ᓯᓚ ᐊᓯᔾᔨᖅᐸᓪᓕᐊᔪᖅ ᐊᒃᑐᐃᕙᓪᓕᐊᕗᖅ ᓄᓇᕘᑉ ᓄᓇᖓᓂ, ᐆᒪᔪᓂᒃ ᐊᒻᒪ ᓄᓇᓕᖕᓂ ᐅᖅᑰᓯᕙᓪᓕᐊᓂᖓᓄᑦ, ᓯᑯ ᐊᐅᒃᐸᓪᓕᐊᓂᖓᓄᑦ ᐊᒻᒪ ᐆᒪᔪᑦ ᓇᔪᒐᖃᕐᕕᖏᑦ ᐊᓯᔾᔨᖅᐸᓪᓕᐊᓂᖏᓐᓄᑦ. ᑖᒃᑯᐊ ᐊᓯᔾᔨᖅᐸᓪᓕᐊᔪᑦ ᓯᓚ ᐊᓯᔾᔨᖅᐸᓪᓕᐊᔪᒧᑦ ᖃᓄᐃᓕᐅᕈᑎᒃᓴᑦ ᐱᒻᒪᕆᐅᑎᑦᑎᕗᑦ ᓄᓇᕘᓕᒫᒥ.
ᓄᓇᕐᔪᐊᓕᒫᒥ ᐅᓪᓗᕆᔭᐅᔪᖅ ᓯᓚ ᐊᓯᔾᔨᖅᐸᓪᓕᐊᔪᒧᑦ ᖃᓄᐃᓕᐅᕈᑎᒃᓴᑦ ᐱᓕᕆᐊᖑᕙᒃᐳᖅ ᐊᕐᕌᒍᑕᒫᑦ ᐅᑐᐱᕆ 24−ᖑᓕᕌᖓᑦ. ᐱᕕᖃᖅᑎᑦᑎᕗᖅ ᐃᓕᑦᑎᒃᑲᓐᓂᕐᓂᕐᒥᒃ ᓯᓚ ᐊᓯᔾᔨᖅᐸᓪᓕᐊᓂᔪᒧᑦ, ᐅᖃᐅᓯᕆᕙᒡᓗᒍ ᖃᓄᖅ ᑐᑭᖃᕐᒪᖔᑦ ᓄᓇᑦᑎᓐᓂ ᐱᓕᕆᓗᑎᒡᓗ.
ᓇᓗᓇᐃᕈᒪᓪᓗᒍ ᓄᓇᕐᔪᐊᕐᒥ ᐅᓪᓗᕆᔭᐅᑎᓪᓗᒍ ᓯᓚ ᐊᓯᔾᔨᖅᐸᓪᓕᐊᔪᒧᑦ ᖃᓄᐃᓕᐅᕆᐊᕐᓂᕐᒧᑦ, ᓄᓇᕗᒻᒥ ᓯᓚ ᐊᓯᔾᔨᖅᐸᓪᓕᐊᔪᒧᑦ ᑐᖅᑲᖅᑕᕐᕕᒃ ᓇᓗᓇᐃᖅᓯᕗᑦ ᔮᓱᐊ ᐊᐃᐱᓕ ᖁᒪᖔᐱᒃ ᓯᓚᓕᕆᔨᕐᔪᐊᓄᑦ ᐱᓕᕆᔾᔪᑎᒃᓴᐃᖏᓐᓂᒃ, ᐊᑭᖃᙱᖦᖢᓂ ᖏᑲᔫᑎᒃᓴᑦ ᐋᖅᑭᒃᓱᖅᑕᐅᓯᒪᓪᓗᑎᒃ ᐃᑲᔪᕈᒪᓪᓗᒋᑦ ᓄᓇᕗᒻᒥᐅᑦ ᓯᓚ ᐊᓯᔾᔨᖅᐸᓪᓕᐊᔪᒧᑦ ᖃᓄᐃᓕᐅᕈᑎᒃᓴᑦ ᓄᓇᓕᖏᓐᓂ. ᐅᕝᕙᐅᑯᐊ ᐊᕐᕕᓂᓖᑦ ᐊᑐᖅᑕᐅᔪᓐᓇᖅᑐᑦ ᐃᓕᖕᓂᒃ ᐃᑲᔪᕈᓐᓇᖅᐳᑦ ᐱᒋᐊᖅᐸᓪᓕᐊᑎᓪᓗᑎᑦ.
ᑭᓇ ᓯᓚᓕᕆᔨᕐᔪᐊᖑᕙ?
ᓯᓚᓕᕆᔨᕐᔪᐊ ᑭᓇᑐᐃᓐᓇᐅᕗᖅ ᐃᑲᔪᖅᐸᒃᑐᖅ ᓄᓇᓕᒋᔭᒥᓂᒃ ᑐᑭᓯᐅᒪᓪᓗᓂ ᐱᓕᕆᔪᓐᓇᕐᓗᓂᓗ ᓯᓚ ᐊᓯᔾᔨᖅᐸᓪᓕᐊᔪᒧᑦ.
ᓯᓚᓕᕆᔨᕐᔪᐊᑦ ᐃᒪᐃᓕᐅᕈᓐᓇᖅᐳᑦ:
- ᐅᖃᐅᓯᖃᖅᐸᒡᓗᑎᒃ ᖃᐅᔨᒪᔭᕐᒥᓂᒃ ᒥᑭᓪᓕᕙᓪᓕᐊᑎᑦᑎᓂᕐᒥᒃ ᑕᒪᐅᖓᑐᐃᓐᓇᖅ ᐳᔫᖅᐸᒃᑐᓂᒃ ᓱᓇᑐᐃᓐᓇᕐᓂᒃ ᓄᓇᕐᔪᐊᑎᓐᓂᒃ ᓱᕈᐃᕙᓪᓕᐊᔪᓂᒃ ᐊᒻᒪ ᐊᑐᖁᔨᕙᓪᓗᑎᒃ ᓴᓗᒪᓂᖅᓴᐅᔪᓐᓇᖅᑐᓂᒃ ᓄᑖᕈᒃᑲᓐᓂᕈᓐᓇᖅᑐᓂᒃ ᐆᒪᖅᑯᑎᓂᒃ.
- ᐃᑲᔪᕐᓗᒋᑦ ᐊᓯᑎᑦ ᑐᑭᓯᑎᓪᓗᒋᑦ ᐱᕙᒌᔭᕐᓗᒋᓪᓗ ᐊᒃᑐᐃᓂᐅᔪᓄᑦ ᓯᓚ ᐊᓯᔾᔨᖅᐸᓪᓕᐊᔪᒧᑦ.
- ᐃᑲᔪᖅᓱᕐᓗᒋᑦ ᐱᓕᕆᐊᑦ ᐃᑲᔫᑕᐅᔪᓐᓇᖅᑐᑦ ᓄᓇᓕᖕᓂ ᐱᕙᒌᔭᐃᓂᐊᕐᓗᓂ ᓯᓚ ᐊᓯᔾᔨᖅᐸᓪᓕᐊᔪᒧᑦ.
ᐊᔪᙱᑦᑐᕐᔪᐊᑦ ᓯᕗᒃᑲᖅᑕᐃᔪᓐᓇᖅᐳᑦ ᐆᒃᑑᑎᖃᕐᓗᑎᒃ, ᑐᓴᐅᒪᖃᑎᒌᒡᓗᑎᒃ ᐊᒻᒪ ᐊᓯᒥᓂᒃ ᐱᓕᕆᖃᑎᖃᕈᓐᓇᕐᓗᑎᒃ. ᑖᒃᑯᐊ ᖃᓄᐃᓕᐅᕈᑎᑦ ᐃᑲᔪᕈᓐᓇᖅᑐᑦ ᓄᓇᓕᖕᓂᒃ ᑐᓴᐅᒪᑎᑕᐅᖏᓐᓇᕐᓗᑎᒃ, ᐃᓚᐅᓗᑎᒃ ᐱᕙᒌᔭᕐᓗᑎᒡᓗ ᐊᒃᑐᐃᓂᐅᔪᓄᑦ ᓯᓚ ᐊᓯᔾᔨᖅᐸᓪᓕᐊᔪᒧᑦ.
ᖃᓄᖅ ᑕᐃᒪᐃᑦᑐᙳᕈᓐᓇᖅᐳᖓ?
ᐱᓕᕆᐊᖃᕐᓂᖅ ᓯᓚ ᐊᓯᔾᔨᖅᐸᓪᓕᐊᔪᒧᑦ ᐊᒃᓱᕈᕐᓇᖅᑑᔪᓐᓇᖅᐳᖅ, ᑭᓯᐊᓂ ᑕᒪᕐᒥᑦᑎᐊᖅ ᐊᑕᐅᑦᑎᒃᑯᑦ ᐱᓕᕆᔭᕆᐊᖃᙱᑕᑎᑦ.
ᐅᕝᕙᐅᑯᐊ ᐊᕐᕕᓂᓖᑦ ᐊᑐᖅᑕᐅᔪᓐᓇᖅᑐᑦ ᐱᒋᐊᕈᑎᒋᔪᓐᓇᖅᑕᑎᑦ ᓄᓇᔅᓯᓐᓂ.
ᐃᓕᖕᓂᒃ ᐃᓕᓐᓂᐊᕐᓗᑎᑦ
ᑐᑭᓯᕚᓪᓕᕐᓗᑎᑦ ᓯᓚ ᐊᓯᔾᔨᖅᐸᓪᓕᐊᓂᖓᓄᑦ, ᐃᓚᐅᓪᓗᑎᒃ ᐱᔾᔪᑎᖏᑦ, ᐊᒃᑐᐃᔾᔪᑎᖏᑦ ᐊᒻᒪ ᖃᓄᖅ ᑭᐅᒋᐊᕈᑎᖃᕈᓐᓇᕐᒪᖔᖅᐱᑦ.
ᓯᓚ ᐊᓯᔾᔨᖅᐸᓪᓕᐊᔪᒧᑦ ᖃᐅᔨᒪᓂᖅ ᓇᑭᙶᕈᓘᔭᖅᐳᖅ. ᓇᓂᔭᐅᔪᓐᓇᖅᐳᖅ ᖃᐅᔨᓴᖅᑕᐅᓯᒪᔪᓂ ᐊᓯᖏᓐᓂᒡᓗ ᑎᑎᕋᖅᓯᒪᔪᓂ ᐊᑐᖅᑕᐅᔪᓐᓇᖅᑐᓂ, ᐊᒻᒪᓗᑦᑕᐅᖅ ᐅᓂᒃᑳᓂ, ᐃᓕᓴᐃᔾᔪᑕᐅᕙᒃᑐᓂ ᐊᑐᖅᓯᒪᔭᖏᓐᓂᒡᓗ ᐃᓄᐃᑦ ᐃᓐᓇᐃᑦ, ᐊᖑᓇᓱᒃᑏᑦ ᐊᓯᖏᓪᓗ ᖃᐅᔨᒪᓂᕆᔭᐅᔪᓂᒃ ᑎᒍᒥᐊᖅᑎᐅᔪᑦ. ᓈᓚᒃᐸᒡᓗᓯ ᐃᓕᑦᑎᓗᓯᓗ ᐃᓄᖕᓂᑦ ᖃᐅᔨᓯᒪᔪᓂᒃ ᐊᓯᔾᔨᖅᐸᓪᓕᐊᔪᓂᒃ ᓄᓇᒥ ᓄᓇᓕᖏᓐᓂᒡᓗ.
ᐅᔾᔨᕈᓱᓕᖅᑎᑦᑎᒃᑲᓐᓂᕐᓂᖅ
ᖃᐅᔨᔭᐅᑎᓪᓗᒋᑦ ᖃᐅᔨᒪᔭᑎᑦ ᓯᓚ ᐊᓯᔾᔨᖅᐸᓪᓕᐊᔪᒧᑦ ᐊᓯᖕᓄᑦ. ᐋᖅᑭᒃᓱᐃᔪᖃᕐᓗᓂ ᓄᓇᓕᖕᓂ ᐱᓕᕆᐊᖑᔪᒥᒃ, ᐱᒋᐊᖅᑎᑦᑎᓗᓯ ᐅᖃᖃᑎᒌᖕᓂᕐᒥᒃ ᑲᑎᖃᑎᖃᕐᓗᓯᓘᓐᓃᑦ ᐃᓄᖕᓂᒃ ᐅᑯᑎᒎᓇᖅ, ᑭᒃᑯᑐᐃᓐᓇᓄᑦ ᑐᓴᐅᒪᑎᑦᑎᕙᖕᓂᕐᒧᑦ ᓄᓇᓕᖕᓂᓗ ᑲᑎᓐᓂᕆᔭᐅᔪᑎᒍᑦ.
ᑐᓴᐅᒪᖃᑎᒌᖕᓂᖅ ᐊᑐᖅᓯᒪᔭᒥᓂᒡᓗ ᐃᑲᔫᑕᐅᔪᓐᓇᖅᐳᖅ ᐃᓄᖕᓂᑦ ᑐᑭᓯᕚᓪᓕᕐᓗᑎᒃ ᓯᓚ ᐊᓯᔾᔨᖅᐸᓪᓕᐊᔪᒧᑦ ᐃᓚᐅᔪᓐᓇᕐᓗᑎᒡᓗ ᓄᓇᓕᖕᓂᑦ ᐱᓕᕆᑎᑕᐅᔪᓂᒃ.
ᐱᓕᕆᓂᒃᑯᑦ ᓯᕗᓕᖅᑎᐅᓂᖅ
ᑲᔪᓰᓐᓇᕈᓐᓇᖅᑐᓂᒃ ᓂᕈᐊᖅᐸᒡᓗᑎᑦ ᖃᐅᑕᒫᑦ ᐃᓅᓯᕐᓂ, ᓲᕐᓗ ᐊᒃᑕᑯᓂᒃ ᒥᒃᖠᒋᐊᖅᑎᑦᑎᓂᖅ, ᐆᒻᒪᖅᑯᑎᓂᒃ ᐊᑐᑦᑎᐊᕐᓂᖅᓴᐅᓂᖅ ᐊᒻᒪ ᐃᑲᔪᖅᓱᐃᓂᖅ ᓄᓇᓕᖕᓂ ᐊᕙᑎᒧᑦ ᐱᓕᕆᐊᖑᕙᓪᓕᐊᔪᒪᔪᓂᒃ.
ᓯᕗᓕᖅᓱᑦᑎᐊᕐᓂᖅ ᑎᓕᐅᕆᔪᓐᓇᖅᐳᖅ ᐊᓯᖕᓂᒃ ᐱᐅᔪᓂᒃ ᐊᓯᔾᔨᖅᓯᔪᓐᓇᕐᓂᕐᒥᒃᑕᐅᖅ.
ᓄᓇᔅᓯᓐᓂ ᐱᓕᕆᖃᑕᐅᖃᑦᑕᕆᑦ
ᐱᓕᕆᖃᑎᖃᖅᐸᒡᓗᓂ ᓄᓇᓕᖕᓂ ᑲᑐᔾᔨᖃᑎᒌᓂᒃ ᐃᓚᐅᕙᒡᓗᓂᓗ ᓄᓇᓕᖕᓂ ᐱᓕᕆᐊᖑᔪᓂᒃ, ᓲᕐᓗ ᓴᓗᒻᒪᖅᓴᐃᓂᕐᒥᒃ ᓯᓚᐅᓪᓗ ᐊᓯᔾᔨᖅᐸᓪᓕᐊᓂᖓᓄᑦ ᐱᓕᕆᐊᖑᔪᓂᒃ.
ᐃᓚᐅᖃᑕᐅᓂᖅ ᐃᑲᔪᕈᓐᓇᖅᑐᖅ ᑲᑎᖃᑎᖃᕐᓂᕐᒥᒃ ᐊᓯᖕᓂᒃ ᓄᓇᓕᔅᓯᓐᓂ ᐱᓕᕆᐊᖃᕐᓂᕐᒥᒡᓗ ᓯᓚ ᐊᓯᔾᔨᖅᐸᓪᓕᐊᔪᒧᑦ.
ᐃᑲᔪᖅᓱᕐᓗᒋᑦ ᓄᓇᓕᖕᓂ ᐱᓕᕆᐊᖑᕙᓪᓕᐊᔪᒪᔪᑦ
ᐃᑲᔪᖅᓱᕐᓗᒋᑦ ᐊᑐᐊᒐᐃᑦ ᐱᓕᕆᐊᒃᓴᐃᓪᓗ ᓄᓇᔅᓯᓐᓂ ᐊᕕᒃᓯᒪᓂᔅᓯᓐᓂᓘᓐᓃᑦ ᐃᑲᔪᖅᑐᓂᒃ ᑭᐅᓯᓂᕐᒥᒃ ᓯᓚ ᐊᓯᔾᔨᖅᐸᓪᓕᐊᔪᒧᑦ, ᓲᕐᓗ ᐊᓯᔾᔨᒋᐊᒐᒃᓴᐅᔪᓂᒃ ᐆᒻᒪᖅᑯᑎᓂᒃ, ᐊᒃᑕᑯᓂᒃ ᒥᒃᖠᒋᐊᖅᑎᑦᑎᓂᕐᒧᑦ ᐱᓕᕆᐊᖑᕙᒃᑐᓂᒃ ᐆᒻᒪᖅᑯᑎᑐᓗᐊᙱᓐᓂᖅᓴᓂᒡᓗ ᐊᖏᕐᕋᕆᔭᐅᔪᓂᒃ.
ᐱᓕᕆᖃᑎᒌᓕᖅᐸᓪᓕᐊᓂᖅ
ᐱᓕᕆᖃᑎᖃᕐᓗᑎᒃ ᐊᓯᖏᓐᓂᒃ ᓯᓚᓕᕆᔨᕐᔪᐊᓂᒃ, ᒪᒃᑯᒃᑐᓂᒃ, ᐃᓐᓇᓪᓚᕆᖕᓂᑦ, ᐃᓕᓴᐃᔨᓂᒃ, ᐊᒻᒪ ᑲᑐᔾᔨᖃᑎᒌᓂᒃ ᐅᖃᖃᑎᒌᒃᐸᒡᓗᓯ ᐃᓱᒪᓕᐊᕆᔭᔅᓯᓐᓂᒃ, ᖃᐅᔨᒪᔭᔅᓯᓐᓂᒃ ᐱᓕᕆᔾᔪᑎᒃᓴᔅᓯᓐᓂᒡᓗ.
ᐱᓕᕆᖃᑎᒌᖕᓂᖅ ᓴᙱᒃᑎᒋᐊᖅᑎᑦᑎᔪᓐᓇᖅᐳᖅ ᓯᓚ ᐊᓯᔾᔨᖅᐸᓪᓕᐊᔪᒧᑦ ᐱᓕᕆᐊᖑᔪᓂᒃ ᓄᓇᕘᓕᒫᒥ.
ᐃᓚᐅᖃᑕᐅᒋᑦ ᓄᓇᕐᔪᐊᓕᒫᒥ ᐅᓪᓗᕆᔭᐅᑎᓪᓗᒍ ᓯᓚ ᐊᓯᔾᔨᖅᐸᓪᓕᐊᔪᒧᑦ ᐱᓕᕆᑎᑕᐅᔪᓂᒃ
ᐊᓯᐊᒍᖔᖅ ᕿᓂᖅᐲᑦ ᐃᓚᐅᓕᕐᓇᖅᑐᓂᒃ? ᓄᓇᕗᒻᒥᐅᑦ ᐃᓚᐅᔪᓐᓇᖅᐳᑦ ᓄᓇᕐᔪᐊᓕᒫᒥ ᐅᓪᓗᕆᔭᐅᑎᓪᓗᒍ ᓯᓚ ᐊᓯᔾᔨᖅᐸᓪᓕᐊᔪᒧᑦ ᐱᓕᕆᑎᑕᐅᔪᓂᒃ ᐃᖃᓗᖕᓂ ᓄᓇᕘᓕᒫᒥᓗ.
ᓯᕙᑖᕐᕕᖕᒥ, ᐅᑐᐱᕆ 24−ᒥ, ᐃᖃᓗᖕᒥᐅᑦ ᑐᙵᓱᒃᑎᑕᐅᕗᑦ ᐃᓚᐅᖁᔭᐅᓪᓗᑎᒃ ᓄᓇᕗᒻᒥ ᓯᓚ ᐊᓯᔾᔨᖅᐸᓪᓕᐊᔪᒧᑦ ᑐᖅᑲᖅᑕᕐᕕᖕᒧᑦ ᐊᑭᖃᙱᑦᑐᒥᒃ ᑕᕐᕆᔭᕐᓗᑎᒃ Anthropocene−ᒥ: ᐃᓅᑉ ᐃᓅᓯᕆᓚᐅᖅᓯᒪᔭᖓ 2-ᒥᑦ 4-ᒧᑦ ᐅᓐᓄᒃᓴᒃᑯᑦ ᑕᕐᕆᔭᕐᕕᖕᒥ. ᓂᐅᖅᑲᒐᒃᓴᖅᑕᖄᕐᔪᖕᓂᐊᖅᑐᖅ ᐹᑉᑯᐊᖃᕐᓗᓂᓗ.
ᐃᖃᓗᐃᑦ ᓯᓚᑖᓂ, ᓄᓇᕗᒻᒥᐅᑦ ᐃᓚᐅᔪᓐᓇᖅᐳᑦ ᐊᔾᔨᓕᐅᖅᓯᒪᔭᒥᓂᒃ ᓵᓚᒃᓴᕋᓲᑎᖃᕐᓗᑎᒃ ᓯᓚ ᐊᓯᔾᔨᖅᐸᓪᓕᐊᓂᖓᓄᑦ ᑐᖅᑲᖅᑕᕐᕕᐅᑉ ᐅᖅᑰᔪᖁᑎᓂᒃ ᓇᓴᕐᓂᒡᓗ. ᐱᔾᔪᑕᐅᔪᖅ "ᓄᓇ ᖃᓄᖅ ᑐᑭᖃᖅᐸ ᐃᓕᖕᓄᑦ?" ᐊᔾᔨᓕᐅᖅᓯᒪᔪᑦ ᑕᑯᒃᓴᐅᑎᑦᑎᔪᑦ ᐊᐅᓪᓛᖅᓯᒪᑎᓪᓗᓯ ᐱᔭᐅᔪᒪᑦᑎᐊᖅᑐᑦ.
ᐱᓇᔪᖃᑕᐅᔪᒪᒍᕕᑦ, ᐃᕐᖐᓐᓈᖅᑕᐅᒃᑯᑦ ᓇᒃᓯᐅᑎᓗᒍ ᐊᔾᔨᙳᐊᑦ ᐅᑯᓄᖓ climatechange@gov.nu.ca ᐅᕝᕙᓘᓐᓃᑦ ᓴᖅᑭᑎᓪᓗᒍ ᐃᓄᖕᓄᑦ ᑐᓴᐅᒪᔪᓕᕆᔾᔪᑎᒃᑯᑦ ᐊᑐᕐᓗᒍ #InternationalDayofClimateActionNU2026. ᐱᓇᓱᐊᕈᒪᔪᓄᑦ ᐃᓱᓕᕝᕕᒃᓴᖃᖅᑐᖅ ᓄᕕᐱᕆ 9, 2026-ᒥ.
ᐃᓅᖕ ᑐᓂᓯᔫᑉ ᐱᓇᔪᒍᑎᒋᔭᓕᒫᖏᑦ ᐊᔾᔨᓕᐅᖅᓯᒪᓪᓚᑦᑖᕆᐊᖃᖅᐳᑦ. AI−ᒧᑦ ᐊᐅᓚᑕᐅᔪᑦ ᐊᔾᔨᙳᐊᑦ ᐊᒻᒪ ᐊᔾᔨᓕᐅᖅᓯᒪᔪᑦ ᓴᓇᔭᐅᔪᑦ ᐊᓯᖏᓐᓄᑦ ᐊᔪᖅᑎᑕᐅᔪᑦ.
ᑐᓐᓂᖅᑯᑕᐅᔪᑦ ᐊᔾᔨᙳᐊᑦ ᓇᖕᒥᓂᕆᔭᐅᓕᖅᐸᒃᐳᑦ ᓄᓇᕗᑦ ᒐᕙᒪᒃᑯᖏᓐᓄᑦ ᐊᑐᖅᑕᐅᑐᐃᓐᓇᕆᐊᖃᖅᖢᑎᒡᓗ ᓯᓚ ᐊᓯᔾᔨᖅᐸᓪᓕᐊᔪᒧᑦ ᑐᖅᑲᖅᑕᕐᕕᖕᒧᑦ ᓄᓇᕗᑦ ᒐᕙᒪᖓᑕᓗ ᐃᓕᓐᓂᐊᖅᑎᑦᑎᓂᕐᒧᑦ ᑐᓴᐅᒪᑎᑦᑎᓂᕐᒧᓪᓗ ᐱᖁᑎᖏᓐᓄᑦ.
ᖃᐅᔨᒋᐊᕐᓗᒋᑦ ᔮᓱᐊ ᐊᐃᐱᓕ ᖁᒪᖔᐱᒃ ᓯᓚᓕᕆᔨᕐᔪᐊᑉ ᐱᓕᕆᔾᔪᑎᒃᓴᖏᑦ
ᑭᖑᓪᓕᕐᒥ ᐱᓕᕆᐊᒃᓴᓄᑦ ᐱᑐᐃᓐᓇᕆᐊᖃᓕᖅᐱᑦ? ᖃᐅᔨᓇᓱᒡᓗᒋᑦ ᐊᑐᕈᓐᓇᖅᑐᑦ ᑐᓴᖅᑕᐅᔪᒃᓴᑦ, ᐃᑲᔫᑎᒃᓴᑦ ᐃᓱᒪᒋᔭᒃᓴᓪᓗ ᐃᓕᖕᓂᒃ ᐃᑲᔫᑎᒃᓴᑦ ᓯᓚ ᐊᓯᔾᔨᖅᐸᓪᓕᐊᓂᖓᓄᑦ ᐱᓕᕆᑎᑦᑎᔪᓂᒃ ᓄᓇᔅᓯᓐᓂ.