ᑲᖏᖅᖠᓂᖅ (“ᐃᑎᔪᖅ ᑲᖏᖅᓱᖅ” ᐃᓄᑦᑎᑐᑦ) ᐱᓇᓱᐊᕐᕕᓐᓄᑦ ᐃᖏᕐᕋᔾᔪᑎᓄᓪᓗ ᑐᑦᑕᕐᕕᐅᔪᖅ ᑭᕙᓪᓕᕐᒥ ᐃᓄᖃᖅᓱᓂ ᐊᑖᓂ 2700. ᑲᖏᖅᖠᓂᖅ ᐊᖅᑯᑕᐅᕗᖅ ᓄᓇᕗᒻᒥ ᕿᑎᐊᓄᑦ ᐱᖓᓐᓇᖓᓄᓪᓗ ᑲᓇᑕᐅᑉ. ᐊᒥᓲᓂᖏᓐᓄᑦ ᐃᖏᕐᕋᔪᑦ ᑕᕝᕘᓇ, ᐊᒻᒪᓗ ᐱᐅᓯᐅᖃᑦᑕᖅᓯᒪᔪᑦ ᐊᕕᑦᑐᖅᓯᒪᔪᓂ ᒐᕙᒪᓄᑦ, ᐅᔭᕋᓐᓂᐊᓂᕐᒧᓪᓗ, ᑲᖏᖅᖠᓂᖅ ᐱᕙᓪᓕᐊᓯᒪᕗᖅ ᓴᓐᖏᔪᒻᒪᕆᓐᓂᒃ ᓇᒻᒥᓂᖅ ᐱᓇᓱᐊᖅᑎᖃᖅᓱᑎᒃ. ᐅᓯᔨᓂᒃ, ᓱᓇᒃᑯᑎᖃᖅᑎᑦᓯᔨᓂᒃ ᐊᒻᒪᓗ ᓅᑎᑦᓯᓖᑦ ᒪᓂᒪᑎᑦᓯᕙᑉᐳᑦ ᐳᓚᖃᑦᑎᓄᑦ ᑲᒻᒪᕆᐅᔪᓄᓪᓗ ᐱᓇᓱᐊᖃᑎᖃᕈᒪᔪᓄᑦ ᑲᓄᐃᑦᑐᑐᐃᓐᓇᖅᑎᒍᑦ ᐱᔨᑦᓯᕋᐅᑎᒃᑯᑦ.
ᐃᔨᕋᓕᒃ ᑰ ᒥᓐᖑᐃᕐᓯᕐᕕᒃ ᐅᐸᑦᑕᐅᒐᓐᓈᖑᕗᖅ ᐱᓱᕋᔮᑦᑎᓄᑦ, ᐃᖃᓗᓪᓕᓂᐊᖅᑎᓄᑦ, ᑎᒻᒥᐊᓂᓪᓗ ᑕᑯᓐᓇᖅᑎᓄᑦ. ᐃᑦᓴᕐᓂᑕᐃᑦ, ᓲᕐᓗ ᑕᕆᐅᑉ ᐊᑭᐊᓂᒃ ᐊᕐᕙᓂᐊᖅᑎᒥᓃᑦ ᐅᒥᐊᕐᔪᐊᒥᓂᖓᑦ ᓴᓂᐊᓂ Marble ᕿᑭᖅᑕᐅᑉ ᐊᒻᒪᓗ ᑐᓂᖅᑲᐃᑦ ᐃᔨᕋᓕᒃ ᑰᖓᓂ ᑕᑯᒍᑎᒋᕙᕗᑦ ᑕᐃᑦᓱᒪᓂ ᐊᑑᑎᖃᖅᑕᖅᓯᒪᔪᒻᒪᕆᐊᓗᓐᓂᒃ.

ᓴᓕ ᓂᒋᐊᓃᖅᑐᖅ ᓴᓪᓕᐅᑉ ᕿᑭᖅᑕᖓᑕ, ᐅᐊᓐᓇᖓᓂ ᑕᓯᐅᔭᕐᔪᐊᑉ. ᐃᓄᑦᑎᑐᑦ ᐊᑎᖓ ᓄᓇᓖᑦ ᓴᓪᓕᖅ, “ᓵᑦᑐᔮ ᕿᑭᖅᑕ ᓯᕗᕌᓂ ᓄᓇᐅᑉ,” ᖃᓪᓗᓈᑎᑐᑦ ᐊᑎᖓ ᑐᑭᖃᖅᑎᓪᓗᒍ ᓴᐅᓂᕈᖅᓯᒪᔪᑦ ᐃᒪᕐᒥᒃ ᐱᕈᖅᑐᐃᑦ ᑲᖏᖅᓱᖓᓂ.
ᓴᓪᓕᖅ ᐱᐅᓂᖅᐸᐅᖃᑕᐅᕗᖅ ᓄᓇᕗᒻᒥ ᓂᕐᔪᑎᓂᒃ ᑕᑯᒋᐊᕐᕕᒋᓗᒍ. ᖃᓂᑦᑐᖅ ᑐᔾᔮᑦ ᑕᖃᐃᕐᓯᕐᕕᐅᓲᖑᒻᒪᑦ ᐊᐃᕕᕋᓵᓗᓐᓄᑦ. ᒪᕐᕉᒃ ᑎᒻᒥᐊᖃᕐᕕᐅᑦᓱᑎᒃ, East Bay-ᒥ ᑐᓛᔪᓂᒃ ᑎᒻᒥᐊᖃᕐᕕᒃ ᐊᒻᒪᓗ Harry Gibbons ᑐᓛᔪᓂᒃ ᑎᒻᒥᐊᖃᕐᕕᒃ ᖃᐅᔨᒪᔭᐅᒻᒪᕆᑦᑐᑦ ᑎᒻᒥᐊᓂᒃ ᑕᐅᑐᒐᓱᐊᖅᑎᓄᑦ. ᐊᒥᓱᑦᑕᐅᓴᐃᑦ ᑲᖑᐃᑦ, ᐊᒻᒪᓗ ᓇᑎᕐᓇᕐᒥᐅᑦ ᖁᔾᔪᐃᑦ, ᖁᔾᔪᐃᑦ ᐊᒻᒪᓗ ᐊᓯᖏᑦ ᑎᒻᒥᐊᑦ ᑐᓛᕙᒻᒪᑕ ᐅᐱᕐᖔᒃᑯᑦ ᑕᒪᐅᖓ. ᓄᓇᓕᓐᓂ ᓅᑎᑦᓯᔩᑦ ᒪᓂᒪᑎᑦᓯᕙᑦᑐᑦ ᐅᒥᐊᒃᑯᑦ ᓅᑎᑦᓯᓂᕐᒥᒃ ᕿᒥᕐᖁᒋᐊᖅᑐᖅᓱᑎᒃ ᐆᒪᔪᕐᓂᒃ ᑖᕙᓂ.

ᐃᒡᓗᓕᒑᕐᔪᒃ ᐅᐊᓐᓇᖅᐸᓯᖓᓂ ᐱᖓᓐᓇᖅᐸᓯᖓᓃᑦᑐᖅ ᓯᓈᖓᓂ ᑕᓯᐅᔭᕐᔪᐊᑉ, ᐅᐊᓐᓇᖓᓂ ᑲᖏᖅᖠᓂᐅᑉ. ᐊᑎᑯᑐᖃᖓ ᐃᒡᓗᓕᒑᕐᔪᒃ, ᑐᑭᓕᒃ “ᓄᓇ ᐃᒡᓗᑕᕐᑳᕐᔪᑦᑐᖅ.”
ᐃᒡᓗᓕᒑᕐᔪᒃ, ᐃᓄᑐᖃᖅᓱᓂ 390-ᓂᒃ, ᑕᑯᓐᓇᖅᑕᐅᔪᖅ “ᓄᓇᓕᑐᖃᐅᓂᖅᐸᐅᒋᐊᖓ” ᐅᑭᐅᖅᑕᖅᑐᒥ, ᑖᕙᓐᖓᓂᑕᐅᑦᓱᓂ 1920-ᖏᓐᓂ. ᑭᓯᐊᓂᓕ, ᖃᓪᓗᓈᑦ ᐊᓪᓛᑦ ᑕᒪᐅᓐᖓᓚᐅᖅᑎᓐᓇᒋᑦ, ᓄᓇᓖᑦ ᐊᑯᓂᐊᓗᒃ ᓄᓇᒋᔭᐅᓯᒪᓕᖅᑐᒥᓂᖅ ᐃᒡᓗᓕᒑᕐᔪᒃ. ᐊᒥᐊᒃᑯᐃᑦ ᐃᓗᓕᖅᑐᔪᓂᒃ ᖃᕐᒪᒥᓂᕐᓂᒃ ᐱᑕᓕᒃ ᓯᓚᑖᓂ ᓄᓇᓖᑦ, ᐅᑉᐱᔭᐅᓪᓗᓂ ᐃᓄᖃᕐᓂᕆᐊᖓ ᐅᖓᑖᓃᑦᑐᓂᒃ 700 ᖃᓪᓗᓈᑦ ᑎᑭᓚᐅᖅᑎᓐᓇᒋᑦ. ᐅᓪᓗᒥ, ᐃᒡᓗᓕᒑᕐᔪᒃ ᐊᖅᑯᑎᑐᖃᖓ ᓇᓗᓇᐃᔭᐃᔪᖅ ᐱᐅᓯᐅᖃᑦᑕᖅᓯᒪᔪᒻᒪᕆᒻᒥᒃ ᑖᕙᓂᒐᓚᒃ. ᑐᑭᓯᒋᐊᒃᑲᓐᓂᕕᑦᓴᖅ ᐅᕙᓂ www.chesterfieldinlet.net.

ᖃᒪᓂᑦᑐᐊᖅ, ᓄᓇᒦᑦᑐᖅ, ᓯᕕᑐᓕᕐᓂᐊᓗᐊᓂ ᑏᓛᓐ ᑰᖓᑕ, ᑲᓂᑦᑑᑦᓴᓂ ᓄᓇᓐᖑᐊᖅᑎᒍᑦ ᕿᑎᖓᓄᑦ ᑲᓇᑕᐅᑉ. ᖃᒪᓂᑦᑐᐊᖅ (ᐃᓄᖏᑦ 1950) ᖃᐅᔨᒪᔭᐅᑦᓯᐊᖅᑐᖅ ᓴᓇᐅᒐᕐᓄᑦ ᓄᓇᓕᓐᓂ. ᓴᓇᐅᒐᕐᓂᕐᒧᑦ ᑎᑎᖅᑐᒐᕐᕖᓪᓗ ᖃᐅᔨᒪᔭᐅᑎᑦᓯᑲᓐᓂᕈᑕᐅᖅᓱᑎᒃ ᓄᓇᓕᓐᓂ ᓴᓇᐅᒐᕐᓂᒃ, ᓲᕐᓗ ᐃᓄᐃᑦ ᐃᑦᓴᕐᓂᑕᒃᑯᕕᖏᑦ, ᔨᐊᓯ ᐅᓇᖅ ᐱᓐᖑᐊᕐᕕᒃ, ᐊᒻᒪᓗ ᒪᑭᒪᑦᓯᐊᖅᑐᑦ ᐃᒻᒥᒃᑯᑦ ᓴᓇᐅᒐᕐᓂᒥᒃ ᑕᑯᔭᒐᖃᕐᕖᑦ, ᐃᑲᔪᖅᓯᒪᓪᓚᕆᑦᑐᑦ ᓄᓇᓕᓐᓂᒃ. ᓄᓇᒥᐅᑕᓕᕆᓂᕐᒧᑦ ᐊᐅᓚᓂᐅᔪᑦ ᐊᑦᑐᐃᓂᖃᓪᓚᕆᖑᓐᓇᕐᒥᔪᑦ ᖃᑭᒪᓇᓱᐊᕐᓂᕐᒥᒃ ᐱᕙᓪᓕᐊᓂᒃᑯᑦ ᖃᒪᓂᑦᑐᐊᕐᒥ. ᐱᕙᓪᓕᐊᒋᐊᒃᑲᓐᓂᕐᓂᐊᕐᒥᔪᖅ ᒪᑐᕚᖕᒃ ᒎᓗᓐᓂᐊᕐᕕᒻᒥ ᓴᖅᑮᒍᑕᐅᓯᒪᒌᖅᓱᓂ ᐊᒥᓱᓂᒃ ᓄᓇᓕᓐᓂ ᐃᖅᑲᓇᔭᐃᖅᑎᓂᒃ. ᑐᑭᓯᒋᐊᒃᑲᓐᓂᕈᒪᒍᑦᓯ ᖃᒪᓂᑦᑐᐊᑉ ᒥᑦᓵᓄᑦ, ᑕᑯᒋᐊᕈᒃ www.bakerlake.ca.

ᐊᑎᖓ ᐊᕐᕕᐊᑦ ᐱᓯᒪᔪᖅ ᐊᕐᕕᒻᒥᒃ, ᐃᓄᑦᑎᑐᑦ ᐊᑎᖓ ᐊᕐᕕᒃ. ᓄᓇᓖᑦ (ᐃᓄᖏᑦ 2500 ᒥᑦᓵᓃᑦᑐᑦ) ᐱᖓᓐᓇᖓᓃᑦᑐᑦ ᓯᓈᖓᑕ ᑕᓯᐅᔭᕐᔪᐊᑉ, ᐅᐊᓐᓇᖓᓂ ᑰᔾᔪᐊᕌᓗᒃ, ᒫᓂᑑᕙ. ᐊᕐᕕᐊᑦ ᓄᓇᖓ ᐃᒪᖏᓪᓗ ᐆᒪᔪᖃᑦᓯᐊᖅᑐᑦ. ᒪᑳᓄᓪ ᑰᖓᑕ ᑐᓛᔪᓄᑦ ᑎᒻᒥᐊᓄᑦ ᓇᔪᒐᖅ, ᓂᒋᐊᓂ ᓄᓇᓖᑦ, ᑕᑕᑦᑐᖅ ᐊᒥᓱᑦᑕᐅᓵᓗᓐᓂᒃ ᑎᒻᒥᐊᓂᒃ ᐃᒪᕐᒥᐅᑕᕐᓂᒃ. ᐅᑭᐊᒃᑯᑦ, ᕿᓚᓗᒐᐃᑦ ᑕᑯᔭᐅᒐᔪᑉᐸᒻᒥᔪᑦ ᑲᖏᖅᓱᖏᓐᓂ ᓄᓇᓖᑦ ᑐᑦᑐᐃᓪᓗ ᑕᑯᔭᐅᒐᔪᑉᐸᒻᒥᑦᓱᑎᒃ ᓄᓇᓖᑦ ᓴᓂᐊᓐᓂ. ᐊᕐᕕᐊᑦ ᐊᔾᔨᐅᓐᖏᑦᑐᖅ ᓄᓇᓖᑦ ᖃᐅᓕᒪᓂᖅ ᐊᒻᒪᓗ ᐊᑐᖅᑐᖁᑎᑎᒋᔭᐅᔪᑦ ᑲᔪᓯᑎᑕᐅᑦᓱᑎᒃ ᐊᑕᐅᓯᒃᑯᑦ ᖃᑭᒪᓇᓱᐊᕐᓂᒃᑯᑦ ᐃᖏᕐᕋᓂᖃᖅᓱᑎᒃ. ᐃᓄᑦᑎᑐᑦ ᐅᖃᐅᓯᖅ ᓴᓐᖏᔪᒻᒪᕆᐊᓗᒃ ᓄᓇᓕᓐᓂ.

ᓴᓂᑭᓗᐊᖅ (ᐃᓄᖏᑦ 812), ᓂᒋᖅᐸᓯᓐᓂᖅᐹᖅ ᓄᓇᓕᓐᓂ ᓄᓇᕗᒻᒥ, ᐃᓂᖃᖅᑐᖅ ᓴᓂᑭᓗᐊᕐᒥ ᑕᓯᐅᔭᕐᔪᐊᕐᒥ. ᓄᓇ ᐊᒥᓱᐊᓗᓐᓂᒃ ᐅᔭᕋᓇᓐᓂᒃ ᐃᓐᓈᕈᔮᖅᑕᓕᒃ ᑕᑭᓂᓕᓐᓂᒃ 50-155 ᒦᑕᓅᖓᔪᓂᒃ ᑕᕆᐅᑉ ᖁᓛᓂ. ᐊᒥᓱᑦ ᑖᒃᑯᐊ ᐃᓐᓈᕈᔮᑦ ᐅᓪᓗᖃᕐᕕᐅᕙᑦᑐᑦ ᒥᑎᕐᓄᑦ, ᓱᓗᖏᑦ (ᖁᓂᕈᖏᑦ) ᓄᐊᑕᐅᕙᑦᓱᑎᒃ ᐅᓪᓗᖏᓐᓂᒃ ᔭᐃᑲᓕᐊᖑᕙᑦᑐᑦ ᐊᓐᓄᕌᓕᐊᖑᕙᑦᓱᑎᒃ.
ᓴᓂᑭᓗᐊᕐᒥ ᓴᓇᓐᖑᐊᖅᑏᑦ ᖃᐅᔨᒪᔭᐅᔪᑦ ᓄᓇᕐᔪᐊᕐᒥ ᐊᔾᔨᐅᓐᖏᑦᑐᓂᒃ ᓴᓇᓐᖑᐊᒐᖃᕐᓂᖏᓐᓄᑦ, ᕿᓂᖅᑐᖅ ᓴᓇᓐᖑᐊᒐᑦᓴᖅ ᓴᓂᑭᓗᐊᕐᒥ.
ᑐᑭᓯᒋᐊᒃᑲᓐᓂᕈᒪᒍᑦᓯ ᓴᓂᑭᓗᐊᕐᒥ ᓴᓇᓐᖑᐊᖅᑏᑦ ᒥᑦᓴᐃᓐᓄᑦ ᐅᐸᒍᒥᓇᖅᑐᖏᓪᓗ, ᑕᑯᒋᐊᕆᑦ ᑯᐊᐸᒃᑯᑦ ᐃᑭᐊᖅᑎᖅᓯᒪᔭᖓᓐᓂᒃ ᐅᕙᓂ website at www.mitiq.com.

ᐊᐃᑉᐸᖓ ᖁᑦᓯᓂᖅᐸᐅᖃᑕᐅᔪᖅ ᓄᓇᓕᓐᓂ ᑲᓇᑕᒥ, ᖃᐅᓱᐃᑦᑐᖅ ᖁᑦᓯᑦᑐᒦᑦᑐᖅ ᓂᒋᖅᐸᓯᐊᓂ ᓯᓈᖓᑕ ᖃᐅᓱᐃᑦᑑᑉ ᕿᑭᖅᑕᖓᑕ. ᐊᖅᑯᑕᐅᑦᓱᓂ ᖁᑦᓯᑦᑐᒧᑦ, ᖃᐅᓱᐃᑦᑐᖅ (ᐃᓄᐃᑦ 257) ᓄᖅᑲᕐᕕᓪᓗᐊᑕᐅᔪᖅ ᐱᓱᒋᐊᖅᑐᐸᓪᓕᐊᔪᓄᑦ ᓄᓇᕐᔪᐊᑉ ᑲᔾᔨᖓᓄᑦ ᐊᒻᒪᓗ ᖁᑦᑎᓂᖅᐹᖅ ᒥᓐᖑᐃᕐᓯᕐᕕᒻᒧᑦ, ᑐᑦᑕᕐᕕᐅᑦᓱᓂ ᑐᑭᓯᓂᐊᖅᑕᐅᔪᓄᑦ ᖃᐅᔨᓴᕐᓂᕐᒧᑦ. ᓯᓚᓐᓂᐊᕐᕕᑦᑕᖃᕐᒥᔪᖅ ᐊᒻᒪᓗ ᖃᐅᔨᓴᖅᑎᓂᒃ ᐅᑭᐅᖅᑕᖅᑐᒥ ᓄᓇᓕᖏᓐᓂᒃ ᐃᓗᐊᓐᓂ ᓄᓇᓖᑦ. ᖃᐅᓱᐃᑦᑐᕐᒥ ᐱᐅᓯᐅᖃᑦᑕᖅᓯᒪᔪᖅ ᖃᓪᓗᓈᓂᒃ ᐊᑦᑐᐃᓯᒪᓂᖅᐸᐅᔪᖅ ᓄᓇᕗᒻᒥ ᓄᓇᓕᓕᒫᓂ. ᐃᓂᒋᔭᐅᔪᖅ ᑲᓱᕐᕕᐅᖃᑦᑕᖅᓯᒪᔪᖅ ᑕᓪᓕᕈᑎᐅᑉ ᐊᖅᑯᑎᖓᒎᕋᓱᐊᖅᑐᓄᑦ, ᑕᕆᐅᑉ ᐊᑭᐊᓄᑦ ᐊᖅᑯᑕᐅᓂᕋᖅᑕᐅᓯᒪᔪᖅ ᑕᕆᐅᑉ ᐊᑭᐊᓂᒥᐅᓄᑦ ᕿᒥᕐᕈᔨᓄᑦ ᑖᕙᓂ 1800-ᖏᓐᓂ 1900-ᖏᓐᓂᓗ. ᓄᓇᓖᑦ ᐊᑦᓯᖅᑕᐅᓯᒪᔪᑦ ᑭᖑᓂᖓᓂ HMS Resolute, ᑯᐃᓐ ᓄᓇᖓᓂᔭ ᐅᒥᐊᕐᔪᐊᖅ ᕿᓂᓚᐅᖅᓯᒪᔪᖅ ᔭᒐᓯᒪᔪᓂᒃ ᕗᕌᖕᑲᓚᓐᑯᓐᓂᒃ.

ᕿᑭᖅᑕᖅᔪᐊᖅ, ᕗᕋᐅᑕᓐ ᐊᐃᓚᓐ-ᖑᓚᐅᖅᓯᒪᔪᖅ, ᑲᓇᓐᓇᖓᓃᑦᑐᖅ ᓯᓈᖓᑕ ᕿᑭᖅᑖᓘᑉ 97 ᑭᓗᒦᑕᓂᒃ ᐅᖓᓯᓐᓂᖃᖅᓱᓂ ᐅᑭᐅᖅᑕᖅᑑᑉ ᓇᓗᓇᐃᒃᑯᑕᖓᓂᒃ. ᕿᑭᖅᑕ ᑕᐃᔭᐅᕙᒃᑲᓗᐊᖅᓱᓂ “ᕿᑭᖅᑕᖅᔪᐊᖅ” ᐃᓄᒃᑎᑐᑦ ᐊᑎᖓ ᐅᖃᕐᒪᑦ, ᕿᑭᖅᑕᖅ ᐊᖏᓂᓕᒃ 12 ᑭᓗᒦᑕᓂᒃ ᓴᓂᒧᑦ ᐊᒻᒪᓗ 16 ᑭᓗᒦᑕᓂᒃ ᑐᑭᒧᑦ.
ᐱᖅᑯᓯᖅᑎᒎᕐᓂᖅᓴᐅᔪᑦ ᓄᓇᓕᖏᑦ ᓄᓇᕗᒻᒥ, ᕿᑭᖅᑕᕐᔪᐊᖅ, (ᐃᓄᖏᑦ 561) ᖃᐅᔨᒪᔭᐅᔪᖅ ᐃᓄᓕᖅᑕᓄᑦ ᐅᓪᓗᒥᓯᐅᑎᓄᓪᓗ ᐊᓐᓄᕌᓄᑦ, ᐱᖃᓯᐅᑎᑦᓱᑎᒃ ᕿᓯᕋᔭᐃᑦ ᐊᑎᒌᑦ ᑲᒦᓪᓗ. ᐆᒪᔪᕋᓴᖏᑦ ᖃᔾᔮᓇᕐᓂᖓᓗ ᐅᐸᒍᒪᒍᑕᐅᓲᖅ ᕿᑭᖅᑕᕐᔪᐊᕐᒥᒃ.

ᐅᑭᐅᖅᑕᖅᑐᒥ ᐊᖅᑯᑎ ᓄᓇᕐᔪᐊᕐᒥ ᖃᐅᔨᒪᔭᐅᔪᖅ ᐊᐅᔪᐃᑦᑐᖅ ᒥᓐᖑᐃᕐᓯᕐᕕᒃ ᐅᐸᒐᑦᓴᐅᔪᖅ ᕿᑭᖅᑕᕐᔪᐊᒃᑯᑦ. ᕿᑭᖅᑕᖅᔪᐊᖅ ᖃᐅᔨᒪᔭᐅᔪᖅ “ᐱᖃᓗᔭᓄᑦ ᐊᖅᑲᐅᒪᓂᕐᒧᓪᓗ ᑐᑦᑕᕐᕕᖓ ᓄᓇᕗᑦ.”

ᒥᑦᑎᒪᑕᓕᒃ ᐃᓂᖃᖅᑐᖅ ᐅᐊᓐᓇᖅᐸᓯᖓᓂ ᑲᓇᓐᓇᖅᐸᓯᒻᒥ ᓯᓈᖓᓂ ᕿᑭᖅᑖᓘᑉ, ᐊᑭᐊᓂ ᒥᑦᑕᒪᑕᓕᐅᑉ ᕿᑭᖅᑕᖓᑕ. ᖃᐅᔨᒪᔭᐅᔪᖅ ᐃᓄᓐᓄᑦ ᒥᑦᑎᒪᑕᓕᒃ, “ᒥᑦᑎᒪᐅᑉ ᐃᓗᕕᖃᕐᕕᖓ.” ᐊᑎᖓ ᑕᕝᕙᐅᖏᓐᓇᕋᓗᐊᖅᓱᓂ, ᑭᓇᐅᓂᖓ ᒥᑦᑎᒪᐅᑉ ᖃᐅᔨᒪᔭᐅᓐᖏᑦᑐᖅ ᐅᓪᓗᒥᒧᑦ ᒥᑦᑎᒪᑕᓕᒻᒥᐅᓄᑦ.
ᒥᑦᑎᒪᑕᓕᒃ, ᓄᓇᒋᔭᐅᔪᖅ 1500 ᐊᑖᓃᑦᑐᓄᑦ ᐃᓄᓐᓄᑦ, ᓄᓇᕗᒻᒥ ᓱᓇᑐᐃᓐᓇᖅᑕᖃᓪᓚᕆᑉᐳᖅ. ᑲᔾᔮᓇᖅᑐᒻᒪᕆᐅᑦᓱᓂ ᐃᓐᓈᕈᐃᑦ, ᐊᐅᔪᐃᑦᑐᐃᑦ, ᐱᖃᓗᔭᐃᓪᓗ ᐊᒥᓱᐊᓗᓐᓄᑦ ᐳᓚᕋᑦᑎᓄᑦ ᐅᐸᒍᒥᓇᖅᑐᕆᔭᐅᕙᑉᐳᑦ ᓄᓇᕐᔪᐊᓕᒫᒥᒃ. ᐃᓚᒋᔭᐅᓪᓗᓂ ᒐᕙᒪᒃᑯᑦ ᓄᓇᕗᒻᒥ ᓯᐊᒻᒪᖅᑎᕆᓂᕐᒧᑦ ᐅᐸᓗᖓᐃᔭᐅᑎᖏᓐᓄᑦ ᓴᖅᑮᒍᑕᐅᓪᓗᓂ ᐃᖅᑲᓇᐃᔮᓂᒃ ᓄᓇᕗᒻᒥ, ᒥᑦᑕᒪᓕᒃ ᒫᓐᓇ ᕿᑭᖅᑖᓗᒻᒥ ᑐᑦᑕᕐᕕᐅᔪᖅ ᒥᓂᔅᑕᐅᕕᖓᓐᓄᑦ ᐱᕙᓪᓕᐊᔪᓕᕆᔨᒃᑯᑦ ᐃᖏᕐᕋᔪᓕᕆᔨᒃᑯᓪᓗ. ᓄᓇᓖᑦ ᑕᑯᓐᓇᐸᑦᑐᑦ ᐱᕈᖅᐸᓪᓕᐊᒍᑎᖏᓐᓂᒃ ᒐᕙᒪᐅᑉ, ᐳᓚᕋᑦᑐᓕᕆᓂᐅᑉ ᐱᓇᓱᐊᕐᓂᐅᓪᓗ ᑲᒪᒋᔭᖃᖅᓱᑎᒃ ᓴᓇᐅᒐᕐᓂᒃ ᐊᒻᒪᓗ ᐊᖑᓇᓱᖃᑦᑕᕐᓂᕐᒥᒃ ᓯᕗᓂᑦᑎᓐᓂ ᖃᑭᒪᓇᓱᐊᕐᓂᐅᑉ ᐱᕈᖅᐸᓪᓕᐊᓂᖓᓄᑦ.

ᐊᑖᓃᑦᓱᓂ ᐃᓐᓈᕉᑉ, ᐹᖓᓂ ᑰᑉ ᐊᕙᓗᔭᐅᒪᑦᓱᓂᓗ ᑲᔾᔮᓇᖅᑐᐊᓗᓐᓄᑦ ᐃᓐᓈᕈᕐᓄᑦ, ᐸᓐᓂᖅᑑᖅ ᕿᑭᖅᑖᓘᒻᒦᑦᑐᖅ, ᐸᓐᓂᖅᑑᑉ ᐃᑭᕋᓴᖓᓂ. ᖃᐅᔨᒪᔭᐅᔪᖅ ᑲᔾᔮᖅᑎᓄᑦ ᐊᓃᖅᑎᓄᓪᓗ ᐊᑯᖅᑕᐅᒋᐊᖓ ᖃᐅᔨᒪᔭᐅᔪᒻᒪᕆᒻᒧᑦ ᐊᐅᔪᐃᑦᑐᖅ ᒥᓐᖑᐃᕐᓯᕐᕕᒻᒥᒃ, ᓄᓇᓖᑦ ᓄᓇᓕᒋᔭᐅᔪᑦ ᐊᑖᓃᑦᑐᓄᑦ 1500 ᐃᓄᐃᑦ.
ᐸᓐᓂᖅᑑᖅ ᖃᐅᔨᒪᔭᐅᔪᖅ ᓴᓇᐅᒐᖏᓐᓂᑦ ᐊᒻᒪᓗ ᐅᐸᒍᒥᓇᖅᑐᕆᔭᐅᓪᓚᕆᑦᓱᓂ ᐅᖅᑯᕐᒥᐅᑦ ᓴᓇᕕᖓᑦ. ᐅᖅᑯᒥᐅᑦ ᓴᓇᐅᒐᖅᑎᓄᑦ ᑲᑐᔾᔨᖃᑎᒌᖑᕗᑦ ᑲᒪᕙᑦᓱᑎᒃ ᑎᑎᖅᑐᒐᕐᓂᒃ ᓄᕕᖅᓵᑦᓴᓂᓪᓗ ᓴᓐᓇᕕᓐᓂᒃ, ᓴᓇᕙᑦᓱᑎᒃ ᐱᐅᔪᒻᒪᕆᐊᓗᓐᓂᒃ ᓄᕕᐅᖅᑲᖅᓯᒪᔪᓂᒃ ᓄᕕᖅᓵᑦᓴᓂᒃ ᑎᑎᖅᑐᒐᕐᓂᓪᓗ. ᖃᐅᔨᒪᔭᐅᔪᒻᒪᕆᐅᔪᑦ “ᐸᓐᓂᖅᑑᑉ” ᓇᓴᖏᑦ, ᑕᖅᓴᖃᐅᖅᓱᑎᒃ ᓂᑦᓯᑕᖅᓯᒪᔪᑦ ᓇᓴᐃᑦ ᓴᓇᐅᔭᐅᒪᔪᑦ ᓄᓇᓕᓐᓂ ᓴᓇᔨᓄᑦ, ᓂᐅᕕᐊᖑᒍᓐᓇᕐᒥᔪᑦ ᐅᖅᑯᕐᒥᐅᓂᒃ.