ᐊᑖᓃᑦᓱᓂ ᐃᓐᓈᕉᑉ, ᐹᖓᓂ ᑰᑉ ᐊᕙᓗᔭᐅᒪᑦᓱᓂᓗ ᑲᔾᔮᓇᖅᑐᐊᓗᓐᓄᑦ ᐃᓐᓈᕈᕐᓄᑦ, ᐸᓐᓂᖅᑑᖅ ᕿᑭᖅᑖᓘᒻᒦᑦᑐᖅ, ᐸᓐᓂᖅᑑᑉ ᐃᑭᕋᓴᖓᓂ. ᖃᐅᔨᒪᔭᐅᔪᖅ ᑲᔾᔮᖅᑎᓄᑦ ᐊᓃᖅᑎᓄᓪᓗ ᐊᑯᖅᑕᐅᒋᐊᖓ ᖃᐅᔨᒪᔭᐅᔪᒻᒪᕆᒻᒧᑦ ᐊᐅᔪᐃᑦᑐᖅ ᒥᓐᖑᐃᕐᓯᕐᕕᒻᒥᒃ, ᓄᓇᓖᑦ ᓄᓇᓕᒋᔭᐅᔪᑦ ᐊᑖᓃᑦᑐᓄᑦ 1500 ᐃᓄᐃᑦ.
ᐸᓐᓂᖅᑑᖅ ᖃᐅᔨᒪᔭᐅᔪᖅ ᓴᓇᐅᒐᖏᓐᓂᑦ ᐊᒻᒪᓗ ᐅᐸᒍᒥᓇᖅᑐᕆᔭᐅᓪᓚᕆᑦᓱᓂ ᐅᖅᑯᕐᒥᐅᑦ ᓴᓇᕕᖓᑦ. ᐅᖅᑯᒥᐅᑦ ᓴᓇᐅᒐᖅᑎᓄᑦ ᑲᑐᔾᔨᖃᑎᒌᖑᕗᑦ ᑲᒪᕙᑦᓱᑎᒃ ᑎᑎᖅᑐᒐᕐᓂᒃ ᓄᕕᖅᓵᑦᓴᓂᓪᓗ ᓴᓐᓇᕕᓐᓂᒃ, ᓴᓇᕙᑦᓱᑎᒃ ᐱᐅᔪᒻᒪᕆᐊᓗᓐᓂᒃ ᓄᕕᐅᖅᑲᖅᓯᒪᔪᓂᒃ ᓄᕕᖅᓵᑦᓴᓂᒃ ᑎᑎᖅᑐᒐᕐᓂᓪᓗ. ᖃᐅᔨᒪᔭᐅᔪᒻᒪᕆᐅᔪᑦ “ᐸᓐᓂᖅᑑᑉ” ᓇᓴᖏᑦ, ᑕᖅᓴᖃᐅᖅᓱᑎᒃ ᓂᑦᓯᑕᖅᓯᒪᔪᑦ ᓇᓴᐃᑦ ᓴᓇᐅᔭᐅᒪᔪᑦ ᓄᓇᓕᓐᓂ ᓴᓇᔨᓄᑦ, ᓂᐅᕕᐊᖑᒍᓐᓇᕐᒥᔪᑦ ᐅᖅᑯᕐᒥᐅᓂᒃ.

ᐊᑑᓃᑦᑐᓂᒃ 500 ᐃᓂᖃᖅᓱᓂ ᓂᒋᖓᑕ ᓯᓈᖓᓂ ᕿᑭᖅᑖᓘᑉ, ᓴᓂᐊᓂ ᑰᔾᔪᐊᑉ. ᐱᓱᕋᔭᑦᑏᑦ ᐊᑐᐃᓐᓇᓖᑦ ᑲᑕᓐᓂᓕᓂᒃ ᒥᓐᖑᐃᕐᓯᕐᑯᒻᒥᒃ ᓯᓚᑎᑦᓯᐊᖓᓂ ᓄᓇᓖᑦ. ᐊᓯᖏᑦ ᐊᓃᕐᕕᑦᓴᐅᔪᑦ ᖃᔭᖅᑐᕐᓂᖅ, ᐊᖑᓇᓱᓐᓂᕐᓗ.
ᐊᒥᓱᑦ ᑭᒻᒥᕈᒻᒥᐅᑦ ᖃᐅᔨᒪᔭᐅᔪᑦ ᓴᓇᓐᖑᐊᖅᑎᒻᒪᕆᐅᒋᐊᖏᑦ ᓴᓇᐅᒐᖏᓪᓗ ᓂᐅᕕᐊᖑᕙᑦᓱᑎᒃ ᓄᐊᑕᐅᕙᑦᓱᑎᓪᓗ ᓄᓇᕐᔪᐊᕐᒥ. ᑐᑭᓯᒋᐊᒃᑲᓐᓂᕈᒪᒍᕕᑦ ᑭᒻᒥᕈᑦ ᒥᑦᓵᓄᑦ ᐊᕙᑖᓃᑦᑐᓪᓗ ᑕᑯᔪᒥᓇᖅᑐᖅ, ᑕᑯᒋᐊᕈᒃ  www.kimmirut.ca.

ᐃᖃᓗᐃᑦ, ᑕᐃᔭᐅᕙᓚᐅᖅᓯᒪᔪᖅ ᕗᕉᕕᓴ ᕙᐃ, ᐱᓇᓱᐊᕐᕕᐅᔪᖅ ᒐᕙᒪᒃᑯᓐᓄᓪᓗ ᑐᑦᑕᕐᕕᑦᓱᓂ ᕿᑭᖅᑖᓘᒻᒥ ᐊᒻᒪᓗ ᒐᕙᒪᖃᕐᕕᐅᑦᓱᓂ ᓄᓇᕗᒻᒥ. ᐃᓂᖃᖅᓱᓂ ᓂᒋᖅᐸᓯᐊᓂ ᕿᑭᖅᑖᓘᑉ ᑯᔭᓯᒥ ᐊᖏᕐᕋᕆᔭᐅᓪᓗᓂᓗ ᐅᖓᑖᓃᑦᑐᓄᑦ 7060 ᐃᓄᐃᑦ, ᐃᖃᓗᐃᑦ ᐊᖏᓂᖅᐸᐅᔪᖅ ᓄᓇᓕᓐᓂ ᓄᓇᕗᒻᒥ ᐊᖅᑯᑕᐅᑦᓱᓂᓗ ᐅᑭᐅᖅᑕᖅᑐᒧᑦ ᑲᓇᓐᓇᖓᓂᒃ ᑲᓇᑕᐅᑉ.

ᐃᒡᓗᓕᒃ ᐃᓂᖃᖅᑐᖅ ᕿᑭᖅᑕᓪᓚᑐᕐᒥ ᐃᒡᓗᓕᐅᑉ ᐃᒪᖓᓂ, ᐃᒡᓗᓕᐅᒃ ᕿᑭᖅᑕᖓᑕ ᓴᓂᐊᓂ ᓄᓇᖓᓂ ᓄᓇᕗᑦ. ᐃᒡᓗᓕᒃ (ᐊᒥᓲᓂᖏᑦ ᐃᓄᖏᑦᑕ 1700) ᐃᓚᒋᔭᐅᒐᓗᐊᑦᓱᓂ ᕿᑭᖅᑕᓂᒧᑦ ᕿᑭᖅᑖᓗᒻᒧᓘᓐᓃᑦ, ᐱᑕᓕᒃ ᐊᔾᔨᒌᓐᖏᑦᑐᓂᒃ ᐃᓄᓐᓄᑦ ᐱᖅᓯᕐᓂᒃ ᐊᑐᓂᑦ ᐱᖓᓱᓂᒃ ᐊᕕᑦᑐᑦᓯᒪᓂᐅᔪᓂᒃ.
ᐃᒡᓗᓕᒃ ᓄᓇᓕᒋᔭᐅᔪᖅ ᐅᓪᓗᒥᓯᐅᑎᓂᒃ ᐃᓅᓂᖃᖅᓱᑎᒃ ᐊᒻᒪᓗ ᑕᐃᑦᓱᒪᓂᑕᕐᓂᒃ ᐃᓅᓯᖃᖅᓱᑎᒃ, ᑕᐃᒫᒃ ᑕᑯᑦᓴᐅᑎᑕᐅᒻᒪᑦ ᐊᑕᓈᕐᔪᐊᕐᒥ, ᓵᓚᖃᖅᓯᒪᔪᑦ ᑕᕐᕆᔭᐃᑦ ᑐᓐᖓᕕᖃᖅᓱᑎᒃ ᐱᖅᑯᓯᑐᖃᖅᑎᒍᑦ ᐅᓂᒃᑳᑐᖃᕐᒥᒃ.

ᓴᓂᕋᔭᒃ ᐃᓂᖃᖅᑐᖅ ᓯᓈᖓᓂ ᐃᒡᓗᓕᐅᑉ ᐃᒪᖓᑕ ᐃᒡᓗᓕᐅᑉ ᕿᑭᖅᑕᖓᓂ, ᒫᓐᓇ ᐃᓄᖃᖅᓱᑎᒃ 720-ᓂᒃ ᓄᓇᓕᓐᖑᓚᐅᖅᓯᒪᔪᖅ ᓈᓚᕝᕕᖃᖅᕕᐅᑦᓱᓂ 1957-ᒥ ᐃᑲᔪᕈᑕᐅᑦᓱᓂ ᑲᓇᑕᒥ ᓯᓚᑐᐃᓐᓇᕐᒥᒃ ᖃᐅᔨᓴᕐᓂᕐᒥᒃ ᐅᑭᐅᖅᑕᖅᑐᒥ. ᓈᓚᕝᕕᖃᕐᕕᒥᓃᑦ ᐊᐅᓚᒍᓐᓃᖅᑐᑦ, ᖃᐅᔨᒪᔭᕆᐊᓕᑦᑎᒍᑦ ᓯᕗᕙᖅᓯᒪᓂᖅᓴᓂᒃ ᖃᐅᔨᓴᕈᑎᑕᖃᓕᖅᑐᖅ ᓄᓇᓕᓐᓂ ᐃᓇᖐᔪᒥᒃ.
1950 ᓄᓐᖑᖅᐸᓯᖏᓐᓂ 1960-ᖏᓐᓂᓗ, ᐃᓄᐃᑦ ᓄᑦᑎᐸᓪᓕᐊᓯᔪᔪᑦ ᐊᕙᑖᓂᒃ ᓄᓇᓕᓐᓂᒃ ᐃᖅᑲᓇᐃᔭᕆᐊᓕᖅᓱᑎᒃ ᓈᓚᕝᕕᖃᕐᕕᒻᒧᑦ ᓄᓇᓖᓪᓗ ᑕᕝᕙᓐᖑᖅᓱᑎᒃ. ᓴᓂᕋᔭᒃ ᐃᓱᒪᒋᔭᐅᔪᖅ ᐱᖅᑯᓯᑐᖃᖅᑎᒎᖅᑐᓄᑦ ᓄᓇᓕᓐᓄᑦ ᐃᓚᒋᔭᐅᒋᐊᖓ ᓄᓇᕗᒻᒥ. ᐱᖅᑯᓯᑐᖃᖅᑎᒍᑦ ᐊᑎᖓ ᓴᓂᕋᔭᐅᑉ ᓴᓂᕋᔭᒃ “ᓯᓈᓃᑦᑐᖅ.” ᑕᑯᕕᑦᓴᑦᓯᐊᕌᓗᒃ ᐊᐃᕕᕐᓂᒃ, ᓇᑦᓯᕐᓂᒃ, ᐃᒪᐅᑉ ᑎᒻᒥᐊᖏᓐᓂᒃ ᐊᓯᖏᓐᓂᓪᓗ ᐅᑭᐅᖅᑕᖅᑐᒥ ᓂᕐᔪᓂᒃ.

ᐅᐊᓐᓇᖅᐸᓯᓐᓂᖅᐹᖅ ᓄᓇᓕᓐᓂ ᑲᓇᑕᒥ, ᐊᐅᔪᐃᑦᑐᖅ ᐃᓂᖃᖅᑐᖅ ᖁᑦᓯᑦᑐᒥ ᐊᐅᔪᐃᑦᑑᑉ ᕿᑭᑦᑕᖓᓂ. ᑲᔾᔮᓇᖅᑐᐹᓗᒃ ᐃᓄᖃᓐᖏᑦᑐᒦᑦᑐᖅ, ᐊᕙᓗᔭᐅᒪᔪᖅ ᖃᖅᑲᓄᑦ ᐊᒻᒪᓗ, ᐊᕐᕌᒍᓕᒫᒐᓚ ᓯᑯᒧᑦ.
ᓄᓇᓖᑦ 160-ᓂᒃ ᐃᓄᓖᑦ ᐊᐅᔪᐃᑦᑐᕐᒥ, “ᓄᓇ ᐊᐅᓚᐅᖅᓯᒪᓐᖏᑦᑐᖅ”, ᑐᑭᒋᓪᓗᓂᒋᑦ ᐊᐅᔪᐃᑦᑐᐃᑦ ᓯᑯᐃᑦ ᑕᑉᐹᓂᑦᑐᑦ ᐅᖓᑖᓃᓗ ᐃᓐᓈᕈᑉ ᓄᓇᓕᓐᓂ. ᐳᓚᕋᑦᑏᑦ ᐊᐅᔪᐃᑦᑐᓕᐊᖅᐸᑦᑐᑦ ᑕᑯᓂᐊᖅᓱᑎᒃ ᑲᔾᔮᓇᕐᓂᐊᓗᐊᓂᒃ ᓂᕐᔪᑎᓂᓪᓗ. ᖃᐅᔨᓴᖅᑏᑦ ᐊᐅᓪᓚᖃᑦᑕᓲᑦ ᐊᐅᔪᐃᑦᑑᑉ ᕿᑭᖅᑕᖓᓄᑦ “ᐃᑦᓴᕐᓂᑕᖅ ᓇᐹᖅᑐᖃᕐᕕᒥᓂᖅ” ᐋᒃᓱᓪ ᕿᑭᖅᑕᖓᓂ.

ᑲᖏᖅᑐᒑᐱᒃ, “ᑲᖏᖅᑐᑦᑎᐊᑯᓗᒃ,” ᐃᓄᓐᓄᑦ, ᐃᓂᖃᖅᑐᖅ ᑲᓇᓐᓇᖅᐸᓯᖓᓂ ᕿᑭᖅᑖᓘᑉ ᐃᓗᐊᓂ Patricia Bay. ᓄᓇᓖᑦ ᐃᓄᖃᖅᑐᑦ ᐅᖓᑖᓃ 900 ᐃᓄᐃᑦ, ᐃᓂᖃᖅᑐᖅ ᒪᓂᖅᑲᔮᒥ, ᐊᕙᓗᔭᐅᒪᑦᓱᓂ ᑲᔾᔮᓇᖅᑐᒻᒪᕆᐊᓗᓐᓄᑦ ᑲᖏᖅᓱᓄᑦ ᑎᑭᐅᑎᓯᒪᔪᓄᑦ Barnes Icecap-ᒧᑦ. ᐃᓐᓈᕈᐊᓗᐃᑦ, ᐱᖃᓗᔭᐃᑦ ᐊᐅᔪᐃᑦᑐᓪᓗ ᑲᖏᖅᑐᒑᐱᒻᒥ ᐅᐸᒍᒪᕆᔭᐅᖃᑦᑕᕐᒪᑕ ᐅᔭᖅᑲᓂᒃ ᓯᑯᓂᓗ ᒪᔪᕋᖅᑎᓄᑦ ᓄᓇᕐᔪᐊᓕᒫᒥᒃ. ᑕᑯᔭᑦᓴᐅᓪᓗᑎᓪᓗ ᐆᒪᔪᐃᑦ ᖃᓄᐃᑦᑐᑐᐃᓐᓇᑦᓯᐊᑦ, ᐱᖃᓯᐅᑎᑦᓱᑎᒃ ᑐᑦᑐᐃᑦ, ᐊᓪᓚᓐᖑᐊᑦ ᐊᓯᖏᓪᓗ ᐳᐃᔩᑦ. ᐃᒐᓕᖅᑑᖅ ᑲᓇᑕᒥ ᓂᕐᔪᑎᖃᕐᕕᒃ, ᓴᐳᑎᔭᐅᓯᒪᑦᓱᑎᒃ ᐊᕐᕖᑦ, ᐃᓂᖃᖅᓱᑎᒃ Patricia Bay-ᒥ.

ᐃᓄᒃᑎᑐᑦ ᑕᐃᔭᐅᔪᑦ ᑭᓐᖓᐃᑦ, ᐱᔾᔪᑎᖃᖅᑐᖅ ᑲᔾᔮᓇᖅᑐᓂᒃ ᖃᖅᑲᓂᒃ ᐊᕙᓗᐃᒪᔪᓂᒃ ᓄᓇᓕᖏᓐᓂᒃ. ᐃᓂᖃᖅᓱᓂ ᓂᒋᖅᐸᓯᐊᓂ ᐱᖓᓐᓇᖅᐸᓯᒻᒥ ᕿᑭᖅᑖᓘᒻᒥ, ᑭᓐᖓᐃᑦ ᓄᓇᒋᔭᐅᓯᒪᔪᖅ ᐊᕐᕌᒍᐃᑦ 1000 ᐅᖓᑖᓂ. ᑐᓂᖅᑕᐃᑦ ᓄᓇᓕᖃᕐᕕᒥᓃᓪᓗ ᐃᑦᓴᕐᓂᑕᐃᑦ ᑕᑯᔭᑦᓴᐅᔪᑦ ᒪᓕᕐᔪᐊᖅ ᒥᓐᖑᐃᕐᓯᕐᑯᒻᒥ, ᐊᑦᑐᐊᔪᒥ ᓄᓇᓕᓐᓄᑦ.
ᑭᓐᖓᐃᑦ (ᐃᓄᖏᑦ 1411) ᓄᓇᕐᔪᐊᕐᒥ ᑐᓴᐅᒪᔭᐅᔪᖅ ᐃᓄᐃᑦ ᓴᓇᐅᒐᖏᓐᓄᑦ, ᐱᓗᐊᖅᑐᒥᒃ ᑎᑎᖅᑐᒐᓕᐅᕐᓂᕐᒧᑦ ᓴᓇᓐᖑᐊᒃᑲᓄᓪᓗ. ᐃᓄᐃᑦ ᓴᓇᐅᒐᖏᓐᓂᒃ ᐱᔪᒪᓲᑦ ᓄᓇᕐᔪᐊᕐᒥ ᑎᑭᖃᑦᑕᓲᑦ ᑭᓐᖓᕐᓄᑦ ᑲᑎᓯᒋᐊᖅᑐᖅᓱᑎᒃ ᓄᓇᓕᓐᓂᓐᓂᒃ ᖃᐅᔨᒪᔭᐅᒻᒪᕆᑦᑐᓂᒃ ᓴᓇᓐᖑᐊᖅᑎᓂᒃ ᐳᓛᕆᐊᓲᖑᑦᓱᑎᓪᓗ ᑯᐊᐸᒃᑯᓐᓄᑦ, ᑎᑎᖅᑐᒐᐃᑦ ᓴᓇᓐᖑᐊᒃᑲᓪᓗ ᑕᑯᑦᓴᐅᑎᑦᓱᑎᒃ ᓂᐅᕕᐊᑦᓴᐃᑦ. ᐊᒥᓱᑦ ᑭᓐᖓᕐᒥᐅᑦ ᓴᓇᐅᒐᖅᑏᑦ ᑕᑯᑦᓴᐅᑎᑦᓯᓯᒪᔪᑦ ᓴᓇᐅᒐᕐᒥᓂᒃ ᓄᓇᕐᔪᐊᕐᒥ ᑕᑯᑦᓴᐅᑎᑦᓯᔪᓄᑦ ᑕᑯᔭᒐᖃᕐᕕᓐᓄᓪᓗ.

ᐃᒃᐱᐊᕐᔪᒃ, (ᐃᓄᓕᒃ ᒥᑦᓵᓂ 760) ᖃᐅᔨᒪᔭᐅᔪᖅ ᐃᓄᓐᓄᑦ “ᐃᒃᐱᐊᕐᔪᒃ”, ᐊᕙᓗᔭᐅᒪᔪᖅ ᐱᖓᓱᓄᑦ ᐳᖅᑐᔪᓄᑦ ᐱᖓᓱᓄᑦ. ᐃᓂᖃᖅᑐᖅ ᐅᐊᓐᓇᖓᓂ ᕿᑭᖅᑖᓘᑉ, ᐱᐅᔪᒻᒪᕆᐊᓗᒃ ᑕᑯᕕᑦᓴᐅᑦᓱᓂ ᐊᓪᓚᓐᖑᐊᓂᒃ, ᐊᐃᕕᕐᓂᒃ, ᓇᑦᓯᕐᓂᒃ ᐊᒻᒪᓗ ᐊᓯᖏᓐᓂᒃ ᐳᐃᔨᓂᒃ. ᐃᒃᐱᐊᕐᔪᒃ ᑲᓲᒪᔪᖅ ᐅᔭᕆᓐᓂᐊᕐᕕᒻᒧᑦ ᓄᓇᓕᖏᓐᓄᑦ ᓇᓂᓯᕕᒃ ᐊᖅᑯᑎᑕᖃᖅᓱᓂ ᑕᑭᓂᓕᒻᒥᒃ 32 ᑭᓗᒦᑕᓂᒃ. ᓇᓂᓯᕕᒃ ᓄᓇᓕᕈᓚᐅᖅᓯᒪᔪᖅ 1970-ᖏᓐᓂ ᐃᑲᔪᖅᓯᒍᑕᐅᑦᓱᓂ ᑐᓚᑦᑕᕐᕕᒻᒧᑦ ᐅᔭᕋᓐᓂᐊᕐᕕᒻᒥ, ᒫᓐᓇᓗ ᒪᑐᕙᓪᓕᐊᓕᖅᓱᓂ.