“ᑕᒪᓐᓇᑐᑦ ᑲᑕᒐᖅᓯᒪᔪᖅ ᑕᕆᐅᑉ ᓯᑯᖓᓄᑦ ᑕᓯᐊᕋᕐᓄᓪᓗ ᖃᐅᔨᓴᖅᑕᐅᓚᐅᕐᓕ. ᐅᖅᓱᕈᔪᓪᓚᑦᓯᐊᕆᒃ.”

“ᑰᓪᓚᕆᐊᓘᕙᔪᔪᑦ ᑕᐃᑦᓱᒪᓂ ᒫᓐᓇ ᑰᒐᓛᑐᐃᓐᓇᓕᖅᑐᑦ. ᑰᔾᔪᐊᖑᕙᔪᔪᑦ ᒫᓐᓇ ᑰᑐᐃᓐᓇᐅᓕᖅᑐᑦ. ᑰᓐᓂᖓ ᓄᖅᑲᐅᓯᒪᔪᖅ.”

“ᐊᓄᕆ ᐊᓯᔾᔨᖅᓯᒪᓗᐊᖅᑑᔮᓐᖏᑦᑐᖅ, ᓴᓐᖏᓂᖅᓴᓂᒃ ᐊᓄᕆᓯᐅᖅᐸᓕᕋᓱᐊᖅᓱᑕ ᑲᓇᓐᓇᒥᒃ. ᐊᓄᕆᔪᐹᓘᖃᑦᑕᖅᓯᒪᔪᒍᑦ ᐃᓚᖓᓂ. ᐃᓚᖓᓂ ᐊᓄᕆᓕᓲᖑᓕᖅᑐᒍᑦ ᓂᕆᐅᓇᓐᖏᑦᑐᒥᒃ ᐊᓪᓛᑦ ᐊᓄᕆᒋᐊᖃᖅᓯᒪᓐᖏᒃᑲᓗᐊᕐᒪᑦ.

“1990-ᖏᓐᓂ ᐊᐅᔪᐃᑦᑐᐃᑦ ᐊᐅᑉᐸᓪᓕᐊᓕᔪᔪᑦ, ᐅᔭᖅᑲᑦ ᑕᑯᑦᓴᐅᓂᖅᓴᐅᓕᖅᓱᑎᒃ. ᑕᑯᑦᓴᓪᓚᕆᐅᔪᖅ ᓯᑯ ᐊᐅᑉᐸᓪᓕᐊᔪᖅ ᐊᐅᔪᐃᑦᑑᑉ ᐊᑭᐊᓂ ᕿᑭᖅᑕᒥ. ᐊᖅᑯᑎ ᐊᑐᖅᐸᔪᔭᕗᑦ ᔪᕇᑲᒧᑦ ᐊᐅᑉᐸᓪᓕᐊᔪᖅ ᐅᔭᖅᑲᓪᓗ ᓴᖅᑭᐸᓪᓕᐊᑐᐃᓐᓇᖅᓱᑎᒃ.”

“ᐊᐳᑎ ᑕᕆᐅᕐᓗ ᑲᑎᑉᐸᒻᒪᑎᒃ ᖁᐊᓕᕋᐃᒻᒪᑦ ᑕᐃᕙᑦᓱᑎᓪᓗᒍ ᐳᓐᓂᕈᔪᒻᒥᒃ, ᑕᐃᒪᐃᓐᓂᖓᓄᑦ ᓱᕋᓴᕋᐃᑦᑑᓕᖅᑐᖅ. ᑕᐃᒫᒃ ᑲᑎᑦᑎᓪᓗᒋᑦ ᓄᐊᓐᓂᐊᖅᑐᖅ ᐊᑖᓄᑦ ᐊᓄᕆᓯᐅᕋᓂ ᓄᓇᒧᑦ.”

“ᖃᓄᐃᓐᓂᐅᔪᖅ ᐅᓪᓗᒥ ᖁᐊᓪᓚᕆᐊᓘᔮᖅᑐᖅ ᑭᓯᐊᓂ ᐊᕿᑦᑐᖅ. ᐱᐊᑦᑑᒍᓐᓃᖅᓱᓂᓗ ᖁᐊᓪᓚᕆᐅᓐᖏᒧᑦ. ᑕᖅᓴᖏᑦ ᓄᑦᑕᐃᑦ ᓯᑯᐊᕐᒥ ᖃᑯᕐᓂᖅᓴᐅᓕᖅᑐᑦ ᐅᓪᓗᒥ ᑐᖑᔪᖅᐸᔪᒐᓗᐊᖅᓱᑎᒃ. ᓯᑯᕙᓪᓕᐊᓂᖅ ᐊᔾᔨᒋᕙᒍᓐᓃᖅᑕᖓ ᐅᓪᓗᒥ ᐃᒻᒪᖃ ᓯᑯᐊᖅ ᓄᑦᑕᕐᓂᖓᓄᑦ. ᖃᓄᐃᓐᓂᕆᔭᖏᑦ ᓯᑯᐃᑦ ᐊᔾᔨᒋᒍᓐᓃᖅᑕᖓ, ᐱᔭᕆᐊᑐᓂᖅᓴᐅᓕᖅᓱᓂ ᕐᑳᖏᕆᐊᖓ. ᑕᐃᑦᓱᒪᓂ ᐱᐊᑉᐸᔪᔫᒐᓗᐊᖅ ᖃᒧᑎᑦᑎᓐᓄᑦ ᐱᔭᕆᐊᑭᓚᕿᒻᒪᕆᓕᖅᓱᑎᒃ ᖃᒧᑎᕗᑦ.”

“ᐱᕈᖅᐸᓪᓕᐊᓕᓚᐅᖅᓯᒪᒐᒪᓂᑦ ᒫᓐᓇᒧᓄᑦ ᑐᑦᑐᒥᓂᖅᑐᖏᓐᓇᖅᑐᖓ. ᖃᐅᔨᒪᔪᖓ ᖃᓄᐃᑦᑐᒋᐊᖃᕐᒪᖔᖅ ᓂᕿᖓ ᖃᓄᐃᓐᓂᖓᓗ ᑐᑦᑑᑉ. ᑕᑯᓐᓇᖅᓱᒋᑦ ᑕᐃᑦᓱᒪᓂ ᐊᒻᒪᓗ ᐅᓪᓗᒥ ᑐᑦᑐᐃᑦ ᐱᔭᐅᔪᑦ ᖃᓄᐃᓐᓂᖅᓴᐅᖃᑦᑕᓕᖅᑐᑦ. ᐊᒥᓱᑎᒍᑦ, ᐊᒥᕐᓗᑎᓱᑎᒃ ᐊᕙᑎᖏᑦ, ᓇᓗᓇᖏᑦᑑᒐᔪᑦᓱᑎᒃ ᐋᓐᓂᐊᖏᑦ - ᐃᒻᒪᑦᓯᒪᔪᑦ ᐊᕙᑎᖏᑦ ᐋᓐᓂᐊᖃᖅᓱᑎᓪᓘᓐᓃᑦ ᓇᒡᒍᐊᖏᑦ. ᑕᒪᓐᓇ ᐊᑑᑎᒐᔪᓐᓂᖅᓴᖅᔫᔮᓕᖅᑐᖅ ᑕᐃᑦᓱᒪᓂᒥᒃ.”

“ᓯᑦᑕᑦᓯᒪᔪᒥ ᐊᐳᑎᒥ ᐱᔭᕆᐊᑐᔪᐹᓗᒃ, ᑐᑦᑐᐃᓪᓗ ᓂᕆᑦᓯᐊᖃᑦᑕᐸᓪᓚᐃᖏᒻᒪᑕ ᓴᒡᒐᕆᐊᖃᕐᓂᑯᒥᓄᑦ ᓂᕿᒥᓂᒃ. ᑐᑦᑐᐃᑦ ᓂᕆᑦᓯᐊᕋᔭᓐᖏᑦᑐᑦ.”

“ᑕᑯᓯᒪᔪᖓ ᒪᒃᑯᑦᑑᑦᓱᖓ, ᐊᖑᓇᓱᑦᑎᐅᓪᓗᖓ, ᐱᓗᐊᖅᑐᒥᒃ ᐅᑭᐅᖑᑎᓪᓗᒍ, ᓯᓚ ᐊᓯᔾᔨᓪᓚᕆᖃᑦᑕᖅᓯᖅᒪᓕᖅᑐᖅ ᐅᑭᐅᒃᑯᑦ. ᐃᒃᑮᓇᖅᑐᐊᓗᒃ ᑭᖑᓂᖓᒍᑦ ᓂᕈᒥᑦᓯᕙᑦᓱᓂ.”

“ᑕᐃᑦᓱᒪᓂᒋᐊᖅ ᐊᖑᓇᓱᑦᑏᑦ ᖃᐅᔨᒪᖃᑦᑕᔪᒧᑦ ᔫᓂᐅᑎᓪᓗᒍ ᔪᓚᐃᒥᓗ, ᐅᖅᑰᓇᖅᑎᓪᓗᒋᑦ ᑕᖅᑮᑦ - ᓄᓇᓕᐊᕈᕕᑦ ᐅᖅᑰᓯᕙᓪᓕᐊᑐᐃᓐᓇᖅᓱᓂ, ᐊᒻᒪᓗ ᐆᒪᔪᐃᑦ ᖃᓄᐃᑦᑐᐊᐱᐅᒐᓛᒐᑎᒃ. ᐸᖓᓕᕋᓕᒻᒪᑕ ᕿᒫᑦᓱᑎᒃ ᑯᒪᓐᓂᒃ ᐊᒻᒪᓗ ᓂᕆᑦᓯᐊᖃᑦᑕᕋᑎᒃ. ᐅᖅᑰᓗᐊᖅᑐᑦ ᐃᓚᖓᓂᓗ ᓴᓪᓗᐊᓘᑦᓱᑎᒃ ᓴᐅᓂᑐᐃᓐᓇᐅᕙᑦᓱᑎᒃ. ᐊᖑᓇᓱᑦᑎᒻᒪᕇᑦ ᐊᖑᓇᓱᒋᐊᖅᐸᔪᔪᑦ ᓴᕐᕙᓄᑦ ᑐᑦᑐᐃᑦ ᑐᓐᓂᓕᐊᐱᐅᑦᓱᑎᒃ ᐅᑭᐊᓕᑕᖅᑎᑐᑦ. ᑕᐅᓄᖓ ᐊᖑᓇᓱᒋᐊᕈᕕᑦ ᑐᑦᑐᓯᐅᕆᐊᕐᓗᑎᒃ ᖃᓄᐃᓐᖏᑦᑐᐊᐱᐅᕙᒍᓐᓃᕐᒥᔪᑦ ᑕᐃᒪᐃᑉᐸᔪᒐᒥᒃ.