ᓯᓚᐅᑉ ᐊᓯᔾᔨᕐᓂᖓᓂᒃ ᒥᑭᓪᓕᑎᕆᓂᖅ

ᐃᑲᔪᕐᓂᖅ ᐊᐅᓚᑦᓯᓂᕐᒧᑦ ᐊᑦᑐᖅᑕᐅᓂᖓᓄᑦ ᓯᓚᐅᑉ ᐊᓯᔾᔨᕐᓂᖓᓄᑦ

ᐃᑲᔪᕐᓂᖅ ᐊᐅᓚᑦᓯᓂᕐᒧᑦ ᐊᑦᑐᖅᑕᐅᓂᖓᓄᑦ ᓯᓚᐅᑉ ᐊᓯᔾᔨᕐᓂᖓᓄᑦ
ᓄᓇᕗᒻᒥ, ᖃᓄᐃᓪᓗᐊᕐᓂᖏᑦ ᐅᖅᓱᐊᓗᐃᑦ ᐊᑐᖅᑕᐅᕙᑦᑐᑦ ᐊᕐᕌᒍᑕᒫᑦ ᐱᕈᖅᐹᓪᓕᖅᓯᒪᔪᑦ 152.1-ᒥᓕᐊᓐ ᖃᓪᓗᑎᕋᓛᓂᒃ ᓖᑕᓂᒃ 1999-ᓯ 173.9 ᒥᓕᐊᓐ ᓖᑕᓄᑦ 2007-ᒥ. 14%-ᒥᒃ ᐊᖏᓪᓕᒋᐊᖅᑐᑦ ᐊᕐᕌᒍᐃᑦ 8 ᐃᓗᐊᓐᓂ. ᑭᓯᐊᓂ ᖁᕝᕙᐸᓪᓕᐊᓂᖓᑦ ᐊᑑᑎᓐᖏᕝᕕᖃᓚᖓᓯᒪᓐᖏᑦᑐᖅ. ᒫᓐᓇ ᓄᓇᕐᔪᐊᕐᒥ ᐆᒪᓕᕋᑦᑕ ᐊᓯᖃᓕᖅᑎᓪᓗᒍ ᐅᖅᓱᐊᓗᒃ, ᓲᕐᓗ ᐊᑐᕋᑦᓴᖅ ᐊᓄᕆ, ᐃᒪᕐᒥᒃ ᐊᐅᒪᓕᐅᕈᑎᖃᕐᓂᖅ, ᐊᒻᒪᓗ ᓯᕿᓂᕐᒥᒃ ᐊᐅᒪᖏᓐᓂᒃ.
ᐊᒻᒪᓗ, ᐊᐅᓚᔾᔭᒋᐊᕈᑎᖃᕈᓐᓇᕐᒥᔪᑎᑦ ᖃᐅᑕᒫᑦ ᐃᓅᓯᓐᓂ ᒥᑭᓪᓕᑎᕆᒍᑕᐅᒍᓐᓇᖅᑐᒥᒃ - ᐅᕝᕙᓗ ᐊᑦᑐᐃᓐᖏᓂᖅᓴᐅᓗᑎᒃ - ᐊᑦᑐᖅᑕᐅᓂᐅᔪᓄᑦ ᓯᓚᐅᑉ ᐊᓯᔾᔨᕐᓂᖓᓄᑦ. ᐃᓄᒃ ᐊᑕᐅᓯᖅ ᐃᓄᑑᔾᔨᓗᓂ ᓱᒃᑲᐃᓪᓕᐅᒥᑎᑦᓯᒍᓐᓇᖏᑦᑐᖅ ᓯᓚᐅᑉ ᐊᓯᔾᔨᕐᓂᖓᓂᒃ ᐊᑦᑐᐃᓂᖓᓂᓪᓗ, ᑭᓯᐊᓂ ᐊᑐᓂᑦ ᐃᓄᒃ ᐊᓯᔾᔩᕚᓪᓕᕈᓐᓇᖅᑐᖅ. ᒥᑭᓈᖅᑑᑎᓂᒃ ᐊᓯᔾᔩᕙᓪᓕᐊᓂᖏᒃᑯᑦ ᖃᐅᑕᒫᑦ ᐃᓅᓯᓐᓂ, ᒥᑭᓪᓕᑎᕆᒍᓐᓇᖅᑐᑎᑦ ᐊᑐᖅᑕᐅᓂᖓᓂᒃ ᐅᖅᓱᓱᐊᓘᑉ ᓱᒃᑲᐃᓪᓕᐅᒥᑎᓪᓗᒍ ᓯᓚᐅᑉ ᐊᓯᔾᔨᐸᓪᓕᐊᓂᖓ. ᐅᑯᐊ ᐃᓚᖏᑦ ᐊᑐᕋᑦᓴᐅᑦᓴᐅᑎᒋᔪᑦ ᐊᑐᖏᐹᓪᓕᒍᑎᑦᓴᐃᑦ ᐅᖅᓱᐊᓗᓐᓂᒃ:

1) ᓄᓇᓯᐅᖃᑎᒌᖃᑦᑕᕐᓂᖅ, ᐱᓲᑎᒃᑰᕐᓂᖅ ᐱᓱᓐᓂᓘᓐᓃᑦ

ᐊᖏᕐᕋᕆᔭᐅᔪᖅ ᐊᑕᐅᓯᐅᓐᖏᑦᑐᒥᒃ ᓄᓇᓯᐅᑎᖃᕋᔪᑦᑐᖅ. ᐊᒥᓱᑦ ᐃᓚᒌᑦ ᐊᑕᐅᓯᐅᓐᖏᑦᑐᒥᒃ ᓄᓇᓯᐅᑎᖃᕆᐊᖃᕐᒪᑕ ᑐᐊᕕᕋᓗᐊᒧᑦ ᓇᒧᓕᒫᖅ.
ᐊᑐᓂᑦ ᐃᓄᒃ ᑲᓇᑕᒥ ᓇᒻᒥᓂᖅ ᐊᖁᖃᑦᑕᖅᐸᑦ ᓄᓇᓯᐅᑎᒥᓂᒃ, ᐅᖓᑖᓃᒐᔭᖅᑐᑦ 34-ᒥᓕᐊᓐ ᓄᓇᓯᐅᑏᑦ ᐊᑐᕆᐊᕐᒦᑦᑐᑦ. ᑐᓐᖓᕕᒋᑦᓱᒋᑦ ᓯᓚᑦᑐᓴᕐᕕᔾᔪᐊᖓ ᕗᕆᑎᔅ ᑲᓚᒻᕕᐊ[1], ᐊᑐᖅᑕᐅᒐᔪᑦᑐᖅ ᐅᖅᓱᐊᓗᒃ 0.076 ᓖᑕ ᐅᖅᓱᐊᓗᒃ ᐊᑐᓂᑦ ᑭᓗᒦᑕᒧᑦ ᐃᖏᕐᕋᔭᐅᔪᒧᑦ. ᐊᑐᓂᑦ ᑲᓇᑕᒥᐅᑦ ᑕᐃᒫᑦᓴᐃᓐᓇᖅ ᐅᖅᓱᐊᓗᑦᑕᖃᖅᑕᖅᐸᑕ ᐃᖏᕐᕋᕙᓪᓗᑎᓪᓗ ᐃᓄᑑᓗᑎᒃ 10 ᑭᓗᒦᑕᓂᒃ ᐃᖅᑲᓇᐃᔭᕆᐊᖅᐸᓪᓕᐊᓗᑎᒃ ᐅᑎᖅᐸᓪᓕᐊᓗᑎᓪᓗ, ᐅᖓᑖᓃᑦᑐᑦ 25-ᒥᓕᐊᓐ ᓖᑕᐃᑦ ᐅᖅᓱᐊᓗᑦᑐᖅᑕᐅᖃᑦᑕᕋᔭᖅᑐᑦ ᖃᐅᑕᒫᑦ. ᐃᓱᒪᒋᓗᒍᓕ ᐅᓯᖃᑎᒌᖃᑦᑕᕐᓂᖅ, ᐱᓲᑎᒃᑰᕐᓂᖅ ᐅᕝᕙᓗ ᐱᓱᓐᓂᖅ ᐃᖅᑲᓇᐃᔭᕐᕕᒻᒧᑦ ᓱᓇᐃᑐᕐᓗᓂᓘᓐᓃᑦ. ᐊᖁᑎᓕᒫᑦ ᐊᑕᐅᓯᕐᒥᒃ ᐅᓯᓕᐅᔾᔨᖃᑦᑕᖅᐸᑕ, ᐅᖅᓱᐊᓗᑦᑐᕐᓂᖅ ᓇᑲᑎᕋᔭᖅᑐᖅ ᐊᕝᕙᓪᓗᐊᒥᒃ!

2) ᑲᑉᐳᔾᔮᕐᓗᒋᑦ ᐊᑐᓐᖏᑦᑐᓕᒫᑦ ᐅᐊᔭᒨᖅᑐᑦ

ᐊᑐᓐᖏᒃᑲᓗᐊᕈᕕᒋᑦ ᐅᐊᔭᒨᖅᑐᑦ ᒪᑯᐊ ᑕᓚᕖᓴᐃᑦ ᓄᒃᑭᑦᓴᐅᑏᓪᓗ ᐅᕐᑳᓚᐅᑎᕋᓛᕐᓂᒃ, ᓱᓕ ᐊᐅᒪᑐᖅᑐᑦ. ᑕᒪᓐᓇ ᑕᐃᔭᐅᔪᖅ ᐅᑕᖅᑭᔪᑦ. ᐊᒥᓱᐊᓗᐃᑦ ᐅᐊᔭᒨᖅᑐᑦ ᐊᑐᕆᐊᑭᑦᑐᑦ ᐊᐅᒪᓕᐅᕈᑎᓂᒃ ᐊᑐᖏᓐᓇᕐᓂᐊᖅᑐᑦ ᖃᖓᓕᒫᖅ. ᑐᓐᖓᕕᒋᑦᓱᒋᑦ ᓄᓇᕐᒧᖓᕐᒥ ᐊᐅᒪᓕᐅᕈᑎᓄᑦ ᑎᒥᐅᔪᓄᑦ, ᓄᐊᕐᖦ ᐊᒥᐊᕆᑲᒥ ᐊᖏᕐᕋᕆᔭᐅᔪᖅ ᑲᑉᐱᔾᔨᓯᒪᒍᓐᓇᖅᑐᖅ ᓱᓇᑐᐃᓐᓇᕐᒥᓂᒃ ᐊᕙᑎᓅᖓᔪᓂᒃ (20) ᐊᐅᒪᑐᖅᓱᑎᒃ. ᑕᒪᓐᓇ ᑐᑭᓕᒃ ᑖᒃᑯᐊ ᑲᑉᐳᑎᒪᔪᑦ ᐊᑐᖅᑐᑦ 5-10%-ᖓᓂᒃ ᑲᑎᑦᓱᑎᒃ ᐊᐅᒪᐃᑦ ᐊᑐᖅᑕᐅᔪᑦ ᐊᖏᕐᕋᕐᒥ, ᐊᒻᒪᓗ 1% ᓄᓇᕐᔪᐊᕐᒥ ᐳᓪᓚᒥᒃ ᐊᓂᐊᑦᓯᔪᓂ [2].

ᑲᑉᐳᔾᔮᕐᓗᒋᑦ ᐃᓪᓗᒥ ᐅᐊᔭᒨᖅᑐᑦ ᐊᑐᖅᑕᐅᖏᑦᑐᑦ ᐊᐅᒪᑐᓗᐊᑦᑕᐃᓕᒍᑎᒋᓗᒋᑦ ᐊᒻᒪᓗ ᑮᓇᐅᔭᖅᑐᖏᒃᑲᓐᓂᕈᑎᒋᒐᓛᓪᓗᒋᑦ ᑭᖑᓪᓕᕐᒥ ᐊᑭᓕᕆᐊᓕᓐᓄᑦ ᐊᐅᒪᓄᑦ.

3) ᐊᓯᔾᔨᕐᓗᖏᑦ ᖃᐅᒻᒪᖅᑯᑎᑎᑦ

ᐊᐅᒪᑐᓗᐊᓐᖏᑦᑐᑦ ᖃᐅᒻᒪᖅᑯᑏᑦ ᐊᑉᐸᐹᓪᓕᑎᑦᓯᓲᑦ ᐊᓂᐊᔪᓂᒃ ᑮᓇᐅᔭᖅᑐᖏᒃᑲᓐᓂᕈᑕᐅᑦᓱᑎᓪᓗ ᐊᑐᓐᖏᓂᖅᓴᐅᒻᒪᑕ ᐊᐅᒪᓂᒃ. ᑐᓐᖓᕕᒋᑦᓱᒋᑦ ᒥᐊᓕᒐᐃᑦ ᓄᓇᖓᓐᓂ ᐊᕙᑎᒥᒃ ᓴᐳᔾᔨᓂᕐᒧᑦ ᑎᒥᐅᔪᑦ, ᐊᑐᓂᑦ ᐃᓪᓗᐃᑦ ᒥᐊᓕᒐᕐᓂ ᐊᓯᔾᔩᑉᐸᑕ ᐊᑕᐅᓯᕐᒥᒃ ᖃᐅᒻᒪᖅᑯᑎᒥᒃ ᐊᐅᒪᑐᓗᐊᓐᖏᑦᑐᒧᑦ, ᐊᐅᒪᑐᓐᖏᓂᖅᓴᐅᒐᔭᖅᑐᑦ ᐃᑭᑦᓯᑲᓐᓂᕈᑕᐅᒍᓐᓇᖅᓱᑎᒃ 2.5 ᒥᓕᐊᓂᒃ ᐊᖏᕐᕋᕆᔭᐅᔪᓂᒃ ᐊᕐᕌᒍᒧᑦ[3]. ᑕᑯᓐᓇᓐᖑᐊᑦᑕᓕᕆᓂᖅ ᖃᓄᑎᒋᑦ ᐊᐅᒪᐃᑦ ᐊᓯᔾᔩᓂᕐᒧᑦ ᐊᑕᐅᓯᕐᒥᒃ ᖃᐅᒻᒪᖅᑯᑎᒥᒃ ᐊᑐᓐᖏᑲᓐᓂᕈᑕᐅᒍᓐᓇᕐᓂᖏᓐᓂᒃ. ᐃᓱᒪᑦᓴᖅᓯᐅᕈᑎᒋᒍᒃ ᐊᓯᔾᔨᕐᓂᖅ ᐊᐅᒪᑐᓗᐊᓐᖏᑦᑐᓄᑦ ᖃᐅᒻᒪᖅᑯᑦᑎᓄᑦ ᐅᓪᓗᒥ.

4) ᐅᑕᖅᑭᓗᑎᑦ ᐅᐊᓴᕋᑦᓴᓂᒃ ᓂᓪᓕᓇᖅᑎᓪᓗᒍ

ᐅᑕᖅᑭᓗᑎᑦ ᐅᐊᓵᑦᓴᑎᑦ ᐊᒥᓱᓐᖑᖏᓐᓂᖏᓐᓂ ᐅᐊᓴᕐᓂᐊᕐᓗᑎᑦ ᐊᓐᓄᕌᓂᒃ ᐅᕝᕙᓗ ᓂᕐᕆᑎᓂᒃ ᐅᐊᓴᕈᑎᒧᑦ. ᐅᐊᓴᖃᑦᑕᕐᓂᖅ ᒥᑭᓈᖅᑎᖅᑐᓂᒃ ᐊᑐᕐᓂᖅᓴᖅ ᐊᐅᒪᓂᒃ ᐃᒪᖅᑐᓂᖅᓴᐅᑦᓱᓂᓗ. ᐃᓱᒪᒋᓗᒋᓪᓗ ᐅᐊᓴᖅᑕᑎᑦ ᐅᐊᓴᕆᐊᖏᑦ ᓂᓪᓕᓇᖅᑐᒥ ᐊᑐᓐᖏᓪᓗᑎᑦ ᓂᕈᒥᑦᑐᒥᒃ ᐆᓇᖅᑐᒥᓪᓘᓐᓃᑦ. ᐃᓘᓐᓇᒐᓚᑎᒃ ᐊᐅᒪᐃᑦ ᐊᑐᖅᑕᐅᔪᑦ ᐅᐊᓴᖅᑐᖃᖅᑎᓪᓗᒍ ᐆᓇᖅᑐᒦᓐᖔᖅᑐᑦ. ᑐᓐᖓᕕᒋᑦᓱᒋᑦ ᓇᐹᖅᑐᓕᕆᔩᑦ, ᐅᐊᓴᕐᓂᖅ ᐊᓐᓄᕌᓃᒃ ᓂᕈᒥᑦᑐᒥ/ᐆᓇᖅᑐᒥ ᐊᕐᕌᒍᓕᒫᖅ ᑕᐃᒫᑦᓴᐃᓐᓇᖅ ᐊᑐᓲᖅ ᐅᖅᓱᐊᓗᑦᑐᕈᑎᓂᒃ ᓲᕐᓗ 182 ᒑᓚᐃᑦ ᖃᓪᓗᑏᑦ ᒑᓴᓖ ᓄᓇᓯᐅᑎᒥ. ᑕᕝᕙᓂᑦᓴᐃᓐᓇᖅ, ᐅᐊᓴᕐᓂᖅ ᓂᓪᓕᓇᖅᑐᒥ ᐃᒪᕐᒥ ᐊᑐᕋᔭᖅᑐᖅ ᑕᐃᒫᑦᓴᐃᓐᓇᖅ ᐅᖅᓱᐊᓗᒻᒥᒃ ᓲᕐᓗ 8-ᒑᓚᓂᒃ ᒑᓴᓖᒥᒃ ᓄᓇᓯᐅᑎᒥ.[4]. ᑕᑯᑦᓴᓪᓚᕆᐊᓗᒃ!

 

 

 

[1] ᓯᓚᑦᑐᓴᕐᕕᔾᔪᐊᖓᓂ ᕗᕆᑎᔅ ᑲᓚᒻᕕᐊ ᖃᐅᔨᕐᓴᕐᓂᖅ http://c21.phas.ubc.ca/article/energy-use-cars-1-stop-and-go-driving

[2] http://www.iea.org/papers/2007/standby_fact.pdf

[3] ᐊᐅᒪᓅᖓᔪᑦ ᑐᓴᕋᑦᓴᐃᑦ ᐅᕙᓃᑦᑐᑦ: EPA http://www.energystar.gov/ia/business/challenge/learn_more/ResidentialHomeImprovement.pdf

[4] ᓇᐹᖅᑐᓕᕆᔩᑦ ᐊᕙᑎᓕᕆᔩᑦ ᐃᑭᐊᖅᑎᖅᓯᒪᔪᖁᑎᖓᑦ

http://www.treehugger.com/files/2008/12/laundry-cold-water-carbon-emissions.php