᔾᔨᖅᓯᒪᓕᖅᑐᖅ 1962 ᑭᖑᕐᖓᓂ. ᐊᖑᓇᓱᑦᑎᐅᓪᓗᖓ, ᑕᑯᕙᓪᓕᐊᓕᔪᔪᖓ ᓯᑯ ᑭᖑᕙᖅᐸᓪᓕᐊᑐᐃᓐᓇᕆᐊᖓ. 1960 ᒥᑦᓵᓂ ᓯᑯᓴᕋᐃᑉᐸᔪᒐᓗᐊᕐᒪᑦ. ᑭᓯᐊᓂ 1960 ᑭᖑᕐᖓᓂ ᓯᑯᓯᒪᓕᕋᓗᐊᖅᓱᓂ, ᓱᓕ ᐊᑐᕋᑦᓴᐅᓐᖏᑦᑐᖅ. ᑕᐃᑦᓱᒪᓂᓕ ᓯᑯᑦᓯᐊᖅᐸᔪᒐᓗᐊᕐᒪᑦ ᔮᓐᓄᐊᕆᐅᑎᓪᓗᖑ. ᓯᑯ ᑕᐃᑦᓱᒨᓇ ᖁᐊᖑᑦᓯᐊᓕᖅᓱᓂ ᓇᒧᑐᐃᓐᓇᖅᓯᐊᖅ ᐊᖑᓇᓱᒋᐊᕈᓐᓇᓕᖅᓱᑕ ᓄᓇᓕᖃᕆᐊᖅᑐᕈᓐᓇᖅᓱᑕᓗ.

“ᖃᐅᔨᒪᓇᕈᓐᓃᖅᑐᖅ ᖃᓄᐃᑦᑑᓂᐊᕐᒪᖔᖅ ᓯᓚ. ᓇᓗᓇᑦᓯᐊᓕᖅᑐᖅ ᐅᓪᓗᒥ.”

“ᐃᓘᓐᓇᒐᓚᑎᒃ ᐊᖅᑯᑎᒋᓲᕗᑦ ᐊᑐᕋᑦᓴᐅᖑᓐᓃᖅᑐᑦ ᐊᐳᑎᖃᑦᓯᐊᓐᖏᓗᐊᕐᓂᑯᖓᓄᑦ, ᐊᑐᕋᑦᓴᐅᒍᓐᓃᖅᑐᑦ. ᐊᑦᑐᐃᓂᖃᓪᓚᕆᑦᓯᒪᔪᖅ ᐃᓚᖏᓐᓂᒃ ᐊᖑᓇᓱᑦᑎᓂᒃ ᐊᐳᑎᖃᑦᓯᐊᖏᓐᓂᖅ ᓄᖅᑲᐅᒥᖓᒍᑎᐹᓘᒻᒪᑦ ᐆᒪᔪᖅᓯᐅᐸᑦᑐᓄᑦ. ᓄᓇᓕᐊᕈᒪᒐᓗᐊᖅᓱᑕ ᐊᖑᓇᓱᒋᐊᕐᓗᑕ, ᐅᑕᖅᑭᓐᖑᓇᓕᖃᑦᑕᖅᑐᖅ ᐊᐳᑎ ᖃᒧᑕᐅᔭᕈᒪᓕᕋᓗᐊᖅᑎᓪᓗᑕ. ᑕᒪᓐᓇ ᐊᑑᑎᓚᐅᖅᓯᒪᓐᖏᒧᑦ ᓱᔪᕐᔫᔮᖅᑐᖅ ᐊᐳᑎᖃᓐᖏᑦᑐᑯᑖᖑᖃᑦᑕᖅᓱᑕ ᓄᓇᒥ.”