“ᐅᓪᓗᒥᐅᓕᖅᑐᖅ, ᓯᓚ ᐊᔾᔨᒋᒻᒪᕆᓕᖅᑕᖓ ᑕᑯᖃᑦᑕᖅᓯᒪᔭᒃᑯᑦ. ᑕᐃᒫᒃ ᐅᖃᖅᑕᐅᒐᒪ ᐃᓕᓐᓂᐊᖅᓯᒪᔪᐊᓘᓐᖏᒃᑲᓗᐊᖅᑐᖓ, ᑭᓯᐊᓂ ᐊᓄᕆ ᓇᑭᑐᐃᓐᓇᖅ ᓴᖅᑭᕐᔫᒥᔭᑐᐃᓐᓇᖅᑑᔮᓕᕐᒪᑦ ᐊᒻᒪᓗ ᓄᕗᔭᐃᑦ ᐊᓯᔾᔨᐸᓪᓕᐊᓕᑐᐊᕐᒪᑕ, ᑕᕝᕙᓴᐃᓐᓇᐅᓪᓗᓂ ᐊᓄᕆᓕᕇᖅᓱᓂᓗ, ᐅᐱᕐᖔᒃᑯᑦ ᐊᓪᓛᑦ ᑕᐃᒪᐃᓕᖅᑐᖅ.

“ᐅᓪᓗᒥᐅᓕᖅᑐᖅ ᐊᐳᑎᖃᓐᖏᓂᖅᓴᓪᓚᕆᐅᓕᕐᒪᑦ ᑕᐃᑦᓱᒪᓂᓂᑦ. ᐊᐱᔪᐹᓘᕙᔪᒐᓗᐊᕋᑦᑕ ᑭᓯᐊᓂ ᐅᓪᓗᒥ ᐊᐳᑎᖃᓐᖏᓂᖅᓴᐅᓕᖅᑐᒍᑦ. ᐊᐳᑎ ᓄᓇᒥ ᐊᐅᓴᕋᐃᓐᓂᖅᓴᐅᓕᖅᓱᓂ. ᑕᐃᑦᓱᒪᓂᓕ ᐊᐅᓴᕋᐃᑉᐸᔪᓐᖏᒃᑲᓗᐊᕐᒪᑦ ᐅᓪᓗᒥᑎᑐᑦ. ᐃᒻᒪᖃ ᐊᐳᑎᖃᑦᓯᐊᖏᓗᐊᕐᓂᑯᖓᓄᑦ ᓄᓇᒥ. ᐱᐅᕙᔪᔫᒐᓗᐊᖅ ᖃᒧᑎᑦᑎᓐᓄᑦ, ᐊᐳᑎᖃᑯᑖᓐᓂᖅᓴᐅᖃᑦᑕᑎᓪᓗᒍ. ᐅᓪᓗᒥᐅᓕᖅᑐᖅ ᓱᓕ ᐱᐅᔫᒐᓗᐊᖅ ᑭᓯᐊᓂ ᐊᑯᓂᐅᓐᖏᓂᖅᓴᐅᖃᑦᑕᓕᖅᑐᖅ.

“ᐊᓯᔾᔨᐸᓪᓕᐊᔪᓪᓕ ᑕᑯᓯᒪᔭᒃᑲ ᓯᑯᒥ 1962 ᒥᑦᓯᑎᓐᓂ ᓯᑯᐃᑦ ᐱᐅᕙᔪᒐᓗᐊᕐᒪᑕ. ᓯᑯ ᐊᓯᔾᔨᖅᓯᒪᓕᖅᑐᖅ 1962 ᑭᖑᕐᖓᓂ. ᐊᖑᓇᓱᑦᑎᐅᓪᓗᖓ, ᑕᑯᕙᓪᓕᐊᓕᔪᔪᖓ ᓯᑯ ᑭᖑᕙᖅᐸᓪᓕᐊᑐᐃᓐᓇᕆᐊᖓ. 1960 ᒥᑦᓵᓂ ᓯᑯᓴᕋᐃᑉᐸᔪᒐᓗᐊᕐᒪᑦ. ᑭᓯᐊᓂ 1960 ᑭᖑᕐᖓᓂ ᓯᑯᓯᒪᓕᕋᓗᐊᖅᓱᓂ, ᓱᓕ ᐊᑐᕋᑦᓴᐅᓐᖏᑦᑐᖅ. ᑕᐃᑦᓱᒪᓂᓕ ᓯᑯᑦᓯᐊᖅᐸᔪᒐᓗᐊᕐᒪᑦ ᔮᓐᓄᐊᕆᐅᑎᓪᓗᖑ. ᓯᑯ ᑕᐃᑦᓱᒨᓇ ᖁᐊᖑᑦᓯᐊᓕᖅᓱᓂ ᓇᒧᑐᐃᓐᓇᖅᓯᐊᖅ ᐊᖑᓇᓱᒋᐊᕈᓐᓇᓕᖅᓱᑕ ᓄᓇᓕᖃᕆᐊᖅᑐᕈᓐᓇᖅᓱᑕᓗ.

“ᖃᐅᔨᒪᓇᕈᓐᓃᖅᑐᖅ ᖃᓄᐃᑦᑑᓂᐊᕐᒪᖔᖅ ᓯᓚ. ᓇᓗᓇᑦᓯᐊᓕᖅᑐᖅ ᐅᓪᓗᒥ.”

“ᐃᓘᓐᓇᒐᓚᑎᒃ ᐊᖅᑯᑎᒋᓲᕗᑦ ᐊᑐᕋᑦᓴᐅᖑᓐᓃᖅᑐᑦ ᐊᐳᑎᖃᑦᓯᐊᓐᖏᓗᐊᕐᓂᑯᖓᓄᑦ, ᐊᑐᕋᑦᓴᐅᒍᓐᓃᖅᑐᑦ. ᐊᑦᑐᐃᓂᖃᓪᓚᕆᑦᓯᒪᔪᖅ ᐃᓚᖏᓐᓂᒃ ᐊᖑᓇᓱᑦᑎᓂᒃ ᐊᐳᑎᖃᑦᓯᐊᖏᓐᓂᖅ ᓄᖅᑲᐅᒥᖓᒍᑎᐹᓘᒻᒪᑦ ᐆᒪᔪᖅᓯᐅᐸᑦᑐᓄᑦ. ᓄᓇᓕᐊᕈᒪᒐᓗᐊᖅᓱᑕ ᐊᖑᓇᓱᒋᐊᕐᓗᑕ, ᐅᑕᖅᑭᓐᖑᓇᓕᖃᑦᑕᖅᑐᖅ ᐊᐳᑎ ᖃᒧᑕᐅᔭᕈᒪᓕᕋᓗᐊᖅᑎᓪᓗᑕ. ᑕᒪᓐᓇ ᐊᑑᑎᓚᐅᖅᓯᒪᓐᖏᒧᑦ ᓱᔪᕐᔫᔮᖅᑐᖅ ᐊᐳᑎᖃᓐᖏᑦᑐᑯᑖᖑᖃᑦᑕᖅᓱᑕ ᓄᓇᒥ.”

“ᑕᑯᑦᓴᐅᓪᓚᕆᑦᑐᖅ ᐅᐱᕐᓴᕋᐃᓐᓂᖅᓴᐅᖃᑦᑕᓕᕐᒪᑦ ᑕᐃᑦᓱᒪᓂᓂᑦ. ᑕᖅᑭᖓ ᐄᑉᐳᕉᓪ ᐆᑦᑑᑎᒋᒍᓐᓇᖅᑕᕋ ᐊᓯᔾᔨᕐᓂᐅᓯᒪᔪᓄᑦ, ᐃᒻᒪᖃᑦᑕᐅᖅ ᐅᔾᔨᕆᔭᐅᔪᖅ ᐊᒥᓱᓄᑦ ᐃᓄᓐᓄᑦ. ᑕᖅᑭᖅ ᐊᑐᖅᑕᐅᒐᔪᓲᖑᒻᒪᑦ ᑐᓂᖅᑕᐃᒧᑦ ᓇᓪᓕᐅᓂᖅᓯᐅᖅᑎᓪᓗᒋᑦ. ᓄᓐᖑᒐᓚᖓᓂᐅᓕᖅᑐᖅ ᑐᓂᖅᑕᐃᖅᑐᖃᖅᑎᓪᓗᒍ 2000-ᕈᕆᐊᕕᑦᑎᓪᓗᒍ, ᑭᓯᐊᓂ ᑕᒃᑯᓇᓂ ᖃᑦᓯᒐᓛᓂ ᐊᕐᕌᒍᓂ ᐊᓂᒍᖅᑐᓂ, ᐅᐱᕐᖏᓴᕋᐃᓐᓂᖅᓴᐅᓂᖓᓄᑦ, ᓇᓪᓕᐅᓂᖅᓯᐅᕐᓃᑦ ᖃᓪᓕᒋᐊᖅᑎᑕᐅᒋᐊᖃᔪᔪᑦ ᐱᓇᓱᐊᕈᓰᓐᓂᒃ ᒪᕐᕉᓐᓂᒃ.”

“ᑕᓰᑦ ᑰᓪᓗ ᐃᒻᒪᑎᓐᓂᕈᖅᐸᓪᓕᐊᓴᕋᐃᓐᓂᖅᓴᐅᖃᑦᑕᓕᖅᑐᑦ ᐊᑐᕋᑦᓴᐅᒍᓐᓃᕇᖅᐸᓕᖅᓱᑎᓪᓗ ᐅᓪᓗᐃᑦ ᖃᑦᓰᓐᓇᐃᑦ. ᐊᓪᓛᑦ ᓯᑯ ᐊᐅᑉᐸᓪᓕᐊᔪᑦᓴᕈᓚᐅᕋᓂ ᐊᑐᕋᑦᓴᐅᒍᓐᓃᖃᑦᑕᓕᖅᑐᖅ ᐊᑦᑕᕐᓇᓗᐊᕐᓂᖓᓄᑦ. ᑕᓰᒃ ᓵᓐᓂᖅᓴᐹᓗᓐᓂᒃ ᓯᑯᐊᖃᓕᖅᑐᑦ ᐊᑯᓃᕈᓐᓇᕋᓂᓗ. ᐅᓪᓗᒥᐅᓕᖅᑐᖅ ᓯᑯ ᐊᐅᓴᕋᐃᓐᓂᖅᓴᐅᓕᕐᒪᑦ ᐊᐅᒃᑳᓂᕈᖅᐸᑦᓱᓂ ᓇᔪᕋᑦᓴᐅᒍᓐᓃᖅᓱᓂ.”

“ᑕᑯᓯᒪᔭᒃᑲ ᐊᓯᔾᔨᕐᓂᐅᔪᑦ ᐱᓗᐊᖅᑐᒥᒃ ᐊᕐᕌᓂ. ᖃᓐᓂᓚᕆᓚᐅᖅᓯᒪᔪᓐᖏᒻᒪᑦ ᐊᕐᕌᓂᓕᒫᖅ. ᐃᒫᒃ ᐱᖅᓯᓪᓚᕆᓪᓗᓂ, ᓱᓕ ᐱᖅᑐᖅᓯᐅᓚᐅᓐᖏᑦᑐᒍᑦ ᑕᕝᕙᓂ ᐅᑭᐅᖅ. ᑐᓴᖅᐸᒃᑲᓗᐊᖅᑐᒍᑦ ᐱᖅᓯᕐᓂᕋᐃᔪᓂᒃ ᓈᓚᐅᑎᒃᑯᑦ, ᑭᓯᐊᓂ ᓇᑎᕈᕚᑐᐃᓐᓇᐸᑦᑐᖅ, ᐱᖅᓯᓪᓚᕆᒐᓂ.”

“ᐃᒻᒪᖃ 1975-ᖑᑎᓪᓗᒍ, ᑲᓪᓕᓚᐅᖅᓯᒪᒻᒪᑦ ᖃᐅᔨᒋᐅᖅᓱᖓᓗ ᑲᓪᓕᖅᑐᒥᒃ ᑕᑯᓇᓂᒋᐊᖅ…. ᐅᓪᓗᒥᐅᓕᖅᑐᖅ, ᑲᓪᓕᖃᑦᑕᓕᖅᑐᖅ ᐊᐅᔭᑕᒫᑦ ᑕᐅᓇᓂᒋᐊᖅ ᑲᖏᖅᓱᒥ”.

“ᐅᓪᓗᒥᐅᓕᖅᑐᖅ ᓇᑭᑐᐃᓐᓇᑦᓯᐊᖅ ᐊᓄᕆᓯᐅᓕᖅᑐᒍᑦ. ᐊᓄᕇᑦ ᓴᕿᔭᑦᓱᑎᒃ ᐊᓯᔾᔨᖅᑕᖏᓐᓇᖅᓱᑎᓪᓗ. ᓯᓚ ᓯᓚᑦᓯᐊᖑᓚᖓᔫᔮᕋᓱᐊᓗᕐᒪᑦ, ᑭᓯᐊᓂ ᐊᓄᕆᓕᑲᓪᓚᑕᖅᑯᖅ ᑕᒪᓐᓇ ᐊᐅᓚᓂᐅᔮᖅᐸᓕᖅᑐᖅ ᐅᓪᓗᒥ.”