ᐋᓗᓘ ᑲᐅᑕᖅ
“ᐊᐳᑎ ᑕᕆᐅᕐᓗ ᑲᑎᑉᐸᒻᒪᑎᒃ ᖁᐊᓕᕋᐃᒻᒪᑦ ᑕᐃᕙᑦᓱᑎᓪᓗᒍ ᐳᓐᓂᕈᔪᒻᒥᒃ, ᑕᐃᒪᐃᓐᓂᖓᓄᑦ ᓱᕋᓴᕋᐃᑦᑑᓕᖅᑐᖅ. ᑕᐃᒫᒃ ᑲᑎᑦᑎᓪᓗᒋᑦ ᓄᐊᓐᓂᐊᖅᑐᖅ ᐊᑖᓄᑦ ᐊᓄᕆᓯᐅᕋᓂ ᓄᓇᒧᑦ.”
ᔪᐊᓇᓯ ᐋᐸᒃ
“ᖃᓄᐃᓐᓂᐅᔪᖅ ᐅᓪᓗᒥ ᖁᐊᓪᓚᕆᐊᓘᔮᖅᑐᖅ ᑭᓯᐊᓂ ᐊᕿᑦᑐᖅ. ᐱᐊᑦᑑᒍᓐᓃᖅᓱᓂᓗ ᖁᐊᓪᓚᕆᐅᓐᖏᒧᑦ. ᑕᖅᓴᖏᑦ ᓄᑦᑕᐃᑦ ᓯᑯᐊᕐᒥ ᖃᑯᕐᓂᖅᓴᐅᓕᖅᑐᑦ ᐅᓪᓗᒥ ᑐᖑᔪᖅᐸᔪᒐᓗᐊᖅᓱᑎᒃ. ᓯᑯᕙᓪᓕᐊᓂᖅ ᐊᔾᔨᒋᕙᒍᓐᓃᖅᑕᖓ ᐅᓪᓗᒥ ᐃᒻᒪᖃ ᓯᑯᐊᖅ ᓄᑦᑕᕐᓂᖓᓄᑦ. ᖃᓄᐃᓐᓂᕆᔭᖏᑦ ᓯᑯᐃᑦ ᐊᔾᔨᒋᒍᓐᓃᖅᑕᖓ, ᐱᔭᕆᐊᑐᓂᖅᓴᐅᓕᖅᓱᓂ ᕐᑳᖏᕆᐊᖓ. ᑕᐃᑦᓱᒪᓂ ᐱᐊᑉᐸᔪᔫᒐᓗᐊᖅ ᖃᒧᑎᑦᑎᓐᓄᑦ ᐱᔭᕆᐊᑭᓚᕿᒻᒪᕆᓕᖅᓱᑎᒃ ᖃᒧᑎᕗᑦ.”
ᔭᐃᑯᐱ ᐃᑭᓐᓂᓕᒃ
“ᐱᕈᖅᐸᓪᓕᐊᓕᓚᐅᖅᓯᒪᒐᒪᓂᑦ ᒫᓐᓇᒧᓄᑦ ᑐᑦᑐᒥᓂᖅᑐᖏᓐᓇᖅᑐᖓ. ᖃᐅᔨᒪᔪᖓ ᖃᓄᐃᑦᑐᒋᐊᖃᕐᒪᖔᖅ ᓂᕿᖓ ᖃᓄᐃᓐᓂᖓᓗ ᑐᑦᑑᑉ. ᑕᑯᓐᓇᖅᓱᒋᑦ ᑕᐃᑦᓱᒪᓂ ᐊᒻᒪᓗ ᐅᓪᓗᒥ ᑐᑦᑐᐃᑦ ᐱᔭᐅᔪᑦ ᖃᓄᐃᓐᓂᖅᓴᐅᖃᑦᑕᓕᖅᑐᑦ. ᐊᒥᓱᑎᒍᑦ, ᐊᒥᕐᓗᑎᓱᑎᒃ ᐊᕙᑎᖏᑦ, ᓇᓗᓇᖏᑦᑑᒐᔪᑦᓱᑎᒃ ᐋᓐᓂᐊᖏᑦ - ᐃᒻᒪᑦᓯᒪᔪᑦ ᐊᕙᑎᖏᑦ ᐋᓐᓂᐊᖃᖅᓱᑎᓪᓘᓐᓃᑦ ᓇᒡᒍᐊᖏᑦ. ᑕᒪᓐᓇ ᐊᑑᑎᒐᔪᓐᓂᖅᓴᖅᔫᔮᓕᖅᑐᖅ ᑕᐃᑦᓱᒪᓂᒥᒃ.”
ᔮᓐ ᐊᕚᓚ
“ᓯᑦᑕᑦᓯᒪᔪᒥ ᐊᐳᑎᒥ ᐱᔭᕆᐊᑐᔪᐹᓗᒃ, ᑐᑦᑐᐃᓪᓗ ᓂᕆᑦᓯᐊᖃᑦᑕᐸᓪᓚᐃᖏᒻᒪᑕ ᓴᒡᒐᕆᐊᖃᕐᓂᑯᒥᓄᑦ ᓂᕿᒥᓂᒃ. ᑐᑦᑐᐃᑦ ᓂᕆᑦᓯᐊᕋᔭᓐᖏᑦᑐᑦ.”
ᔮᓐ ᐊᕚᓚ
“ᑕᑯᓯᒪᔪᖓ ᒪᒃᑯᑦᑑᑦᓱᖓ, ᐊᖑᓇᓱᑦᑎᐅᓪᓗᖓ, ᐱᓗᐊᖅᑐᒥᒃ ᐅᑭᐅᖑᑎᓪᓗᒍ, ᓯᓚ ᐊᓯᔾᔨᓪᓚᕆᖃᑦᑕᖅᓯᖅᒪᓕᖅᑐᖅ ᐅᑭᐅᒃᑯᑦ. ᐃᒃᑮᓇᖅᑐᐊᓗᒃ ᑭᖑᓂᖓᒍᑦ ᓂᕈᒥᑦᓯᕙᑦᓱᓂ.”
ᕼᐃᐅ ᑐᓗᕆᐊᓕᒃ
“ᑕᐃᑦᓱᒪᓂᒋᐊᖅ ᐊᖑᓇᓱᑦᑏᑦ ᖃᐅᔨᒪᖃᑦᑕᔪᒧᑦ ᔫᓂᐅᑎᓪᓗᒍ ᔪᓚᐃᒥᓗ, ᐅᖅᑰᓇᖅᑎᓪᓗᒋᑦ ᑕᖅᑮᑦ - ᓄᓇᓕᐊᕈᕕᑦ ᐅᖅᑰᓯᕙᓪᓕᐊᑐᐃᓐᓇᖅᓱᓂ, ᐊᒻᒪᓗ ᐆᒪᔪᐃᑦ ᖃᓄᐃᑦᑐᐊᐱᐅᒐᓛᒐᑎᒃ. ᐸᖓᓕᕋᓕᒻᒪᑕ ᕿᒫᑦᓱᑎᒃ ᑯᒪᓐᓂᒃ ᐊᒻᒪᓗ ᓂᕆᑦᓯᐊᖃᑦᑕᕋᑎᒃ. ᐅᖅᑰᓗᐊᖅᑐᑦ ᐃᓚᖓᓂᓗ ᓴᓪᓗᐊᓘᑦᓱᑎᒃ ᓴᐅᓂᑐᐃᓐᓇᐅᕙᑦᓱᑎᒃ. ᐊᖑᓇᓱᑦᑎᒻᒪᕇᑦ ᐊᖑᓇᓱᒋᐊᖅᐸᔪᔪᑦ ᓴᕐᕙᓄᑦ ᑐᑦᑐᐃᑦ ᑐᓐᓂᓕᐊᐱᐅᑦᓱᑎᒃ ᐅᑭᐊᓕᑕᖅᑎᑐᑦ. ᑕᐅᓄᖓ ᐊᖑᓇᓱᒋᐊᕈᕕᑦ ᑐᑦᑐᓯᐅᕆᐊᕐᓗᑎᒃ ᖃᓄᐃᓐᖏᑦᑐᐊᐱᐅᕙᒍᓐᓃᕐᒥᔪᑦ ᑕᐃᒪᐃᑉᐸᔪᒐᒥᒃ.
ᔮᓐ ᓄᑭᒃ
“ᐅᓪᓗᒥ ᐸᕐᓇᓯᒪᔫᔮᕈᓐᓃᖅᑐᒍᑦ ᐊᓯᔾᔨᕐᓂᐅᔪᓄᑦ ᐊᑦᑐᐃᔪᓄᑦ ᐅᕙᑦᑎᓐᓂᒃ ᖃᐅᑕᒫᑦ ᐃᓅᓯᑦᑎᓐᓂ. ᐃᓄᐃᑦ ᑐᖁᕙᓪᓕᐊᑐᐃᓐᓇᖅᑐᖅ ᕿᐅᑦᓱᑎᒃ ᐸᕐᓇᓯᒪᓐᖏᓗᐊᒧᑦ ᓂᕈᐊᓇᓐᖏᑦᑐᒧᑦ ᓯᓚᒧᑦ.”
ᔫᔩᓐ ᓂᕕᐊᑦᓯᐊᒃ
“ᓄᓇᐃᑦ ᓴᕐᕙᓃᑦᑐᑦ ᑕᑯᓐᓇᖅᑕᐅᕙᔪᔪᑦ ᓂᓪᓕᓇᖅᑑᒋᐊᖏᑦ. ᓂᓪᓚᖅᑑᖃᑦᑕᔪᔪᑦ. ᒫᓐᓇ ᐆᓇᖃᑕᐅᑐᐃᓐᓇᓕᖅᑐᑦ ᓄᓇᑎᑐᑦ.”
ᔭᐃᑯᐱ ᐃᑭᓂᓕᒃ
“ᐱᒃᑯᒋᓪᓚᕆᑦᑕᒃᑲ ᐃᓄᐃᑦ ᐃᓅᓯᒪᔪᑦ ᓯᕗᓂᓐᓂ ᖃᐅᔨᒪᔪᒻᒪᕆᐅᓯᒪᔪᑦ - ᐱᓗᐊᖅᑐᒥᒃ ᖃᐅᔨᒪᕐᓂᒥᒃ ᓯᓚᒥᒃ. ᑕᑯᓐᓇᑐᐃᓐᓇᖅᓱᑎᒃ ᕿᓚᒻᒥᒃ ᓄᕗᔭᓂᓪᓗ ᖃᐅᔨᒪᒍᓐᓇᖃᑦᑕᔪᔪᑦ ᓯᓚ ᖃᓄᐃᑦᑑᓛᕐᒪᖔᖅ ᖃᐅᖓᓂ. ᑕᒻᒪᕈᓐᓇᖃᑦᑕᔪᒐᑎᓪᓗ ᓇᓚᐅᑦᓵᖅᑕᒥᓐᓂ. ᑭᓯᐊᓂ ᐅᓪᓗᒥ ᓇᓚᐅᑦᓵᖅᑐᖃᕈᓐᓇᖅᑑᒐᓗᐊᖅ ᖃᓄᐃᓛᕐᒪᖔᖅ ᕿᒥᕐᕈᓂᒃᑯᑦ, ᑭᓯᐊᓂ ᑕᒻᒪᓐᖏᑦᑐᕆᑐᐃᓐᓇᕆᐊᖃᖅᑐᑎᑦ ᑕᑯᓐᓇᕋᕕᑦ ᓇᓗᓇᐃᕈᑎᑦᓴᔭᐅᔪᓂᒃ, ᑭᓯᐊᓂ ᓯᓚ ᐊᓯᔾᔨᑲᓪᓚᑉᐸᓕᕐᒪᑦ ᐅᓪᓗᒥ, ᓂᕆᐅᒋᔭᐃᑦ ᑕᒻᒪᕋᔪᓐᓂᖅᓴᐅᓕᖅᑐᖅ. ᓯᓚᑦᓯᐊᐹᓘᑐᐃᓐᓇᕆᐊᓕᒃ ᓯᓚᕐᓂᓪᓗᓕᑲᓪᓚᑕᖅᑯᖅ.
ᑕᐃᕕᑦ ᑐᓗᒃᑐᒃ
“ᐊᒃᕼᐊᐃᑦ ᐊᒥᓱᓐᖑᐸᓪᓕᐊᑐᐃᓐᓇᖅᑑᔮᖅᑐᑦ. ᕿᓐᓂᔭᐅᒪᔪᑦ ᑐᑦᑐᒥᓃᑦ ᐸᕝᕕᓴᑦᑕᐅᕙᔪᓐᖏᒃᑲᓗᐊᕐᒪᑕ. ᑭᓯᐊᓂ ᕿᓐᓂᔭᐅᒪᔪᑦ Aberdeen-ᒥ ᐊᕙᑎᐅᑦᓱᑎᒃ (20) ᕿᓐᓃᑦ ᐃᓘᓐᓇᑦᓯᐊᑎᒃ ᓄᖑᑕᒥᓃᑦ.”