ᓄᓇᓕᖕᓂ ᐊᑐᖅᑐᒃᓴᐅᑕᐅᓪᓗᑎᒃ ᓇᑉᐸᖅᑎᖅᑕᐅᓯᒪᔪᑦ ᑲᓇᑕᒥᐅᓂ ᐅᑭᐅᖅᑕᖅᑐᖓᓂ ᐊᒃᑐᖅᑕᐅᕙᓪᓕᐊᕗᑦ ᓯᓚᐅᑉ ᐊᓯᔾᔨᖅᐸᓪᓕᐊᓂᖓᓄᑦ ᐊᒃᑐᖅᓯᓂᕆᔭᐅᔪᓂ ᓲᕐᓗ ᓄᓇᐅᑉ ᐃᑭᐊᖓᓂ ᖁᐊᖑᐃᓐᓇᐅᔭᖅᑐᖅ ᐊᐅᒃᐸᓪᓕᐊᓕᖅᖢᓂ, ᓯᒡᔭ ᓱᕋᖅᐸᓪᓕᐊᓕᖅᖢᓂ, ᐊᓯᔾᔨᖅᑐᓄᓪᓗ ᓯᓚᐅᑉ ᓂᒡᓚᓱᖕᓂᕆᕙᒃᑕᖏᓐᓄᑦ ᒪᖁᒃᐸᖕᓂᕐᒧᓪᓗ ᖃᓄᐃᓕᖓᓂᕆᕙᒃᑕᖓᓄᑦ. ᑕᒪᒃᑯᐊ ᐃᓱᒪᒥᐅᑕᕆᓪᓗᒋᑦ, ᐊᑐᖅᑕᐅᕙᒃᑐᓄᑦ ᑲᑎᒪᔩᑦ ᑲᓇᑕᒥ ᐋᖅᑭᒃᓯᒪᓕᖅᑎᑦᑎᓚᐅᖅᐳᑦ ᐆᒥᖓ, ᐅᑭᐅᖅᑕᖅᑐᒥ ᓄᓇᓕᖕᓂ ᐊᑐᖅᑕᐅᔪᒃᓴᐅᑕᐅᓪᓗᑎᒃ ᓇᑉᐸᖅᑎᖅᑕᐅᓯᒪᔪᓄᑦ ᐊᑕᐅᓰᓐᓇᒃᑰᖅᑎᑦᑎᓕᕐᓂᕐᒧᑦ ᐱᒋᐊᖅᑕᐅᓯᒪᔪᒥᒃ (NISI−ᒥᒃ), ᑖᒃᑯᐊᓗ ᓴᖅᑭᑎᑦᑎᕙᒃᖢᑎᒃ ᐊᑐᖅᑕᐅᕙᒃᑐᓂᒃ ᑐᕌᖓᓪᓗᐊᑕᖅᑐᓂᒃ ᓇᑉᐸᖅᑎᖅᑕᐅᓯᒪᔪᓄᑦ ᓄᓇᓕᖕᓂ ᐊᑐᖅᑕᐅᔪᒃᓴᐅᑕᐅᓪᓗᑎᒃ ᐅᑭᐅᖅᑕᖅᑐᒥ.
ᐱᓕᕆᐊᖑᓂᖓ 1 NISI−ᒥ (2011-2016) ᓴᖅᑭᑎᑦᑎᕗᖅ ᐱᕙᓪᓕᐊᓂᕆᔭᐅᔪᒧᑦ 5-ᓄᑦ ᐊᑐᖅᑕᐅᕙᒃᑐᓄᑦ ᐅᑯᓂᖓ ᐃᓚᖃᖅᖢᓂ:
- ᐊᐅᓚᑦᑎᕝᕕᖃᕐᓂᖅ ᐊᐳᒻᒥᒃ ᖄᓕᖅᓯᒪᓕᖅᐸᖕᓂᖏᓐᓄᑦ ᖁᐊᖅᓵᕐᓇᕈᓐᓇᖅᑐᓂᒃ ᐃᒡᓗᕐᔪᐊᓂ;
- ᓄᓇᓕᖕᓂ ᑯᕕᕙᓪᓕᐊᓂᐅᕙᒃᑐᓄᑦ ᐊᑐᖅᑕᐅᕙᒃᑐᓄᑦ ᐱᕙᒌᔭᕐᓂᖅ;
- ᐊᑐᕐᓂᖅ thermosyphon−ᓂᒃ ᑐᙵᕕᖕᓂᒃ ᑕᒪᒃᑯᓇᓂ ᓄᓇᐅᑉ ᐃᑭᐊᖓᒍᑦ ᖁᐊᖑᐃᓐᓇᐅᔭᖅᑐᖅᑕᓕᖕᓂ;
- ᐊᐅᓚᑦᑎᕝᕕᖃᕐᓂᖅ ᖃᓄᐃᓕᖓᓕᕐᓂᕆᔭᐅᕙᒃᑐᓂ ᐊᐅᒃᐸᓪᓕᐊᔪᒧᑦ ᖁᐊᖑᐃᓐᓇᐅᔭᖅᑐᒧᑦ ᐱᑕᖃᖅᐸᖐᖅᑐᓂ ᓄᓇᓕᖕᓂ ᓇᑉᐸᖅᑎᖅᑕᐅᓯᒪᔪᓂ ᐊᑐᖅᑕᐅᔪᒃᓴᓂ; ᐊᒻᒪᓗ
- Geotechnical−ᑯᑦ ᐃᓂᓂᒃ ᖃᐅᔨᓴᖅᓯᓃᑦ ᐃᒡᓗᕐᔪᐊᑦ ᑐᙵᕕᒋᔭᖏᓐᓂᒃ ᑕᒫᓂ ᖁᐊᖑᐃᓇᐅᔭᖅᑐᒥ.
ᐱᓕᕆᐊᖑᓂᖓ 2 NISI−ᑯᑦ (2016-2020) ᓴᖅᑭᑎᑦᑎᓂᐊᖅᐳᖅ 7−ᑲᓐᓂᕐᓂᒃ ᐊᑐᖅᑕᐅᕙᒃᑐᓂᒃ ᐅᑯᐊ ᐃᓚᒋᔭᐅᓗᑎᒃ:
- ᐊᐅᓚᑦᑎᓂᖅ, ᑲᒪᒋᔭᖃᕐᓂᖅ ᐊᑐᕈᓐᓃᖅᑎᑦᑎᓂᕐᓗ ᑭᓈᓗᖃᕐᕕᖕᓂᒃ;
- ᐊᐅᓚᑦᑎᕝᕕᖃᕐᓂᖅ ᐊᒃᑐᖅᓯᓂᕆᕙᒃᑕᖏᑦ ᐊᓄᕌᕐᔪᐊᕐᓃᑦ ᓄᓇᓕᖕᓂ ᓇᑉᐸᖅᑎᖅᑕᐅᓯᒪᔪᓄᑦ ᐊᑐᖅᑕᐅᔪᒃᓴᐅᑕᐅᓪᓗᑎᒃ;
- ᐊᑐᓕᖅᓂᕐᒧᑦ ᖃᓄᐃᓕᐅᖅᑕᐅᕙᓪᓕᐊᓇᔭᖅᑐᑦ ᓄᓇᓕᖕᓂ ᓇᑉᐸᖅᑎᖅᑕᐅᓯᒪᔪᓄᑦ ᐊᑐᖅᑕᐅᔪᒃᓴᐅᑕᐅᓪᓗᑎᒃ ᖁᐊᖑᐃᓐᓇᐅᔭᖅᑐᒦᓐᓂᖏᓐᓄᑦ;
- ᖃᑦᑎᒃᓯᓂᓕᖅᓯᒪᔪᓄᑦ ᓴᐳᔾᔨᓯᒪᓂᕐᒥᒃ ᖁᐊᖑᐃᓐᓇᐅᔭᖅᑐᒥᒃ ᓄᓇᐅᑉ ᐃᑭᐊᖓᓂ;
- ᐃᑭᑦᑐᓄᑦ ᓴᐳᔾᔭᐅᓯᒪᓂᕐᒧᑦ ᐱᑐᐃᓐᓇᕆᐊᖃᓕᖅᓯᒪᓂᕐᒧᓪᓗ;
- ᖁᐊᖅᓵᕐᓇᖅᑐᓂᒃ−ᑐᙵᕕᓕᖕᓄᑦ ᐊᑐᖅᑕᐅᓇᔭᖅᑐᖅ ᓄᓇᓕᖕᓂ ᐱᕙᒌᔭᖅᐸᓪᓕᐊᓂᕐᒧᑦ; ᐊᒻᒪᓗ
- ᑭᓈᓗᓕᕆᓂᕐᒧᑦ ᐊᐅᓚᑦᑎᓂᖅ.
ᑎᓯᐱᕆ 2018−ᒥ, ᓄᓇᓕᖕᓂ ᒐᕙᒪᒃᑯᓐᓂᓪᓗ ᐱᔨᑦᑎᕋᖅᑎᒃᑯᑦ ᐊᒻᒪᓗ CCS−ᑯᑦ ᑲᑐᔾᔨᓪᓗᑎᒃ ᑲᔪᓯᑎᑦᑎᓚᐅᖅᐳᒃ NISI−ᒧᑦ ᐊᔪᕈᓐᓃᖅᓴᕐᓂᕐᒥᒃ ᐃᖃᓗᖕᓂ 30 ᐅᖓᑖᓃᑦᑐᓄᑦ ᓄᓇᕗᑦ ᒐᕙᒪᖓᑕ ᓄᓇᓕᐸᐅᔭᐅᓪᓗ ᐃᖃᓗᖕᒥᐅᓄᑦ ᐃᖅᑲᓇᐃᔭᖅᑎᖏᓐᓄᑦ ᐱᓕᕆᐊᖃᖅᐸᒃᑐᓄᑦ ᓄᓇᓕᖕᓂ ᓇᑉᐸᖅᑎᖅᑕᐅᓯᒪᔪᓂᒃ ᐊᑐᖅᑕᐅᕙᒃᑐᓂᒃ.
ᑐᓴᖅᑐᖃᒃᑲᓐᓂᕈᒪᒃᐸᑦ ᐃᓛᒃᑰᖅᑐᓄᑦ ᐊᑐᖅᑕᐅᕙᒃᑐᓄᑦ NISI−ᒧᓪᓘᓐᓃᑦ, ᐅᓇ ᑕᑯᔭᖅᑐᕐᓗᒍ: https://www.scc.ca/en/nisi