ᐃᓄᐃᑦ ᖃᐅᔨᒪᔭᑐᖃᖏᑦ ᓯᓚᐅᑉ ᐊᓯᔾᔨᐸᓪᓕᐊᓂᖓᓄᑦ
ᐅᖃᖃᑎᖃᕐᓂᖅ ᐃᓄᑐᖃᕐᓂᒃ, ᐊᓯᖏᓐᓂᓪᓗ ᓄᓇᕗᒻᒥᐅᓂᒃ ᐊᓯᔾᔨᕐᓂᐅᔪᑦ ᒥᑦᓴᐃᓐᓄᑦ ᑕᑯᕙᓪᓕᐊᔭᖏᑦᑕ ᐊᓯᓂ.
ᐃᓄᐃᑦ ᖃᐅᔨᒪᔭᑐᖃᖏᑦ, ᐊᐅᓚᓂᐅᔪᑦ ᐃᓄᐃᑦ ᐱᖅᑯᓯᖅᑎᒍᑦ ᖃᐅᔨᒪᓂᖏᓐᓄᑦ ᐃᓅᓯᕐᒧᓪᓗ ᐊᑐᖅᑐᖁᑎᖏᓐᓄᑦ, ᑐᓐᖓᕕᖃᖅᓱᑎᒃ ᐊᑯᓃᑦᑐᓂᒃ ᑲᓲᒪᓂᕆᕙᑦᑕᒥᓐᓂᓪᓗ ᓄᓇᕗᑦ ᐊᕙᑎᒥᓪᓗ. ᐱᐅᔪᒻᒪᕆᓐᓂᒃ ᓇᓗᓇᐃᔭᖅᓯᒪᔪᖅᑕᓕᒃ ᓯᓚᐅᑉ ᐊᓯᔾᔨᐸᓪᓕᐊᓂᖓᓄᑦ ᓱᖏᐅᑎᓂᐅᔪᓂᓪᓗ, ᐊᒻᒪᓗ ᐃᓗᓕᖏᑦ ᐃᑲᔪᕐᒪᑕ ᑐᑭᓯᓂᕐᒥᒃ ᖃᓄᖅ ᓯᓚᐅᑉ ᐊᓯᔾᔨᕐᓂᖓ ᐊᑦᑐᐃᓂᖃᕐᓂᐊᕐᒪᖔᖅ ᐃᓄᐃᑦ ᐱᖅᑯᓯᖓᓐᓂᒃ, ᓄᓇᓕᓐᓂᒃ ᐃᓄᓐᓂᓪᓗ.
ᐊᐱᖅᓱᕐᓃᑦ ᐃᓄᑐᖃᕐᓂᒃ, ᐊᖑᓇᓱᑦᑎᓂᒃ ᓄᓇᓕᓕᓐᓂᓪᓗ ᐃᓚᒍᑦᓯᐅᓯᔾᔨᓯᒪᔪᑦ ᑐᑭᓯᓂᐊᖅᑎᒻᒪᕆᓐᓄᑦ ᖃᐅᔨᓴᕐᓂᐅᓯᒪᔪᓄᑦ ᓯᓚᐅᑉ ᐊᓯᔾᔨᐸᓪᓕᐊᓂᖓᓄᑦ. ᐃᓄᐃᑦ ᖃᐅᔨᕐᓴᓂᖓᑦ ᐊᑐᐃᓐᓇᐅᑭᑦᓯᓯᒪᔪᖅ ᐊᑐᕐᓕᓪᓚᕆᓐᓂᒃ ᑐᓴᕋᑦᓴᓂᒃ ᖃᖓᑐᐃᓐᓇᒃᑯᑦ ᐊᒻᒪᓗ ᖁᑦᓯᓕᕇᓐᓂᖏᑦ ᐃᓗᓕᕆᔭᐅᔪᑦ ᐊᓚᒡᒐᐃᑦᑐᒻᒪᕆᒻᒥᒃ ᐃᑲᔪᖅᓯᓂᖃᖅᓯᒪᔪᑦ ᑐᑭᓯᓂᑦᑎᓐᓄᑦ ᓯᓚᐅᑉ ᐊᓯᔾᔨᕐᓂᖓᓂᒃ ᓄᓇᕗᒻᒥ.
ᖃᐅᔨᔭᐅᖃᑦᑕᖅᓯᒪᔪᖅ ᐃᓄᐃᑦ ᖃᐅᔨᒪᔭᑐᖃᖏᑦᑎᒍᑦ ᓯᓚᐅᑉ ᐊᓯᔾᔨᕐᓂᖓᓄᑦ ᐅᑯᐊ ᐱᖃᓯᐅᑎᒧᑦ:
- ᓯᑯ ᐊᓯᔾᔨᖅᓯᒪᓕᖅᑐᖅ; ᓯᑯ ᓵᓐᓂᖅᓴᐅᓕᖅᑐᑦ ᓯᑯᓇᓵᕐᓂᖅᓴᐅᕙᓪᓕᖅᓱᓂ ᐊᐅᓴᕋᐃᓐᓂᖅᓴᐅᓕᖅᓱᓂᓗ. ᑕᐃᒫᑦᓴᐃᓐᓇᖅ ᐃᑉᐱᒋᔭᐅᓯᒪᒻᒥᔪᑦ ᑕᓰᑦ ᓯᑯᐊᑦ.
- ᐊᓂᐅᕙᑦ (ᐊᐳᑕᐅᖏᓐᓇᖅᑐᑦ) ᒥᑭᓪᓕᕙᓪᓕᐊᑐᐃᓐᓇᖅᑐᑦ. ᓯᓚᓗᓐᓂᖅᓴᐅᖃᑦᑕᓕᖅᑐᑦ, ᐊᐱᓇᓵᕐᓂᖅᓴᐅᕙᓕᖅᓱᓂ ᓯᑯᓇᓵᖅᓱᓂᓗ ᐊᐅᓴᕋᐃᓐᓂᖅᓴᐅᑦᓱᓂᓗ.
- ᓯᓚ ᓇᓗᓇᑦᓯᐊᓕᖅᑐᑦ. ᐊᓯᔾᔨᓱᐊᖑᓂᖅᓴᐅᖓᓕᖅᑐᖅ ᓯᓚᕐᓂᕐᓗᓕᑲᓪᓚᑦᑐᐹᓘᕙᑦᓱᓂ.
- ᐃᒪᐃᑦ ᐊᑉᐸᐹᓪᓕᖅᓯᒪᔪᑦ, ᐱᔭᕆᐊᑦᑐᐃᑦᓱᑎᒃ ᐅᕝᕙᓘᓐᓃᑦ ᐊᔪᕐᓇᓕᖅᓱᓂ ᐅᒥᐊᒃᑰᕐᕕᒋᒋᐊᖓ ᐃᓚᖓᒍᑦ.
- ᓂᕈᒥᓐᓂᖅᓴᐅᓕᖅᑐᖅ ᐊᕐᕌᒎᑉ ᐃᓗᐊᓂ.
- ᓄᑖᑦ ᐆᒪᔪᐃᑦ ᑕᑯᔭᐅᖃᑦᑕᖅᓯᒪᔪᑦ.
- ᓄᓇ ᐃᑉᐱᒋᔭᐅᓯᒪᔪᖅ ᐸᓂᕐᓂᖅᓴᐅᒋᐊᖓ ᐊᒻᒪᓗ ᐊᐅᔪᐃᑦᑐᖅ ᓄᓇ ᐊᓯᔾᔨᐸᓪᓕᐊᔪᖅ.
- ᐊᑯᓂᐅᓂᖓ ᖃᖓᒃᑰᓂᖓᓗ ᐱᖅᑯᓯᖅᑎᒍᑦ ᐃᓄᐃᑦ ᓯᓚᖏᑦ ᐊᓯᔾᔨᖅᓯᒪᓕᖅᑐᑦ.
ᐃᓚᒍᑦᓯᐅᔾᔨᒋᑦ ᓄᓇᓕᑦᓯᓂ ᐃᓄᐃᑦ ᖃᐅᔨᒪᔭᑐᖃᖏᓐᓄᑦ:
ᖃᓄᖅ ᐃᓄᑐᖃᓯ ᓄᓇᓕᑦᓯᓐᓂᓗ ᓯᕗᓕᖅᑏᑦ ᐅᖃᐅᓯᑦᓴᖃᖅᑲᑦ ᐊᓯᔾᔨᐸᓪᓕᐊᔪᓄᑦ ᐊᕐᕌᒍᓂ ᐊᓂᒍᖅᑐᓂ? ᑎᑎᕋᕐᓗᒋᑦ ᖃᐅᔨᒪᓂᖏᑦ ᑕᑯᔭᖏᓪᓗ ᓯᓚᐅᑉ ᐊᓯᔾᔨᕐᓂᖓᓄᑦ ᑐᓴᖅᑕᐅᑎᓪᓗᒍᓗ ᐅᕙᑦᑎᓐᓄᑦ. ᓯᐊᒻᒪᖅᑎᕆᖃᑕᐅᓂᐊᖅᑐᑎᒃ ᓯᓚᐅᑉ ᐊᓯᔾᔨᐸᓪᓕᐊᓂᖓᑕ ᒥᑦᓵᓄᑦ ᐃᓚᒍᑦᓯᔾᔨᓗᑎᓪᓗ ᑐᖅᑯᖅᓯᒪᔪᓄᑦ ᐃᓄᐃᑦ ᖃᐅᔨᒪᔭᑐᖃᖏᓐᓄᑦ!