ᐊᑐᒃᑲᓐᓂᕈᓐᓇᖅᑐᑦ ᐆᒻᒪᖅᑯᑎᓄᑦ ᐃᒡᓗᕋᓛᕐᒧᑦ ᐊᐃᑦᑑᑎᓄᑦ ᑐᑭᒧᐊᒍᑎᑦ

ᐃᒡᓗᕋᓛᓂᒃ ᓇᖕᒥᓂᖃᖅᑏᑦ:

• ᐱᓕᕆᐊᖑᔪᒧᑦ ᑐᙵᕕᒋᔭᐅᔪᖅ
• ᐱᓇᔫᑎᖓ

---

ᐊᑐᒃᑲᓐᓂᕈᓐᓇᖅᑐᑦ ᐆᒻᒪᖅᑯᑎᓄᑦ ᐃᒡᓗᕋᓛᕐᒧᑦ ᐊᐃᑦᑑᑎᓄᑦ ᑐᑭᒧᐊᒍᑎᑦ

ᐊᕙᑎᓕᕆᔨᒃᑯᑦ ᓯᓚ ᐊᓯᔾᔨᖅᐸᓪᓕᐊᔪᒧᑦ ᑐᖅᑲᖅᑕᕐᕕᒃ  ᑮᓇᐅᔭᖃᖅᑎᑦᑎᔨᐅᕗᑦ ᐃᒡᓗᕋᓛᖃᖅᑎᓄᑦ ᓄᓇᕗᒻᒥ ᐃᑲᔫᑎᒃᓴᓂᒃ ᐋᖅᑭᒋᐊᕈᑎᒃᓴᓂᒃ ᐊᑭᖓᓄᑦ ᐃᓕᔭᐅᓂᐊᖅᑎᓪᓗᒍ ᐊᑐᒃᑲᓐᓂᕈᓐᓇᖅᑐᑦ ᐆᒻᒪᖅᑯᑎᓄᑦ ᐃᒡᓗᕋᓛᖏᓐᓄᑦ. ᐅᑯᐊ ᑮᓇᐅᔭᑦ ᐊᑐᐃᓐᓇᕈᖅᑎᑕᐅᔪᑦ ᐃᒪᓐᓇ ᐋᖅᑭᒃᓯᒪᓪᓗᑎᒃ ᐊᑕᐅᓯᐊᕐᓗᒍ ᐊᑭᓕᒃᑲᓐᓂᕆᐊᖃᙱᖦᖢᓂ ᐊᐃᑦᑑᑎᑦ.

1. ᑭᒃᑯᑦ ᐱᓇᔪᒍᓐᓇᖅᐸᑦ?

• ᓄᓇᕗᒥᐅᑦ ᐃᒡᓗᕋᓛᖃᖅᑐᑦ ᐱᓇᔪᒍᓐᓇᖅᑐᑦ: ᓄᓇᕗᒥᐅᑕᖅ ᐃᓅᓗᓂ ᓄᓇᕗᒥᐅᑕᓪᓚᕆᐅᓗᓂᓗ.
• ᑐᒃᓯᕋᖅᑐᖅ ᐅᑭᐅᖃᕆᐊᖃᖅᐳᑦ 19−ᓂᒃ.
• ᑖᓐᓇ ᐊᐃᑦᑑᑎ ᐊᑐᐃᓐᓇᐅᓂᐊᖅᐳᖅ ᐊᑕᐅᓯᐊᕐᓗᓂ ᐃᒡᓗᕋᓛᓕᖕᒧᑦ ᐊᑕᐅᓯᕐᒧᑦ.

2. ᑭᓱᓂᒃ ᐃᓕᐅᖅᑲᐃᓂᐊᕋᒪ?

• ᐊᑐᒃᑲᓐᓂᕈᓐᓇᖅᑐᓂᒃ ᐆᒻᒪᖅᑯᑎᓕᕆᔾᔪᑎᓂᒃ ᓇᓗᓇᐃᒃᑯᑦᑎᖅᓯᒪᔪᓄᑦ ᑲᓇᑕᒥ ᐱᔾᔪᓯᕆᔭᐅᔪᖅ ᑲᑐᔾᔨᖃᑎᒌᓄᑦ (CSA Group) ᓇᓗᓇᐃᒃᑯᑕᕐᒥᒃ:
  
  • ᓯᕿᓂᕐᒧᑦ ᐆᒻᒪᖅᑯᑎᑐᕈᓯᖅ (photovoltaic, ᐅᕝᕙᓘᓐᓃᑦ PV) ᐱᓕᕆᔾᔪᓯᑦ
  • ᐊᓄᕆᑦᑑᑎᑦ
  • ᕚᑕᓖᓄᑦ ᐃᑲᔪᖅᑐᐃᔾᔪᑎᑦ ᖁᓛᓂ ᓇᓗᓇᐃᖅᓯᒪᔪᓄᑦ.
• *ᖃᐅᔨᒪᔭᐅᒋᐊᓕᒃ: ᑲᓇᑕᒥ ᐱᔾᔪᓯᕆᔭᐅᔪᒃᑯᑦ ᑲᑐᔾᔨᖃᑎᒌᓂᒃ ᓇᓗᓇᐃᒃᑯᑕᖅ ᑐᑭᖃᖅᐳᖅ ᑖᓐᓇ ᐱᓕᕆᐊᖅ ᐊᔪᖅᑎᑕᐅᙱᓐᓂᖓᓂ ᐊᑐᖅᑕᐅᒋᐊᒃᓴᖅ ᑲᓇᑕᒥ.

3. ᓇᒧᑦ ᐃᓕᐅᖅᑲᕈᓐᓇᕋᒃᑯ?

• ᓄᓇᕗᒻᒥ ᐃᒡᓗᕋᓛᕐᒧᑦ.
  
  • ᐃᒡᓗᕋᓛᖅ ᓇᓗᓇᐃᖅᑕᐅᓯᒪᕗᖅ ᐃᒪᓐᓇ "ᐃᒡᓗᕋᓛᙳᑐᐊᖅᐸᑦ ᓄᓇᓖᑦ ᓯᓚᑖᓃᓪᓗᓂ ᐊᑐᖅᑕᐅᓲᖑᓗᓂᓗ ᐊᐅᓪᓛᖅᓯᒪᔪᓄᑦ ᐊᒻᒪ/ᐅᕝᕙᓘᓐᓃᑦ ᐊᐅᓪᓛᖅᓯᒪᔪᓄᑦ ᐱᓕᕆᕝᕕᐅᔪᓄᑦ ᐊᑐᖅᑕᐅᙱᓪᓗᑎᒡᓗ ᐊᖏᕐᕋᕆᔭᐅᓗᑎᒃ ᐃᒡᓗᒋᔭᐅᓗᑎᒃ."

4. ᖃᑯᒍ ᐃᓕᐅᖅᑲᕈᓐᓇᕋᒃᑭᑦ?

• ᐃᓕᐅᖅᑲᕈᓐᓇᖅᑕᑎᑦ ᓂᕈᐊᕆᔭᑎᑦ ᐊᑐᒃᑲᓐᓂᕈᓐᓇᖅᑐᑦ ᐆᒻᒪᖅᑯᑎᓄᑦ ᐊᐃᑦᑑᑎᒧᑦ ᐊᖏᖅᑕᐅᓚᐅᖅᑎᓪᓗᑎᑦ.
• ᐱᓕᕆᐊᑦ ᐱᐊᓂᒃᓯᒪᒋᐊᖃᖅᑐᖅ ᑕᖅᑭᑦ 12 ᐊᓂᒍᖅᓯᒪᓕᖅᑎᓪᓗᒋᑦ ᐊᖏᖅᑕᐅᓚᐅᖅᑎᓪᓗᑎᑦ.
• ᐱᓕᕆᐊᑦ ᐱᐊᓂᓚᐅᓱᖓᕈᖕᓂ, ᐊᑐᐃᓐᓇᕈᖅᑎᑦᑕᕆᐊᖃᖅᑐᑦ ᐱᓕᕆᐊᕐᒧᑦ ᓇᓕᖅᑲᐃᑦ ᐊᒻᒪ ᐊᔾᔨᓕᐅᖅᓯᒪᔪᑦ ᐊᑐᒃᑲᓐᓂᕈᓐᓇᖅᑐᑦ ᐆᒻᒪᖅᑯᑎᓄᑦ ᐃᓕᐅᖅᑲᓚᐅᖅᑕᑎᑦ ᓯᓚ ᐊᓯᔾᔨᖅᐸᓪᓕᐊᔪᒧᑦ ᑐᖅᑲᖅᑕᕐᕕᖕᒧᑦ.

5. ᑮᓇᐅᔭᑦ ᐅᕙᓐᓄᑦ ᒪᓂᒻᒪᒃᑕᐅᓇᔭᖅᑐᑦ ᖃᔅᓯᐅᕙᑦ?

• $5,000−ᒧᑦ ᑎᑭᓪᓗᒍ ᐊᑕᐅᓯᐊᕐᓗᒍ ᐃᒡᓗᕋᓛᕐᒧᑦ ᐊᑕᐅᓯᕐᒧᑦ, ᐊᐃᑦᑑᑎ ᐅᑎᖅᑎᑦᑕᕆᐊᖃᙱᖦᖢᓂ ᐱᓇᔫᑎᒋᓚᐅᖅᑕᑦ ᐊᖏᖅᑕᐅᓯᒫᓂᓕᖅᐸᑦ.

6. ᖃᓄᖅ ᐱᓇᔪᖕᓂᐊᕋᒪ?

• ᖃᐅᔨᒋᐊᕈᓐᓇᖅᑐᓯ ᓯᓚ ᐊᓯᔾᔨᖅᐸᓪᓕᐊᔪᒧᑦ ᑐᖅᑲᖅᑕᕐᕕᖕᒧᑦ ᓇᓗᓇᐃᖅᓯᓗᓯ ᐱᓕᕆᐊᕆᔪᒪᔭᓯ ᐊᔪᖅᑎᑕᐅᙱᓐᓂᖓᒃ ᐊᐃᑦᑑᑎᓄᑦ ᐅᕗᖓ ᑎᑎᕋᕐᕕᒋᓗᒋᑦ renewableenergy@gov.nu.ca
• ᐊᑭᒃᓴᖏᓐᓂᒃ ᖃᐅᔨᓇᓱᒍᓐᓇᖅᑐᓯ ᑳᓐᑐᓛᒃᑕᐅᓯᒪᔪᓄᑦ ᐱᖃᖅᑎᑦᑎᔨᐅᔪᓄᓪᓗ ᐱᓕᕆᐊᑦ ᐱᐊᓂᖕᓂᐊᕐᓗᒍ.
• ᐱᐊᓂᒡᓗᒍ ᐃᒡᓗᕋᓛᕐᓄᑦ ᐊᐃᑦᑑᑎᒧᑦ ᐱᓇᔫᑎᑦ ᑕᑕᑎᕆᐊᓕᒃ, ᐃᓚᓕᐅᑎᓗᒍᓗ ᐊᑎᓕᐅᖅᓯᒪᔪᖅ ᒪᓕᒐᖅᑎᒍᑦ ᓱᓕᓂᕋᕈᑎ ᓇᓗᓇᐃᖅᓯᓯᒪᔪᖅ ᐃᒡᓗᕋᓛᖃᖅᑎᐅᓂᕐᓂᒃ.
• ᑕᑕᑎᕈᒪᒍᕕᑦ ᑐᒃᓯᕋᐅᑎᒥᑦ, ᐅᓇ ᓇᕿᓪᓗᒍ.
• ᐱᓇᔫᑎᒋᔭᑦ ᓇᒃᓯᐅᑎᓗᒍ ᕿᓚᒻᒥᐅᓂᖅᐹᒃᑯᑦ.
  
  • ᐊᕐᕌᒍᑕᒫᑦ, ᐋᖅᑭᒃᑕᐅᔪᖃᖃᑦᑕᖅᐳᖅ ᐊᑭᒥᒃ ᑮᓇᐅᔭᓄᑦ ᐊᐃᑦᑑᑕᐅᓂᐊᖅᑐᓄᑦ. ᐅᑯᐊ ᑮᓇᐅᔭᑦ ᓯᐊᒻᒪᒃᑎᖅᑕᐅᖃᑦᑕᕐᓂᐊᖅᐳᑦ ᓯᕗᓪᓕᐅᔪᑦ ᐱᔨᑦᑎᖅᑕᐅᖅᑳᕐᓗᑎᒃ ᑭᓯᐊᓂ ᐊᑕᖏᖅᑕᐅᓗᑎᒃ ᑮᓇᐅᔭᑦ ᓯᐊᒻᒪᒃᑎᖅᑕᐅᕌᓂᒃᑐᐃᓐᓇᐅᒃᐸᑕ. ᐊᔪᕐᓇᙱᑦᑐᖅ ᑮᓇᐅᔭᑦ ᓴᓂᕐᕙᒃᑕᐅᔪᓐᓇᕐᓂᖏᓐᓂᒃ ᐊᕐᕌᒍ ᐃᓱᓕᓚᐅᙱᓐᓂᖓᓂ.

7. ᓇᒧᓪᓕ ᐱᓇᔫᑎᒐ ᓇᒃᓯᐅᑎᓂᐊᕋᒃᑯ?

• ᐱᓇᔫᑎᑦ ᓇᒃᓯᐅᑎᔪᓐᓇᖅᑕᑦ ᓯᓚᐅᑉ ᐊᓯᔾᔨᖅᐸᓪᓕᐊᓂᖓᓄᑦ ᑐᖅᑲᖅᑕᕐᕕᖕᒧᑦ:
  
  • ᑎᑎᖅᑲᑎᒍᑦ ᓯᓚᐅᑉ ᐊᓯᔾᔨᖅᐸᓪᓕᐊᓂᖓᓄᑦ ᑐᖅᑲᖅᑕᕐᕕᒃ ᐅᕗᖓ, P.O.  Box 1000, Stn. 1330, Iqaluit, NU, X0A 0H0
  • ᐃᕐᖐᓐᓈᖅᑕᐅᒃᑯᑦ ᐅᕗᖓ renewableenergy@gov.nu.ca
  • ᓱᒃᑲᔪᒃᑯᑦ ᐊᐅᓪᓚᖅᑎᓪᓗᒋᑦ ᐅᕗᖓ (867) 975-7799
  • ᐃᓕᖕᓂᒃ ᐊᒡᔭᕈᓐᓇᕆᓪᓗᒋᑦ ᐅᕗᖓ:
    • ᐃᒡᓗᕐᔪᐊᖅ 5100, ᐃᖃᓗᖕᓂ − ᓯᓚᐅᑉ ᐊᓯᔾᔨᖅᐸᓪᓕᐊᓂᖓᓄᑦ ᑐᖅᑲᖅᑕᕐᕕᖕᒧᑦ
    • ᐃᒡᓗᕐᔪᐊᖅ 1104A, ᐃᖃᓗᖕᓂ − ᐊᕙᑎᓕᕆᔨᒃᑯᑦ ᐊᖓᔪᖅᑳᖃᕐᕕᐊ
    • ᐆᒪᔪᕐᓂᐊᖅᑎᒃᑯᑦ ᑎᑎᕋᕐᕕᐊᓂ ᓄᓇᔅᓯᓐᓂ

8. ᑭᓱᓂᒃ ᒪᓕᒋᐊᓕᖕᓂᒃ ᓯᓚᐅᑉ ᐊᓯᔾᔨᖅᐸᓪᓕᐊᓂᖓᓄᑦ ᑐᖅᑲᖅᑕᕐᕕᒃ ᐊᑐᕐᓂᐊᖅᐸᑦ ᖃᐅᔨᓴᕐᓂᐊᓕᖅᐸᑕ ᐱᓇᔫᑎᒋᔭᓐᓂᒃ?

• ᐱᓇᔫᑎᓕᒫᑦ ᐱᓕᕆᐊᖑᓲᖑᕗᑦ ᑎᑭᑉᐸᓪᓕᐊᔪᑦ ᑲᒪᒋᔭᐅᕙᓪᓕᐊᖏᓐᓇᖅᖢᑎᒃ ᓯᓚᐅᑉ ᐊᓯᔾᔨᖅᐸᓪᓕᐊᓂᖓᓄᑦ ᑐᖅᑲᖅᑕᕐᕕᖕᒥ; ᓯᕗᓪᓕᐅᓪᓗᑎᒃ ᑎᑭᑉᐸᓪᓕᐊᔪᑦ ᑲᒪᒋᔭᐅᖅᑳᖅᐸᓪᓕᐊᓪᓗᑎᒃ. ᐱᓇᔫᑦ ᐃᓱᒪᒋᔭᐅᓂᐊᖅᐳᖅ ᓯᓚᐅᑉ ᐊᓯᔾᔨᖅᐸᓪᓕᐊᓂᖓᓄᑦ ᑐᖅᑲᖅᑕᕐᕕᖕᒥ ᐱᐊᓂᒃᑕᐅᓯᒪᓕᖅᐸᑦ ᑕᒻᒪᖅᑕᖅᓯᒪᙱᓪᓗᓂ ᐃᓗᓕᖃᕐᓗᓂᓗ ᑕᒪᐃᓐᓂᒃ ᑎᑎᖅᑲᓂᒃ ᐃᑲᔪᖅᑐᐃᔾᔪᑎᓂᒃ.
• ᐱᓇᔫᑎᑦ ᖃᐅᔨᓴᖅᑕᐅᖃᑦᑕᕐᓂᐊᖅᑐᑦ ᐅᑯᓂᖓ ᑐᙵᕕᖃᕐᓗᑎᒃ:
  
  • ᐱᓇᔫᑎᑦ ᑎᑎᕌᓂᑦᑎᐊᕐᓗᒍ, ᐊᒻᒪᓗ
  • ᐱᓕᕆᔾᔪᑎᓄᑦ ᑲᔪᓯᑎᒐᒃᓴᐅᓗᓂ.
• ᑐᑭᒧᐊᒃᑎᑦᑎᔨ ᓯᓚᐅᑉ ᐊᓯᔾᔨᖅᐸᓪᓕᐊᓂᖓᓄᑦ ᑐᖅᑲᖅᑕᕐᕕᖕᒥ ᐱᔪᓐᓇᐅᑎᖃᕐᒪᑕ ᑭᖑᓪᓕᖅᐹᒥ ᐃᓱᒪᓕᐅᕆᒋᐊᖃᖅᖢᑎᒃ ᑕᒪᐃᓐᓂᒃ ᐱᓇᔫᑎᓂᒃ ᑮᓇᐅᔭᓂᒃ.

9. ᖃᑯᒍᓕ ᖃᐅᔨᓛᕋᒪ ᐱᓇᔫᑎᒋᔭᕋ ᐊᖏᖅᑕᐅᓐᓂᖅᐸᑦ?

• ᓯᓚᐅᑉ ᐊᓯᔾᔨᖅᐸᓪᓕᐊᓂᖓᓄᑦ ᑐᖅᑲᖅᑕᕐᕕᖕᒥ ᑐᓂᓯᓛᖅᑐᑦ ᑎᑎᕋᖅᓯᒪᔪᒥᒃ ᖃᐅᔨᒃᑲᐃᔾᔪᑎᒥᒃ ᐅᖃᖅᓯᒪᓗᓂ ᐊᐃᑦᑑᑎᑖᕆᓕᒑᔭᑦ ᐊᖏᖅᑕᐅᖕᒪᖔᑦ ᐅᓪᓗᑦ 30 ᐱᓇᔫᑎᑦ ᐱᔭᐅᓚᐅᖅᑎᓪᓗᒍ.

10. ᖃᑯᒍ ᐊᐃᑦᑑᑎ ᐱᓛᕋᒃᑯ?

• ᓂᕆᐅᒍᓐᓇᖅᐳᓯ ᐊᐃᑦᑐᑎᑖᓚᕋᓱᒋᓗᓯ ᐱᓇᓱᐊᕈᓯᑦ ᑎᓴᒪᑦ ᐱᐊᓂᓚᐅᖅᑎᓪᓗᓯᐅᒃ ᑮᓇᐅᔭᓕᕆᔾᔪᑎᓄᑦ ᑎᑎᕋᖅᓯᒪᔪᓕᒫᑦ ᐱᓕᕆᐊᒃᓴᑦ ᐊᖏᖅᑕᐅᓚᐅᖅᑎᓪᓗᒍ. ᐅᑯᐊ ᑎᑎᕋᕐᕕᒃᓴᑦ ᐃᓚᓕᐅᔾᔭᐅᓯᒪᓂᐊᖅᑐᑦ ᐊᖏᖅᑕᐅᔾᔪᑎᖕᓄᑦ.

11. ᑭᓱᑦ ᐊᑭᓕᖅᓱᖅᑕᐅᕙᑦ?

• ᓄᑖᑐᐊᑦ ᐱᖁᑎᑦ, ᑎᑎᖅᑲᖁᑎᓕᔭᖅᑐᑦ ᑲᓇᑕᒥ ᒪᓕᒃᑕᐅᕙᒃᑐᓂᒃ ᑲᑐᔾᔨᖃᑎᒌᓂᒃ ᓇᓗᓇᐃᒃᑯᑦᑎᖅᓯᒪᔪᑦ ᐊᔪᙱᑦᑐᑦ.
• ᐆᒻᒪᖅᑯᑎᓂᑦ ᐊᑐᑦᑎᐊᕐᓂᖅ ᑭᓱᒃᓴᓕᒫᖏᓪᓗ ᐱᔭᐅᒋᐊᓕᑦ ᐃᓕᐅᖅᑲᕐᓂᐊᕐᓗᒋᑦ ᐆᒻᒪᖅᑯᑎᑐᕈᓯᑦ. (ᖃᐅᔨᒪᒋᑦ: ᑎᑎᕋᖅᓯᒪᔪᑦ ᐊᑕᖏᐅᒪᓪᓗᑎᒃ ᐊᔪᙱᑦᑐᑦ ᑭᓲᓂᖏᑦ ᓇᓂᔭᒃᓴᐅᔪᑦ ᐱᓇᔫᑎᓂᒃ ᑲᑎᖅᓱᖅᓯᒪᔪᓂᒃ.)
  
  • ᓯᕿᓂᕐᒧᑦ ᐆᒻᒪᖅᑯᑎᑐᕈᓯᖅ (photovoltaic, ᐅᕝᕙᓘᓐᓃᑦ PV) ᐱᓕᕆᔾᔪᓯᑦ.
  • ᐊᓄᕆᑦᑑᑎᑦ.
  • ᕚᑕᓖᓄᑦ ᐃᑲᔪᖅᑐᐃᔾᔪᑎᑦ ᖁᓛᓂ ᓇᓗᓇᐃᖅᓯᒪᔪᓄᑦ.
  • ᐊᐅᓪᓚᖅᑎᓐᓂᐊᕐᓗᒋᑦ ᐊᔪᙱᑦᑐᑦ ᐊᑐᒃᑲᓐᓂᕈᓐᓇᖅᑐᑦ ᐆᒻᒪᖅᑯᑎᑐᕈᓯᑦ, ᐱᖁᑏᓪᓗ ᐱᔭᐅᒋᐊᓕᑦ ᐃᓕᐅᖅᑲᕐᓂᐊᕐᓗᒋᑦ, ᓄᓇᓕᖕᓂ ᐃᒡᓗᕋᓛᕐᒧᑦ ᖃᓂᒋᔭᐅᓛᒧᑦ.

12. ᑭᓱᑦ ᐊᑭᓕᖅᓱᖅᑕᐅᔾᔮᙱᓚᑦ?

• ᓂᐅᕕᐊᕆᔭᓯ ᐅᕝᕙᓘᓐᓃᑦ ᐱᓕᕆᐊᕆᔭᓯ ᐊᐃᑦᑑᑎ ᐊᖏᖅᑕᐅᓚᐅᖅᑎᓐᓇᒋᑦ.
• ᓇᖕᒥᓂᖃᖅᑎᒧᑦ ᐱᓕᕆᐊᑦ.
• ᐲᔭᖅᑕᐅᓂᖏᑦ ᐱᑕᖃᖅᐸᒌᖅᑐᑦ ᐱᔾᔪᑎᒃᓴᑦ.
• ᐃᒡᓗᕋᓛᑉ ᑐᙵᕕᖏᑦ.
• ᐃᓚᒃᓴᒃᑲᓐᓃᑦ ᐃᑲᔪᖅᑐᐃᔾᔪᓯᑦ ᐱᔾᔪᑎᒃᓴᓄᑦ.
• ᐊᐅᓚᔾᔪᑏᑦ ᐋᖅᑭᐅᒪᔾᔪᑏᓪᓗ
• ᐊᓯᔾᔨᖅᓱᕐᓗᒋᑦ ᐱᑕᖃᖅᐸᒌᖅᑐᑦ ᐃᓗᓕᖅᑕᖏᑦ ᐱᔾᔪᑎᒃᓴᓄᑦ.
• ᐃᖏᕐᕋᔪᓕᕆᔨᒃᑯᑦ ᐱᖁᑎᓄᑦ ᐊᒻᒪ ᐃᓚᒃᓴᓄᑦ ᓄᓇᓖᑦ ᐊᒻᒪ ᐃᒡᓗᕋᓛᑉ ᐊᑯᓐᓂᖓᓐᓂ.
• ᐊᑭᓕᒐᒃᓴᑦ ᓴᖅᑭᓚᐅᖅᑐᑦ ᐱᔾᔪᑎᓄᑦ ᐃᓗᓕᖏᑦ ᐊᓯᔾᔨᖅᑕᐅᒋᐊᖃᕐᓂᖅᐸᑕ ᐱᔾᔪᑎᖃᕐᓗᑎᒃ ᓲᕐᓗ ᐱᐅᔪᓐᓃᖅᑐᖃᕐᓂᖅᐸᑦ ᑭᓱᑯᑦᑎᖏᓐᓂᒃ, ᓱᕋᖕᓂᖅᐸᑕ ᐱᓇᔪᒃᑐᒧᑦ ᓱᓕ ᑎᑭᐅᑎᓚᐅᖅᑎᓐᓇᒋᑦ, ᐃᓕᐅᖅᑲᖅᑕᐅᑎᓪᓗᒋᑦ ᐊᒻᒪ/ᐅᕝᕙᓘᓐᓃᑦ ᐊᐅᓚᑕᐅᑎᓪᓗᒋᑦ, ᐅᕝᕙᓘᓐᓃᑦ ᐊᓯᖏᑦ ᓇᓪᓕᐅᒃᑯᒫᓄᑦ ᐱᔾᔪᑕᐅᓲᓄᑦ.

13. ᑭᐊᓕ ᐆᒻᒪᖅᑯᑎᖃᐅᑎᒃᓴᒃᑲ ᐃᓕᐅᖅᑲᕐᓂᐊᕐᒪᒋᑦ?

• ᖃᔅᓯᑲᓪᓚᑦ ᒥᑭᑦᑑᑎᑦ ᐊᑐᒃᑲᓐᓂᕈᓐᓇᖅᑐᑦ ᐆᒻᒪᖅᑯᑎᑐᕈᓯᑦ ᐃᒡᓗᕋᓛᓄᑦ ᓇᓗᓇᐃᖅᑕᐅᓯᒪᕗᑦ ᐃᒪᓐᓇ "ᑲᑉᐳᑎᓗᒍ ᐱᙳᐊᕈᑎᒋᓗᒍᓗ" ᐊᔪᕐᓇᙱᑦᑎᐊᖅᖢᑎᒡᓗ ᐃᓕᐅᖅᑲᕆᐊᒃᓴᖅ (ᖃᐅᔨᒪᔪᕐᔪᐊᒧᑦ ᐃᓕᐅᖅᑲᖅᑕᐅᙱᒃᑲᓗᐊᕐᓗᑎᒃ ᓱᖁᑕᐅᙱᑦᑐᖅ). ᖃᐅᔨᒪᑦᑎᐊᕆᐊᑐᐃᓐᓇᕐᓗᑎᑦ ᐱᖁᑎᑦ ᐋᖅᑭᒃᑲᓗᐊᕐᒪᖔᑕ ᒪᓕᒡᓗᒋᑦ ᑭᓱᑖᕐᕕᒋᔭᕕᑦ ᒪᓕᒃᑕᐅᖁᔭᖏᑦ ᐊᑐᐃᓐᓇᕈᖅᑎᑕᐅᔪᑦ ᐱᑖᕆᔭᕐᓂᒃ. ᐃᕝᕕᑦ ᑲᒪᒋᓂᐊᖅᑕᑎᑦ ᐃᓕᐅᖅᑲᕆᐊᓕᑦ. ᐃᖅᑲᐅᒪᓗᒋᑦ ᓴᓇᔭᐅᑎᓪᓗᒋᑦ ᐊᑭᓕᖅᓱᖅᑕᐅᔾᔮᙱᓐᓇᕕᑦ ᑖᒃᑯᓂᖓ ᐱᓕᕆᑎᓪᓗᑎᑦ.

14. ᐆᒃᑐᒃᑲᓐᓂᕈᖕᓇᖅᐳᖓ ᐃᓱᒪᓕᐊᖑᔪᒥᑦ?

• ᐄ, ᓈᒻᒪᒃᓴᙱᒃᑯᕕᑦ ᐱᓇᔫᑎᒋᔭᑦ ᐃᓱᒪᓕᐊᕆᔭᐅᔪᒥᒃ, ᐆᒃᑐᒃᑲᓐᓂᕈᓐᓇᖅᐳᑎᑦ ᐱᔾᔪᑎᒋᓗᒍ ᖃᐅᔨᓴᖅᑕᐅᓂᕆᔭᖓ ᐃᓱᒪᓕᐅᕈᑕᐅᔪᕐᓗ ᐱᓇᔫᑎᒋᔭᕐᓄᑦ ᑮᓇᐅᔭᖃᖅᑎᑕᐅᓂᕐᒧᑦ.
• ᐊᔪᐃᓐᓇᕆᐊᕈᑎᑦ ᐊᐃᑦᑑᑎᓄᑦ ᐃᑲᔫᑎᓄᓪᓗ ᐱᓕᕆᐊᖑᔭᕆᐊᖃᖅᐳᑦ ᐅᓪᓗᑦ 30 ᐃᓗᐊᓂ ᐱᓇᔪᒃᑐᒧᑦ ᐃᓱᒪᓕᐅᕆᔪᒧᑦ ᑐᒃᓯᕋᐅᑎᖓᑕ ᒥᒃᓵᓄᑦ.
• ᐊᕙᑎᓕᕆᔨᒃᑯᑦ ᒥᓂᔅᑕᖓᑕ ᑐᒡᓕᐊᓄᑦ ᐃᓱᒪᓕᐅᕈᑕᐅᔪᖅ ᑭᖑᓪᓕᖅᐹᖑᔭᕆᐊᓕᒃ.

15. ᖃᓄᐃᓕᐅᕐᓂᐊᖅᐳᖓ ᐊᐃᑦᑑᑎᒥᒃ ᑎᑭᑕᐅᓯᒪᓕᕈᒪ?

• ᐱᑖᕆᔭᕆᐊᖃᖅᑕᑎᑦ ᓂᐅᕕᕐᓗᒋᑦ.
• ᐱᓕᕆᐊᑦ ᐱᐊᓂᒃᓯᒪᒋᐊᖃᖅᑐᖅ ᑕᖅᑭᑦ 12 ᐊᓂᒍᖅᓯᒪᓕᖅᑎᓪᓗᒋᑦ ᐊᖏᖅᑕᐅᓚᐅᖅᑎᓪᓗᑎᑦ.
• ᐱᓕᕆᐊᑦ ᐱᐊᓂᓚᐅᓱᖓᕈᖕᓂ, ᐊᑐᐃᓐᓇᕈᖅᑎᑦᑕᕆᐊᖃᖅᑐᑦ ᐱᓕᕆᐊᕐᒧᑦ ᓇᓕᖅᑲᐃᑦ ᐊᒻᒪ ᐊᔾᔨᓕᐅᖅᓯᒪᔪᑦ ᐊᑐᒃᑲᓐᓂᕈᓐᓇᖅᑐᑦ ᐆᒻᒪᖅᑯᑎᓄᑦ ᐃᓕᐅᖅᑲᓚᐅᖅᑕᑎᑦ ᓯᓚ ᐊᓯᔾᔨᖅᐸᓪᓕᐊᔪᒧᑦ ᑐᖅᑲᖅᑕᕐᕕᖕᒧᑦ.

16. ᓱᓇᓂᒃ ᑲᒪᒋᔭᖃᕆᐊᖃᖅᐳᖓ?

• ᐊᑐᐃᓐᓇᕈᖅᑎᓪᓗᒋᑦ ᓱᓕᔪᑦ, ᐱᐊᓂᒃᓯᒪᔪᑦ, ᐊᒻᒪ ᓇᓗᓇᐃᔭᑦᑎᐊᖅᓯᒪᔪᑦ ᑐᑭᓯᒋᐊᒐᒃᓴᑦ ᐱᓇᔫᑎᔅᓯᓐᓂ ᑲᑎᖅᓱᖅᓯᒪᔪᓂᒃ, ᐃᓚᖃᖅᑐᑦ ᐊᑎᓕᐅᖅᓯᒪᔪᒥᒃ ᒪᓕᒐᖅᑎᒍᑦ ᓱᓕᓂᕋᕈᑎᒥᒃ.
• ᑲᓇᑕᒥ ᐱᔾᔪᓯᕆᔭᐅᔪᖅ ᑲᑐᔾᔨᖃᑎᒌᑦ ᓇᓗᓇᐃᒃᑯᑦᑎᖅᓯᓚᐅᖅᐳᑦ ᐊᑐᒃᑲᓐᓂᕈᓐᓇᖅᑐᓂᒃ ᐆᒻᒪᖅᑯᑎᑐᓕᕆᔾᔪᓯᕐᓂᒃ ᓇᒃᓯᐅᔾᔭᐅᓗᑎᒡᓗ ᐃᒡᓗᕋᓛᔅᓯᓐᓄᑦ ᐊᖏᖅᑕᐅᓚᐅᖅᑎᓪᓗᑎᑦ ᓯᓚ ᐊᓯᔾᔨᖅᐸᓪᓕᐊᔪᒧᑦ ᑐᖅᑲᖅᑕᕐᕕᖕᒥᐅᓄᑦ.
• ᐃᓕᐅᖅᑲᕐᓂᐊᕐᓗᒋᑦ ᐊᑐᒃᑲᓐᓂᕈᓐᓇᖅᑐᑦ ᐆᒻᒪᖅᑯᑎᑐᕈᑎᒃᓴᓯ ᐃᒡᓗᕋᓛᔅᓯᓐᓄᑦ, ᐃᓂᖃᕆᐊᖃᖅᖤᖅᐳᑦ ᓄᓇᕘᑉ ᑭᒡᓕᖓᓃᖃᑕᐅᓗᑎᒃ.
• ᒪᓕᒐᖅᑎᒍᑦ ᐱᔪᓐᓇᐅᑎᖃᕐᓂᖅ ᐃᒡᓗᕋᓛᔅᓯᓐᓄᑦ ᐊᑐᒃᑲᓐᓂᕈᓐᓇᖅᑐᑦ ᐆᒻᒪᖅᑯᑎᑐᕈᑎᒋᓂᐊᖅᑕᓯ ᐃᓕᐅᖅᑲᖅᑕᐅᓇᔭᖅᑐᑦ.
• ᖃᐅᔨᒪᑦᑎᐊᕆᐊᑐᐃᓐᓇᕐᓗᑎᑦ ᐱᖁᑎᑦ ᐋᖅᑭᒃᑲᓗᐊᕐᒪᖔᑕ ᒪᓕᒡᓗᒋᑦ ᑭᓱᑖᕐᕕᒋᔭᕕᑦ ᒪᓕᒃᑕᐅᖁᔭᖏᑦ ᐊᑐᐃᓐᓇᕈᖅᑎᑕᐅᔪᑦ ᐱᑖᕆᔭᕐᓂᒃ.
• ᓇᓕᖅᑲᓕᒫᑦ ᑐᓐᓂᖅᑯᑎᒋᓗᒋᑦ ᓯᓚ ᐊᓯᔾᔨᖅᐸᓪᓕᐊᔪᒧᑦ ᑐᖅᑲᖅᑕᕐᕕᖕᒧᑦ ᑎᑎᖅᑲᙳᖅᑎᑕᐅᓂᐊᕐᒪᑕ, ᐃᓚᓕᐅᔾᔨᓗᑎᒡᓗ ᓇᓗᓇᐃᖅᓯᒪᔪᒥᒃ ᐱᖁᑎᑦ ᓂᐅᕕᐊᖑᓯᒪᔪᓂᒃ.
• ᐊᔾᔨᙳᐊᑦ ᑐᓐᓂᖅᑯᑎᒋᔭᐅᔪᑦ ᐱᐊᓂᒃᓯᒪᔪᑦ ᐊᑐᒃᑲᓐᓂᕈᓐᓇᖅᑐᑦ ᐆᒻᒪᖅᑯᑎᑐᕈᓯᑦ ᐃᓕᐅᖅᑲᖅᑕᐅᓂᖏᑦ. ᐊᔾᔨᓕᐅᖅᓯᒪᔪᑦ ᐱᔭᐅᔪᒪᓂᐊᖅᑐᑦ ᐃᒪᐃᑦᑑᒋᐊᖃᖅᑐᑦ:
  
  • ᐃᓕᐅᖅᑲᖅᓯᒪᓕᕐᓗᓂ ᓯᕿᓂᕐᒧᑦ ᐆᒻᒪᖅᑯᑎᑐᕈᓯᖅ ᐊᒻᒪ/ᐅᕝᕙᓘᓐᓃᑦ ᐊᓄᕆᑦᑑᑎ
  • ᐹᑕᓖᖃᕐᕕᐊ
  • ᓴᙱᒃᑎᓴᐅᑎᖓᓄᑦ ᐊᐅᓚᑦᑎᔾᔪᑎᑦ ᐊᒻᒪ ᑲᑉᐳᔾᔨᕕᐊ

17. ᑭᓲᖕᒪᑕ ᓄᓇᕗᑦ ᒐᕙᒪᒃᑯᑦ ᑲᒪᒋᔭᒃᓴᖏᑦ?

• ᐃᓄᖕᓂᒃ ᐃᑲᔪᓲᑦ ᐱᓇᔫᑎᓯ ᐱᕙᒌᔭᖅᐸᓪᓕᐊᑎᓪᓗᓯᐅᒃ.
• ᕿᒥᕐᕈᕙᒡᓗᒋᑦ ᐱᓇᔫᑎᓯ ᓈᒻᒪᖅᑰᑦᑎᓗᓯ ᑎᑎᕋᕐᓗᑎᓪᓗ ᑭᐅᔭᕐᓂᒃ ᐅᖃᖅᓯᒪᓗᓂ ᐱᓕᕆᐊᕆᔪᒪᔭᑦ ᐊᖏᖅᑕᐅᖕᒪᖔᑦ ᐋᒃᑳᖅᑕᐅᖕᒪᖔᓪᓘᓐᓃᑦ ᐅᓪᓗᑦ 30 ᐱᓇᔫᑎᒋᔭᑦ ᐱᔭᐅᓚᐅᖅᑎᓪᓗᒍ.
• ᐊᐃᑦᑑᑎᑎᒍᑦ ᑮᓇᐅᔭᖅᑖᖅᑎᑕᐅᒍᕕᑦ, ᐱᓇᔫᑎᒋᔭᑦ ᐊᖏᖅᑕᐅᓂᖓ ᒪᓕᒡᓗᒍ.
• ᐃᓚᓕᐅᑎᓗᒋᑦ ᐊᑐᒃᑲᓐᓂᕈᓐᓇᖅᑐᑦ ᐆᒻᒪᖅᑯᑎᑐᕈᓯᑦ ᓯᓚ ᐊᓯᔾᔨᖅᐸᓪᓕᐊᔪᒧᑦ ᑐᖅᑲᖅᑕᕐᕕᖕᒥ ᐊᑐᒃᑲᓐᓂᕈᓐᓇᖅᑐᑦ ᐱᓕᕆᐊᑦ ᑐᓴᒐᒃᓴᓂᒃ ᑲᑎᖅᓱᐃᕝᕕᒃ ᖃᕆᑕᐅᔭᒃᑯᑦ.

18. ᖃᓄᕐᓕ ᓂᕈᐊᕐᓂᐊᕋᒪ ᐊᒻᒪ ᐃᓕᐅᖅᑲᐃᓂᐊᕋᒪ ᐃᓕᐅᖅᑲᕆᐊᓕᖕᓂᒃ?

• ᓄᑖᖑᓪᓗᑎᒃ ᑭᓱᒃᓴᖏᑦ ᐊᔪᙱᑦᑐᑑᓂᐊᖅᑐᑦ ᑖᔅᓱᑎᒎᓇᖅ ᐊᐃᑑᑎᒃᑯᑦ.
• ᓂᕈᐊᕐᓗᒋᑦ ᐱᖁᑎᑦ ᐃᓗᓕᖏᓪᓗ ᑲᓇᑕᒥ ᐱᔾᔪᓯᕆᔭᐅᔪᖅ ᑲᑐᔾᔨᖃᑎᒌᓄᑦ ᓇᓗᓇᐃᒃᑯᑦᑎᖅᑕᐅᓯᒪᓗᑎᒃ.
• ᓯᕿᓂᕐᒧᑦ ᐆᒻᒪᖅᑯᑎᑐᕈᓯᕐᓂᒃ ᐃᓕᐅᖅᑲᐃᓂᐊᕐᓗᓂ ᐱᓕᕆᔾᔪᓯᑦ:
  
  • ᖃᐅᔨᒪᔭᐅᖕᒥᔪᖅ ᐃᒪᓐᓇ ᖃᐅᔨᒋᐊᕈᑎᒃᓴᓄᑦ ᐃᓕᐅᖅᑲᕆᐊᓕᑦ ᒪᑯᓂᖓ ᐃᓗᓕᖃᖅᐳᑦ ᐊᔭᑉᐹᕐᕕᖕᓂᒃ, ᐊᑕᔾᔪᑎᓂᒃ, ᑐᙵᕕᖏᓐᓂᒃ, ᕿᔾᔮᓂᒃ, ᖃᐅᒻᒪᖅᑯᑎᓂᒡᓗ ᐋᖅᑭᒃᑕᐅᓯᒪᔪᓂᒃ ᐃᑲᔪᖅᓱᐃᔾᔪᑎᒃᓴᑦ ᓯᕿᓂᕐᒧᑦ ᐆᒻᒪᖅᑯᑎᑐᕈᓯᕐᓂᒃ. ᐊᔾᔨᒌᙱᕈᓘᔭᖅᑐᓂᒃ ᐱᓕᕆᔾᔪᓯᖅᑕᖃᖅᑐᖅ ᐊᖏᖅᑕᐅᔪᓄᑦ ᐃᓕᐅᖅᑲᕐᓂᐊᕐᓗᒋᑦ ᑐᙵᕕᖏᑦ ᐃᒡᓗᕋᓛᑦ ᖁᓛᓄᑦ, ᓴᓂᕋᖏᓐᓄᑦ, ᐅᕝᕙᓘᓐᓃᑦ ᒪᓂᖅᑲᒧᑦ.
  • ᑐᓴᖅᑕᐅᒋᐊᖃᓪᓚᕆᒃᑐᖅ: ᐃᓕᐅᖅᑲᙱᒃᑯᕕᒋᑦ ᓯᕿᓂᕐᒧᑦ ᐆᒻᒪᖅᑯᑎᑐᕈᓯᑦ ᑐᙵᕕᒃᓴᖏᑦ ᐋᖅᑭᒃᓯᒪᔪᓄᑦ ᓯᕿᓂᕐᒧᑦ ᑐᕌᖓᔪᓄᑦ, ᓇᓪᓕᐅᒃᑯᒫᖓ ᓄᖅᑲᖅᑎᑦᑐᓐᓇᖅᑕᑦ ᓯᕿᓂᕐᒧᑦ ᑐᙵᕕᒃᓴᖏᓐᓄᑦ.
• ᐊᑦᑕᕐᓇᖅᑕᐃᓕᒪᔾᔪᑎ ᐱᖁᑎᑦ:
  
  • ᒪᓂᖅᑲᒧᑦ ᑲᑉᐳᑎᓂᐊᖅᑐᑦ ᐃᓚᒃᓴᖏᑦ ᐃᓚᓕᐅᑎᓯᒪᔪᑦ (ᐅᐊᐃᔭᐃᑦ ᐊᒻᒪ ᑭᑭᐊᒡᕕᖏᑦ), ᑲᑉᐳᔾᔮᕈᑎᖏᑦ, ᐊᒻᒪ ᓱᒃᑲᓴᖅᖢᑎᒃ ᖃᒥᑦᑕᐅᑎᖏᑦ. ᐅᑯᐊ ᓇᓗᓇᐃᔭᐅᑎᑦ ᐊᓯᔾᔨᓛᖅᑐᑦ ᐆᒻᒪᖅᑯᑎᑐᕈᓯᑦ ᖃᓄᐃᑦᑑᓂᖏᑦ ᒪᓕᒃᑕᐅᓗᑎᒃ. ᓲᕐᓗ: ᐃᓚᖏᑦ ᓯᕿᓂᕐᒧᑦ ᑐᙵᕕᒃᓴᖏᑦ ᐃᓚᓕᐅᔾᔨᓯᒪᖕᒪᑕ ᒪᓂᖅᑲᒧᑦ ᑲᑉᐳᑎᒋᐊᓕᖕᓂᒃ ᐊᑕᔾᔪᑎᖏᓐᓂᒃ ᐊᒻᒪ ᑐᙵᕕᖏᓐᓂᒃ.
  • ᐱᓕᕆᖃᑎᒋᓗᒍ ᐱᖁᑎᑖᖅᑎᑦᑎᔨ/ᐃᓕᐅᖅᑲᐃᔨ ᖃᐅᔨᒪᓂᐊᕋᔅᓯᐅᒃ ᐃᓕᐅᖅᑲᖅᑕᓯ ᓈᒻᒪᒃᑲᓗᐊᕐᒪᖔᑕ ᐅᐊᐃᔭᑦ ᓇᓗᓇᐃᒃᑯᑕᖏᓐᓄᑦ ᐱᔭᐅᒋᐊᓕᖕᓄᑦ.
• ᐊᓄᕆᑦᑑᑎᒧᑦ ᐆᒻᒪᖅᑯᑎᑐᕈᓯᖅᑎᖔᕐᓗᒍ:
  
  • ᐊᓄᕆᑦᑑᑎᒧᑦ ᐆᒻᒪᖅᑯᑎᑐᕈᓯᑦ ᐃᓚᓕᐅᑎᓯᒫᓂᑐᐃᓐᓇᕆᐊᖃᖅᐳᑦ ᐊᓄᕆᑦᑑᑎᒧᑦ − ᐱᖁᑎᑖᖅᑎᑦᑎᔨᓯ ᖃᐅᔨᒋᐊᕐᕕᒋᔪᓐᓇᖅᑕᓯ ᑖᓐᓇ ᐱᔾᔪᑕᐅᖕᒪᖔᑦ.