ᓯᓚᐅᑉ ᐊᓯᔾᔨᕐᓂᖓᑕ ᐊᑦᑐᐃᓂᖓ

ᓱᓇᐅᑉ ᓯᓚᐅᑉ ᐊᓯᔾᔨᕐᓂᖓᑕ ᐊᑦᑐᐃᓂᖓ?

ᓯᓚᐅᑉ ᐊᓯᔾᔨᕐᓂᖓᑕ ᐊᑦᑐᐃᓂᖓ ᑕᑯᓐᓇᕐᓂᐅᕗᖅ ᐊᑦᑐᐃᓂᖏᓐᓂᒃ ᓯᓚᐅᑉ ᐊᓯᔾᔨᕐᓂᖓᑕ ᐃᓄᓐᓂᒃ ᐊᕙᑎᖓᓂᓪᓗ ᓄᓇᕗᑦ, ᐊᓂᒍᖅᐸᓪᓕᐊᑎᓪᓗᒍ.
ᐃᓘᓐᓇᒐᓚᑎᒃ ᐆᒪᔪᑦ ᓄᓇᕗᒻᒥ ᐊᑦᑐᖅᑕᐅᓂᐊᖅᑐᑦ ᓯᓚᐅᑉ ᐊᓯᔾᔨᕐᓂᖓᓄᑦ. ᐱᒻᒪᕆᐅᕗᖅ ᐅᔾᔨᕈᓱᓐᓂᖅ ᑖᒃᑯᓇᓐᖓᑦ ᐊᓯᔾᔨᕐᓂᐅᔪᓂᒃ ᐊᑑᑎᓂᐊᕐᓗᒋᑦ ᐊᑦᑐᖅᑕᐅᓂᐅᔪᑦ ᐊᑑᑎᓯᒪᒌᖅᑐᑦ ᐊᒻᒪᓗ ᐸᕐᓇᐃᕈᑎᒋᓗᒋᑦ ᐊᑑᑎᓛᖅᑑᔮᖅᑐᓄᑦ. ᓲᕐᓗ, ᓯᑯᐃᕈᑉᐸᓪᓕᐊᓂᖅ ᐊᒥᓱᓐᖑᐹᓪᓕᕈᑕᐅᓂᐊᕐᒪᑦ ᐅᒥᐊᕐᔪᐊᓄᑦ ᐃᖏᕐᕋᔪᓄᑦ ᐅᑭᐅᖅᑕᖅᑐᒥ ᐊᖅᑯᑎᑎᒍᑦ, ᐱᖃᓯᐅᑎᑦᓱᓂ ᑕᓪᓗᕈᑎ. ᖃᑭᕚᓪᓕᕈᑕᐅᒍᓐᓇᕋᓗᐊᖅᓱᓂ ᓄᓇᕗᒻᒥᐅᓄᑦ, ᐅᓗᕆᐊᓇᖅᑑᒍᓐᓴᕐᒥᔪᖅ ᐅᖅᓱᐊᓗᐃᑦ ᓱᕈᓐᓇᖅᑐᓪᓗ ᑯᕕᑐᐃᓐᓇᕆᐊᖃᕐᓂᖏᑦ. ᓄᓇᒥᒃ ᐊᑐᕐᓂᖅ ᐱᕚᓪᓕᖅᓯᒪᓗᓂ ᐊᒻᒪᓗ ᓄᓇᒥᐅᑕᓂᒃ ᐊᐅᓚᖅᓯᓂᖅ, ᐊᑕᐅᓯᒃᑰᖃᑎᖃᕐᓗᓂ ᐃᓄᐃᑦ ᐊᒥᓱᓐᖑᐹᓪᓕᕐᓂᖏᓐᓂᒃ ᐊᖏᓪᓕᕙᓪᓕᐊᓗᓂᓗ ᖃᕿᒪᓇᓱᐊᕐᓂᖅ, ᐸᕐᓇᒋᐊᖃᓪᓚᕆᑦᑐᒍᑦ ᖃᐅᔨᓴᑦᓯᐊᕈᑎᒋᓗᖑ ᐊᕙᑎᐅᑉ ᑲᔪᓯᑦᓯᐊᕈᓐᓇᕐᓂᖓᓂᒃ ᓯᕗᓂᑦᓴᒥ.

ᐊᑦᑐᖅᑕᐅᓂᐅᔪᑦ ᐱᖅᑯᓯᕐᒧᑦ, ᖃᓄᐃᑦᑕᐃᓕᒪᓂᕐᒧᑦ ᖃᓄᐃᓐᖏᑦᓯᐊᕐᓂᕐᒧᓪᓗ

ᑕᐃᒪᓐᖓᓂᑐᖃᕐᔪᐊᕌᓗᒃ ᐃᓄᐃᑦ ᑲᓲᒪᖃᑎᖃᖃᑦᑕᖅᓯᒪᒻᒪᑕ ᓯᑯᒥᒃ, ᓄᓇᒥᒃ, ᕿᓚᒻᒥᒃ, ᐆᒪᔪᓂᓪᓗ, ᐃᓄᐃᑦ ᓱᖏᖅᑑᑎᓖᑦ ᐊᓐᓇᒍᑕᐅᒍᓐᓴᖅᑐᓂᒃ ᓱᖏᐅᑎᓯᒪᔪᓂᒃ ᐊᔾᔨᐅᖏᑦᑐᒧᑦ ᓯᓚᒧᑦ ᐅᑭᐅᖅᑕᖅᑐᒥ. ᑕᕝᕙᓴᐃᓐᓇᖅ ᓯᓚᐅᑉ ᐊᓯᔾᔨᖅᑕᕐᓂᖏᑦ ᑲᔪᓯᓂᐊᖅᑐᑦ ᐊᑦᑐᐃᓗᑎᒃ ᐃᓄᐃᑦ ᐱᖅᑯᓯᖏᓐᓂᒃ ᖃᓄᐃᓐᖏᑦᓯᐊᕐᓂᖏᓐᓂᓪᓗ ᓄᓇᕗᒻᒥᐅᑦ.
ᓄᓇᕗᒻᒥᐅᑦ ᐃᓚᒋᔭᐅᒻᒪᑕ ᐃᓗᓕᖅᑐᔪᒧᑦ ᐃᓅᓯᕐᒨᖓᔪᓄᑦ ᐊᕙᑎᒧᓪᓗ. ᓯᓚᐅᑉ ᐊᓯᔾᔨᕐᓂᖓ ᓄᓇᕗᒻᒥ ᑲᒪᒋᒋᐊᕋᑦᓴᐅᓐᖏᑦᑐᖅ ᐃᓱᒪᒋᖃᓯᐅᑎᓐᖏᓪᓗᒋᑦ ᐊᓯᖏᑦ ᐃᓗᓕᕆᔭᐅᔪᑦ. ᓄᓇᓖᑦ ᐊᓐᓇᒍᓐᓇᕐᓂᖏᑦ ᓱᖏᐅᑎᒍᓐᓇᕐᓂᖏᓪᓗ ᓯᓚᐳᑉ ᐊᓯᔾᔨᕐᓂᖓᓄᑦ ᑭᓪᓕᖃᖅᑎᑕᐅᓂᐊᖅᑐᑦ ᐃᓗᓕᖏᓐᓄᑦ ᒪᑯᓄᖓ ᐃᓪᓗᐃᑦ, ᐊᔪᖅᓴᕐᓂᖅ, ᓂᕿᑦᓴᖃᕐᓂᖅ, ᐅᖃᐅᓯᖅ, ᐅᓪᓗᒥᓯᐅᑎᕈᖅᐸᓪᓕᐊᔪᑦ, ᐊᒻᒪᓗ ᓄᖑᑎᖅᐸᓪᓕᐊᓂᖏᑦ ᐱᖅᑯᓯᖅᑎᒍᑦ ᓄᓇᒦᒍᓐᓇᕐᓂᐅᔪᑦ. ᐃᓘᓐᓇᑎᒃ ᑖᒃᑯᐊ ᐃᓗᓕᕆᔭᐅᔪᑦ ᑐᕋᐃᓐᓇᖅᑐᒥᒃ ᐊᑦᑐᐃᓂᖃᕐᓂᐊᖅᑐᑦ ᑲᔪᓯᓂᖓᓂᒃ ᐃᓄᐃᑦ ᐱᑯᓯᖓᑦᑕ, ᐊᒻᒪᓗ ᖃᓄᐃᓐᖏᑦᓯᐊᕐᓂᖏᓐᓂᒃ ᓄᓇᕗᒻᒥᐅᑦ.

ᐊᑦᑐᖅᑕᐅᓂᖏᑦ ᐱᖅᑯᓯᖅᑎᒍᑦ ᐊᐅᓚᓂᐅᔪᑦ

ᐊᒥᓱᑦ ᓄᓇᕗᒻᒥᐅᑦ ᓱᖏᖅᑑᑎᖃᕐᒪᑕ ᐊᖑᓇᓱᓐᓂᕐᒥᒃ, ᐃᖃᓗᒐᓱᐊᕐᓂᕐᒥᒃ ᐊᒻᒪᓗ ᑲᑎᖃᑦᑕᕐᓂᕐᒥᒃ ᐃᑲᔪᖃᑦᑕᐅᑎᑦᓱᑎᒃ ᐊᒻᒪᓗ ᓄᓇᓕᓐᓂ ᖃᑭᒪᓇᓱᐊᕐᓂᕐᒥᒃ ᓄᓇᓕᒻᒥᓂ. ᓄᓇᓕᓐᓂ ᐊᖑᓇᓱᓐᓂᐅᔪᑦ ᐊᓯᔾᔨᖅᓯᒪᓕᕇᖅᑐᑦ ᐊᒻᒪᓗ ᓄᑖᑦ ᖃᐅᔨᒪᓕᑕᐃᑦ ᓱᖏᖅᑑᑕᐅᕙᓪᓕᐊᑐᐃᓐᓇᖅᓱᑎᒃ.
ᐃᓄᐃᑦ ᐃᓄᑐᖃᐃᑦ, ᐱᖅᑯᓯᖅᑎᒍᑦ ᐱᔪᓐᓇᕐᓂᕐᒥᓂᒃ ᐊᑐᖃᑦᑕᖅᓯᒪᔪᑦ ᓇᓚᐅᑦᓵᖅᓱᑎᒃ ᓯᓚᒥᒃ, ᑕᑯᓯᒪᔪᑦ ᐊᓯᔾᔨᖅᑐᓂᒃ ᓄᕗᔭᓂᒃ ᐊᓄᕆᒥᓪᓗ (ᑕᑯᓗᒋᑦ ᓂᐲᑦ ᓄᓇᒥᒃ ᐅᖃᐅᓯᐅᓯᒪᔪᓄᑦ ᐃᓄᑐᖃᕐᓄᑦ ᐊᓯᔾᔨᕐᓂᐅᔪᓄᑦ ᑕᑯᓯᒪᔭᖏᓐᓄᑦ). ᓯᒪᖏᑦ ᐊᑦᑐᐊᔪᑦ ᖃᐅᔨᒪᓂᕐᒧᑦ ᓈᒻᒪᖑᓐᓃᖅᑐᑦ ᐅᓪᓗᒥ ᓯᓚᐅᑉ ᐊᐅᓚᓂᖏᓐᓄᑦ. ᓂᕆᐅᓇᓐᖏᑦᑐᑦ ᓯᓚ ᐅᓗᕆᐊᓇᒃᑲᓐᓂᕈᑕᐅᓕᖅᓯᒪᔪᖅ ᓅᓯᒪᓂᕐᒧᑦ ᐊᓯᓄᑦ. ᑕᒪᓐᓇ
ᐱᔭᕆᐊᑦᑐᐃᓯᒪᔪᐹᓗᒃ ᐃᓄᑐᖃᕐᓄᑦ ᖃᐅᔨᒪᓂᕐᒥᒃ ᕿᒪᐃᒐᓱᐊᕆᐊᑦᓴᖅ ᓯᓚᓕᕆᒍᓐᓇᕐᓂᕐᒧᑦ ᑭᖑᕚᖑᔪᓄᑦ.
ᐃᓚᖏᑦ ᐱᖅᑯᓯᑐᖃᖅᑎᒍᑦ ᐃᖏᕐᕋᕕᐅᖃᑦᑕᖅᓯᒪᔪᖅ ᑎᑭᑕᑦᓴᐅᒍᓐᓃᖅᑐᑦ, ᐊᑐᖅᑕᐅᒍᓐᓇᐃᓪᓕᑦᓱᑎᒃ ᓄᓇᓕᑐᖃᐅᖃᑦᑕᖅᓯᒪᔪᑦ. ᐊᒥᓱᐊᓗᐃᑦ ᐃᓄᑐᖃᐃᑦ ᓄᓇᓖᓪᓗ ᐅᖃᖅᓯᒪᔪᑦ ᐃᒪᐃᕈᑉᐸᓪᓕᐊᑐᐃᓐᓇᖅᑐᖅ ᐅᒥᐊᒃᑰᕐᕕᒋᒐᓱᐊᕆᐊᖓ ᐱᔭᕆᐊᑐᑦᓱᓂ. ᐊᐅᓴᕋᐃᓐᓂᖏᑦ ᑕᓰᑦ, ᑰᑦ ᐊᒻᒪᓗ ᑕᕆᐅᑉ ᐊᖅᑯᑎᓄᑦ ᐊᑦᑕᕐᓇᕈᑕᐅᓕᖅᑐᑦ ᐅᐱᕐᖔᒃᑯᑦ, ᐊᒻᒪᓗ ᐊᐅᑉᐸᓪᓕᐊᔪᑦ ᐊᐅᓚᐃᑦᑐᑦ  ᐃᖏᕐᕋᕕᒋᒋᐊᖏᑦ ᓯᑕᒪᓕᒃᑯᑦ ᐊᐅᔭᒃᑯᑦ ᐱᔭᕆᐊᑦᑐᐃᑦᓱᑎᒃ.

ᐊᑦᑐᖅᑕᐅᓂᖓ ᓂᕿᑦᓴᖃᕐᓂᐅᑉ

ᓯᓚᐅᑉ ᐊᓯᔾᔨᕐᓂᖓᓄᑦ ᓂᕆᐅᒋᔭᐅᔪᑦ ᐊᑦᑐᖅᑕᐅᓂᐊᕆᐊᖏᑦ ᐱᖃᓯᐅᔾᔨᔪᑦ ᐊᑐᐃᓐᓇᖃᓐᖏᓂᖅᓴᐅᓂᖅ ᐆᒪᔪᕐᓂᒃ ᐊᒻᒪᓗ ᐅᓗᕆᐊᓇᕐᓂᖅᓴᐅᓗᓂ ᐊᓯᔾᔨᕐᓂᐅᔪᑦ ᓯᑰᑉ ᐃᔾᔪᓂᖓᓄᑦ, ᐊᐅᔪᐃᑦᑐᑦ ᖃᓄᐃᑦᑑᓂᖏᓐᓄᑦ ᐊᒻᒪᓗ ᓯᓚᕐᓂᕐᓘᖃᑦᑕᕐᓂᐅᑉ. ᑕᐃᒪᐃᑦᑎᓪᓗᒍ ᑐᑭᓕᒃ ᐃᓄᓕᖅᑕᓂᒃ ᐊᑐᐃᓐᓴᖃᕐᓂᖅ ᐊᑦᑐᖅᑕᐅᓪᓚᕆᑐᐃᓐᓇᕆᐊᓕᒃ.
ᐃᓄᓕᖅᑕᓂᒃ ᖃᓪᓗᓈᓕᖅᑕᑐᖔᖃᑦᑕᓕᕐᓂᖅ ᐊᑭᔪᓂᒃ, ᓂᐅᕕᕐᕕᔭᓂᒃ, ᓂᕿᑦᓯᐊᕙᐅᒐᔪᐃᑦᓱᑎᓪᓗ ᐊᑦᑐᐃᓂᕐᓗᑦᓯᒪᔪᑦ ᐃᓄᓐᓂᒃ ᐊᒻᒪᓗ ᐱᖅᑯᓯᖓᓐᓂᒃ. ᓯᓚᐅᑉ ᐊᓯᔾᔨᕐᓂᖓ ᑕᒪᑦᓱᒥᖓ ᐊᑲᓪᓕᐅᕈᑕᐅᕙᒌᖅᑐᒥᒃ ᐱᕚᓪᓕᑎᑦᓯᑐᐃᓐᓇᕆᐊᓕᒃ.
ᓂᕐᑮᑦ ᑐᖅᑯᖅᑕᐅᓯᒪᓂᖏᑦ ᐊᑦᑐᖅᑕᐅᓯᒪᒻᒥᔪᑦ ᓂᕈᒥᓐᓂᖅᓴᒧᑦ ᓯᓚᒧᑦ ᐊᐅᑉᐸᓪᓕᐊᔪᒧᓪᓗ ᐊᐅᔪᐃᑦᑐᕐᒧᑦ. ᐊᐱᖅᓱᖅᑕᐅᔪᑦ ᐃᓄᑐᖃᐃᑦ ᐅᖃᖅᓯᒪᔪᑦ ᓯᓚᒥ ᕿᓐᓃᑦ, ᓂᕿᑦᓯᐊᕙᐅᖃᑦᑕᔪᔫᒐᓗᐊᑦ ᐃᒃᑮᓇᖅᑐᐊᓗᒻᒥ, ᒫᓐᓇ ᓱᕋᑐᐃᓐᓇᓲᖑᓕᖅᑐᑦ.
ᐃᓄᓕᖅᑲᐃᑦ ᓱᓕ ᓂᕿᑦᓯᐊᕙᐅᓂᖅᐹᖅ ᓄᓇᕗᒻᒥᐅᓄᑦ. ᑭᓯᐊᓂᓕ, ᓯᓚᐅᑉ ᐊᓯᔾᔨᐸᓪᓕᐊᓂᖓ ᐃᓄᓐᓄᑦ ᓱᕈᓐᓇᖅᑐᓄᑦ ᓵᓐᖓᑲᓐᓂᕈᑕᐅᑐᐃᓐᓇᕆᐊᖃᖅᑯᖅ. ᐊᓯᔾᔨᐸᓪᓕᐊᔪᖅ ᓯᓚ ᐊᓯᔾᔨᐸᓪᓕᐊᒪᑦ ᐊᓂᖅᓵᖅᑐᖅᑕᐅᔪᖅ ᐊᒻᒪᓗ ᐃᒪᐅᑉ ᐃᖏᕐᕋᓂᖏᓐᓂᒃ ᓱᕈᓐᓇᖅᑐᓂᒃ ᐅᑭᐅᖅᑕᖅᑐᒨᕆᕙᑦᓱᑎᒃ. ᐊᒻᒪᓗ, ᐊᓯᔾᔨᕐᓂᐅᔪᑦ ᓯᑯᒧᑦ ᐊᒻᒪᓗ ᐊᐅᑉᐸᓪᓕᐊᔪᑦ ᐊᐅᔪᐃᑦᑐᖅ ᐃᑲᔪᖅᓯᓯᒪᓪᓚᑦᓯᐊᕆᑦᑐᑦ ᓴᕕᕋᔭᑦᓴᖃᓗᐊᖃᓗᐊᕐᓂᕐᒧᑦ ᐃᓚᖏᓐᓂ ᐅᑭᐅᖅᑕᖅᑐᒥ ᑕᓰᑦ. ᑕᐃᒪᐃᑦᑎᓪᓗᒍ ᓱᕈᓐᓇᖅᑐᖃᕐᓂᖅᓴᐅᔪᑦ ᐱᕈᖅᑐᓅᖅᐸᓪᓕᐊᔪᓂᒃ, ᐆᒪᔪᕐᓄᑦ, ᐊᒻᒪᓗ ᐃᓄᓐᓄᑦ ᑎᑭᐅᑎᕋᑕᕐᓗᑎᒃ.

ᐊᑦᑐᖅᑕᐅᓂᖏᑦ ᖃᓄᐃᓐᖏᑦᓯᐊᕐᓂᐅᑉ ᐋᓐᓂᐊᓪᓗ

ᐋᓐᓂᐊᑦ ᐊᐃᑦᑑᑕᐅᒍᓐᓇᖅᑐᑦ ᐆᒪᔪᕐᓄᑦ ᐃᓄᓐᓅᕐᓗᑎᒃ (ᑐᑭᓯᓂᐊᖅᑎᒻᒪᕇᑦ ᑕᐃᔭᖏᑦ “ᐆᒪᔪᕐᓃᓐᖔᖅᑐᑦ ᖃᓂᒻᒪᓯᑦ”) ᓂᕆᐅᒋᔭᐅᔪᑦ ᐊᒥᓱᓐᖑᐸᓪᓕᐊᓂᐊᕆᐊᖏᑦ ᓯᓚ ᓂᕈᒥᑦᓯᕙᓪᓕᐊᑎᓪᓗᒍ. ᐆᒪᔪᐃᑦ ᐃᒻᒥᓅᖓᑐᐃᓐᓇᕋᔪᖃᑦᑕᖅᓯᒪᔪᑦ ᐆᒪᔫᖃᑎᒥᓂᒃ ᑲᓱᐃᓂᖅᓴᐅᖃᑦᑕᓕᕐᓗᑎᒃ ᒪᑯᐊ ᐊᐳᖅᕕᐅᖃᑦᑕᖅᓯᒪᔪᑦ ᓯᑯᐃᑦ ᐊᐳᑏᓪᓘᓐᓃᑦ ᓄᖑᑎᖅᐸᓪᓕᐊᑉᐸᑕ ᓯᓚᐅᑉ ᐊᓯᔾᔨᐸᓪᓕᐊᓂᖓᓄᑦ. ᑕᐃᒪᐃᑦᑎᓪᓗᒍ ᓯᐊᒻᒪᖅᑎᕈᑕᐅᒍᓐᓇᖅᑐᖅ ᖃᓂᒻᒪᓯᕐᓄᑦ.
ᓯᓚᕐᓂᓪᓗ ᐊᒻᒪᓗ ᐅᓗᕆᐊᓇᖅᑐᑦ ᑕᒪᕐᒥᒃ ᑐᕋᐃᓐᓇᖅᑐᒥᒃ ᐊᑦᑐᐃᓂᐅᒻᒪᑕ ᐃᓄᐃᑦ ᖃᓄᐃᓐᖏᑦᓯᐊᕐᓂᖏᓐᓂᒃ ᐊᓯᔾᔨᐸᓪᓕᐊᔪᒥᒃ ᓯᓚᒥᒃ. ᓂᕆᐅᓇᓐᖏᑦᑐᑦ ᓯᓚᐅᑉ ᐊᐅᓚᓂᖏᑦ ᐱᕐᓗᐊᕿᓂᖅᓴᐅᒍᑕᐅᑐᐃᓐᓇᕆᐊᓖᑦ ᑐᐊᕕᕐᓇᖅᑐᖃᕐᓂᖅᓴᐅᓗᓂ. ᕿᓂᖅᑏᑦ ᐊᑦᑐᖅᑕᐅᔪᑦ, ᕿᓂᕐᓂᐅᒐᔭᖅᑐᑦ ᓄᖅᑲᖓᑎᑕᐅᒐᔪᒻᒪᑕ ᓯᓚᕐᓂᕐᓗᒻᒧᑦ.

ᐊᑦᑐᖅᑕᐅᓂᖏᑦ ᐃᑦᓴᕐᓂᑕᐃᑦ ᐊᔾᔨᐅᖏᑦᑐᓪᓗ ᓄᓇᐃᑦ

ᐃᑦᓴᕐᓂᑕᐃᑦ ᐊᔾᔨᐅᓐᖏᑦᑐᓪᓗ ᐃᓂᐅᔪᑦ ᓄᓇᕗᒻᒥ ᐊᑦᑐᖅᑕᐅᓕᕐᒪᑕ ᐊᐅᔪᐃᑦᑐᐃᑦ ᐊᐅᑉᐸᓪᓕᐊᓂᖏᓐᓄᑦ ᐊᒻᒪᓗ ᓯᓈ ᓄᖑᑎᖅᐸᓪᓕᐊᓂᖓᓄᑦ ᐱᔾᔪᑕᐅᓪᓗᓂ ᓯᑯᓇᓵᕐᓂᕆᕙᑦᑕᖓ ᑕᕆᐅᑉ ᓯᑯᖓᑕ. ᐃᒃᑮᓇᖅᑐᖅ ᐅᑭᐅᖅᑕᖅᑐᖅ ᖁᐊᖑᑎᑦᓯᓲᖑᒐᓗᐊᕐᒪᑦ ᐊᐅᔪᐃᑦᑐᕐᒥ. ᐊᐅᔪᐃᑦᑐᖅ ᐊᓯᕈᖅᐸᑦ, ᓱᕋᑦᑎᕆᓂᐊᖅᑐᖅ ᐱᖅᑯᓯᖅᑎᒍᑦ ᕿᒪᑯᒥᓂᕐᓂᒃ ᐃᑦᓴᕐᓂᑕᕐᓂᓪᓗ ᓱᕋᑉᐸᓪᓕᐊᓚᐅᖅᓯᒪᓐᖏᑦᑑᒐᓗᐊᓂᒃ. ᑲᔪᓯᔪᒥᒃ ᖁᐊᖅᐸᑦᑐᑦ ᐊᐅᑉᐸᑦᓱᑎᓪᓗ ᐅᖁᖅᐸᓪᓕᐊᑎᑦᓯᒻᒪᑕ ᐃᑦᓴᕐᓂᑕᕐᓂᒃ ᓲᕐᓗ ᖃᕐᒪᒥᓂᕐᓂᒃ (ᐃᒥᑦᓱᑦ ᒪᑭᑕᓚᕿᔪᖅ ᐊᐅᔪᑦᑐᖅ ᐱᔾᔪᑕᐅᓪᓗᓂ) ᐊᒻᒪᓗ ᐊᓯᖏᑦ ᐱᑐᖃᐃᑦ ᓄᓇᒦᑦᑐᑦ, ᓲᕐᓗ ᐃᓂᒋᔭᐅᔪᒥᓃᑦ ᖃᓪᓗᓈᑦ ᑎᑭᑉᐸᓪᓕᐊᑎᓪᓗᒋᑦ ᐅᑭᐅᖅᑕᖅᑐᒧᑦ. ᓄᖑᑎᖅᐸᓪᓕᐊᔪᖅ ᓯᓈ ᓂᕆᐅᖏᔭᐅᔪᖅ ᐱᓕᖅᐸᓪᓕᐊᑐᐃᓐᓇᕐᓂᐊᕆᐊᖓ ᐅᓕᓐᓃᑦ ᖁᕝᕙᐸᓪᓕᐊᑎᓪᓗᒋᑦ. ᑕᒪᓐᓇ ᐅᓗᕆᐊᓇᕐᓂᐊᖅᑐᖅ ᐃᑦᓴᕐᓂᑕᕐᓄᖅ ᐃᓂᐅᔪᓄᑦ ᓂᒋᐊᓂ ᕿᑭᖅᑖᓘᑉ, ᐅᐊᓐᓇᖓᓂ Victoria Island ᐊᒻᒪᓗ ᐱᖓᓐᓇᖓᓂ ᖁᑦᓯᑦᑐᒥ ᕿᑭᖅᑕᐃᑦ, ᐃᑦᓴᕐᓂᑕᕐᓂᒃ ᖃᐅᔨᓴᕐᕕᐅᓯᒪᓗᐊᓐᖏᑦᓱᓂ. ᓄᓇᕗᒻᒥ ᑕᑯᖃᑦᑕᖅᓯᒪᔪᒍᑦ ᐳᓚᕋᑦᑎᓂᒃ ᐊᑑᑎᒍᒪᔪᓂᒃ ᐊᔾᔨᐅᓐᖏᑦᑐᒥᒃ ᐅᑭᐅᖅᑕᖅᑐᒥ ᐊᕙᑎᒥᒃ ᐳᓚᕋᓪᓗᑎᓪᓗ ᐃᑦᓴᕐᓂᑕᕐᓄᑦ, ᒥᓐᖑᐃᕐᓯᕐᕕᓐᓄᑦ ᐊᒻᒪᓗ ᐊᔾᔨᐅᓐᖏᑦᑐᓄᑦ ᐅᐸᒐᕐᓄᑦ. ᓄᓇᕗᒻᒥ ᐱᐅᓯᐅᓯᒪᔪᓄᑦ ᐃᑦᓴᕐᓂᑕᐃᓪᓗ ᐅᐸᒍᒪᔭᓪᓗᐊᑕᕆᔭᐅᔪᑦ ᐳᓚᕋᑦᑎᓄᑦ ᐅᒥᐊᕐᔪᐊᓄᑦ ᐊᓯᖏᓐᓄᓪᓗ ᐳᓚᕋᑦᑎᓄᒃ. ᓄᖑᖅᐸᓪᓕᐊᓂᖓᑦ ᐊᑦᑐᐃᓂᕐᓗᓐᓂᖃᕈᓐᓇᖅᑐᖅ ᐳᓚᕋᑦᑐᓕᕆᓂᕐᒥᒃ.

ᐊᑦᑐᖅᑕᐅᓂᖏᑦ ᐋᖅᑭᐅᒪᔾᔪᑏᑦ

ᐊᕐᕌᒍᓂ ᕿᐱᑕᐃᑦ ᐅᖓᑖᓃᑦᑐᓂ, ᐊᑐᖃᑦᑕᖅᓯᒪᔪᒍᑦ ᐊᔾᔨᒌᓐᖏᑦᑐᓂᒃ ᖁᐊᕐᓂᒃ ᓄᓇᓂ, ᐅᐃᔪᐃᑦᑐᕐᒥ, ᐊᑑᑎᕕᖃᖅᓱᓂ. ᐸᕐᓇᐃᖃᑦᑕᖅᓯᒪᔪᒍᑦ ᑎᑎᖅᑑᔭᖅᑕᐅᓂᖏᓐᓂᒃ ᐃᓪᓗᑦᓴᐃᑦ ᑐᓐᖓᕕᖃᖅᓱᑕ ᖁᐊᕐᒥᒃ ᓄᓇᒥᒃ. ᐊᐅᔪᐃᑦᑐᖅ ᐊᑦᓱᕈᕐᓇᕈᑕᐅᒻᒪᑦ ᓴᓇᓂᕐᒧᑦ, ᐊᐅᓚᓂᐅᔪᑦ ᐊᒻᒪᓗ ᒪᑭᒪᔭᐅᓂᖏᓐᓄᑦ ᐃᓪᓗᐃᑦ, ᒥᑦᑕᕐᕖᑦ, ᐊᖅᑯᑏᑦ ᐊᒻᒪᓗ ᐊᓯᖏᑦ ᐅᑭᐅᖅᑕᖅᑐᒥ ᐋᖅᑭᐅᒪᔾᔪᑕᐅᔪᑦ.
ᑕᐃᒪᐃᓐᓂᖓᓄᑦ, ᐊᓯᔾᔨᕐᓂᐅᔪᑦ ᐊᐅᔪᐃᑦᑐᕐᒧᑦ, ᓯᑯᓄᑦ, ᖃᐅᓯᕐᓇᖅᑐᓄᑦ, ᑰᓐᓂᐅᔪᓄᑦ, ᓂᕈᒻᓂᓐᐅᔪᓄᑦ, ᐊᒻᒪᓗ ᓯᓚᕐᓂᓗᒻᒪᕆᐊᓗᓐᓄᑦ ᐊᑦᑐᐃᓂᕐᓗᓐᓂᖃᕈᓐᓇᖅᑐᑦ ᐋᖅᑭᐅᒪᔾᔪᑕᐅᔪᓂᑦ ᐋᖅᑭᑦᑕᐅᓯᒪᔪᓂᒃ ᐊᐅᔪᐃᑦᑐᒦᒍᒫᕐᓂᐊᑎᓪᓗᒋᑦ. ᐊᐅᔪᐃᑦᑐᖅ ᐊᐅᑉᐸᓪᓕᐊᑎᓪᓗᒍ ᐃᓪᓗᓄᑦ ᑐᓐᖓᕕᐅᔪᓄᑦ ᓄᑦᑕᕈᑕᐅᒍᓐᓇᕐᒪᑦ ᓴᓐᖐᑦᑐᕈᕐᓗᓂ. ᖁᐊᖅ ᓄᓇ ᐊᑦᑕᓇᓐᖏᒻᒪᑦ ᑐᓐᖓᕕᒋᒋᐊᖓ. ᖁᐊᖑᐃᓐᓇᖏᑉᐸᑦ, ᓴᓐᖏᓂᖓ ᓇᔪᕋᑦᓴᐅᓂᖓᓗ - ᒪᑭᒪᑦᓯᒍᓐᓇᕐᓂᖓᓘᓐᓃᑦ ᐃᓪᓗᒥᒃ, ᓱᓪᓗᓕᓐᓂᒃ ᐊᖅᑯᑎᓂᒃ ᒥᑦᑕᕐᕕᒻᒥᓘᓐᓃᑦ - ᐊᑦᑐᖅᑕᐅᑐᐃᓐᓇᕆᐊᓖᑦ. ᐃᓪᓗᑐᖃᐅᓂᖅᓴᐃᑦ ᐊᑦᑐᖅᑕᐅᓂᐅᓴᓂᖅᓴᐅᓂᐊᖅᑐᑦ ᓯᓚ ᐊᓯᔾᔨᐸᓪᓕᐊᒐᔭᕐᓂᖓ ᐃᓱᒪᒋᔭᐅᓯᒪᔪᓐᖏᒻᒪᑦ ᑖᒃᑯᐊ ᐃᓪᓗᐃᑦ ᓇᑉᐸᑎᖅᑕᐅᓕᕐᒪᑕ. ᐊᑦᑐᖅᑕᐅᓂᐅᔪᑦ ᓯᓚᐅᑉ ᐊᓯᔾᔨᕐᓂᖓᓄᑦ ᐱᒻᒪᕆᐅᓂᐊᕆᐊᖏᑦ ᓂᕆᐅᒋᔭᐅᔪᑦ ᐅᖁᒪᐃᑦᑐᒻᒪᕆᐅᓕᕐᓗᑎᓪᓗ ᒐᕙᒪᑦᑯᓐᓄᑦ. ᓄᓇᓕᓐᓂ ᐋᖅᑭᐅᒪᔾᔪᑏᑦ ᐊᖅᑐᖅᑕᐅᔪᑦ ᐊᐅᑉᐸᓪᓕᐊᔪᒧᑦ ᐊᐅᔪᐃᑦᑐᒧᑦ (ᓲᕐᓗ, ᑭᕕᕙᓪᓕᐊᔪᑦ ᓄᑎᑉᐸᓪᓕᐊᔪᑦ ᐃᓪᓗᐃᑦ) ᓄᖅᑲᐅᒥᒍᑕᐅᑐᐃᓐᓇᕆᐊᓖᑦ ᓴᓇᔭᐅᕙᓪᓕᐊᓂᖏᓐᓄᑦ ᐊᐅᓚᔾᔪᑏᑦ ᓄᑖᑦ. ᑎᑎᖅᑑᔭᕐᓂᕐᒧᑦ ᓴᓇᓂᕐᒧᓪᓗ ᐊᐅᓚᓂᐅᔪᑦ ᐃᓪᓗᓕᐅᕐᓂᕐᒧᑦ ᐊᓯᔾᔨᐸᓪᓕᐊᔪᒥ ᐊᐅᔪᐃᑦᑐᒥ ᐱᕙᓪᓕᐊᑎᑕᐅᔪᑦ. ᑭᓯᐊᓂᓕ, ᑖᒃᑯᐊ ᐊᓯᔾᔨᐸᓪᓕᐊᔪᑦ ᐊᐅᓚᓂᐅᔪᑦ ᐊᑦᑐᐃᓂᖃᕐᓂᐊᖅᑦ ᐊᑭᖏᓐᓂᒃ ᑕᒪᒃᑮᓐᓂᒃ ᓴᓇᒋᐊᓕᓐᓄᑦ ᒪᑭᒪᔭᐅᓂᖏᓐᓄᓪᓗ ᒫᓐᓇ ᓯᕗᓂᑦᓴᑎᓐᓂᓗ ᐊᖅᑭᐅᒪᔾᔪᑏᑦ.
ᓱᓪᓗᓖᑦ, ᐊᖅᑯᑏᑦ, ᒥᑦᑕᕐᕖᓪᓗ, ᓱᖏᖅᑑᑎᖃᕐᒥᔪᑦ ᐊᐅᔪᐃᑦᑐᕐᒥᒃ ᒪᑭᒪᓂᖏᓐᓄᑦ, ᐊᑑᑎᔪᑦ ᐅᖁᒪᐃᑦᓴᕐᓂᕐᒥᒃ ᓄᑦᑕᖅᑐᓂᒃ ᐊᐅᑉᐸᓪᓕᐊᔪᓂᓪᓗ ᓄᓇᓂᒃ. ᓴᓇᒋᐊᕆᐊᖃᖅᔫᒥᓛᖅᑐᑦ ᐊᓯᔾᔨᖅᑕᕐᓂᖓᓄᑦ ᖁᐊᖃᑦᑕᕐᓂᖅ ᐊᐅᖃᑦᑕᕐᓂᕐᓗ. ᓄᑖᑦ ᐋᖅᑭᐅᒪᔾᔪᑏᑦ ᑎᑎᖅᑑᔭᖅᑕᐅᕙᓪᓕᐊᒐᓗᐊᖅᑎᓪᓗᒋᑦ ᐊᓯᔾᔨᐸᓪᓕᐊᔪᒧᑦ ᐊᕙᑎᒧᑦ ᓈᒻᒪᓈᕆᐊᖅᓱᒋᑦ, ᑕᕝᕙᐅᔪᑦ ᐃᒪᕐᓂᒃ ᓱᕈᓐᓂᓪᓗ ᐸᐸᑦᓯᕖᑦ ᐋᖅᑭᓱᖅᑕᐅᓯᒪᓐᖏᑐᐃᓐᓇᕆᐊᖃᕐᒥᔪᑦ ᒫᓐᓇ ᓯᕗᓂᑦᑎᓐᓂᓗ ᓂᕈᒥᑦᓯᓂᐅᓂᐊᖅᑐᒧᑦ. ᑖᒃᑯᐊ ᐃᓪᓗᐃᑦ ᐊᒻᒪᓗ ᐊᑑᑎᔪᑦ ᐊᑑᑎᓲᑦ ᓇᑉᐸᖅᑕᐅᓯᒪᔪᑦ ᐊᑐᓐᖏᓕᑐᐃᓐᓇᕆᐊᓖᑦ, ᐊᑦᑐᐃᓂᖃᑐᐃᓐᓇᕆᐊᖃᖅᓱᓂ ᐊᕙᑎᒥᒃ ᐃᓄᐃᓪᓗ ᖃᓄᐃᓐᖏᑦᓯᐊᕐᓂᖓᓐᓂᒃ. ᓄᓇᒥᒃ ᐊᑐᕐᓂᕐᒧᑦ ᐊᐅᓚᓂᐅᔪᑦ ᐃᑲᔪᖅᓯᔪᑦ ᐊᓯᔾᔨᕐᓂᖏᓐᓂᒃ ᐋᖅᑭᑦᑕᐅᓯᒪᔪᑦ ᓄᓇᒧᑦ ᐊᐅᔪᐃᑦᑐᒧᓪᓗ ᐊᓯᔾᔨᖅᑕᐅᑦᓱᓂ ᓯᕿᓂᐅᑉ ᒥᓪᓗᐊᕐᓂᖓ, ᐊᒻᒪᓗ ᐊᓯᔾᔨᖅᑕᐅᑦᓱᓂ ᑰᓐᓂᖓ ᐃᒪᐅᑉ. ᑕᒪᓐᓇ ᐊᖅᑯᑎᓄᑦ ᑲᑕᒐᕈᑕᐅᒍᓐᓇᖅᑐᖅ, ᓄᑦᑕᕈᑕᐅᓗᓂ ᐃᓪᓗᓄᑦ ᑐᓐᖓᕕᐅᔪᓄᑦ. ᑕᒪᑦᓱᒥᖓ ᐊᑑᑎᑦᑕᐃᓕᒪᓂᖅ ᐸᕐᓇᓐᓂᒻᒪᕆᑦᑕᖃᕆᐊᖃᕐᓂᐊᖅᑐᖅ ᖃᐅᔨᓴᑦᓯᐊᕈᑕᐅᓗᓂ ᐋᖅᑭᐅᒪᔾᔪᑏᑦ ᒪᑭᒪᔭᐅᑦᓯᐊᕋᓗᐊᕐᒪᖔᑕ. ᐊᕙᑎᒧᑦ ᐊᓯᔾᔨᕐᓂᐅᔪᑦ ᐊᑦᑐᐃᓂᖏᓪᓗ ᐊᐅᔪᑦᑐᕐᒥ ᒫᓐᓇ ᐃᓱᒪᒋᔭᐅᔪᑦ ᓄᓇᓕᓐᓂ ᓄᓇᒥᒃ ᐊᑐᕐᓂᕐᒧᑦ ᐸᕐᓇᓐᓂᐅᔪᓂ ᐊᒻᒪᓗ ᓯᓚᐅᑉ ᐊᓯᔾᔨᕐᓂᖓᓄᑦ ᐃᕕᖅᑎᕐᓂᕐᒧᑦ ᐸᕐᓇᐅᑎᓂ. ᒫᓐᓇ ᑲᑎᖅᓱᖅᑕᐅᓯᒪᔪᑦ ᐊᒻᒪᓗ ᓴᓇᕐᕈᑏᑦ ᐱᕙᓪᓕᐊᑎᑕᐅᔪᑦ ᑲᔪᓯᓂᐊᖅᑐᑦ ᐊᑐᐃᓐᓇᐅᑎᑦᓯᒍᑕᐅᓗᑎᒃ ᑐᓴᕋᑦᓴᓂᒃ ᐋᖅᑭᑦᓱᐃᓗᑎᒃ ᓈᒻᒪᓈᖅᓯᒪᔪᓂᒃ, ᑲᔪᓯᓂᖃᑦᓯᐊᕈᓐᓇᖅᑐᓂᒃ ᐋᖅᑭᐅᒪᔾᔪᑎᓂᒃ ᐊᑑᑎᒍᓐᓇᖅᑐᓂᒃ ᓯᓚᒥ ᐊᓯᔾᔨᐸᓪᓕᐊᔪᒥ.

ᐊᑦᑐᖅᑕᐅᓂᐅᔪᑦ ᐃᖏᕐᕋᔪᓕᕆᓂᕐᒥ

ᓵᓪᓕᕙᓪᓕᐊᔪᑦ ᓯᑯᐃᑦ ᐃᔾᔪᑎᓂᖏᑦ ᐊᒻᒪᓗ ᕐᑳᖏᑦ ᒪᑐᐃᖅᓯᓂᐊᖅᑐᖅ ᓄᓇᒥᒃ ᐃᒪᕐᒥᓪᓗ ᐅᐸᒐᑦᓴᐅᖃᑦᑕᖅᓯᒪᓐᖏᑦᑐᓄᑦ. ᑕᐃᒪᐃᑦᑎᓪᓗᒍ ᐃᖏᕐᕋᓂᖅᓴᐅᓂᐊᖅᑐᑦ ᐅᒥᐊᕐᔪᐊᑦ ᓴᓇᓂᖅᑕᖃᕐᓂᖅᓴᐅᓗᓂᓗ, ᐊᐅᔭᑯᑖᖑᓂᖅᓴᐅᑎᓪᓗᒍ ᐅᒥᐊᕐᔪᐊᑦ ᐃᖏᕐᕋᖃᑦᑕᕐᓂᖓᑦ ᐊᐅᓚᔾᔭᐃᓂᐊᕋᓗᐊᖅᑎᓪᓗᒍ ᖃᑭᒪᓇᓱᐊᕈᑕᐅᒍᓐᓇᖅᑐᓂᒃ ᓄᓇᕗᒻᒧᑦ, ᐊᖏᓪᓕᕚᓪᓕᕈᑕᐅᓂᐊᕐᒥᔪᖅ ᐅᓗᕆᐊᓇᖅᑐᓄᑦ ᐊᕙᑎᒧᑦ, ᐱᓗᐊᖅᑐᒥᒃ ᑯᕕᔪᑎᒍᑦ ᐊᓯᖏᑦᑎᒍᓪᓗ ᓱᕈᓐᓇᖅᑐᒃᑯᑦ. ᐊᓯᖏᑦ ᐃᖏᕐᕋᔾᔪᑎᓄᑦ ᐊᑦᑐᐊᔪᑦ ᐊᑦᓱᕈᕐᓇᖅᑐᑦ ᓇᓗᓇᐃᖅᑕᐅᓯᒪᔪᑦ. ᓲᕐᓗ, ᑕᕆᐅᖅ ᓯᑯ ᐊᓯᔾᔨᐸᓪᓕᐊᓂᖓ ᐊᑦᓱᕈᕐᓇᐃᓐᓇᖅᑐᖅ ᖃᒧᑕᐅᔭᒃᑯᑦ ᕿᒧᑦᓯᑯᓪᓗ ᐊᖅᑯᑎᑐᖃᐅᔪᓄᑦ. ᓄᑖᑦ ᐊᓯᖏᓪᓘᓐᓃᑦ ᐊᖅᑯᑏᑦ ᐱᔭᕆᐊᖃᕐᓂᐊᖅᑐᑦ ᐊᑦᑕᓇᓐᖏᑦᑐᒥᒃ ᐱᖅᑯᓯᖅᑎᒍᑦ ᐊᖑᓇᓱᖃᑦᑕᕈᓐᓇᖁᓪᓗᒋᑦ ᑲᔾᔮᕆᐊᖅᐸᓪᓗᑎᓪᓗ. ᐊᐅᑉᐸᓪᓕᐊᔪᑦ ᐊᐅᔪᐃᑦᑐᐃᑦ ᐊᓯᔾᔨᐸᓪᓕᐊᔪᓪᓗ ᖁᐊᖅᐸᑦᓱᑎᒃ ᐊᐅᑉᐸᑦᑐᑦ ᑕᑯᑦᓴᒥᒃ ᐊᓯᔾᔩᓯᒪᓕᖅᑐᑦ ᓄᑦᑎᑦᓯᒪᓕᖅᓱᑎᓪᓗ ᕐᑳᖏᑦ ᒥᑦᑕᕐᕖᑦ ᓄᓇᕗᒻᒥ. ᑕᒪᓐᓇ ᐊᓚᒡᒐᐃᑦᑐᒻᒪᕆᒻᒥᒃ ᐃᖏᕐᕋᔾᔪᑎᓄᑦ ᐊᑦᓱᕈᕐᓇᖅᑐᖅ ᖃᖓᑕᔫᒃᑯᑦ ᐃᖏᕐᕋᖃᑦᑕᕐᓂᖅ ᐃᖏᕐᕋᔾᔪᑎᓪᓗᐊᑕᐅᒻᒪᑦ ᓄᓇᕗᒻᒥᐅᓄᑦ
ᐅᓯᔨᒋᔭᐅᑦᓱᓂ ᓂᕿᓂᒃ ᓱᓇᒃᑯᑎᓂᓪᓗ. ᐊᐅᓚᔾᔭᒋᐊᕈᑕᐅᑦᓱᓂ ᑖᒃᑯᓄᖓ ᐊᑦᓱᕈᕐᓇᖅᑐᓄᑦ, ᓄᓇᕗᒻᒥ ᐱᕚᓪᓕᕆᐊᖃᕐᓂᐊᖅᑐᑦ ᖃᐅᔨᕐᓴᕐᓂᐅᔪᑦ ᐊᐅᓚᔾᔭᒋᐊᕈᓐᓇᕈᑕᐅᔪᓪᓗ. ᐱᖃᓯᐅᑎᑦᓱᓂ ᓄᑖᑦ ᐱᐅᓂᖅᓴᐃᓪᓗ ᐋᖅᑭᐅᒪᔾᔪᑏᑦ, ᓄᓇᓐᖑᐊᑦ, ᐊᒻᒪᓗ ᐃᖏᕐᕋᔾᔪᑏᑦ. ᐱᕚᓪᓕᖅᓯᒪᔪᑦ ᐋᖅᑭᐅᒪᔾᔪᑏᑦ ᐱᖃᓯᐅᔾᔨᓂᐊᖅᑐᑦᓴᐅᕗᑦ ᐊᖅᑯᑎᓂᒃ, ᖁᐊᖅᑎᑕᒐᕐᓂᒃ ᒥᕝᕕᓐᓂᒃ ᐊᒻᒪᓗ ᓄᑦᑕᖏᑦᑐᓂᒃ ᑐᓚᑦᑕᕐᕕᓐᓂᒃ ᓯᓈᓃᑦᑐᓂ.

ᐊᑦᑐᖅᑕᐅᓂᐅᔪᑦ ᐃᑲᔪᖅᓯᒍᑏᑦ ᐱᕙᓪᓕᐊᓂᖏᓐᓄᑦ

ᐊᒥᓱᓐᖑᐹᓪᓕᕐᓂᖏᑦ ᖃᐅᔨᕐᓴᓂᕐᐅᔪᑦ ᐊᐅᓚᓂᐅᔪᓪᓗ ᑕᑯᑦᓴᕈᐃᓂᐊᖅᑐᑦᓴᐅᕗᑦ ᒫᓐᓇ ᓯᓚᐅᑉ ᐊᓯᔾᔨᐸᓪᓕᐊᓂᖓᓂᒃ ᓂᕆᐅᒋᔭᐅᔪᓂᒃ, ᐱᖃᓯᐅᑎᓗᑎᒃ ᓯᑯᖃᓐᖏᓂᖅᓴᐅᓗᓂ ᐊᒻᒪᓗ ᓂᕈᒥᓐᓂᖅᓴᐅᓗᓂ . ᑲᓇᑕᒥ ᐅᑭᐅᖅᑕᖅᑐᖓᓂ ᕿᑭᖅᑕᐃᑦ ᐅᔭᕋᑦᓯᐊᕙᑦᑕᖃᕐᓂᐅᓴᑐᐃᓐᓇᕆᐊᓖᑦ ᐊᖏᓈᖅᓯᒪᔪᐊᓕᓐᓂᒃ. ᐅᖅᓱᐊᓗᓐᓂᐊᕐᓃᑦ ᐅᔭᕋᓐᓂᐊᕐᓃᓪᓗ ᐱᕙᓪᓕᐊᑐᐃᓐᓇᕐᓂᐊᕆᐊᖏᑦ ᓂᕆᐅᓇᖅᑐᑦ.
ᓄᓇᒥᐅᑕᓂᒃ ᐱᕙᓪᓕᐊᑎᑦᓯᓂᖅ, ᓲᕐᓗ ᐃᖃᓗᓕᕆᓂᖅ, ᐊᑦᑐᖅᑕᐅᓂᐊᒃᒥᔪᖅ ᓯᓚᐅᑉ ᐊᓯᔾᔨᕐᓂᖓᓄᑦ. ᐃᖃᓗᒐᓱᐊᕐᓂᖅ ᓄᓇᕗᒻᒥ ᐱᒻᒪᕆᐊᓘᔪᖅ ᖃᑭᒪᒐᓱᐊᕐᓂᕐᒧᑦ ᐃᓅᓇᓱᐊᕐᓂᕐᒧᓪᓗ. ᓇᓗᓇᓗᐊᓐᖏᑦᑐᖅ ᐃᖃᓗᐃᑦ ᒫᓐᓇ ᑕᕝᕙᐅᔪᑦ ᐊᒥᓱᓐᖑᐹᓪᓕᕐᓂᐊᕆᐊᖏᑦ ᓄᓇᕗᑦ ᐃᒪᖓᑕ ᓯᓚᑖᓃᑦᑐᑦ ᐅᑭᐅᖅᑕᖅᑐᒥᐅᖑᖃᑦᑕᖅᓯᒪᓐᖏᑦᑐᑦ ᐃᖃᓗᐃᑦ ᓅᑉᐸᓪᓕᐊᓂᐊᕐᒪᑕ ᐅᑭᐅᖅᑕᖅᑐᒧᑦ ᓯᓚ ᓂᕈᒥᑦᓯᕙᓪᓕᐊᑎᓪᓗᒍ. ᑕᒪᓐᓇ ᐊᓚᒃᑲᐃᒍᑕᐅᒍᓐᓇᕋᓗᐊᖅᑎᓪᓗᒍ ᓄᑖᓂᒃ ᐱᕕᑦᓴᖃᕐᓂᐅᔪᓂᒃ ᐃᖃᓗᓕᕆᔨᓄᑦ, ᑎᑭᐅᔾᔨᖃᓯᐅᑎᒍᓐᓇᕐᒥᔪᑦ ᖁᐱᕐᕈᐊᕐᔪᓐᓂᒃ ᓂᕿᑦᓴᖅᓯᐅᖅᑎᓂᓪᓗ. ᒫᓐᓇ ᐊᒻᒪᓗ ᐸᕐᓇᑕᐅᓯᒪᔪᑦ ᐃᖃᓗᓕᕆᓂᕐᒧᑦ ᐊᐅᓚᓂᐅᔪᑦ ᐊᐅᓚᑦᓯᓂᕐᓗ ᑲᔪᓯᔪᒥᒃ ᖃᐅᔨᓴᖅᑕᐅᒋᐊᖃᕐᓂᐊᖅᑐᑦ ᐋᖅᑭᒋᐊᖅᑕᐅᓗᑎᒃ ᐊᑦᑐᖅᑕᐅᓂᐅᔪᓄᑦ ᓯᓚᐅᑉ ᐊᓯᔾᔨᕐᓂᖓᓄᑦ.

ᐊᑦᑐᖅᑕᐅᓂᐅᔪᑦ ᐳᓚᕋᓐᓂᕐᒧᑦ

ᐊᐅᔭᐅᑯᑖᓐᓂᖅᓴᐅᖃᑦᑕᑎᓪᓗᒍ “ᐊᒥᓱᒻᒪᕆᓐᓄᑦ” ᐳᓚᕋᓐᓂᖅᑕᖃᑐᐃᓐᓇᕆᐊᓕᒃ ᐊᒻᒪᓗ ᐳᓚᕋᓐᓂᖅ ᐊᐅᓚᓂᖃᕆᐊᒃᑲᓐᓂᓕᕐᓗᓂ. ᓯᑯᐃᕈᑉᐊᓪᓕᐊᓂᖅ ᓇᓗᓇᓗᐊᓐᖏᑦᑐᖅ ᐅᒥᐊᕐᔪᐊᓄᑦ ᐃᖏᕐᕋᑲᓐᓂᕈᑕᐅᓂᐊᖅᑐᖅ, ᐱᓗᐊᖅᑐᒥᒃ ᐳᓚᕋᑦᑎᓄᑦ ᐅᒥᐊᕐᔪᐊᓄᑦ, ᐅᐸᒐᑦᓴᐅᖃᑦᑕᖅᓯᒪᓐᖏᑦᑐᓄᑦ ᐊᒻᒪᓗ /ᐅᕝᕙᓗ ᐅᐸᒋᐊᑐᖃᑦᑕᖅᓯᒪᔪᓄᑦ. ᐊᑑᑎᖃᕋᓗᐊᖅᓱᓂ, ᐊᒥᓲᓂᖅᓴᐃᑦ ᐅᒥᐊᒃᑯᑦ ᐳᓚᕋᑦᑏᑦ ᐊᑦᓱᕈᕐᓇᕐᒥᒻᒪᑕ ᐊᑦᑐᖅᑕᐅᓂᖏᓐᓄᑦ ᓄᓇᓖᑦ, ᐃᑦᓴᕐᓂᑕᐃᑦ, ᐊᒻᒪᓗ ᐊᕙᑎᒧᑦ ᐃᓘᓐᓈᒍᑦ. ᑲᒪᒋᔭᕋᕐᓂᖅ ᑖᒃᑯᓇᓐᖓᑦ ᐊᑦᓱᕈᕐᓇᖅᑐᓂᒃ ᐱᔭᕆᐊᖃᕈᑕᐅᓂᐊᖅᑐᖅ ᐃᑲᔪᖅᓯᑲᓐᓂᕈᑎᑦᓴᓂᒃ.

ᐊᑦᑐᖅᑕᐅᓂᐅᔪᑦ ᓴᓇᐅᒐᕐᓄᑦ

ᐳᓚᕋᑦᑎᖃᕆᐊᒃᑲᓐᓂᕐᓂᖅ ᑎᑭᐅᑎᒍᑕᐅᒐᔭᖅᑑᔮᖅᑐᖅ ᓂᐅᕕᖅᑕᐅᓂᖅᓴᐅᓂᖏᓐᓄᑦ ᓴᓇᐅᒐᐃᑦ, ᐊᒻᒪᓗ ᓯᓚᑦᓯᐊᖑᓂᖅᓴᐅᑎᓪᓗᒍ ᓴᓇᓐᖑᐊᕈᓐᓇᓂᖅᓴᐅᖃᑦᑕᕐᓂᐊᕐᒪᑕ ᐅᔭᖅᑲᓂᒃ ᐊᑯᓂᐅᓂᖅᓴᖅ ᐊᕐᕌᒍᒥ. ᑭᓯᐊᓂᓕ, ᓂᕆᐅᓇᓐᖏᑦᑐᑦ ᓯᓚᐅᑉ ᐊᐅᓚᓂᖏᑦ ᐊᐅᑉᐸᓪᓕᐊᓂᖓᓗ ᐊᐅᔪᐃᑦᑑᑉ ᐅᓗᕆᐊᓇᕈᓐᓇᖅᑐᖅ ᐊᑦᑕᓇᑦᑕᐃᓕᓂᖏᓐᓄᑦ ᓴᓇᐅᒐᖅᑏᑦ ᐱᓇᓱᐊᕐᕕᐅᔪᓪᓗ ᐅᔭᕋᓐᓂᐊᕐᕕᓐᓂ ᐅᖓᓯᑦᑐᒻᒪᕆᐊᓕᓐᓂ ᓄᓇᓕᓐᓂᒃ.

ᐊᑦᑐᖅᑕᐅᓂᐅᔪᑦ ᐊᐅᒪᓄᑦ

ᐊᓯᔾᔨᐸᓪᓕᐊᔪᖅ ᓯᓚ ᐊᑦᑐᐃᖃᓪᓚᕆᓐᓂᐊᖅᑐᖅ ᐊᐅᒪᓕᐅᕈᑎᑦᑎᓐᓂᒃ. ᓂᕈᒥᓐᓂᖅᓴᖅ ᓯᓚ ᐊᑦᑐᐃᓂᖃᕐᓂᐊᖅᑐᖅ ᐅᖅᑰᓴᐅᑎᖃᕆᐊᖃᕐᓂᑎᓐᓂᒃ, ᐊᑭᑭᓐᓂᖅᓴᐅᓕᕐᓗᓂ ᐅᖅᑰᑎᑦᓯᒐᓱᐊᕐᓂᖅ ᐃᓪᓗᓂᒃ. ᑕᕝᕙᐅᕗᑦ ᐊᐅᓚᐅᑎᖃᕐᕕᐊᓗᐃᑦ ᐊᑦᑐᖅᑕᐅᓂᐊᖅᑐᑦ ᐊᓯᔾᔨᐸᓪᓕᐊᓂᐅᔪᓄᑦ ᐊᐅᔪᐃᑦᑐᒧᑦ, ᒪᑭᒪᑦᓯᐊᕈᓐᓇᕐᓂᖓᓂᒃ ᐊᑦᑐᐃᓂᖃᕐᓗᓂ. ᕿᑲᖅᓯᕙᓪᓕᐊᓂᖏᑦ ᑐᓐᖓᕕᐅᔪᑦ ᑕᕝᕙᐅᔪᓄᑦ ᐊᐅᒪᓕᐅᕐᕕᓐᓂ ᑕᑯᔭᐅᓯᒪᓕᕇᖅᑐᖅ. ᐊᐅᑉᐸᓪᓕᐊᔪᖅ ᐊᐅᔪᐃᑦᑐᖅ ᓂᕆᐅᒋᔭᐅᒻᒥᔪᖅ ᐊᑦᑐᐃᓂᖃᕐᓂᐊᕆᐊᖓ ᐅᖅᓱᐊᓗᖃᐅᑎᖃᕐᕕᓐᓂᒃ ᐊᒻᒪᓗ ᐅᐊᔭᖃᕐᕕᓐᓂᒃ. ᓲᕐᓗ, ᐊᐅᔪᐃᑦᑐᖅ ᐊᐅᑉᐸᓪᓕᐊᔪᖅ ᓴᖅᑮᓯᒪᒻᒪᑦ ᓇᐸᔪᐊᓗᐃᑦ ᐋᖅᑭᒋᐊᑭᓐᓂᖅᓴᐅᒻᒪᕆᓕᖅᓱᑎᒃ. ᑕᕝᕘᓇᑦᓴᐃᓐᓇᕐᓗ, ᐊᐅᑉᐸᓪᓕᐊᓂᖅ ᓇᐸᔪᓄᑦ ᓇᐸᑦᓯᐊᕈᓐᓃᕈᑕᐅᕙᓪᓕᐊᒻᒥᔪᖅ, ᐅᕕᖓᔮᓕᖅᓱᑎᒃ ᐃᔾᔪ ᓴᓐᖐᓕᕐᓂᑯᖓᓄᑦ. ᐊᓯᔾᔨᕐᓂᐅᔪᑦ ᐃᒪᕐᒧᑦ ᖃᐅᓯᕐᓇᕐᒧᓪᓗ ᐊᐅᔪᐃᑦᑐᐃᑦ ᐊᐅᑉᐸᓪᓕᐊᓂᖏᓐᓂ ᐊᑦᑐᐃᓂᖃᑐᐃᓐᓇᕆᐊᓕᒃ ᐅᐊᔭᒋᔭᐅᔪᓂᒃ. ᖃᐅᔨᕐᓴᓂᐅᖃᑦᑕᖅᓯᒪᔪᑦ ᒥᑦᓴᐅᓯᔪᑦ ᐃᒪᕐᒥᒃ ᐊᐅᒪᖃᕈᑏᑦ ᓱᖏᖅᑑᑎᑦᓴᐅᔾᔮᒍᓐᓃᕆᐊᖏᑦ ᑰᓐᓂᐅᔪᑦ ᑕᓯᑦᑎᓐᓄᑦ ᑰᑦᑎᓐᓄᓪᓗ ᐊᓯᔾᔨᑐᐃᓐᓇᕆᐊᖃᕐᒪᑕ ᓯᓚᐅᑉ ᐊᓯᔾᔨᐸᓪᓕᐊᓂᖓ ᐱᔾᔪᑕᐅᓗᓂ. ᐃᓚᖏᑦ ᖃᐅᔨᓴᕐᓂᐅᔪᑦ ᖃᐅᔨᒍᑕᐅᓯᒪᔪᑦ ᖃᐅᓯᕐᓇᓕᖅᐹᓪᓕᕐᓂᐊᕆᐊᖓ, ᐊᑦᑐᐃᓂᖃᑦᓯᐊᕐᓂᐊᖅᓱᓂ ᐊᖏᓂᖓᓂᒃ ᐃᒪᐅᑉ ᐊᑐᐃᓐᓇᐅᔫᑉ ᐃᒪᕐᒥᒃ ᐊᐅᒪᓕᐅᕈᑎᖃᕐᓂᕐᒧᑦ. ᐊᓯᔾᔨᕐᓂᐅᑐᐃᓐᓇᕆᐊᓖᑦᑕᐅᖅ ᐊᓄᕆᐅᑉ ᐊᐅᓚᓂᖏᓐᓂ ᐊᑦᑐᐃᓂᖃᑐᐃᓐᓇᕆᐋᓖᑦ ᐊᑐᖅᑕᐅᒍᓐᓇᕐᓂᒃ ᐊᓂᕆᒥᒃ ᐊᐅᒪᓕᐅᕈᑎᖃᕐᓂᐅᑉ.