ᓯᓚ ᐊᓯᔾᔨᖅᐸᓪᓕᐊᔪᖅ ᐊᒃᑐᐃᕙᓪᓕᐊᕗᖅ ᓄᓇᕘᑉ ᓄᓇᖓᓂ, ᐆᒪᔪᓂᒃ ᐊᒻᒪ ᓄᓇᓕᖕᓂ ᐅᖅᑰᓯᕙᓪᓕᐊᓂᖓᓄᑦ, ᓯᑯ ᐊᐅᒃᐸᓪᓕᐊᓂᖓᓄᑦ ᐊᒻᒪ ᐆᒪᔪᑦ ᓇᔪᒐᖃᕐᕕᖏᑦ ᐊᓯᔾᔨᖅᐸᓪᓕᐊᓂᖏᓐᓄᑦ. ᑖᒃᑯᐊ ᐊᓯᔾᔨᖅᐸᓪᓕᐊᔪᑦ ᓯᓚ ᐊᓯᔾᔨᖅᐸᓪᓕᐊᔪᒧᑦ ᖃᓄᐃᓕᐅᕈᑎᒃᓴᑦ ᐱᒻᒪᕆᐅᑎᑦᑎᕗᑦ ᓄᓇᕘᓕᒫᒥ.
ᓄᓇᕐᔪᐊᓕᒫᒥ ᐅᓪᓗᕆᔭᐅᔪᖅ ᓯᓚ ᐊᓯᔾᔨᖅᐸᓪᓕᐊᔪᒧᑦ ᖃᓄᐃᓕᐅᕈᑎᒃᓴᑦ ᐱᓕᕆᐊᖑᕙᒃᐳᖅ ᐊᕐᕌᒍᑕᒫᑦ ᐅᑐᐱᕆ 24−ᖑᓕᕌᖓᑦ. ᐱᕕᖃᖅᑎᑦᑎᕗᖅ ᐃᓕᑦᑎᒃᑲᓐᓂᕐᓂᕐᒥᒃ ᓯᓚ ᐊᓯᔾᔨᖅᐸᓪᓕᐊᓂᔪᒧᑦ, ᐅᖃᐅᓯᕆᕙᒡᓗᒍ ᖃᓄᖅ ᑐᑭᖃᕐᒪᖔᑦ ᓄᓇᑦᑎᓐᓂ ᐱᓕᕆᓗᑎᒡᓗ.
ᓯᑎᐱᕆ 16, 2026−ᒥ, ᐊᒃᑐᐃᓗᐊᖅᑕᐃᓕᑎᑦᑎᓂᕐᒧᑦ ᖃᐅᔨᒪᔨᑕᖅ ᒫᒃᓰᒻ ᑐᐴ ᓇᐅᔮᕐᒥᐅᓂᒃ ᑲᑎᖃᑎᖃᓚᐅᖅᐳᖅ, ᑭᒡᒐᖅᑐᐃᔨᓂᒃ ᖁᓪᓕᖅ ᐆᒻᒪᖅᑯᑎᓕᕆᔨᒃᑯᓐᓂ, ᓄᓇᕗᑦ ᑐᙵᕕᒃᑯᓐᓂ ᐊᒻᒪ ᐃᑲᔫᑦ ᐱᓕᕆᐊᒧᑦ ᐱᓕᕆᖃᑎᒋᔭᖏᓐᓂᒃ ᓇᓗᓇᐃᖅᓯᓪᓗᑎᒃ ᐱᐊᓂᒃᑕᐅᓂᖓᓂᒃ ᐊᒻᒪ ᐊᑦᑕᑕᖅᑎᑕᐅᓂᖓᓂᒃ ᐃᑲᔫᑦ ᓯᕿᓂᕐᒧᑦ ᐊᒻᒪ ᐆᒻᒪᖅᑯᑎᓂᒃ ᑐᖅᑯᖅᓯᓯᒪᕝᕕᒃ ᐱᓕᕆᐊᖅ.
ᐱᓕᕆᐊᑉ ᐊᑎᖓ, ᐃᑲᔫᑦ ᑐᑭᖃᖅᐳᖅ "ᐃᑲᔪᕐᓂᖅ, ᐃᑲᔪᖅᑐᐃᓂᖅ ᐅᕝᕙᓘᓐᓃᑦ ᐃᑲᔫᑎᒃᓴᑦ". ᓂᕈᐊᖅᑕᐅᓚᐅᖅᑐᖅ ᕼᐋᒻᓚᑦᑯᑦ ᑲᑎᒪᔨᖏᓐᓄᑦ ᓲᖃᐃᒻᒪ ᐊᒃᑐᐊᓂᖃᕐᓂᖓᓄᑦ ᐱᓕᕆᐊᑉ ᐱᔾᔪᑎᖓᓄᑦ ᐊᒃᑐᐊᓂᖓᓄᓪᓗ ᓄᓇᓕᖕᓄᑦ. ᐃᑲᔫᑦ ᓂᕆᐅᒋᔭᐅᕗᑦ ᐱᑎᑦᑎᓂᐊᕐᓂᖏᓐᓂᒃ 30 ᐳᓴᐸᓗᖕᓂᒃ ᓇᐅᔮᑉ ᐆᒻᒪᖅᑯᑎᓄᑦ ᐊᒻᒪ ᐊᑭᓖᔾᔪᑕᐅᕙᒃᖢᓂ 400,000 ᓖᑕᓂᒃ ᐃᒐᓯᐅᑎᒥᒃ ᐊᕐᕌᒍᑕᒫᑦ.
ᐆᒻᒪᖅᑯᑎᑐᓗᐊᙱᓐᓂᖅ ᑐᑭᖃᖅᐳᖅ ᐆᒻᒪᖅᑯᑎᑐᙱᓐᓂᖅᓴᐅᓗᓂ ᐊᔾᔨᖓᓂᒃ ᐊᑐᕈᒪᓗᓂ, ᓲᕐᓗ ᐃᒡᓗᕈᓯᕐᒥᒃ ᖃᐅᒪᑎᑦᑎᓗᓂ ᐅᕝᕙᓘᓐᓃᑦ ᐊᖏᕐᕋᐃᑦ ᐅᖅᑰᑎᑉᐸᒡᓗᒍ. ᐊᓯᔾᔨᕐᓗᒋᑦ ᓄᑕᐅᙱᓐᓂᖅᓴᑦ ᖃᐅᒻᒪᖅᑯᑎᑦ LED−ᓄᑦ ᐊᒻᒪ ᓱᕕᔾᔭᐃᒃᑯᑎᑦ ᐃᒐᓛᑦ ᐹᓪᓗ ᐊᕙᑖᓂ ᒪᕐᕉᒃ ᐆᒃᑑᑏᒃ.
ᐊᑐᑦᑎᐊᕐᓂᖅ ᐆᒻᒪᖅᑯᑎᒥᒃ ᐱᕚᓪᓕᖅᑎᑦᑎᔪᓐᓇᖅᐳᖅ ᐊᕙᑎᒧᑦ ᑮᓇᐅᔭᖃᕐᕕᖕᓄᓪᓗ. ᐱᐅᓯᒋᐊᖅᑎᑦᑎᓂᖅ ᐆᒻᒪᖅᑯᑎᑐᓗᐊᙱᓐᓂᕐᒥᒃ ᒥᒃᖠᒋᐊᖅᑎᑦᑎᔪᓐᓇᖅᐳᖅ ᐅᖅᓱᐊᓗᒃᓴᒥᒃ ᐊᑐᖅᑕᐅᔭᕆᐊᖃᖅᐸᒃᑐᒥᒃ ᓴᖅᑭᑎᑦᑎᓂᐊᕐᓗᓂ ᐆᒻᒪᖅᑯᒻᒥᒃ ᐅᖅᑰᓴᖅᑎᑦᑎᓂᐊᕐᓗᓂᓗ ᐊᖏᕐᕋᕆᔭᐅᔪᓂᒃ. ᑕᒪᓐᓇ ᒥᒃᖠᕚᓪᓕᖅᑎᑦᑎᔪᓐᓇᖅᐳᖅ ᐅᖅᓱᐊᓗᒃᓴᓂᑦ ᐱᔭᐅᔭᕆᐊᓕᖕᓂᑦ ᐆᒻᒪᖅᑯᑎᖃᖅᑎᑦᑎᓂᕐᒧᑦ ᓄᓇᓕᖕᒥᑦ ᐊᕐᕌᒍᑕᒫᑦ. ᓇᖕᒥᓂᖅ ᐊᑭᓕᖅᓱᐃᒍᕕᑦ ᐆᒻᒪᖅᑯᑎᓄᑦ ᐅᖅᑰᓴᐅᑎᒧᓪᓘᓐᓃᑦ, ᐱᐅᓯᒋᐊᖅᓯᒪᔪᑦ ᐆᒻᒪᖅᑯᑎᑐᓗᐊᙱᓐᓂᖅᓴᑦ ᐊᑭᒃᖠᒋᐊᖅᑎᑦᑎᔪᓐᓇᕐᒥᔪᑦ ᐊᑭᓕᒐᒃᓴᕐᓂᒃ.
ᓯᓚᕐᔪᐊᑉ ᐅᔅᓯᒃᓯᕙᓪᓕᐊᔾᔪᑎᖏᑦ ᑕᐅᑐᙳᐊᒐᒃᓴᐅᙱᑦᑑᔪᓐᓇᖅᐳᑦ. ᐆᒃᑐᕋᐅᑎᖏᑦ ᑕᐅᑐᙳᐊᕐᓗᒋᑦ, 2024-ᒥ, ᑲᓇᑕ ᓴᖅᑭᑎᑦᑎᓚᐅᖅᐳᖅ ᐃᒪᓐᓇᐸᓗᒃ 13.42 ᑕᓐᔅ CO₂ ᐅᔅᓯᒃᓯᕙᓪᓕᐊᔾᔪᑎᖏᑦ ᐃᓄᖕᒧᑦ ᐊᑕᐅᓯᕐᒧᑦ ᐅᖅᓱᐊᓗᒃᓴᓂᑦ ᓴᓇᕝᕕᖕᓂᓪᓗ. ᐅᖁᒪᐃᓐᓂᖓ ᐊᔾᔨᑐᐃᓐᓇᕆᖕᒪᒍ 60 ᖃᒧᑕᐅᔭᐃᑦ ᐅᕝᕙᓘᓐᓃᑦ 7 ᐊᖏᔪᑦ ᐊᖑᑏᑦ ᕿᓚᓗᒐᐃᑦ ᖃᐅᓪᓗᖅᑕᑦ.
ᓯᑎᐱᕆ 21, 2026−ᒥ, ᓄᓇᕗᒻᒥ ᓯᓚᐅᑉ ᐊᓯᔾᔨᖅᐸᓪᓕᐊᓂᖓᓄᑦ ᑐᖅᑲᖅᑕᕐᕕᐊ ᑐᙵᓱᒃᑎᑦᑎᕗᑦ ᓄᓇᕗᒻᒥᐅᓂᒃ ᐃᓚᐅᖁᔨᓪᓗᑎᒃ ᐃᓯᐊᕿᔪᖃᙱᓪᓗᓂ ᐅᓪᓗᖓᓂ ᒥᑭᑦᑑᑎᓂᒃ ᐱᓕᕆᐊᖃᕐᓗᑎᒃ ᐅᔅᓯᒃᓯᕙᓪᓕᐊᔾᔪᑎᓂᒃ ᑮᓇᐅᔭᓂᒡᓗ ᐊᑐᙱᓐᓂᖅᓴᐅᔪᓐᓇᖅᖢᑎᒃ.
ᐅᕝᕙᐅᑯᐊ ᐃᓚᖏᑦ ᐅᔅᓯᒃᓯᕙᓪᓕᐊᓐᓇᙱᓐᓂᖅᓴᑦ:
ᔪᓚᐃ 27, 2026−ᒥ, ᐊᐅᓪᓛᖅᓯᒪᔪᑦ ᐃᖃᓗᖕᓂ ᓄᓇᓕᐸᐅᔭᒃᑯᑦ ᐊᐅᔭᒃᑯᑦ ᐅᓪᓗᒃᑯᑦ ᐊᐅᓪᓛᖅᓯᒪᕝᕕᖕᒥ ᐃᓚᐅᓚᐅᖅᐳᑦ "ᐊᔾᔨᙳᐊᑦ ᓯᕗᓂᒃᓴᑦᑎᓐᓂᙶᖅᑐᑦ" ᐱᓕᕆᐊᖑᔪᒥᒃ ᐋᖅᑭᒃᓱᖅᑕᐅᓪᓗᓂ ᒪᐅᕋᓐ ᕼᐊᐃᕗᑦᒧᑦ, ᐊᐅᔭᒃᑯᑦ ᐃᓕᓐᓂᐊᖅᑎ ᓄᓇᕗᒻᒥ ᓯᓚᐅᑉ ᐊᓯᔾᔨᖅᐸᓪᓕᐊᓂᖓᓄᑦ ᑐᖅᑲᖅᑕᕐᕕᖕᒥ (CCS−ᑯᓐᓂ). ᑖᓐᓇ ᐱᓕᕆᐊᖑᔪᖅ ᐃᓚᒋᔭᐅᕗᖅ ᐱᓕᕆᐊᖑᔪᒧᑦ ᑲᑎᖅᓱᐃᕙᓪᓕᐊᓂᕐᒧᑦ ᐅᓂᒃᑳᓂᒃ ᒪᒃᑯᒃᑐᓂᑦ ᓄᓇᕘᓕᒫᒥ, ᔫᑳᓐᒥ ᓄᓇᑦᑎᐊᒥᓗ.
ᐊᐅᓪᓛᖅᓯᒪᔪᑦ ᐅᖃᐅᓯᖃᓯᒋᐊᓚᐅᖅᐳᑦ ᐊᓯᔾᔨᕐᓂᐅᔪᓂᒃ ᖃᐅᔨᓯᒪᔭᖏᓐᓂᒃ ᐊᕙᑎᑦᑎᓐᓂ. ᐊᒥᐊᕆᓕᓚᐅᖅᐳᑦ, ᑎᑎᕋᐅᔭᖅᖢᑎᒃ ᑎᑎᕋᖅᖢᑎᒡᓗ ᖃᓄᖅ ᐅᑭᐅᖅᑕᖅᑐᒥ ᓄᓇᓖᑦ ᐱᕙᒌᔭᕈᓐᓇᕐᒪᖔᑕ ᐊᒃᑐᐃᓂᐅᔪᓄᑦ ᓯᓚᐅᑉ ᐊᓯᔾᔨᖅᐸᓪᓕᐊᓂᖓᓄᑦ, ᓂᕆᐅᒋᔭᖏᓐᓂᒃ ᓯᕗᓂᒃᓴᒧᑦ ᐊᒻᒪ ᑐᓴᖅᑕᐅᖁᔭᖏᓐᓂᒃ ᓯᓚᐅᑉ ᐊᓯᔾᔨᖅᐸᓪᓕᐊᓂᖓᓄᑦ ᓯᕗᓕᖅᑎᓄᑦ.
ᔫᓂ 11, 2026−ᒥ, ᒪᓕᒐᓕᐅᖅᑎ ᐳᕋᐃᔭᓐ ᑯᓄᒃ, ᒥᓂᔅᑕ ᐊᕙᑎᓕᕆᔨᒃᑯᓐᓄᑦ, ᑐᓴᖅᑎᑦᑎᓚᐅᖅᐳᖅ ᐊᑦᑎᖅᑕᐅᒃᑲᓐᓂᕐᓂᖓᓂᒃ ᓄᓇᕗᒻᒥ ᓯᓚᐅᑉ ᐊᓯᔾᔨᖅᐸᓪᓕᐊᓂᖓᓄᑦ ᐱᓕᕆᔾᔪᑕᐅᕙᒃᑐᖅ ᐆᒧᖓ, ᔮᓱᐊ ᐊᐃᐱᓕ ᖁᒪᖔᐱᒃ ᓯᓚᒧᑦ ᐊᔪᙱᓛᖑᕙᒃᑐᓄᑦ ᐊᑐᖅᑕᐅᔪᓐᓇᖅᑐᑦ ᐅᐱᒋᓪᓗᒍ ᓄᓇᕗᒻᒥ ᓯᓚᐅᑉ ᐊᓯᔾᔨᖅᐸᓪᓕᐊᓂᖓᓄᑦ ᒪᒃᑯᒃᑐᑦ ᐅᖃᐅᔾᔨᒋᐊᖅᑎᑦ ᑲᑎᒪᔨᕋᓛᖏᑦ (NuCCYAC) ᐃᓚᒋᔭᐅᔪᖅ ᔮᓱᐊ ᐊᐃᐱᓕ ᖁᒪᖔᐱᒃ.
ᐅᖃᖅᑎᑦᑎᔩ, ᓄᓇᕗᑦ ᒐᕙᒪᖓ ᐅᐱᒍᓱᒃᐳᖅ ᐃᓕᓴᖅᓯᔪᓐᓇᕋᒥᒃ ᔮᓱᐊ ᖁᒪᖔᐱᐅᑉ ᐃᓅᓯᖓᓂᒃ ᐃᑲᔪᖃᑦᑕᖅᓯᒪᓂᖓᓂᒡᓗ ᐊᑦᑎᖅᑕᐅᒃᑲᓐᓂᕐᓂᖓᓄᑦ ᓄᓇᕗᒻᒥ ᓯᓚᐅᑉ ᐊᓯᔾᔨᖅᐸᓪᓕᐊᓂᖓᓄᑦ ᐱᓕᕆᔾᔪᑕᐅᕙᒃᑐᖅ ᐃᒪᓐᓇ ᔮᓱᐊ ᐊᐃᐱᓕ ᖁᒪᖔᐱᒃ ᓯᓚᐅᑉ ᐊᓯᔾᔨᖅᐸᓪᓕᐊᓂᖓᓄᑦ ᐊᔪᙱᓛᖑᓂᕐᒧᑦ ᐊᑐᖅᑕᐅᔪᓐᓇᖅᑐᖅ.
ᐃᓕᓐᓂᐊᕆᑦ ᖃᓄᖅ ᓇᐅᔮᑦ ᐃᑲᔪᖅᑐᐃᖕᒪᖔᑦ ᓯᕿᓂᕐᒥᑦ ᐆᒻᒪᖅᑯᑎᖃᕐᓂᕐᒥᑦ ᐃᓚᒋᔭᐅᓪᓗᓂ ᓅᑉᐸᓪᓕᐊᓂᖓᓂ ᑲᔪᓰᓐᓇᕈᓐᓇᖅᑐᒥᑦ ᐆᒻᒪᖅᑯᑎᒥᑦ —ᐅᕘᓇ ᓇᕿᓪᓗᒍ ᑕᒪᕐᒥᒃ ᐅᖃᓕᒫᕈᒪᒍᕕᐅᒃ ᐅᓂᒃᑳᖅ.
ᕕᕗᐊᕆ 2-ᒥ, ᓄᓇᕗᒻᒥ ᓯᕗᓕᖅᑎ, ᐲᔭᐃ ᐊᕿᐊᕈᖅ, ᐊᒻᒪ ᓄᓇᕗᒻᒥ ᒥᓂᔅᑕ ᐊᕙᑎᓕᕆᔨᒃᑯᓐᓄᑦ, ᑕᐃᕕᑦ ᔪᐊᓇᓯ, ᑲᑎᖃᑎᖃᓚᐅᖅᐳᖅ ᓄᓇᕗᒻᒥ ᓯᓚᐅᑉ ᐊᓯᔾᔨᖅᐸᓪᓕᐊᓂᖓᓄᑦ ᒪᒃᑯᒃᑐᓄᑦ ᐅᖃᐅᔾᔪᐃᔨᑦ ᑲᑎᒪᔨᕋᓛᖏᓐᓂᒃ, ᑲᑎᒪᔨᕋᓛᑦ ᐊᕐᕌᒍᓕᒫᖅᓯᐅᑎᒥᒃ ᑲᑎᒪᑎᓪᓗᒋᑦ. ᑲᑎᒪᑎᓪᓗᒋᑦ ᓄᓇᕗᒻᒥ ᑲᑎᒪᔩᑦ ᐊᒻᒪ ᑲᑎᒪᔩᑦ ᐃᓚᐅᔪᓐᓇᖅᓯᓚᐅᖅᐳᑦ ᐅᖃᖃᑎᖃᑦᑎᐊᖅᖢᑎᒡᓗ ᓯᕗᓕᖅᑎ ᐊᒻᒪ ᒥᓂᔅᑕ ᔪᐊᓇᓯᒥᑦ.
ᑕᒪᕐᒥᒃ ᓯᕗᓕᖅᑏᒃ ᐅᖃᓚᐅᖅᑐᑦ ᐅᐱᒍᓱᖕᓂᕋᖅᖢᑎᒃ ᑲᑎᒪᔨᕋᓛᓄᑦ, ᓇᓗᓇᐃᖅᓯᓪᓗᑎᒃ ᖃᓄᖅ ᑲᔪᖏᖅᓴᐃᔪᓐᓇᕐᒪᖔᑕ ᒪᒃᑯᒃᑐᓂᑦ ᑕᑯᓪᓗᑎᒃ, ᖁᕕᐊᒋᔭᖃᖅᑐᓂᒃ ᓄᓇᕗᒻᒥᐅᓂᒃ ᐱᓕᕆᐊᖃᖅᑐᓂᒃ ᐊᒃᓱᕈᓐᓇᓂᖅᐹᓂᒃ ᐱᕕᒃᓴᑦᑎᓐᓂ. ᐅᖃᐅᓯᖃᓚᐅᕐᒥᔪᑦ ᓇᖕᒥᓂᖅ ᐃᓱᒪᒋᔭᒥᖕᓂᒃ ᖃᓄᖅ ᐊᑐᖅᓯᒪᔭᖏᑦ ᑐᑭᓯᐅᒪᓕᕈᑎᒋᖕᒪᖔᑦ ᐊᕙᑎᑦᑎᓐᓂ ᓯᓚᐅᓪᓗ ᒥᒃᓵᓄᑦ. ᐃᓱᒪᒋᔭᒥᓂᒃ ᐅᖃᖃᑎᒌᑐᐃᓐᓇᓚᐅᖅᐳᑦ ᐃᓚᐅᑎᑦᑎᓪᓗᑎᒡᓗ, ᑲᑎᒪᔨᕋᓛᓂᑦ ᖃᔅᓯᑲᓪᓚᖕᓂᒃ ᐃᓱᒫᓘᑕᐅᓗᐊᖅᑐᓂᒃ ᐅᖃᐅᓯᖃᖅᖢᑎᒃ.
ᓯᓚᐅᑉ ᐊᓯᔾᔨᖅᐸᓪᓕᐊᓂᖓᓄᑦ ᑐᖅᑲᖅᑕᕐᕕᒃ ᐊᓕᐊᓇᐃᒍᓱᒃᑐᑦ ᑐᓴᖅᑎᑦᑎᔭᕆᐊᒃᓴᖅ ᒪᕐᕉᖕᓂᒃ ᓄᑖᓂᒃ ᐃᓕᓐᓂᐊᕈᑎᒃᓵᖕᓂᒃ ᓴᖅᑭᑎᑦᑎᖕᒪᑕ ᐱᔾᔪᑎᖃᓗᐊᖅᑐᑦ ᓯᓚᐅᑉ ᐊᓯᔾᔨᖅᐸᓪᓕᐊᓂᖓᓂᑦ ᑲᔪᓰᓐᓇᕈᓐᓇᖅᑐᓂᒡᓗ ᐆᒻᒪᖅᑯᑎᑦ ᓴᖅᑭᔮᖅᑎᒃᑲᓐᓂᕐᓗᒋᑦ ᖃᓄᐃᓕᐅᕐᓂᕐᓗ.
ᓘᓯᐅᑉ ᐃᓕᓐᓂᐊᒐᒃᓴᖓ ᐅᓂᒃᑳᖅᑐᐊᖑᕗᖅ ᓴᓇᔭᐅᓯᒪᔪᖅ ᐃᓕᓐᓂᐊᖅᑎᓄᑦ ᐊᔪᙱᓐᓂᓕᖕᓄᑦ 1-ᒥ 3-ᒧ. ᒪᒃᑯᒃᑑᑉ ᐊᕐᓇᐅᑉ ᓘᓯᒥ ᐊᑎᑲᖅᑑᑉ ᓇᒧᙵᐅᕙᓪᓕᐊᓂᖓᓂ ᒪᓕᒃᐳᖅ ᐃᓕᑦᑎᕙᓪᓕᐊᑎᓪᓗᒍ ᖃᓄᖅ ᓯᓚᐅᑉ ᐊᓯᔾᔨᖅᐸᓪᓕᐊᓂᖓ ᐊᒃᑐᐃᖕᒪᖔᑦ ᐃᓚᒥᓂᒃ ᓄᓇᓕᖕᓂᓪᓗ. ᐱᓕᕆᖃᑎᖃᖅᖢᑎᒃ ᐅᓂᒃᑳᖅᑐᐊᖅᑎᓂᒃ ᑎᑎᕋᐅᔭᑦᑎᐊᖅᓯᒪᔪᓂᓪᓗ, ᐅᖃᓕᒫᒐᕐᒥ ᓇᓗᓇᐃᖅᑕᐅᔪᖅ ᐊᒃᑐᐊᖃᑦᑕᐅᑎᓂᖓᓂᒃ ᐃᓅᓯᑦᑎᓐᓂ, ᓯᓚᐅᑉ ᐊᓯᔾᔨᖅᐸᓪᓕᐊᓂᖓᓂ, ᐆᒻᒪᖅᑯᑎᒥᑦ ᓂᕈᐊᕆᔭᐅᕙᒃᑐᑦ ᖃᓄᕐᓗ ᓅᑉᐸᓪᓕᐊᓂᖅ ᑲᔪᓰᓐᓇᕈᓐᓇᖅᑐᓄᑦ ᐆᒻᒪᖅᑯᑎᖃᖅᑎᑦᑎᔨᑦ ᐃᑲᔪᕈᓐᓇᖅᐳᑦ ᓄᓇᓕᑦᑎᓐᓂ ᐊᕙᑎᑦᑎᓐᓂᒡᓗ.