Hilaup aadlangurninnga ajuqhaqtipkailiqtaa Nunavuutim nunanga, huradjat nunallaangillu uunnakpalianinnganit, mahaktiqtuq hiku aadlanguliqtuqlu avatinga. Hapkuat aallannguqtirutit piliuqtaa hilaup ilitquhia hulidjutit anginiqaqtut tamainni avikturniinni.
Nunarjuami Ublua Hilaup Qanuriliurninnga pivaktuq ukiuq tamaat Tattiarnaqhilirvia 24-mi. Tunihimaarniaqtuq pidjutikharnik ajuirianganik talvuuna hilaup allanguqtiginikkut, uqarianganik talvuuna qanuqtut tukiqaqqa nunalaaptingnun hanaqidjutijaarni.
Naunaijautigilugu Nunarjuami Ublua Hilaup Aalannguqtirninga Qanuriliurutikhanik, Nunavunmi Hilaup Aalannguqtirninga Havagviat naunaiqtitait Joshua Ipeelie Komangapik Hilaup Aalannguqtirninga Akimajuq Atuqtakhait, akiituq hanaqidjutikhaq havakhimajuq ikajurianganik Nunavunmiunun aulatitijaangat hilaup allanguqtiginikkut hanaqidjutikharnik nunalaamingni. Hamma siksiujut qanuriliurutikhat ikajuutikhat ikajurniaqtaatit aularutijaangni.
Kinauva hilaup aalannguqtirninga akimajuq?
Hilaup Aalannguqtirninga akimajuq taamnaujuq qujaginaq ikajuqpaktuq nunamingni kangiqhijakhainik qanuriliurutikhainiklu hilaup aalannguqtirninga.
Hilaup Aalannguqtirninga akimajut imailiuqtaaqtut:
- Tunilugit ilihimajarnik talvuuna ikiglinahuarutikhanik pujuum anialaiqutaa anianiinnik imaalu aturnikhanik aularaanginnaqtun auladjutikhat.
- Ikajurlugit aalat kangiqhijaangini imaalu upalungaijarlugit hulaqutainun hilap aalanguqtirniranun.
- Ikajurlugit hulidjutit tapkua ikajuutaujut nunallaanun upalungaijautinun aalanguqtirniranun hilap.
Ikajuqtiujut hivuliqtuittaaqtut naunaijattiarlutik, uqautigilugit naunaitkutikhat imaalu havaqatigilugit aallat. Hapkua hulidjutit ikajuutauniaqtut nunallaanun kangiqhimapkarlugit, ilaulutik imaalu upalungaijarlutik hulaqutainun hilap aalanguqtirniranun.
Qanuq taimailiniaqqik?
Qanuriliurutikhanik hilaup aalannguqtirninga ihumalungnaqpiaktuq, kihimi tamaita pijakhaittutit atauttikkut.
Hamma siksit qanuriliurutikhat aullaqtirutikhatit nunangni.
Iliharlutit ilingnik!
Piliurlugu kangiqhimaniq hilap aalanguqtirniranun, ilaujut qanuriliuridjutit, hulaqutainun qanurlu kiudjuttauniaqtuq.
Hilaup Aalannguqtirninga qaujihimaniq qaijuq hamanga amihunit pivikhanit. Nalvaaqtauvaktuq qaujikhaidjutini aallanilu titiraqhimajuni atuqtakhani, unipkaanilu, ilihaudjijuni atuqpakhimajainniklu Inuit Inirnikhaanit, anguniaqtinit aallanillu ilihimarniq tigumidjutiqaqtut. Naalaklutit iliharlutit inungnit takuvaktunit aallannguqtirutinik nunami nunalaanullu hivullirmi.
Ilituqhaidjutit.
Uqautigilugit ilihimajatit mikhaagun hilap aalanguqtiqniatigut aalanun. Ihuaqhailutit nunangni hulipkaidjutikhamik, uqaqatigilugit imaaluuniit ilaulutit inungnut tuhaqtidjutikkut imaalu nunangni katimapkailutit.
Uqautigilugit kangiqhidjutit atuqhimajatiklu ikajuutauniaqtut amigaitunun inungnun kangiqhijaangini hilap aalanguqtirniranun ilaulutiklu nunamingni hulidjutinun.
Hivuliqtiulutit tautuktaulutit
Ihuaqtumik pijakhaqaqlutit ubluq tamaat inuuhirni, imaatut ikilijuumirlugit iqakut, aturlugit auladjutit ihuatqiamik imaalu ikajurlugit nunamingni avatiliqinikkut pinahuarutit.
Hivuliqhuqniq tautuktauluni akhuurutauniaqtuq aalanun ihuaqtumik aalanguqtigianganilu.
Ilauvaklutit nunangni
Havaqatigilugit nunalaani havagviingit ilaulutiklu nunalaani havaakhangit, taimaitutun halumaqhinikkut hilaup allanguqtiginikkut hulilukaaqtunik.
Ilaujaangat ikajuutiginiaqtuq katitirutikharnik allanun nunalaaptingni taima havakhimaaqtilunik hanaqidjutikharnik talvuuna hilaup allanguqtiginikkut.
Ikajurlugit nunamingni uuktuutikhat
Ikajurlugit maliguagakhat imaalu havaakhat nunallaangni uvaluuniin aviktuqhimajuni tapkua ikajuutaujut uqautigilugu hilap aalanguqtirniatigut, imaa atutqiktaaqtut auladjutit, iqakut ikilijuumirutikhat pinahuarutit imaalu amigairjuumilugit auladjutit-ihuatqiat iglut.
Havaklutik paanariigutikhamik
Uqaqatigilugit aallat hilaup aalannguqtirninga akhuurutiqaqtunut, inulrammiit, Inirnikhaat, ilihaijit timiqutaujullu uqautigilugit ihumagijamingnik, qaujimajamingnik atuqtakhaniklu.
Havaqatigiikniq ikajurniaqtuq hakugiktigiami hilaup qanuriliurninnga tamainni Nunavunmi.
Ilaulutin nunarjuami Ublua Hilaup Qanuriliurninnga:
Qiniqhiavit aallamik qanuriliurutikhamik ilaudjutikhamik? Nunavummiut ilauttaaqtut umani Nunarjuami Ublua Hilaup Allanguqtirninganut Qanuriliurutikhainik hulipkaidjutikhat Iqalungni tamainnilu avikturniinni.
Saalutimi, Tattiarnaqhilirvia 24, Iqalungni nunaqaqtut qaitqujaujut ilaulutik Nunavunmi Hilaup Aalannguqtirninga Havagviat akiittumik qun'ngiaqtitiniaqtut hapkuninga Anthropocene: Una Human Epoch 2-mit 4-mut ubluummaat talvani Astro Theatre-mi. Mikijumik niuqagakhamik popcorn-miklu ilaujut.
Hilataani Iqaluit, Nunavunmiutat ilaugiaqaqtun piksanik akimajukharnik akimanahuarianganik CCSnik akuvruarmik naharmiklu. Pidjutaujuq "Hunauva nuna kangiqhidjutaa ilingnun?" Piksaliuqhimajut tautuktitijut aulaaqpakhimajainik nunami atuqujaujut.
Uukturiami, qaritaujakkut tujurlugu piksat hamunga climatechange@gov.nu.ca iliurarluguluunniit inungnun tuhaumapkaidjutinin aturlugu #InternationalDayofClimateActionNU2026. Umikvikhaa uukturiami Hikutirvia 9, 2026.
Tamaita uuktuutit piksaliuqhimajukhat inungmin tujuqtumin. AI-piliuqhimajut piksat piksallu piliuqtauhimajut kinamit pilimaittut.
Tunijauhimajut piksat nanminiriliqtait Nunavut Kavamanga atuqtauniarungnaqhijullu talvani Hilaup Aalannguqtirninga Havagviat ukuallu Nunavut Kavamanga ilihautikhat tuhapkaidjutikhainullu atuqtakhat.
Qiniqhimaarlugu tamna Joshua Ipeelie Komangapik Hilaup Allanguqtiginikkut Atuqtakharnik
Upalungaiqhimavit tuklianik atuqtakharnik? Qiniqhimaarlugu ikajuutikhat kangiqhidjutinun, ikajuutikhanun ihumaliurutinunlu ikajuutikhat hilap aalanguqtirniranun hulidjutinun nunallaangni.