ᓯᓚᐅᑉ ᐊᓯᔾᔨᕐᓂᖓᓄᑦ ᓱᖏᐅᑎᓂᑦ

ᓱᓇᐅᒻᒪᑦ ᓱᖏᐅᑎᓂᖅᕙ ?

ᐊᐅᓚᔾᔭᒋᐊᕈᑎᖃᕐᓂᖅ ᐊᑦᑐᖅᑕᐅᓂᐅᔪᓄᑦ ᓯᓚᐅᑉ ᐊᓯᔾᔨᕐᓂᖓᓄᑦ.

ᓱᖏᐅᑎᓂᖅ ᐊᓯᔾᔨᕐᓂᕆᒍᓐᓇᖅᑕᕗᑦ ᐱᐅᓯᑦᑎᓐᓄᑦ ᐊᑦᑐᐊᔪᓄᑦ ᐊᑦᑐᖅᑕᐃᓂᕐᒧᑦ ᓯᓚᐅᑉ ᐊᓯᔾᔨᕐᓂᖓᓄᑦ. ᓄᓇᕗᒻᒥ, ᖃᓄᑐᐃᓐᓇᑦᓯᐊᖅ ᑐᑭᖃᕈᓐᓇᖅᑐᖅ ᕿᓂᕐᓂᕐᒥᒃ ᐊᖑᓇᓱᓐᓂᕐᒧᑦ ᐊᖅᑯᑎᑖᖅᑲᐅᓂᒃ ᓯᓚᐅᑉ ᐅᓕᓐᓂᖏᑦ ᐊᓯᔾᔨᐸᓪᓕᐊᑎᓪᓗᒋᑦ ᐊᓯᔾᔨᕆᐊᕆᐊᖃᖅᓱᓂ ᓴᓇᖃᑦᑕᕐᓂᕗᑦ ᐃᓪᓗᓂᒃ ᐊᐅᔪᐃᑦᑐᖅ ᐊᐅᑉᐸᓪᓕᐊᑎᓪᓗᒍ. ᐃᓄᐃᑦ ᓄᓇᕐᔪᐊᓕᒫᒥ ᓱᖏᖑᑎᑎᑦᓯᕙᓪᓕᐊᓯᒪᔪᑦ ᐃᓅᓯᕐᒥᓂᒃ ᐋᖅᑭᐅᒪᑎᒋᐊᖅᓱᒍ ᐊᓯᔾᔨᖅᑐᓄᑦ ᓯᓚᓄᑦ. ᐅᑭᐅᖅᑕᖅᑐᒥ ᐊᑦᓱᕈᕐᓇᐸᓪᓕᐊᑐᐃᓐᓇᕐᓂᐊᖅᑐᖅ ᑕᐃᒪᐃᓗᐊᖅᑎᓐᓇᒋᑦ ᐊᓯᖏᑦ ᓱᖏᐅᑎᓂᕐᒧᑦ ᓯᓚᐅᑉ ᐊᓯᔾᔨᕐᓂᖓᑦ, ᐊᑦᑐᖅᑕᐅᓯᒪᕐᔪᐊᓕᕇᕐᒪᑦ. ᐱᒻᒪᕆᐊᓗᒃ ᐃᓱᒪᑦᓴᖅᓯᐅᕈᑎᖃᖅᐸᓪᓕᐊᓂᖅ ᖃᓄᖅ ᐊᑦᑐᐃᓂᕆᔭᖏᑦ ᓯᓚᐅᑉ ᐊᓯᔾᔨᕐᓂᖓᑕ ᓄᓇᓕᑦᑎᓐᓂᒃ ᐊᑑᑎᓂᐊᕐᒪᖔᑕ. ᓄᓇᕗᒻᒥᐅᑦ ᑕᑯᖃᑦᑕᖅᓯᒪᒌᖅᑐᑦ ᑐᕋᐃᓐᓇᖅᑐᒥᒃ ᐊᑐᖅᑕᐅᑦᓱᑎᒃ, ᓲᕐᓗ ᐊᓯᔾᔨᕐᓂᐅᔪᑦ ᓯᑯᓄᑦ ᐊᐱᑎᒧᓪᓗ.
ᐊᑦᓱᕈᕐᓇᖅᑐᑦ ᐊᐱᖅᑯᑕᐅᔪᑦ: ᖃᓄᖅ ᓱᖏᐅᑎᓂᐊᖅᑭᑕ ᓄᓇᒧᑦ ᐆᒪᔪᖃᕐᕖᑦ ᐊᓯᔾᔨᐸᓪᓕᐊᑎᓪᓗᒋᑦ ᐊᖑᓇᓱᑦᑏᓪᓗ ᑎᑭᐅᑎᒍᓐᓇᕈᓐᓃᖅᓱᑎᒃ ᐆᒪᔪᕐᓄᑦ. ᖃᓄᖅ ᒪᑭᒪᒋᐊᕐᓂᐊᖅᑲᕗᑦ ᐊᖅᑯᑎᕗᑦ ᐃᓪᓗᖁᑎᕗᓪᓗ, ᓴᓇᐅᔭᓯᒪᔪᑦ ᓄᓇᒧᑦ ᐊᐅᔪᐃᑦᑐᓕᒻᒧᑦ? ᑭᐅᔾᔪᑎᑦᓴᓪᓚᕆᓐᓂᒃ ᐱᑕᖃᕐᓂᐊᖅᑐᑦᓴᐅᖏᒃᑲᓗᐊᖅᑎᓪᓗᒍ ᐊᐱᖅᑯᑎᓄᑦ, ᐊᒥᓱᑎᒍᑦ ᓄᓇᓕᓯ ᓱᖏᐅᑎᒍᓐᓇᖅᑐᖅ ᓯᓚᐅᑉ ᐊᓯᔾᔨᕐᓂᖓᓄᑦ:

ᐊᓯᖏᓐᓂᒃ ᐊᖅᑯᑎᖃᕐᓂᖅ ᐆᒪᔪᕐᓅᖓᔪᓂᒃ

ᐱᔭᕆᐊᑐᓂᖅᓴᐅᓚᖓᔪᖅ ᑎᑭᐅᑎᒐᓱᐊᕐᓂᖅ  ᐅᒪᔪᕐᓄᑦ ᐊᖅᑯᑎᑐᖃᒃᑯᑦ ᓯᑯ ᐊᐳᑎᓗ ᐊᓯᔾᔨᐸᓪᓕᐊᖏᓐᓇᑎᓪᓗᒍ. ᐸᕐᓇᒋᖓᓕᒃ ᓯᕗᕐᖓᓂ, ᐸᕐᓇᐃᖅᓯᒪᓗᓂ, ᐃᓱᒪᒋᔭᖃᕐᓗᓂ ᐊᓯᐊᒎᖅᕕᑦᓴᓂᒃ, ᐊᑦᑕᓇᓐᖏᓂᖅᓴᓂᒃ ᐊᖅᑯᑎᓂᒃ ᐆᒪᔪᓕᐊᕐᓗᓂ.

ᐊᑐᐃᓐᓇᐅᒪᒋᐊᓕᒃ ᓯᓚᒧᑦ ᐊᓯᔾᔨᓴᕋᐃᑦᑐᒧᑦ ᐊᓯᓂ

ᐊᓯᓅᓐᓂᐊᕈᕕᑦ, ᖃᐅᔨᓴᑦᓯᐊᕆᑦ ᐊᓐᓇᒍᑎᑦᓴᓂᒃ ᓇᑦᓴᑦᓯᐊᕋᓗᐊᕐᒪᖔᖅᐱᑦ ᓯᓚᕐᓂᓪᓗᐊᓗᒃᑯᑦ, ᓯᓚᑦᓯᐊᕌᓘᑎᓪᓗᒍ ᐊᐅᓪᓚᕋᓗᐊᕈᕕᑦ ᓄᓇᑦᓯᓐᓂᒃ. ᐱᖃᓯᐅᑎᔪᑦ ᓂᕐᑮᑦ, ᓯᓂᑦᑕᕕᑦᓴᖅ, ᐃᒪᖅ, ᐊᒻᒪᓗ ᐅᖅᑰᔪᓂᒃ ᐊᓐᓄᕌᓂᒃ. 
ᐃᖏᕐᕋᓂᕐᒧᑦ ᓴᓇᕐᕈᑏᑦ  ᓲᕐᓗ ᑕᒻᒪᕇᒃᑯᑏᑦ, ᓇᐃᐱᑕᐅᔾᔪᑏᓪᓘᓐᓃᑦ ᕿᓂᖅᑲᐅᔪᓄᑦ ᐊᑐᕐᓂᖃᕈᓐᓇᓪᓚᕆᑦᑐᑦ ᓯᓚ ᐊᓯᕐᔨᖅᑕᓴᐅᖅᑐᑎᓪᓗᒍ. ᐊᔾᔭᖅᓯᓂᖅ ᐅᕐᑳᓚᐅᑎᒥᒃ, ᓲᕐᓗ ᖃᖓᑦᑕᖅᑎᑕᐅᓯᒪᔪᒃᑯᑦ ᐅᕝᕙᓗ ᓈᓚᐅᑎᒥᒃ ᐃᓱᒪᑦᓯᐊᕙᐅᒻᒥᔪᖅ; ᑐᓴᕐᕕᑦᓴᐅᒻᒪᑕ ᓯᓚᐅᑉ ᖃᓄᐃᓐᓂᐊᕐᓂᕋᖅᑕᐅᓂᖓᓂᒃ ᐅᕐᑳᓚᒍᓐᓇᕋᔭᖅᓱᑎᓪᓗ ᑐᐊᕕᕐᓇᖅᑐᖃᖅᑎᓪᓗᒍ. ᖃᐅᔨᒪᑎᑦᓯᒋᐊᖃᕐᒥᔪᑎᑦ ᐱᖃᑎᓐᓂᒃ ᐃᓚᓐᓂᓘᓐᓃᑦ ᓇᒧᓐᖓᕐᒪᖔᖅᐱᑦ ᖃᖓᓗ ᐅᑎᕋᔭᓐᖑᐊᕐᒪᖔᖅᐱᑦ.

ᐸᕐᓇᐃᕐᓗᒍ ᐊᖏᕐᕋᐃᑦ ᐱᕕᓕᒫᒃᑯᑦ

ᐃᓪᓗᐃᑦ ᐊᖏᕐᕋᕆᔭᐅᔪᓪᓗ ᓴᓇᔭᐅᓯᒪᔪᑦ ᓄᓇᒥ ᐊᐅᔪᐃᑦᑐᒥ ᑕᑯᓂᐊᖅᑐᖅ ᐊᓯᔾᔨᕐᓂᕐᒥᒃ, ᓲᕐᓗ ᐃᓪᓗ ᓄᑦᑕᕐᓗᓂ. ᑕᒪᓐᓇ ᐊᑲᐃᓪᓕᐅᕈᑕᐅᒍᓐᓇᖅᑐᑦ ᑐᓐᖓᕕᖏᓐᓄᑦ ᓇᐸᔪᓄᓪᓗ ᐃᑲᔪᖅᓯᔪᓄᑦ ᐃᓪᓗᓂᒃ. ᑕᒪᓐᓇ ᐊᓯᔾᔨᕐᓂᐅᔪᑦ ᐅᓐᓄᐊᖏᓐᓇᖅ ᐊᑑᑎᔾᔮᖏᑦᑑᒐᓗᐊᖅ ᑭᓯᐊᓂ ᐱᒻᒪᕆᐅᕗᖅ ᐸᕐᓇᐃᓂᖅ ᐃᓪᓗᓂᒃ ᓯᕗᓂᑦᓴᒧᑦ.
ᐃᓪᓗᓕᐅᓕᕈᕕᑦ, ᐱᒻᒪᕆᐅᕗᖅ ᐊᑐᕐᓂᖅ ᓴᕕᕋᔭᓐᓂᒃ ᓱᓪᓗᓕᓐᓂᒃ ᐃᑳᕈᑎᓂᓘᓐᓃᑦ ᑲᐃᕗᖅᓯᒪᔪᓂᒃ ᐊᑦᓱᖏᖅᓯᒪᔪᓂᓪᓗ ᖃᐃᖅᑐᒧᑦ. ᑕᒪᓐᓇ ᓄᑦᑕᕈᑕᐅᓐᖏᓂᖅᓴᖅ ᐊᒻᒪᓗ ᒪᑭᒪᑦᓯᐊᕈᑕᐅᓂᖅᓴᐅᑦᓱᓂ ᓇᐸᔪᓄᑦ. ᒪᑭᒪᑦᓯᐊᓂᖅᓴᐅᑎᓪᓗᒋᑦ, ᐊᑯᓃᖅᑐᒥᒃ ᓴᓇᑭᑕᒋᐊᖃᓐᖏᓂᖅᓴᐅᔪᑦ ᐃᓪᓗᓂᒃ (ᓲᕐᓗ, ᓄᑦᑕᓐᓂᓕᒃ ᐊᑭᓐᓇᖅ, ᒪᑐᐃᑦ ᐋᖅᑭᒋᐊᕆᐊᓖᑦ, ᐊᓯᖏᓪᓗ). ᐊᑐᖃᑦᑕᕐᓂᖅ ᕿᔾᔮᕆᒍᑎᓂᒃ ᐃᑲᔪᖅᒍᑕᐅᓗᑎᒃ ᐃᓪᓗᒥᒃ ᐃᑲᔪᕐᓂᖃᕈᓐᓇᕐᒥᔪᖅ ᓄᑦᑕᓗᐊᓐᖏᓪᓗᑎᒃ ᓄᓇᒥ ᐊᑑᑎᓲᖑᒻᒪᑦ ᐊᓯᔾᔨᖅᑕᑎᓪᓗᒍ ᐊᐅᔪᐃᑦᑐᖅ.

ᐃᓕᓐᓂᐊᖅᑎᒋᑦ ᐃᒻᒥᓂᒃ ᓯᓚᐅᑉ ᐊᓯᔾᔨᐸᓪᓕᐊᓂᖓᓄᑦ

ᐱᔭᕆᐊᑭᑦᑐᖅ ᓱᖏᐅᑎᒍᑎᒋᓗᒍ ᑐᑭᓯᓂᑦ ᐊᑦᑐᐃᓂᖏᓐᓂᒃ ᓯᓚᐅᑉ ᐊᓯᔾᔨᕐᓂᖓᑕ. ᐅᔾᔨᕆᓗᒋᑦ ᐊᑦᑐᖅᑕᐅᓂᐅᔪᑦ ᓯᓚᐅᑉ ᐊᓯᕐᓂᖓᓄᑦ ᓄᓇᓕᑦᓯᓐᓂᒃ ᐊᒻᒪᓗ ᓇᒻᒥᓂᖅ ᓱᖏᐅᑎᒍᑎᑦᓴᓐᓂᒃ ᐸᕐᓇᐅᑎᓕᐅᖅᐸᓪᓕᐊᓕᕐᓗᑎᑦ. ᕿᒥᕐᕈᑦᓯᐊᕐᓗᑎᑦ ᓄᓇᕗᒻᒥ ᓯᓚᐅᑉ ᐊᓯᔾᔨᐸᓪᓕᐊᓂᖓᓄᑦ ᑐᑦᑕᕐᕕᒻᒥᒃ ᐃᑭᐊᖅᑎᖅᓯᒪᔪᒥᒃ ᐃᓕᓐᓂᐊᕆᐊᒃᑲᓐᓂᕈᑎᒋᓗᒍ ᓯᓚᐅᑉ ᐊᓯᔾᔨᕐᓂᖓᓄᑦ ᐊᑦᑐᖅᑕᐅᓂᐅᔪᑦ ᓱᖏᐅᑎᓂᕐᒧᓪᓗ ᐊᐅᓚᓂᐅᔪᑦ ᓄᓇᕗᒻᒥ.

ᒐᕙᒪᒃᑯᖏᑦ ᓄᓇᕗᑦ ᑲᑐᔾᔨᖃᑎᖃᖅᓱᑎᒃ ᐃᖅᑲᓇᐃᔮᖃᖃᑦᑕᖅᓯᒪᕗᑦ ᓄᓇᓕᓐᓂᒃ, ᑲᓇᑕᒥᓗ ᑎᒥᐅᔪᓂᒃ, ᓯᓚᑦᑐᓴᕐᕕᔾᔪᐊᕐᓂᒃ, ᒐᕙᒪᓂᓪᓗ ᐃᑲᔪᖅᓱᑎᒃ ᓄᓇᕗᒻᒥᐅᓂᒃ ᓱᖏᐅᑎᑎᓪᓗᒋᑦ ᓯᓚᐅᑉ ᐊᓯᔾᔨᕐᓂᖓᓄᑦ. ᐃᓚᖏᑦ ᒫᓐᓇᕐᓂᑕᒐᓚᐃᑦ ᐊᐅᓚᓂᕆᔭᕗᑦ ᐱᖃᓯᐅᔾᔨᔪᑦ:

  • ᓴᖅᑮᕙᓪᓕᐊᓂᖅ ᓯᓚᐅᑉ ᐊᓯᔾᔨᕐᓂᖓᓄᑦ ᐊᐅᓚᔾᔭᒋᐊᕈᑎᓂᒃ ᐸᕐᓇᐅᑎᓂᒃ ᑕᓪᓕᒪᓄᑦ ᐆᑦᑐᕋᕐᕕᐅᔪᓄᑦ ᓄᓇᓕᓐᓂ ᓄᓇᕗᒻᒥ
  • ᓴᖅᑮᓂᖅ ᐸᕐᓇᐅᑎᓂᒃ ᓴᓇᕐᕈᑎᓂᒃ ᐃᑲᔪᕈᑕᐅᓂᐊᖅᑐᓂᒃ ᓄᓇᕗᒻᒥ ᓄᓇᓕᓐᓂᒃ ᓱᖏᐅᑎᕐᓂᕐᒧᑦ ᐸᕐᓇᐅᑎᖏᓐᓄᑦ
  • ᐊᑐᐃᓐᓇᐅᑎᑦᓯᓂᖅ ᐃᓕᓐᓂᐊᕋᑦᓴᓂᒃ ᐃᖅᑲᓇᐃᔮᑦᓴᓂᓪᓗ ᓄᓇᕗᒻᒥ ᒪᒃᑯᑦᑐᓄᑦ ᓄᓇᓕᓕᓐᓄᓪᓗ ᓯᓚᐅᑉ ᐊᓯᔾᔨᐸᓕᐊᓂᖓᓄᑦ ᐊᐅᓚᓂᐅᔪᓄᑦ
  • ᕿᒥᕐᕈᓂᖅ ᐃᒪᖃᕐᕕᐅᔪᓂᒃ ᓄᓇᓕᓐᓂ ᖅ-ᓂ ᓄᓇᕗᒻᒥ ᐅᓗᕆᐊᓇᖅᑐᒦᒻᒪᖔᑕ
  • ᖃᐅᔨᓴᕐᓂᖅ ᐊᐅᔪᐃᑦᑐᕐᒥᒃ ᓄᓇᓕᓐᓂ 11-ᓂ
  • ᓴᖅᑮᓂᖅ ᓄᓇᑎᒍᑦ ᐅᓗᕆᐊᓇᕈᓐᓇᖅᑐᓂᑦ ᓄᓇᓐᖑᐊᓂᒃ ᐃᑲᔪᖅᓯᒍᑕᐅᓗᑎᒃ ᓄᓇᓕᓐᓂ ᐸᕐᓇᐅᑎᓂᒃ  
  • ᑲᑐᔾᔨᖃᑎᖃᕐᓂᖅ ᐃᓄᑐᖃᕐᓂᖅ ᐊᒻᒪᓗ ᐊᑐᕐᓂᖅ ᓄᓇᓕᓐᓂ ᖃᐅᔨᒪᓂᐅᔪᓂᒃ ᑐᕌᒐᖃᕐᓗᑎᒃ ᓯᓚᐅᑉ ᐊᓯᔾᔨᐸᓪᓕᐊᓂᖓᓄᑦ ᐃᓱᒫᓘᑕᐅᔪᓂᒃ ᓄᓇᓕᓐᓂ
  • ᓴᖅᑮᓂᖅ ᓱᓇᒃᑯᑎᓂᒃ ᓄᓇᕗᒻᒥᐅᑦ ᑐᓴᐅᒪᑦᓯᐊᖁᓪᓗᒋᑦ ᓯᓚᐅᑉ ᐊᓯᔾᔨᐸᓪᓕᖓᓄᑦ ᑐᓴᕋᑦᓴᓂᒃ ᐱᒻᒪᕆᐊᓗᓐᓂᒃ