ᔪᓚᐃ 27, 2026−ᒥ, ᐊᐅᓪᓛᖅᓯᒪᔪᑦ ᐃᖃᓗᖕᓂ ᓄᓇᓕᐸᐅᔭᒃᑯᑦ ᐊᐅᔭᒃᑯᑦ ᐅᓪᓗᒃᑯᑦ ᐊᐅᓪᓛᖅᓯᒪᕝᕕᖕᒥ ᐃᓚᐅᓚᐅᖅᐳᑦ "ᐊᔾᔨᙳᐊᑦ ᓯᕗᓂᒃᓴᑦᑎᓐᓂᙶᖅᑐᑦ" ᐱᓕᕆᐊᖑᔪᒥᒃ ᐋᖅᑭᒃᓱᖅᑕᐅᓪᓗᓂ ᒪᐅᕋᓐ ᕼᐊᐃᕗᑦᒧᑦ, ᐊᐅᔭᒃᑯᑦ ᐃᓕᓐᓂᐊᖅᑎ ᓄᓇᕗᒻᒥ ᓯᓚᐅᑉ ᐊᓯᔾᔨᖅᐸᓪᓕᐊᓂᖓᓄᑦ ᑐᖅᑲᖅᑕᕐᕕᖕᒥ (CCS−ᑯᓐᓂ). ᑖᓐᓇ ᐱᓕᕆᐊᖑᔪᖅ ᐃᓚᒋᔭᐅᕗᖅ ᐱᓕᕆᐊᖑᔪᒧᑦ ᑲᑎᖅᓱᐃᕙᓪᓕᐊᓂᕐᒧᑦ ᐅᓂᒃᑳᓂᒃ ᒪᒃᑯᒃᑐᓂᑦ ᓄᓇᕘᓕᒫᒥ, ᔫᑳᓐᒥ ᓄᓇᑦᑎᐊᒥᓗ.
ᐊᐅᓪᓛᖅᓯᒪᔪᑦ ᐅᖃᐅᓯᖃᓯᒋᐊᓚᐅᖅᐳᑦ ᐊᓯᔾᔨᕐᓂᐅᔪᓂᒃ ᖃᐅᔨᓯᒪᔭᖏᓐᓂᒃ ᐊᕙᑎᑦᑎᓐᓂ. ᐊᒥᐊᕆᓕᓚᐅᖅᐳᑦ, ᑎᑎᕋᐅᔭᖅᖢᑎᒃ ᑎᑎᕋᖅᖢᑎᒡᓗ ᖃᓄᖅ ᐅᑭᐅᖅᑕᖅᑐᒥ ᓄᓇᓖᑦ ᐱᕙᒌᔭᕈᓐᓇᕐᒪᖔᑕ ᐊᒃᑐᐃᓂᐅᔪᓄᑦ ᓯᓚᐅᑉ ᐊᓯᔾᔨᖅᐸᓪᓕᐊᓂᖓᓄᑦ, ᓂᕆᐅᒋᔭᖏᓐᓂᒃ ᓯᕗᓂᒃᓴᒧᑦ ᐊᒻᒪ ᑐᓴᖅᑕᐅᖁᔭᖏᓐᓂᒃ ᓯᓚᐅᑉ ᐊᓯᔾᔨᖅᐸᓪᓕᐊᓂᖓᓄᑦ ᓯᕗᓕᖅᑎᓄᑦ.
ᓯᑎᐱᕆ 22-ᒥᑦ 24-ᒧᑦ, 2026-ᒥ, ᑕᖕᒫᖅᓯᒪᔪᑦ ᐊᔾᔨᙳᐊᑦ ᑕᑯᒃᓴᐅᑎᑕᐅᓛᖅᑐᑦ ᓱᖏᐅᑎᕙᓪᓕᐊᓂᕐᒧᑦ ᑲᓇᑕᒥ 2026-ᒥ ᑐᕌᓐᑐᒥ. ᑲᓇᑕᓕᒫᒥ ᑲᑎᒪᕐᔪᐊᕐᓂᖅ ᑲᑎᑎᑦᑎᓂᐊᖅᐳᖅ 1,000 ᐅᖓᑖᓃᑦᑐᓂᒃ ᐃᓚᐅᔪᓂᒃ ᑭᒡᒐᖅᑐᐃᔪᓂᒃ ᓄᓇᓕᖕᓂᒃ ᐱᓕᕆᕝᕕᒋᔭᐅᔪᓂᒡᓗ ᑲᓇᑕᓕᒫᒥ ᐊᒥᖅᑳᖃᑎᖃᕐᓗᑎᒃ ᐃᓱᒪᒋᔭᒥᓂᒃ ᐊᑐᖅᑕᐅᔪᓐᓇᖅᑐᓂᒡᓗ ᐋᖅᑭᒃᓯᒪᓕᕈᑕᐅᔪᓐᓇᖅᑐᓂᒃ ᑭᐅᓯᓂᐊᕐᓗᓂ ᓯᓚᐅᑉ ᐊᓯᔾᔨᖅᐸᓪᓕᐊᓂᖓᓄᑦ.
