“ᓯᑯᖃᑦᑕᓚᑦᓯᐊᕆᑉᐸᓪᓕᐊᑐᐃᓐᓇᖅᑐᖅ ᑭᖑᕙᖅᐸᓪᓕᐊᔪᒥᒃ ᐊᕐᕌᒍᑕᒫᑦ ᓯᓚ ᑕᐃᒪᐃᑦᓴᐃᓐᓇᖅᑑᔮᖅᐸᓕᖅᓱᓂ ᐅᑭᐊᒃᑯᑦ ᐊᑯᓂᐊᓗᒃ. ᑕᒪᓐᓇ ᖃᐅᔨᒪᔭᕋ ᑎᑭᐅᑎᓇᖅᓯᒻᒪᑦ ᖁᐊᒃᕐᓇᐅᒐᔪᓲᒧᑦ, ᑕᓰᑦ ᖁᐊᖅᐸᔪᒧᑦ. ᑕᒃᑯᓇᓂ ᐊᕐᕌᒍᓂ ᐊᓂᒍᖅᑐᓂ ᑕᓰᑦ ᖁᐊᖃᑦᑕᖅᓯᒪᓐᖏᑦᑐᑦ ᖁᐊᕐᕕᒋᕙᔪᔭᒥᓂ ᓯᓚ ᑕᐃᒪᐃᑦᓯᐊᖅᐸᒍᓐᓃᕐᒪᑦ.”

“ᐅᑭᐅᒃᑯᑦ ᐸᑐᑉᐸᔪᔪᖅ ᐃᒃᑮᓇᖅᓯᕖᓐᖓᕋᐃᒻᒪᑦ, ᐅᖓᑖᓂ -40. ᑕᒪᓐᓇ ᐊᑑᓗᐊᖅᐸᒍᓐᓃᖅᑐᖅ. ᐊᑑᑎᒐᔪᑉᐸᔪᔪᖅ ᔮᓐᓄᐊᕆᒥ ᕕᕗᐊᕆᒥᓗ. ᐊᓄᕆᓗᐊᕈᓐᓃᕋᐃᒻᒪᑦ, ᐃᒃᑮᓇᖅᑐᖅ ᐸᑐᒍᑕᐅᓯᕙᔪᔪᖅ. ᑕᐃᒫᑎᒋᐊᓗᒃ ᐃᒃᑮᓇᖅᐸᒍᓐᓃᖅᑐᖅ ᐃᖃᓗᓐᓂ, ᑕᐃᒫᑎᒋᐊᓗᒃ ᐃᒃᑮᓇᑯᑖᑉᐸᔪᒻᒪᑦ.”

“ᐊᐳᑎ ᓯᑎᔪᐹᓘᓕᖅᑐᖅ ᒫᓐᓇ. ᓯᑎᔫᔮᖅᐸᔪᓐᖏᑦᑑᒐᓗᐊᖅ, ᓈᓐᖑᐊᖏᓐᓇᒐᓚᐅᕙᔪᔪᑦ. ᐊᒻᒪᓗ ᐊᐳᑏᑦ ᓇᐃᐱᒐᔭᖅᑑᔮᖅᑕᑎᑦ ᐊᐳᑎᐅᑉ ᐊᑖᓂ, ᐳᑲᔮᒃ, ᐱᑕᖃᖅᑑᔮᕈᓐᓃᖅᑐᑦ. ᐃᒻᒪᖃ ᐊᓄᕆᔪᑦ ᑕᐃᒪᐃᑕᐅᔪᖅ. ᐃᓚᖓᓂ ᓇᐃᐱᑦᓯᓲᖑᒐᓗᐊᖅᓱᑕ ᐳᑲᔮᒻᒥᒃ, ᑕᐃᒪᐃᑦᑐᓴᐃᓐᓇᒍᓐᓃᖅᑐᑦ. ᐃᓘᓐᓈᒍᑦ, ᓇᐃᐱᑕᑦᓴᐅᔪᑦ ᐊᓄᕆᓕᒻᒥ, ᑭᓯᐊᓂᑦᑕᐅᖅ ᐃᓚᖏᑦ ᓴᐳᔾᔨᒍᑕᐅᔪᑦ. ᐳᑲᔮᑦᑕᖃᑦᓯᐊᕈᓐᓃᖅᑐᖅ.

“ᑕᕆᐅᑉ ᓯᑯᖓ ᐊᓯᔾᔨᓪᓚᕆᑦᓯᒪᔪᖅ, ᐊᑦᓱᐊᓗᒃ. ᐃᖅᑲᐅᒪᔪᖓ (ᒪᒃᑯᑦᓱᖓ) ᓯᑯᖃᖅᐸᔪᒐᓗᐊᕐᒪᑦ ᔪᓚᐃᒧᓄᑦ. ᓯᑯᓕᕇᕐᒥᑦᓱᓂᓗ ᑕᖅᑮᒃ ᒪᕐᕉᒃ ᐊᓂᒍᕐᒪᑎᒃ. ᐃᒃᑮᓇᖅᓯᕙᔪᔪᖅ ᐊᓪᓛᑦ ᓅᕙᐃᕝᕙᕈᓚᐅᖅᑎᓐᓇᓚᒍ. ᐃᖅᑲᐅᓚᖓ ᓯᑯᖃᖅᐸᔪᒧᖅ, ᐃᔾᔪᔪᐊᓗᒻᒥᒃ ᓯᑯᕙᑦᓱᓂ ᓅᕙᐃᕝᕙᒥ. ᓯᕗᓪᓕᖅᐹᒥ ᐱᓇᓱᐊᕈᓯᓂᖓ ᓅᕙᐃᕝᕙᒥ, ᓯᑯ ᐊᑐᕋᑦᓴᐅᓕᖅᐸᔪᔪᖅ ᓇᒧᑐᐃᓐᓈᖅᓱᑕ. ᐊᐳᑎᓕᐹᓘᓕᖅᓱᓂᓗ ᓄᓇ, ᓯᑯ ᓯᑯᓚᐅᖅᑎᓐᓇᒍ.

“ᑕᒪᓐᓇᑐᑦ ᑲᑕᒐᖅᓯᒪᔪᖅ ᑕᕆᐅᑉ ᓯᑯᖓᓄᑦ ᑕᓯᐊᕋᕐᓄᓪᓗ ᖃᐅᔨᓴᖅᑕᐅᓚᐅᕐᓕ. ᐅᖅᓱᕈᔪᓪᓚᑦᓯᐊᕆᒃ.”

“ᑰᓪᓚᕆᐊᓘᕙᔪᔪᑦ ᑕᐃᑦᓱᒪᓂ ᒫᓐᓇ ᑰᒐᓛᑐᐃᓐᓇᓕᖅᑐᑦ. ᑰᔾᔪᐊᖑᕙᔪᔪᑦ ᒫᓐᓇ ᑰᑐᐃᓐᓇᐅᓕᖅᑐᑦ. ᑰᓐᓂᖓ ᓄᖅᑲᐅᓯᒪᔪᖅ.”

“ᐊᓄᕆ ᐊᓯᔾᔨᖅᓯᒪᓗᐊᖅᑑᔮᓐᖏᑦᑐᖅ, ᓴᓐᖏᓂᖅᓴᓂᒃ ᐊᓄᕆᓯᐅᖅᐸᓕᕋᓱᐊᖅᓱᑕ ᑲᓇᓐᓇᒥᒃ. ᐊᓄᕆᔪᐹᓘᖃᑦᑕᖅᓯᒪᔪᒍᑦ ᐃᓚᖓᓂ. ᐃᓚᖓᓂ ᐊᓄᕆᓕᓲᖑᓕᖅᑐᒍᑦ ᓂᕆᐅᓇᓐᖏᑦᑐᒥᒃ ᐊᓪᓛᑦ ᐊᓄᕆᒋᐊᖃᖅᓯᒪᓐᖏᒃᑲᓗᐊᕐᒪᑦ.

“1990-ᖏᓐᓂ ᐊᐅᔪᐃᑦᑐᐃᑦ ᐊᐅᑉᐸᓪᓕᐊᓕᔪᔪᑦ, ᐅᔭᖅᑲᑦ ᑕᑯᑦᓴᐅᓂᖅᓴᐅᓕᖅᓱᑎᒃ. ᑕᑯᑦᓴᓪᓚᕆᐅᔪᖅ ᓯᑯ ᐊᐅᑉᐸᓪᓕᐊᔪᖅ ᐊᐅᔪᐃᑦᑑᑉ ᐊᑭᐊᓂ ᕿᑭᖅᑕᒥ. ᐊᖅᑯᑎ ᐊᑐᖅᐸᔪᔭᕗᑦ ᔪᕇᑲᒧᑦ ᐊᐅᑉᐸᓪᓕᐊᔪᖅ ᐅᔭᖅᑲᓪᓗ ᓴᖅᑭᐸᓪᓕᐊᑐᐃᓐᓇᖅᓱᑎᒃ.”