“ᐊᒥᓱᐊᓗᓐᓂᒃ ᑕᑯᖃᑦᑕᖅᓯᒪᓕᖅᑐᒍᑦ ᓲᕐᓗ ᕿᓚ ᓄᕗᔭᐃᓐᓇᒐᓚᑦᑐᐊᓘᓕᖅᑐᖅ. ᓄᕗᔭᐃᑦ, ᐳᔪᕈᔪᓪᓘᓐᓃᑦ” ᖃᑯᖏᓐᓇᖃᑦᑕᖅᑐᖅ ᑕᑯᑦᓴᐅᑦᓯᐊᕋᓂᓗ ᓄᓇ. ᐊᓪᓚᕿᔪᐊᐱᐅᖃᑦᑕᕈᓐᓃᖅᑐᖅ ᑕᑯᑦᓴᐅᑦᓯᐊᕐᓗᓂ. ᐅᖃᐅᓯᑐᖃᖅ ᐳᔪᕋᖅᑐᖅ - ᐊᑦᓱᐊᓗᒃ ᐳᔪᕋᖃᑦᑕᓕᖅᑐᖅ. ᐃᕿᕆᐊᓐᖏᑦᑐᖅ (ᐳᔪᖅ ᐃᑯᐊᓚᔪᒥᒃ) ᐱᑕᓕᐹᓗᒃ ᐅᓪᓗᒥ. ᐊᓪᓚᕿᒐᐃᒐᓗᐊᕐᒪᑦ ᐊᓪᓛᑦ. ᐳᔪᕆᐊᖃᑦᑕᖅᑐᖅ ᐊᓪᓚᕿᒐᓗᐊᕐᒪᑦ.
ᐊᖏᕐᕋᖃᖅᓱᑕ ᐃᒡᓗᒥ, ᐃᒡᓗᖃᖅᐸᔪᖓᑦᑕ ᑕᓯᐅᑉ ᓴᓂᐊᓂ. ᓯᑯᓗ ᓄᑦᑖᕙᓗᐃᓐᓇᖅᓱᓂ. ᓄᖅᑲᕈᓐᓇᕋᓂ ᓂᐱᓕᐹᓘᑦᓱᓂ ᓲᕐᓗ ᑲᓪᓕᕐᕙᓗᒃ. ᑐᓴᖅᓴᐅᓲᖑᒍᓐᓃᖅᑐᖅ. ᐊᑑᑎᓚᐅᓱᖓᓲᖑᕙᓪᓚᐃᔫᒐᓗᐊᖅ ᑭᓯᐊᓂ ᐊᕐᕌᒍᓂ ᐊᓂᒍᖅᑐᓂ ᑐᓴᖅᓴᐅᖏᓐᓇᖅᐸᔪᔪᖅ.”
“ᐱᕈᖅᐸᓪᓕᐊᑎᓪᓗᖓ ᐊᑖᑕᒐ ᑕᒡᔭᖅᐸᔪᔪᖅ (ᓄᓇᓕᐊᖅᓱᓂ) ᐃᑳᕆᐊᖃᖅᓱᓂᓗ ᑰᓐᓂᒃ ᑰᒐᓛᓐᓂᓪᓗ. ᑖᒃᑯᐊ ᐸᓂᖅᓯᒪᓕᖅᑐᑦ. ᑖᕗᖓᔪᒐᑦᑕ ᐊᕐᕌᒍᐃᑦ ᖃᑦᓯᒐᓛᑦ ᐊᓂᒍᖅᓯᒪᓕᖅᑐᑦ ᐊᑖᑕᒪ ᐊᖑᓇᓱᕝᕕᒋᕙᔪᔭᖓᓄᑦ. ᖃᔭᕆᐊᕗᑦ ᑕᑕᑦᑎᓪᓗᒍ ᕿᒻᒥᓕᒫᑦᑎᓐᓄᓪᓗ ᓱᓇᓕᒫᓂᓪᓗ ᐃᖏᕐᕋᒍᓐᓇᖅᐸᔪᔭᕗᑦ, ᒫᓐᓇ ᐸᓂᖅᓯᒪᓕᖅᑐᖅ.”
“ᐊᑐᕆᑐᓕᖅᑐᐹᓗᒃ. ᐃᓚᖓᓂ ᐃᓱᒫᓘᒋᕙᑦᑕᕗᑦ ᐃᓪᓗᕋᓛᓄᑦ ᓱᓇᒃᑯᑎᕗᓪᓗ ᑎᑦᑕᐅᑕᕋᔭᕆᐊᖏᑦ. ᐅᓪᓗᒥ ᓱᓇᓕᒫᑦ ᐊᑦᓱᖏᖅᓯᒪᒋᐊᖃᓕᖅᑐᑦ. ᐊᓄᕆ ᓴᓐᖏᔪᕈᖅᐸᓪᓕᐊᑐᐃᓐᓇᖅᑐᖅ ᑕᑯᖃᑦᑕᖅᓯᒪᔭᑦᑎᓐᓂ.”
“ᖃᖓᒃᑰᕐᓂᖓᑦ ᐃᓚᖓᑦ ᐊᕐᕌᒍᒥ ᓯᓚᐅᑉ ᐊᓯᔾᔨᖅᑕᖓᓂ. ᑲᓱᕈᓐᓃᖅᑐᑦ. ᖃᐅᔨᒪᕙᔪᔪᒍᑦ ᖃᖓᒃᑯᑦ ᓯᓚ ᐊᓯᔾᐸᓪᓕᐊᓂᐊᓕᕐᒥᒻᒪᖔᖅ. ᓲᕐᓗ ᐃᑎᒐᑎᒃ ᒪᐅᑉᐸᑕ ᐊᐳᑎᒥ, ᖃᐅᔨᒪᑦᑕᖅᑐᑦ ᐊᐅᔭᖅ ᐅᕝᕙᓗ ᐅᐱᕐᖔᖅ ᐊᑑᑎᒐᔭᕐᒪᖔᖅ. ᐊᑐᕐᓂᖅ ᖃᐅᔨᒪᓂᑐᖃᑦᑎᓐᓂᒃ ᖃᐅᔨᒪᒐᔭᖅᑐᑎᑦ ᓱᓇ ᐊᑑᑎᒐᔭᕐᒪᖔᖅ ᖃᖓᒃᑯᑦ, ᑭᓯᐊᓂ ᓇᓗᓇᑐᐃᓐᓇᓕᖅᑐᖅ ᓇᓚᐅᑦᓵᕆᐊᑦᓴᖅ. ᐃᓄᐃᑦ ᐅᕙᖓᓗ ᓇᓗᓕᖅᑐᒍᑦ. ᑕᐃᑦᓱᒪᓂᒋᐊᖅ ᖁᐊᖅᐸᔪᔪᑦ ᑕᓰᑦ ᑕᓯᐊᕋᐃᓪᓗ, ᑭᖑᓂᖓᒍᑦ ᖃᑦᓯᒐᓛᑦ ᐱᓇᓱᐊᕈᓰᑦ ᐊᓂᒍᕐᒪᑕ ᓯᑯ ᐊᑦᑕᕐᓇᕈᓐᓃᑕᖅᑯᖅ ᐃᖏᕐᕋᕕᒋᒋᐊᖓ.
“ᐊᕐᕌᒍᕋᓴᐃᑦ ᐊᓂᒍᖅᓯᒪᓕᖅᑐᑦ ᐃᔾᔪᔪᓪᒪᕆᐊᓗᓐᓂᒃ ᓯᑯᖃᖅᐸᔪᔪᒍᑦ ᐊᑯᓂᐊᓗᒃ ᐊᑐᕆᐊᖃᖅᐸᔪᔪᑦ ᑑᕐᓂᒃ. ᐃᓘᓐᓇᑦᓯᐊᓂ ᐳᓚᕙᔪᔪᖅ ᑐᖅ ᐃᐳᖓ. ᒫᓐᓇ ᓇᐃᓐᓂᖅᓴᓪᓚᕆᐊᓘᓕᖅᑐᑦ ᑑᑦ ᐃᐳᖏᑦ ᐊᒻᒪᓗ ᓱᓕ ᑎᑭᐅᑎᕙᑦᑐᒍᑦ ᐃᒪᕐᒧᑦ. ᐃᓘᓐᓈᒍᑦ ᓯᑰᑉ ᐃᔾᔪᓂᖓ ᒥᑭᓪᓕᕚᓪᓕᖅᓯᒪᔪᖅ. ᐊᒻᒪᓗ ᐃᔾᔪᓂᖓ ᓯᑰᑉ ᓇᓗᓇᐃᖅᓯᒍᑕᐅᒻᒥᔪᖅ ᖃᓄᑎᒋ ᓂᓪᓕᓇᕐᒪᖔᖅ ᓯᓚ. ᐃᒃᑮᓇᕐᓂᖅᐸᑦ ᐃᔾᔪᓂᐊᖅᑐᖅ. ᐊᐳᑎᓕᐹᓘᒍᓂ ᓵᓐᓂᖅᓴᐅᓂᐅᓴᔪᖅ, ᑭᓯᐊᓂ ᐃᓘᓐᓈᒍᑦ ᓯᓚᒥᒃ ᒪᓕᑦᑐᖅ.”
“ᑭᖑᓂᖃᓈᕆᖃᑦᑕᕐᒥᔭᕗᑦᑕᐅᖅ ᖃᕕᖅ, ᐊᑑᑎᖃᑦᑕᕈᓐᓃᕐᒪᑦ. ᑕᑯᓐᖏᑐᐃᓐᓇᖃᑦᑕᓕᖅᑭᑖ? ᓵᑦᑐᐋᓘᒃ ᓯᑯᐊᖅᓯᒪᔪᖅ ᐊᐳᑎᐅᑉ ᕐᑳᖓᒍᑦ. ᐊᑐᖅᐸᔪᔭᕗᑦ ᒥᑭᒋᐊᑦᑎᓐᓄᑦ. ᐊᒻᒪᓕᑭᑕᐅᔪᖓᔪᓕᐅᖅᓱᑕ ᐊᐳᒻᒥᒃ ᕐᑳᕈᕕᐊᖏᔭᖅᓱᒍ. ᑕᒪᓐᓇ ᐊᑐᖅᑕᐅᕙᔪᔪᖅ ᑲᑎᒪᑎᑦᓯᒍᑕᐅᑦᓱᓂ”.
“ᐱᖅᑯᓯᖅᑎᒍᑦ ᖃᐅᔨᒪᓕᑕᖃᖃᑦᑕᖅᓯᒪᔪᒍᑦ ᓈᓐᖑᐊᓂᒃ, ᐱᓗᐊᖅᑐᒥᒃ ᐃᖏᕐᕋᑦᓱᑕ ᑖᖅᑐᒥ. ᖃᐅᔨᒋᐊᖅᐸᔪᔪᒋᑦ ᓈᓐᖑᐊᓂᒃ ᑖᕗᖓᑦᓯᐊᖅ ᐃᖏᕐᕋᓕᕋᓗᐊᕐᒪᖔᑦᑕ ᐅᑎᖅᐸᓪᓕᐊᑦᓱᑕ ᐃᒡᓗᑎᓐᓄᑦ. ᒫᓐᓇ ᓇᓗᓇᑐᐃᓐᓇᓕᖅᑐᖅ ᑎᒃᑯᐊᖓᒍᓐᓃᕐᒪᑕ ᑎᒃᑯᐊᖓᕕᒋᕙᔪᔭᒥᓄᑦ.”
ᐃᓄᑦᑎᑐᑦ ᐊᑎᖓ ᑕᓗᕐᔪᐊᖅ ᓇᓗᓇᐃᔭᐃᔪᖅ ᐊᖏᔪᒻᒪᕆᐊᓗᒻᒥᒃ ᑕᓗᕐᒥᒃ ᐅᔭᖅᑲᒥᒃ ᐊᑐᖅᑕᐅᕙᑦᑐᒥᓂᕐᒥᒃ ᐊᖑᓇᓱᑦᑎᓄᑦ ᑐᑦᑐᓕᐊᖅᓯᒪᑦᓱᑎᒃ. ᑕᓗᕐᔪᐊᖅ (ᐃᓄᖏᑦ 900 ᒥᑦᓵᓂ) ᐱᖓᓐᓇᖓᓃᑦᑐᖅ Boothia Peninsula, ᕿᑎᓪᓗᐊᖓᓂ ᑕᓪᓗᕈᑎᐅᑉ. ᖃᐅᔨᒪᔭᐅᕙᔪᔪᖅ ᓯᐱᐊᓐᔅ ᕙᐃᒥᒃ, ᐅᕙᑦᓯᐊᕈᐊᓗᓐᓂᒃ ᐅᐸᑦᑕᐅᖃᑦᑕᖅᓯᒪᔪᖅ ᕿᓂᖅᑎᓄᑦ, ᐱᖃᓯᐅᑎᑦᓱᓂ ᖃᐅᔨᒪᔭᐅᔪᒻᒪᕆᒃ ᔮᓐ ᕌᔅ ᖃᐅᔨᓴᖅᑏᑦ 1830-ᖏᓐᓂ ᓇᓗᓇᐃᖅᓯᓚᕿᓯᒪᑦᓱᑎᒃ ᓄᓇᕐᔪᐊᑉ ᑲᔾᔨᖓᓂᒃ. ᑕᐃᑲᓂᒋᐊᖅ 1800-ᖏᓐᓂ, ᐊᑯᓐᓂᖓᓂ ᐊᕐᕌᒍᐃᑦ 1848 ᐊᒻᒪᓗ 1860, ᒥᐊᓕᒐᐃᑦ ᑯᐃᓐᓗ ᓄᓇᖓᓐᓂᒥᐅᑦ ᐅᒥᐊᕐᔪᐊᖅ ᓯᑎᓯᒪᔪᑦ ᑕᒪᐅᖓ ᕿᓂᕆᐊᖅᓱᑎᒃ ᑐᓴᐅᒪᔭᐅᔪᒥᒃ Franklin Expedition. ᑕᓗᕐᔪᐊᕐᒥ ᐅᓪᓗᒥ ᑕᑯᔪᒥᓇᖅᑐᑦ ᓄᓇᖓ, ᐱᐅᓯᐅᓯᒪᔪᑦ, ᐃᖃᓗᐃᑦ ᐊᒻᒪᓗ ᓂᕐᔪᑏᑦ. ᓄᓇᖓ ᐱᐅᔪᒻᒪᕆᒃ ᐱᓱᕋᔮᕝᕕᒋᒋᐊᖓ. ᓯᑕᒪᓕᒃᑯᑦ ᐱᓱᕝᕖᓪᓗ ᐊᖅᑯᑏᑦ ᓄᓇᓕᓐᓄᑦ ᐳᓚᕋᑦᑎᓄᓪᓗ ᐊᑐᖅᑕᐅᕙᑦᑐᑦ ᐃᖃᓪᓗᐊᖅᓱᑎᒃ ᓯᓂᑦᑕᕆᐊᖅᓱᑎᓪᓗ ᖃᓂᑦᑐᓄᑦ ᑕᓯᕐᓄᑦ.
ᖁᒡᓗᖅᑐᖅ, ᑕᐃᔭᐅᕙᓚᐅᖅᓯᒪᔪᖅ ᑳᐸᒪᐃᓐ, ᓯᓈᖏᓐᓃᖅᑐᖅ ᖁᒡᓗᖅᑑᑉ ᑰᖓᑕ ᐊᒻᒪᓗ ᓯᓈᖏᓐᓂ Coronation Gulf. ᐅᐊᓐᓇᖓᓃᑦᓱᓂ, ᐱᖓᓐᓇᖅᐸᓯᖓᓂ ᔭᓗᓇᐃ, ᖁᒡᓗᖅᑐᖅ ᐱᖓᓐᓇᖅᐸᓯᓐᓂᖅᐹᖅ ᓄᓇᓕᓕᒫᓂ ᓄᓇᕗᒻᒥ, ᐃᓄᖃᖅᓱᓂ ᒥᑦᓵᓂ 1460. ᐊᐅᔭᒃᑯᑦ, ᖃᔭᖅᑐᖅᑏᑦ ᐊᑐᖅᐸᖅᑐᖅ ᖁᒡᓗᖅᑑᑉ ᑰᖓᓂᒃ ᑎᑭᐅᑎᑦᓱᑎᒃ ᑲᔾᔮᓇᖅᑐᒧᑦ Bloody Falls ᑰᖓᓄᑦ ᒥᓐᖑᐃᕐᓯᕐᕕᒻᒥ. ᓇᑎᕐᓇᖅ ᖃᓂᓐᓂᑯᖓᓄᑦ ᓇᐹᖅᑐᓄᑦ, ᖃᓄᐃᑦᑐᑐᐃᓐᓇᐃᑦ ᓂᕐᔪᑏᑦ ᑕᑯᔭᐅᖃᑦᑕᕈᓐᓇᖅᑐᑦ ᑕᒫᓂ, ᐱᖃᓯᐅᑎᑦᓱᑎᒃ ᐊᒃᖤᐃᑦ, ᖃᕝᕖᑦ, ᑐᑦᑐᕙᐃᑦ ᐊᒻᒪᓗ ᓇᑎᕐᓇᕐᒥ ᓂᕐᔪᑏᑦ ᒪᑯᐊ ᐅᒥᒻᒪᐃᑦ, ᑐᑦᑐᐃᑦ, ᑎᕆᒐᓐᓂᐊᑦ ᐊᒪᕈᐃᓪᓗ.