“ᐅᓪᓗᒥ ᐸᕐᓇᓯᒪᔫᔮᕈᓐᓃᖅᑐᒍᑦ ᐊᓯᔾᔨᕐᓂᐅᔪᓄᑦ ᐊᑦᑐᐃᔪᓄᑦ ᐅᕙᑦᑎᓐᓂᒃ ᖃᐅᑕᒫᑦ ᐃᓅᓯᑦᑎᓐᓂ. ᐃᓄᐃᑦ ᑐᖁᕙᓪᓕᐊᑐᐃᓐᓇᖅᑐᖅ ᕿᐅᑦᓱᑎᒃ ᐸᕐᓇᓯᒪᓐᖏᓗᐊᒧᑦ ᓂᕈᐊᓇᓐᖏᑦᑐᒧᑦ ᓯᓚᒧᑦ.”

“ᓄᓇᐃᑦ ᓴᕐᕙᓃᑦᑐᑦ ᑕᑯᓐᓇᖅᑕᐅᕙᔪᔪᑦ ᓂᓪᓕᓇᖅᑑᒋᐊᖏᑦ. ᓂᓪᓚᖅᑑᖃᑦᑕᔪᔪᑦ. ᒫᓐᓇ ᐆᓇᖃᑕᐅᑐᐃᓐᓇᓕᖅᑐᑦ ᓄᓇᑎᑐᑦ.”

“ᐱᒃᑯᒋᓪᓚᕆᑦᑕᒃᑲ ᐃᓄᐃᑦ ᐃᓅᓯᒪᔪᑦ ᓯᕗᓂᓐᓂ ᖃᐅᔨᒪᔪᒻᒪᕆᐅᓯᒪᔪᑦ - ᐱᓗᐊᖅᑐᒥᒃ ᖃᐅᔨᒪᕐᓂᒥᒃ ᓯᓚᒥᒃ. ᑕᑯᓐᓇᑐᐃᓐᓇᖅᓱᑎᒃ ᕿᓚᒻᒥᒃ ᓄᕗᔭᓂᓪᓗ ᖃᐅᔨᒪᒍᓐᓇᖃᑦᑕᔪᔪᑦ ᓯᓚ ᖃᓄᐃᑦᑑᓛᕐᒪᖔᖅ ᖃᐅᖓᓂ. ᑕᒻᒪᕈᓐᓇᖃᑦᑕᔪᒐᑎᓪᓗ ᓇᓚᐅᑦᓵᖅᑕᒥᓐᓂ. ᑭᓯᐊᓂ ᐅᓪᓗᒥ ᓇᓚᐅᑦᓵᖅᑐᖃᕈᓐᓇᖅᑑᒐᓗᐊᖅ ᖃᓄᐃᓛᕐᒪᖔᖅ ᕿᒥᕐᕈᓂᒃᑯᑦ, ᑭᓯᐊᓂ ᑕᒻᒪᓐᖏᑦᑐᕆᑐᐃᓐᓇᕆᐊᖃᖅᑐᑎᑦ ᑕᑯᓐᓇᕋᕕᑦ ᓇᓗᓇᐃᕈᑎᑦᓴᔭᐅᔪᓂᒃ, ᑭᓯᐊᓂ ᓯᓚ ᐊᓯᔾᔨᑲᓪᓚᑉᐸᓕᕐᒪᑦ ᐅᓪᓗᒥ, ᓂᕆᐅᒋᔭᐃᑦ ᑕᒻᒪᕋᔪᓐᓂᖅᓴᐅᓕᖅᑐᖅ. ᓯᓚᑦᓯᐊᐹᓘᑐᐃᓐᓇᕆᐊᓕᒃ ᓯᓚᕐᓂᓪᓗᓕᑲᓪᓚᑕᖅᑯᖅ.

“ᐊᒃᕼᐊᐃᑦ ᐊᒥᓱᓐᖑᐸᓪᓕᐊᑐᐃᓐᓇᖅᑑᔮᖅᑐᑦ. ᕿᓐᓂᔭᐅᒪᔪᑦ ᑐᑦᑐᒥᓃᑦ ᐸᕝᕕᓴᑦᑕᐅᕙᔪᓐᖏᒃᑲᓗᐊᕐᒪᑕ. ᑭᓯᐊᓂ ᕿᓐᓂᔭᐅᒪᔪᑦ Aberdeen-ᒥ ᐊᕙᑎᐅᑦᓱᑎᒃ (20) ᕿᓐᓃᑦ ᐃᓘᓐᓇᑦᓯᐊᑎᒃ ᓄᖑᑕᒥᓃᑦ.”

“ᐊᒥᓱᐊᓗᓐᓂᒃ ᑕᑯᖃᑦᑕᖅᓯᒪᓕᖅᑐᒍᑦ ᓲᕐᓗ ᕿᓚ ᓄᕗᔭᐃᓐᓇᒐᓚᑦᑐᐊᓘᓕᖅᑐᖅ. ᓄᕗᔭᐃᑦ, ᐳᔪᕈᔪᓪᓘᓐᓃᑦ” ᖃᑯᖏᓐᓇᖃᑦᑕᖅᑐᖅ ᑕᑯᑦᓴᐅᑦᓯᐊᕋᓂᓗ ᓄᓇ. ᐊᓪᓚᕿᔪᐊᐱᐅᖃᑦᑕᕈᓐᓃᖅᑐᖅ ᑕᑯᑦᓴᐅᑦᓯᐊᕐᓗᓂ. ᐅᖃᐅᓯᑐᖃᖅ ᐳᔪᕋᖅᑐᖅ - ᐊᑦᓱᐊᓗᒃ ᐳᔪᕋᖃᑦᑕᓕᖅᑐᖅ. ᐃᕿᕆᐊᓐᖏᑦᑐᖅ (ᐳᔪᖅ ᐃᑯᐊᓚᔪᒥᒃ) ᐱᑕᓕᐹᓗᒃ ᐅᓪᓗᒥ. ᐊᓪᓚᕿᒐᐃᒐᓗᐊᕐᒪᑦ ᐊᓪᓛᑦ. ᐳᔪᕆᐊᖃᑦᑕᖅᑐᖅ ᐊᓪᓚᕿᒐᓗᐊᕐᒪᑦ.

ᐊᖏᕐᕋᖃᖅᓱᑕ ᐃᒡᓗᒥ, ᐃᒡᓗᖃᖅᐸᔪᖓᑦᑕ ᑕᓯᐅᑉ ᓴᓂᐊᓂ. ᓯᑯᓗ ᓄᑦᑖᕙᓗᐃᓐᓇᖅᓱᓂ. ᓄᖅᑲᕈᓐᓇᕋᓂ ᓂᐱᓕᐹᓘᑦᓱᓂ ᓲᕐᓗ ᑲᓪᓕᕐᕙᓗᒃ. ᑐᓴᖅᓴᐅᓲᖑᒍᓐᓃᖅᑐᖅ. ᐊᑑᑎᓚᐅᓱᖓᓲᖑᕙᓪᓚᐃᔫᒐᓗᐊᖅ ᑭᓯᐊᓂ ᐊᕐᕌᒍᓂ ᐊᓂᒍᖅᑐᓂ ᑐᓴᖅᓴᐅᖏᓐᓇᖅᐸᔪᔪᖅ.”

“ᐱᕈᖅᐸᓪᓕᐊᑎᓪᓗᖓ ᐊᑖᑕᒐ ᑕᒡᔭᖅᐸᔪᔪᖅ (ᓄᓇᓕᐊᖅᓱᓂ) ᐃᑳᕆᐊᖃᖅᓱᓂᓗ ᑰᓐᓂᒃ ᑰᒐᓛᓐᓂᓪᓗ. ᑖᒃᑯᐊ ᐸᓂᖅᓯᒪᓕᖅᑐᑦ. ᑖᕗᖓᔪᒐᑦᑕ ᐊᕐᕌᒍᐃᑦ ᖃᑦᓯᒐᓛᑦ ᐊᓂᒍᖅᓯᒪᓕᖅᑐᑦ ᐊᑖᑕᒪ ᐊᖑᓇᓱᕝᕕᒋᕙᔪᔭᖓᓄᑦ. ᖃᔭᕆᐊᕗᑦ ᑕᑕᑦᑎᓪᓗᒍ ᕿᒻᒥᓕᒫᑦᑎᓐᓄᓪᓗ ᓱᓇᓕᒫᓂᓪᓗ ᐃᖏᕐᕋᒍᓐᓇᖅᐸᔪᔭᕗᑦ, ᒫᓐᓇ ᐸᓂᖅᓯᒪᓕᖅᑐᖅ.”

“ᐊᑐᕆᑐᓕᖅᑐᐹᓗᒃ. ᐃᓚᖓᓂ ᐃᓱᒫᓘᒋᕙᑦᑕᕗᑦ ᐃᓪᓗᕋᓛᓄᑦ ᓱᓇᒃᑯᑎᕗᓪᓗ ᑎᑦᑕᐅᑕᕋᔭᕆᐊᖏᑦ. ᐅᓪᓗᒥ ᓱᓇᓕᒫᑦ ᐊᑦᓱᖏᖅᓯᒪᒋᐊᖃᓕᖅᑐᑦ. ᐊᓄᕆ ᓴᓐᖏᔪᕈᖅᐸᓪᓕᐊᑐᐃᓐᓇᖅᑐᖅ ᑕᑯᖃᑦᑕᖅᓯᒪᔭᑦᑎᓐᓂ.”

“ᖃᖓᒃᑰᕐᓂᖓᑦ ᐃᓚᖓᑦ ᐊᕐᕌᒍᒥ ᓯᓚᐅᑉ ᐊᓯᔾᔨᖅᑕᖓᓂ. ᑲᓱᕈᓐᓃᖅᑐᑦ. ᖃᐅᔨᒪᕙᔪᔪᒍᑦ ᖃᖓᒃᑯᑦ ᓯᓚ ᐊᓯᔾᐸᓪᓕᐊᓂᐊᓕᕐᒥᒻᒪᖔᖅ. ᓲᕐᓗ ᐃᑎᒐᑎᒃ ᒪᐅᑉᐸᑕ ᐊᐳᑎᒥ, ᖃᐅᔨᒪᑦᑕᖅᑐᑦ ᐊᐅᔭᖅ ᐅᕝᕙᓗ ᐅᐱᕐᖔᖅ ᐊᑑᑎᒐᔭᕐᒪᖔᖅ. ᐊᑐᕐᓂᖅ ᖃᐅᔨᒪᓂᑐᖃᑦᑎᓐᓂᒃ ᖃᐅᔨᒪᒐᔭᖅᑐᑎᑦ ᓱᓇ ᐊᑑᑎᒐᔭᕐᒪᖔᖅ ᖃᖓᒃᑯᑦ, ᑭᓯᐊᓂ ᓇᓗᓇᑐᐃᓐᓇᓕᖅᑐᖅ ᓇᓚᐅᑦᓵᕆᐊᑦᓴᖅ. ᐃᓄᐃᑦ ᐅᕙᖓᓗ ᓇᓗᓕᖅᑐᒍᑦ. ᑕᐃᑦᓱᒪᓂᒋᐊᖅ ᖁᐊᖅᐸᔪᔪᑦ ᑕᓰᑦ ᑕᓯᐊᕋᐃᓪᓗ, ᑭᖑᓂᖓᒍᑦ ᖃᑦᓯᒐᓛᑦ ᐱᓇᓱᐊᕈᓰᑦ ᐊᓂᒍᕐᒪᑕ ᓯᑯ ᐊᑦᑕᕐᓇᕈᓐᓃᑕᖅᑯᖅ ᐃᖏᕐᕋᕕᒋᒋᐊᖓ.

“ᐊᕐᕌᒍᕋᓴᐃᑦ ᐊᓂᒍᖅᓯᒪᓕᖅᑐᑦ ᐃᔾᔪᔪᓪᒪᕆᐊᓗᓐᓂᒃ ᓯᑯᖃᖅᐸᔪᔪᒍᑦ ᐊᑯᓂᐊᓗᒃ ᐊᑐᕆᐊᖃᖅᐸᔪᔪᑦ ᑑᕐᓂᒃ. ᐃᓘᓐᓇᑦᓯᐊᓂ ᐳᓚᕙᔪᔪᖅ ᑐᖅ ᐃᐳᖓ. ᒫᓐᓇ ᓇᐃᓐᓂᖅᓴᓪᓚᕆᐊᓘᓕᖅᑐᑦ ᑑᑦ ᐃᐳᖏᑦ ᐊᒻᒪᓗ ᓱᓕ ᑎᑭᐅᑎᕙᑦᑐᒍᑦ ᐃᒪᕐᒧᑦ. ᐃᓘᓐᓈᒍᑦ ᓯᑰᑉ ᐃᔾᔪᓂᖓ ᒥᑭᓪᓕᕚᓪᓕᖅᓯᒪᔪᖅ. ᐊᒻᒪᓗ ᐃᔾᔪᓂᖓ ᓯᑰᑉ ᓇᓗᓇᐃᖅᓯᒍᑕᐅᒻᒥᔪᖅ ᖃᓄᑎᒋ ᓂᓪᓕᓇᕐᒪᖔᖅ ᓯᓚ. ᐃᒃᑮᓇᕐᓂᖅᐸᑦ ᐃᔾᔪᓂᐊᖅᑐᖅ. ᐊᐳᑎᓕᐹᓘᒍᓂ ᓵᓐᓂᖅᓴᐅᓂᐅᓴᔪᖅ, ᑭᓯᐊᓂ ᐃᓘᓐᓈᒍᑦ ᓯᓚᒥᒃ ᒪᓕᑦᑐᖅ.”