ᓯᓚᐅᑉ ᐊᓯᔾᔨᕐᓂᖓ ᓄᓇᕗᒻᒥ

ᕿᒥᕐᕈᓂᖅ ᐃᓘᓐᓈᒍᑦ ᖃᐅᔨᔭᐅᓯᒪᔪᒻᒪᕆᓐᓂᒃ ᑐᑭᓯᓂᐊᖅᑎᒻᒪᕆᓐᓄᑦ ᓄᓇᓕᓐᓂᓗ ᖃᐅᔨᓴᕐᓂᐅᔪᓄᑦ ᓯᓚᐅᑉ ᐊᓯᔾᔨᕐᓂᖓᑕ ᒥᑦᓵᓄᑦ ᓄᓇᕗᒻᒥ.

ᐊᓯᔾᔨᕐᓂᐅᔪᑦ ᐅᑭᐅᖅᑕᖅᑐᒥ ᐱᖃᓯᐅᔾᔨᔪᑦ: ᐊᐅᔪᐃᑦᑐᑦ ᐃᖏᕐᕋᓂᖏᑦ, ᑕᕆᐅᖅ ᓯᑯ ᐊᒻᒪᓗ ᑕᓰᑦ ᓯᑯᐊᖏᑦᑕ ᓵᓪᓕᓂᖏᑦ, ᓄᓇᐃᑦ ᐊᐅᔪᐃᑦᑐᑦ ᐊᐅᑉᐸᓪᓕᐊᓂᖏᑦ, ᓯᓈᑦ ᓄᖑᑎᖅᐸᓪᓕᐊᓂᖏᑦ ᒪᓕᓐᓄᑦ ᐊᐅᓚᑕᐅᑦᓱᑎᒃ, ᐊᓯᔾᔨᕐᓂᐅᔪᑦ ᐃᒪᐅᑉ ᐃᖏᕐᕋᓂᖏᓐᓄᑦ, ᐊᒻᒪᓗ ᓄᑦᑎᐸᓪᓕᐊᓂᖏᑦ ᐱᕈᖅᑐᑦ ᐆᒪᔪᐃᓪᓗ, ᖃᖓᐅᓂᖓ, ᖃᓄᐃᑦᑐᓂᖓ ᐱᕕᔾᔪᐊᕐᓂᖏᓪᓗ ᐊᑦᑐᐃᓂᖏᑦᑕ ᓄᓇᕗᒻᒥ ᓄᓇᓕᓐᓂᒃ ᐱᔭᕆᐊᑐᔪᐹᓗᒃ ᓇᓚᐅᑦᓵᕋᓱᐊᕆᐊᖓ ᐊᔾᔨᒌᔾᔮᒐᑎᓪᓗ ᓄᓇᓖᑦ ᐊᑦᑐᖅᑕᐅᓂᖏᑦ.  
ᑕᐃᒪᐃᒻᒪᑦ ᐊᒥᓱᑦ ᓄᓇᓕᕐᔪᐊᑦ ᓄᓇᕐᔪᐊᕐᒥ, ᓄᓇᕗᑦ ᒥᑭᓪᓕᑎᕆᒐᓱᐊᖅᑑᒐᓗᐊᖅ ᐃᑖᔪᓂᒃ ᓯᓚᐃᓐᓇᕐᒧᑦ ᐊᐅᓚᔾᔭᒋᐊᕈᑕᐅᒐᓱᐊᖅᓱᑎᒃ ᓯᓚᐅᑉ ᐊᓯᔾᔨᐸᓪᓕᐊᓂᖓᓄᑦ. ᑐᕌᒐᓪᓗᐊᑕᐅᔪᖅ ᓄᓇᕗᒻᒥ ᖃᐅᔨᒪᔭᐅᑎᑦᓯᓂᖅ ᓱᖏᐅᑎᓂᕐᒥᒃ ᓄᑖᓄᑦ ᖃᓄᐃᓐᓂᐅᔪᓄᑦ ᑕᕝᕙᐅᓕᖅᑎᑕᐅᓯᒪᔪᓄᑦ ᓯᓚᐅᑉ ᐊᓯᔾᔨᕐᓂᖓᓄᑦ. ᑕᒪᓐᓇ ᑐᑭᓕᒃ ᐋᖅᑭᒋᐊᕆᓂᖅ ᐸᕐᓇᓂᕐᒥᒃ, ᖃᓄᖅᑑᕈᑕᐅᔪᓂᑦ, ᐊᐅᓚᓂᐅᔪᓂᓪᓗ ᓂᕆᐅᒋᔭᐅᔪᓄᑦ ᐊᑦᑐᐃᓂᐅᓂᐊᖅᑐᓄᑦ ᓯᓚᐅᑉ ᐊᓯᔾᔨᕐᓂᖓᓄᑦ.
ᑮᑕᑲᐃᓐᓇᕐᒨᖓᔪᓄᑦ, ᓇᓪᓕᑐᐃᓐᓇᖏᑦ ᒥᑭᓪᓕᑎᕆᓃᑦ ᓱᖏᐅᑎᓂᕐᒧᓪᓗ ᐊᐅᓚᔾᔭᒋᐊᓃᑦ ᑕᕝᕙᑑᓗᑎᒃ ᓄᖅᑲᑎᑦᓯᒍᓐᓇᖏᑦᑐᑦ ᐊᑲᐅᓈᓐᖏᑦᑐᒥᒃ ᐱᓯᒪᔪᓂᒃ ᓯᓚᐅᑉ ᐊᓯᔾᔨᕐᓂᖓᓄᑦ ᐊᑦᑐᖅᑕᐅᓂᐅᔪᓂᒃ. ᑭᓯᐊᓂᓕ, ᐊᐅᓚᔾᔭᒋᐊᕈᑎᖃᕐᓂᖅ ᓱᖏᐅᑎᑦᓴᐅᔪᓂᒃ ᒥᑭᓪᓕᑎᕆᓂᐊᖅᑐᖅ ᐋᓐᓂᖅᑎᖅᑕᐅᓂᕆᒍᓐᓇᖅᑕᖏᓐᓂᒃ ᐃᓄᐃᑦ ᓄᓇᓖᓪᓗ.

ᐊᓯᔾᔨᕐᓂᐅᔪᑦ ᓂᕈᒥᓐᓂᕐᒧᑦ

ᐊᕐᕌᒍᓂ 100-ᓂ ᐊᓂᒍᖅᑐᓂ, ᐅᑭᐅᖅᑕᖅᑐ ᑕᑯᓯᒪᔪᖅ ᐊᑑᑎᒐᔪᑦᑐᒥᒃ ᓂᕈᒥᑦᓯᕙᓪᓕᐊᓂᕐᒥᒃ 1.5˚C-ᒥᒃ.
ᑭᓯᐊᓂᑦᑕᐅᖅ, ᐊᕕᑦᑐᖅᓯᒪᓂᐅᔪᓂ ᖁᕝᕙᐸᓪᓕᐊᓯᒪᔪᖅ 1- 3˚C-ᒥᒃ. ᒫᓐᓇᕐᓂᑕᐃᑦ ᐅᓂᒃᑳᑦ ᑐᑭᓯᓂᐊᖅᑎᖅᔪᐊᖑᔪᓂᒃ, ᐊᖑᓇᓱᑦᑎᓂᒃ, ᐃᓄᑐᖃᕐᓂᓪᓗ ᐅᖃᖅᓯᒪᔪᑦ ᐊᓚᒡᒐᐃᑦᑐᒥᒃ ᓄᓇᓕᓐᓂ ᓂᕈᒥᑦᓯᕙᓪᓕᐊᒋᐊᖓ ᓄᓇᕗᒻᒥ ᐊᕐᕌᒍᓂ 50-ᓂ ᐊᓂᒍᖅᑐᓂ. ᑖᒃᑯᐊ ᐊᓯᔾᔨᕐᓂᐅᔪᑦ ᓂᕈᒥᓐᓂᕐᒧᑦ ᐊᑦᑐᐃᓂᐊᖅᑐᑦ ᐊᑯᓂᐅᓂᖓᓂᒃ ᐊᐅᓚᔾᔭᐃᕙᑦᓱᑎᓪᓗ ᓯᓚᐅᑉ ᐊᓯᔾᔨᖅᑕᕐᓂᖓᓂᒃ ᐊᕐᐹᕌᒍᒥ, ᐱᓗᐊᖅᑐᒥᒃ ᐱᖅᑯᓯᑐᖃᖅᑎᒍᑦ ᐃᓄᐃᑦ ᓯᓚᒋᖃᑦᑕᓲᖏᑦ, ᐊᑦᑐᐊᓂᖃᖅᑐᑦ ᐱᖅᑯᓯᑐᖃᖅᑎᒍᑦ ᓄᓇᒥᒃ ᐊᐅᓚᓂᖃᕐᓂᕐᒧᑦ. ᓂᕈᒥᑦᓯᓂᐅᔪᑦ ᐊᓯᔾᔩᓂᖃᖅᓯᒪᑐᐃᓐᓇᕆᐊᖃᕐᒥᔪᑦ ᓄᓇᕗᒻᒥ ᓯᓚᖓᓂᒃ, ᓲᕐᓗ ᐊᒥᓱᓐᖑᐹᓪᓕᖅᓯᒪᔪᑦ ᓯᓚᕐᓂᓪᓗᓐᓂᐅᕙᑦᑐᑦ ᐊᒻᒪᓗ ᓂᕆᐅᓇᓐᖏᑦᑐᓂᒃ ᐊᓄᕆᖃᕐᓂᖅᓴᐅᓕᖅᓱᓂ.
ᒫᓐᓇ ᓂᕆᐅᒋᔭᐅᔪᑦ ᓇᓗᓇᐃᖅᓯᔪᑦ ᓂᕈᒥᑦᓯᕙᓪᓕᐊᓂᖅ ᑲᔪᓯᓂᐊᕆᐊᖓ ᐊᕐᕌᖑᓂᒃ 100-ᓂᒃ ᐊᒡᒋᖅᑐᓂ ᒥᑭᓪᓕᑎᖅᑕᐅᒐᓱᐊᕋᓗᐊᖅᐸᑦ ᒪᑭᒪᔭᐅᑦᓯᐊᕋᓱᐊᕐᓗᓂᓗ ᓄᓇᕐᔪᐊᕐᒥ ᐱᕈᖅᓰᕕᑦᑎᑐᑦ ᐳᓪᓚᖃᕐᓃᑦ. ᓯᓚᐅᑉ ᐊᓯᔾᔨᐸᓪᓕᐊᓂᖓᓂᒃ ᑕᑯᑦᓴᐅᑎᑦᓯᓂᐅᔪᑦ ᑕᑯᓇᖅᑑᔮᖅᑐᑦ ᓯᕗᓂᑦᑎᓐᓂ ᓂᕈᒥᑦᓯᕙᓪᓕᐊᓂᖅ ᐊᔾᔨᒌᔾᔮᓐᖏᒋᐊᖓ ᓄᓇᕗᒻᒥ; ᐃᓚᖏᑦ ᓄᓇᐃ (ᓲᕐᓗ, ᐱᖓᓐᓇᖓ ᓄᓇᕗᑦ ᐊᒻᒪᓗ ᖁᑦᓯᑦᑐᖅ) ᓂᕈᒥᑦᓯᓴᕋᐃᓐᓂᖅᓴᐅᑐᐃᓐᓇᕆᐋᓖᑦ ᐊᓯᖏᓐᓂᒃ (ᕿᑭᖅᑖᓘᑉ ᓂᒋᐊᓂᒃ/ ᕿᑭᖅᑖᓘᑉ ᑕᓪᓗᕈᑎᖓᓂᒃ). ᑭᓯᐊᓂᓕ, ᑕᐃᒪᐃᑉᐸᒻᒪᑕ ᓂᕆᐅᒋᔭᐅᔪᓕᒫᑦ, ᓇᓗᓇᖅᑐᑦ ᑖᒃᑯᐊ ᓂᕆᐅᒋᔭᐅᔪᑦ.

ᐊᓯᔾᔨᕐᓂᐅᔪᑦ ᓯᓚᒥ ᖃᐅᓯᕐᓇᕐᓂᖓᓂᓗ

ᖃᓄᐃᓪᓗᐊᕐᓂᖓ, ᖃᓄᐃᑦᑑᓂᖓ ᐊᒻᒪᓗ ᐊᐅᓚᓂᖏᑦ ᓯᓚᓗᐃᑦ, ᖃᐅᓯᕐᓇᐃᓪᓘᓐᓂᑦ, ᓄᓇᕗᒻᒥ ᓂᕆᐅᒋᔭᐅᔪᑦ ᐊᓯᔾᔨᕐᓂᐊᕆᐊᖏᑦ ᐊᑦᑐᐃᓂᖃᕐᓗᑎᓪᓗ ᐱᖅᑯᓯᕐᒥᒃ, ᐃᓅᕐᓯᒃᒥ ᐊᕙᑎᒥᓪᓗ. ᐅᑭᐅᖅᑕᖅᑐᒥ ᖃᐅᓯᕐᓇᕐᓂᖓ ᐊᖏᓪᓕᕚᓪᓕᖅᓯᒪᔪᖅ 8% ᒥᑦᓵᓂ ᐊᕐᕌᒍᓂ 100-ᓂ ᐊᓂᒍᖅᑐᓂ, ᐊᒻᒪᓗ ᐊᖏᓪᓕᒋᐊᕐᓂᐊᕆᐊᖏᑦ ᓂᕆᐅᒋᔭᐅᔪᑦ. ᑕᐃᒫᑦᓴᐃᓐᓇᒐᓚᒃ, ᖃᑦᓯᐅᓂᖏᑦ ᐊᑯᓐᓂᖏᓪᓗ ᓯᓚᕐᓂᓪᓗᓂᐅᔪᑦ ᒪᑯᐊ ᐱᖅᓯᕐᓂᐊᓗᐃᑦ, ᐊᓄᕆᓯᐅᕐᓂᐊᓗᐃᑦ ᓯᓚᕐᓂᓪᓗᓯᑲᓪᓚᖃᑦᑕᕐᓂᐅᔪᓪᓗ ᐊᕐᕌᒍᒥ ᓂᕆᐅᒋᔭᐅᔪᑦ  ᐊᒥᓱᓐᖑᐹᓪᓕᕐᓂᐊᕆᐊᖏᑦ. ᖃᐅᓯᕐᓇᖅᑐᖅ ᐊᔾᔨᒌᓐᖏᑦᑐᖅ ᓇᒥᑐᐃᓐᓇᖅ, ᐱᔭᕆᐊᑐᓂᖅᓴᐅᑦᓱᑎᓂᓗ ᓂᕈᒥᓐᓂᕐᒥᒃ ᓇᓚᐅᑦᓵᕋᓱᐊᕆᐊᖓ. ᓯᕗᓂᑦᑎᓐᓂ ᖃᐅᓯᕐᓇᐃᑦ ᓄᓇᕗᒻᒧᑦ ᓇᓗᓇᖅᑐᑦ.

ᐊᓯᔾᔨᕐᓂᐅᔪᑦ ᐅᓕᓐᓂᐅᔪᓂ

ᑕᕆᐅᕐᒧᑦ ᐅᓕᓐᓃᑦ ᖁᕝᕙᐸᓪᓕᓂᐊᖏᑦᑕ ᓂᕆᐅᒋᔭᐅᓂᖏᑦ ᐊᔾᔨᒌᓐᖏᑦᑐᑦ. ᒐᕙᒪᐅᖃᑎᒌᑦᑐᓂᒃ ᕿᒥᕐᕈᔨᓂᒃ ᓯᓚᐅᑉ ᐊᓯᔾᔨᐸᓪᓕᐊᓂᖓᓂᒃ ᒫᓐᓇᕈᓗᒃ ᓂᕆᐅᓐᓂᖃᔪᔪᑦ ᓄᓇᕐᔪᐊᕐᒥ ᑕᕆᐅᑉ ᐅᓕᓐᓂᖏᑦᑕ ᖁᕝᕙᐸᓪᓕᐊᓂᖏᑦ 20 cm ᐊᑖᓃᓐᓂᑰᑦᓱᑎᒃ 60 cm-ᓄᑦ ᑎᑭᐅᒪᔪᑦ ᑕᕝᕙᓂ 2000-ᖏᓐᓃᓕᖅᑎᓪᓗᑕ.
ᓄᓇ ᖁᕝᕙᐸᓪᓕᐊᔪᖅ ᓄᓇᕗᓕᒫᒥ ᐱᔾᔪᑎᖃᖅᓱᑎᒃ ᓄᖑᑉᐸᓪᓕᐊᓂᖏᓐᓂᒃ ᓯᑯᐊᕌᓗᐃᑦ ᑲᓇᑕᓕᒫᒧᑦ ᕐᑳᕈᕕᐊᖑᖃᑦᑕᖅᓯᒪᔫᒐᓗᐊᑦ ᑭᖑᓪᓕᖅᐹᒥ ᐅᑭᐅᖅᔪᐊᖅᑎᓪᓗᒍ, ᐊᕐᕌᒍᐃᑦ 11,500 ᐊᓂᒍᖅᓯᒪᓕᖅᑐᑦ. ᑕᐃᔭᐅᔪᖅ Isostatic ᐅᑎᕆᐊᖅᑐᖅ. ᑕᕆᐅᑉ ᐅᓕᓐᓂᖏᑦ ᐊᑉᐸᐸᓕᐊᔪᕐᔫᔮᖏᓐᓇᖅᑐᑦ ᐱᔾᔪᑎᖃᖅᓱᑎᒃ ᐃᓚᖓ ᓄᓇᕗᒻᒥ ᓄᓇᐅᑉ ᓱᑲᑦᑐᐹᓘᒻᒥᒃ ᖁᕝᕙᐸᓪᓕᐊᓂᑯᖓᓄᑦ. ᓇᒥᐃᓐᓇᖅ, ᑕᕆᐅᑉ ᐅᓕᓐᓂᖓᑕ ᐊᓯᔾᔨᐸᓪᓕᐊᓂᖓ ᑐᓐᖓᕕᖃᖅᑐᖅ ᖃᓄᑎᒋ ᓱᑲᑦᑐᒥᒃ ᓄᓇ ᐳᐃᕙᓪᓕᐊᓂᖓᓂᒃ ᑭᕕᕙᓪᓕᐊᓂᖓᓂᓪᓘᓐ•ᓂᑦ. ᑐᑭᓕᒃ ᐊᑦᑐᐃᓂᖓ ᐊᑐᓂᑦ ᓄᓇᕗᒻᒥ ᓄᓇᓕᓐᓂᒃ ᐊᔾᔨᒌᓐᖏᑦᑑᓚᖓᔪᖅ. ᖃᐅᔨᓴᕐᓂᖅ ᓄᓇᐅᑉ ᐊᐅᓚᒪᓂᖓᓂᒃ ᐊᑑᑎᒋᐊᓕᒃ ᑐᑭᓯᑦᓯᐊᑲᓐᓂᖁᓪᓗᑕ ᐃᖏᕐᕋᓂᕐᒥᒃ ᓯᕗᓂᕐᒥᓗ ᐊᑦᑐᖅᑕᐅᓂᕆᓂᐊᖅᑕᖏᓐᓂᒃ ᑕᕆᐅᑉ ᐅᓗᓐᓂᖏᑦᑕ ᖁᕝᕙᕆᐊᖅᑎᓪᓗᒋᑦ ᓄᓇᕗᒻᒥ.

ᐱᑭᐊᖅᐸᓪᓕᐊᔪᖅ ᐅᑎᕆᐊᖅᑐᖅ

ᑭᖑᓪᓕᕐᐹᒥ ᐅᑭᐅᕕᔾᔪᐊᑎᓪᓗᒍ, ᓄᓇᕗᑦ ᕐᑳᕈᕕᐊᖃᖅᓯᒪᔪᖅ ᐊᐅᔪᐃᑦᑐᕐᓂᒃ ᐳᖅᑐᓂᓕᓐᓂᒃ ᑭᓗᒦᑕᕋᓴᓐᓂᒃ. ᑖᓐᓇ ᐅᖁᒪᐃᑦᑐᐊᓗᒃ ᐊᔭᑦᓯᓚᐅᖅᓯᒪᔪᖅ ᓄᓇᒥᒃ ᐊᒻᒧᑦ. ᐊᐅᑉᐸᓪᓕᐊᑎᓪᓗᒋᑦ ᐊᐅᔪᐃᑦᑐᐃᑦ, ᓄᓇ ᒫᓐᓇ “ᐱᓪᓕᐸᓪᓕᐊᔪᖅ” (ᐅᑎᖅᐸᓪᓕᐊᔪᖅ) ᐅᑎᖅᐸᓪᓕᐊᔪᖅ ᐳᖅᑐᓂᕆᓯᒪᔭᒥᓄᑦ ᐱᑭᐊᖅᐸᓪᓕᐊᑦᓱᓂ. ᐃᓱᒪᒋᑦ ᖃᓄᐃᑦᑐᖃᕋᔭᕐᒪᖔᖅ ᐅᖁᒪᐃᑦᑐᐊᓗᒻᒥᒃ ᐅᔭᖅᑲᒥᒃ ᐃᓕᓯᒍᕕᑦ ᕐᑲᖓᓄᑦ ᐊᑦᓴᓗᐊᑦᓴᔭᐅᑉ. ᐊᑦᓴᓗᐊᑦᓴᔭ ᐃᑎᖅᓴᓕᐅᓯᓲᖅ, ᑭᓯᐊᓂ ᐅᔭᕋ ᐲᕈᕕᐅᒃ, ᐅᑎᕆᐊᓲᖅ ᐋᖅᑭᑦᓯᒪᓂᕆᓯᒪᔭᒥᓄᑦ. ᑕᒪᓐᓇ ᑕᐃᔭᐅᔪᖅ ᐅᑎᕆᐊᖅᑐᖅ. ᑕᒪᓐᓇ ᐊᑑᑎᕙᓪᓕᐊᔪᖅ ᓄᓇᕗᒻᒥ ᓲᕐᓗ ᐊᕐᕕᐊᓂ.

ᐊᓯᔾᔨᕐᓂᐅᔪᑦ ᓄᓇᓂ ᐊᐅᔪᐃᑦᑐᓂ

ᑕᒪᕐᒥᒃ ᐊᐅᔪᐃᑦᑑᑉ ᐃᑎᓂᖓ ᕐᑳᒥᑦᓯᒪᓂᖓᓗ ᓄᓇᕗᒻᒥ ᓂᕆᐅᒋᔭᐅᔪᑦ ᓄᖑᑉᐸᓪᓕᐊᓂᐊᕆᐊᖏᑦ ᐅᑭᐅᖅᑕᖅᑐᒥ ᓂᕈᒻᒥᓂᐅᔪᑦ ᖁᕝᕙᐸᓪᓕᐊᑐᐃᓐᓇᑎᓪᓗᒋᑦ. ᐊᐅᔪᐃᑦᑑᒻᒪᑦ ᓄᓇᐅᑉ ᐃᑭᐊᖓ ᖁᐊᖑᓲᖑᑦᓱᓂ ᐊᕐᕌᒎᒃ ᒪᕐᕉᒃ ᑭᖑᓕᕇᒃ ᐅᖓᑖᓄᑦ. ᐊᐅᔪᐃᑦᑐᖅ ᐊᐅᑉᐸᓪᓕᐊᑎᓪᓗᒍ, ᓴᓐᖐᓕᖅᐸᓪᓕᐊᑎᑦᓯᓲᖅ ᓄᓇᒥᒃ, ᓄᖑᑎᖅᐸᓪᓕᐊᓕᖅᓱᓂ. ᓯᓈᑦ ᓂᓚᓐᓂᒃ ᐊᐅᔪᐃᑦᑐᓖᑦ ᐅᓗᕆᐊᓇᖅᑐᒦᓐᓂᖅᐹᑦ ᓄᖑᑎᖅᐸᓪᓕᐊᓂᕐᒧᑦ ᒪᓕᓐᓄᑦ ᐊᐅᓚᓂᕐᓂᒃ. ᐊᐅᑉᐸᓪᓕᐊᔪᖅ ᐊᐅᔪᐃᑦᑐᖅ ᖁᕝᕙᐹᓪᓕᑎᑦᓯᓲᖅ ᕿᑲᓐᖏᑦᑐᒥᒃ ᕐᑳᕈᕕᐊᖓᓂᒃ, ᐊᓯᔾᔨᕈᑕᐅᒍᓐᓇᖅᓱᓂ ᑰᓐᓂᐅᔪᓄᑦ, ᐃᒪᐅᓪᓗ ᒥᓗᑦᑕᐅᒍᓐᓇᕐᓂᖓᓂᒃ ᐃᓚᖏᓐᓂ ᓄᓇᐃᑦ.

ᕐᑭᑲᓐᖏᑦᑐᖅ ᕐᑳᕈᕕᐊ

ᕿᑲᓐᖏᑦᑐᖅ ᕐᑳᕈᕕᐊ ᕐᑳᕆᕙᐅᒃ ᐃᔾᔫᑉ (ᐅᕝᕙᓗ ᕐᑳᖓ) ᐊᐅᓲᖅ ᐊᐅᔭᒃᑯᑦ ᖁᐊᒃᑲᓐᓂᓲᖑᑦᓱᓂ ᐅᑭᐊᕐᒪᑦ. ᐃᑎᓂᖓ ᕿᑲᓐᖏᑦᑑᑉ ᕐᑳᕈᕕᐊᑉ ᐊᔾᔨᒌᓐᖏᑦᑐᖅ ᓄᓇᕗᒻᒥ, ᐊᓪᓛᑦ ᓄᓇᓕᓐᓂ, ᑐᓐᖓᕕᖃᖅᑐᖅ ᒪᑯᓇᓐᖓᑦ ᖃᓄᐃᑦᑑᓂᖏᓐᓂᒃ ᐃᔾᔪᐃᑦ ᐊᒻᒪᓗ ᓇᒦᓐᓂᖏᓐᓂᒃ (ᓲᕐᓗ ᖃᓂᑦᓴᖅᑐᑦ ᑰᒻᒥᒃ). ᐊᐅᑉᐸᓪᓕᐊᔪᑦ ᐊᐅᔪᐃᑦᑐᑦ ᐊᑯᓃᖅᑐᒥᒃ ᑲᔪᓯᔪᒥᓪᓗ ᐊᑦᑐᐃᓂᖃᕐᓂᐊᖅᑐᖅ ᐅᑭᐅᖅᑕᖅᑐᒥ ᐋᖅᑭᐅᒪᔾᔪᑎᓂᒃ ᓲᕐᓗ ᐃᓪᓗᓂᒃ ᐊᖅᑯᑎᓂᓪᓗ.

ᐊᓯᔾᔨᕐᓂᐅᔪᑦ ᓯᑯᓄᑦ  

ᐃᓚᖓᑦ ᐊᓚᒡᒐᐃᓗᐊᓐᖑᐊᕐᒥᔪᖅ ᐅᑭᐅᖅᑕᖅᑐᒥ ᓄᖑᑉᐸᓪᓕᐊᓂᖓᒃ ᐊᐅᔭᒃᑯᑦ ᑕᕆᐅᕐᒥ ᓯᑯᐃᑦ. ᖃᖓᑦᑲᖅᑎᑕᐅᓯᒪᔪᒃᑯᑦ ᑲᑎᖅᓱᖅᑕᐅᓯᒪᔪᑦ ᑕᑯᑦᓴᐅᑎᑦᓯᔪᑦ ᐊᖏᓂᖓᓐᓂᒃ ᐅᑭᐅᖅᑕᖅᑐᒥ ᑕᕆᐅᑉ ᓯᑰᑉ ᓄᖑᑉᐸᓪᓕᐊᓂᖓᑕ ᐊᕐᕌᒍᐃᑦ ᖁᓕᑦ ᐊᓂᒍᕋᐃᒻᒪᑕ 1978-ᒥᓂᑦ, ᓯᕗᓪᓕᖅᐹᖅ ᐊᕐᕌᒍ ᖃᖓᑦᑕᖅᑎᑕᐅᓯᒪᔪᒃᑯᑦ ᑲᑎᖅᓱᖅᓯᒪᔪᑦ ᐱᔭᑦᓴᕈᕆᐊᓐᖓᓚᐅᖅᓯᒪᒻᒪᑕ. ᐊᑦᓯᓂᖅᐸᐅᓯᒪᔪᖅ ᑕᕆᐅᕐᒥ ᓯᑯᐃᑦ ᓯᑦᑕᕝᕙ 2007-ᖑᑎᓪᓗᒍ.

ᓄᐊᑦᓯᓂᖅ ᑕᕆᐅᕐᒧᑦ ᓯᑯᒧᑦ ᑲᑎᖅᓱᖅᓯᒪᔪᓂᒃ

ᐱᐅᓯᐅᓯᒪᔪᑦ ᑕᕆᐅᕐᓄᑦ ᓯᑯᓄᑦ ᑲᑎᖅᓱᖅᓯᒪᔪᑦ ᓄᐊᑕᐅᒍᓐᓇᖅᑐᑦ ᐊᔾᔨᒌᓐᖏᑦᑐᓂᒃ. ᐱᖃᓯᐅᑎᑦᓱᓂ ᐊᕐᕖᑦ ᓴᐅᓂᖏᑦ ᓇᐃᐱᑕᐅᓯᒪᔪᑦ ᐃᓗᐊᓂ ᐊᕙᑖᓂᓗ ᐃᑦᓴᕐᓂᑕᐃᑦ ᓄᓇᓕᒥᓃᑦ ᑐᓂᕐᓄᑦ. ᖃᖓᓂᑕᐅᓂᖏᑦ ᐊᒻᒪᓗ ᐊᐅᓚᓂᕆᓯᒪᔭᖏᑦ ᑖᒃᑯᐊ ᓴᐅᓃᑦ ᑕᑯᑦᓴᐅᑎᑦᓯᔪᑦ ᑕᕆᐅᑉ ᓯᑰᑉ ᐊᓯᔾᔨᐸᓪᓕᐊᓂᖓᓂᒃ ᐊᒻᒪᓗ ᐃᓂᒋᔭᐅᖃᑦᑕᖅᓯᒪᔪᓂᒃ ᑕᓪᓗᕈᑎᐅᑉ ᐊᖅᑯᑎᖓᓂ.

ᐱᔾᔪᑎᓪᓗᐊᑕᐅᔪᖅ ᓯᑰᑉ ᓵᓪᓕᕙᓪᓕᐊᓂᖓᓄᑦ ᐊᒻᒪᓗ ᐊᐅᔭᑐᖃᐅᓕᖅᑎᓪᓗᒍ ᓯᑯᖃᕐᓂᖅ ᐱᔾᔪᑎᖃᖅᑐᖅ ᓯᑯᑐᖃᐃᑦ ᔭᒑᓂᖏᓐᓂᒃ, ᐃᓇᖏᖅᑕᐅᕙᓪᓕᐊᔪᑦ ᓄᑖᖑᓂᖅᓴᓄᑦ, ᓯᖁᑦᑎᓴᕋᐃᓐᓂᖅᓴᓄᑦ ᓯᑯᓄᑦ. ᐃᒪᐃᓪᓗ ᐊᑐᕋᑦᓴᐅᖃᑦᑕᖅᓯᒪᓐᖏᑦᑐᑦ ᐊᑐᕋᑦᓴᕈᓛᖅᑐᑦ, ᐱᕕᑦᓴᖃᕆᐊᒃᑲᓐᓂᕈᑕᐅᓗᑎᒃ ᐅᒥᐊᕐᔪᐊᒃᑯᑦ ᐅᓯᖃᑦᑕᕐᓂᕐᒧᑦ, ᓄᓇᒥᐅᑕᕐᓂᒃ ᕿᓂᕐᓂᕐᒧᑦ ᐱᕙᓪᓕᐊᓂᕐᒧᓪᓗ. ᐊᑐᐃᓐᓇᖃᕐᓂᖅᓴᐅᓂᖅ ᐃᒻᒪᖃ ᐅᓗᕆᐊᓇᖅᑐᒦᒍᑕᐅᓂᖅᓴᐅᓂᐊᖅᑐᖅ ᐊᕙᑎᒥ ᐊᑑᑎᔪᓄᑦ ᐊᐅᓚᔾᔭᒋᐊᕈᑕᐅᒋᐊᖃᑐᐃᓐᓇᕆᐊᓕᓐᓄᑦ.

ᐱᖃᓗᔭᐃᑦ ᕿᑐᕐᖏᐅᕐᓂᖏᑦ

ᐱᖃᓗᔭᐃᑦ ᕿᑐᕐᖏᐅᓱᑦ ᓯᖁᑦᑎᑲᓪᓚᒻᒪᑕ ᐊᖏᔫᓈᖅᑎᖅᑐᐊᓗᓐᓂᒃ ᓯᑯᓂᒃ ᐊᐅᔪᐃᑦᑐᕐᓂᒃ, ᓯᑯᐊᕐᓂᒃ ᐅᕝᕙᓗ ᐱᖃᓗᔭᕐᓂᒃ.

ᖃᑦᓯᒐᓛᑦ ᐊᓯᖏᑦ ᐊᓯᔾᔨᕐᓂᐅᔪᑦ ᓯᑯᓂ ᑕᑯᔭᐅᓯᒪᔪᑦ. ᓲᕐᓗ, ᖃᑦᓯᐅᓂᖏᑦ ᓯᑯᖃᓐᖏᑦᑐᑦ ᐅᓪᓗᐃᑦ ᑕᓯᕐᓂ, ᑰᓐᓂ ᐊᒻᒪᓗ ᑕᕆᐅᕐᓂ ᐱᕙᓪᓕᐊᑐᐃᓐᓇᖅᑐᖅ ᐅᑭᐅᖅᑕᖅᑐᒥ, ᓯᑯᓇᓵᕐᓂᖅᓴᐅᖃᑦᑕᓕᖅᑎᓪᓗᒍ ᐊᐅᓴᕋᐃᓐᓂᖅᓴᐅᓕᖅᓱᓂ. ᑕᑯᑦᓴᐅᒻᒥᔪᖅ ᓄᓇᕗᒻᒥ ᐊᐅᔪᐃᑦᑐᐃᑦ ᓄᖑᑉᐸᓪᓕᐊᓂᖏᑦ, ᐃᓚᖓ ᐱᔾᔪᑕᐅᔪᖅ ᐱᖃᓗᔭᐃᑦ ᕿᑐᕐᖏᐅᕐᓂᖏᓐᓄᑦ. ᑕᒪᓐᓇ ᐊᓯᔾᔨᖅᑎᑦᓯᒍᓐᓇᖅᑐᖅ ᑰᒐᓛᓐᓂᒃ, ᐊᑦᑐᐃᓗᓂ ᓄᓇᓂᒃ ᓱᖏᖅᑑᑎᓕᓐᓂᒃ ᑰᑦᑐᓂᒃ ᐊᐅᔪᐃᑦᑐᕐᓂᒃ ᑰᒐᓛᓐᓄᑦ ᑰᓐᓄᓪᓗ, ᐊᑦᑐᐃᓂᖏᑦ ᐊᐅᔪᐃᑦᑐᐃᑦ ᑰᓕᖅᐹᓪᓕᕐᓂᖏᑦᑕ ᐱᖃᓯᐅᔾᔨᑐᐃᓐᓇᕆᐊᓕᒃ ᐊᓯᕈᖅᑕᕐᓂᖏᓐᓂᒃ ᐃᒪᐃᑦ ᑭᓪᓕᖏᑦᑕ, ᐊᓯᔾᔨᕐᓗᓂ ᑕᕆᐅᖑᓂᖓ ᐃᒪᐅᑉ ᐃᒪᑦᓯᐊᓪᓗ, ᐃᒪᐃᑦ ᐱᐅᓂᖏᑦ ᐊᓯᔾᔨᕐᓗᑎᒃ, ᐊᑐᐃᓐᓇᐅᓂᖓᑕᓗ ᐃᒥᑦᓯᐊᕙᐅᑉ ᐃᒥᕋᑦᓴᐅᑉ.

ᐊᓯᔾᔨᕐᓂᐅᔪᑦ ᓂᕐᔪᑎᓂᒃ ᐱᕈᖅᑐᓂᓗ

ᐊᓯᔾᔨᕐᓂᐅᔪᑦ ᐅᐸᑉᐸᑦᑕᖏᓐᓂ, ᐃᓂᒋᕙᑦᑕᖏᓐᓂ, ᐊᒥᓲᓂᖏᓐᓂ, ᑭᖑᕚᕇᑦ ᐊᔾᔨᒌᓐᖏᓐᓂᖏᓐᓂ, ᐱᐅᓯᖏᓪᓗ ᑐᓛᔪᑦ ᑐᓛᓐᖏᑦᑐᓪᓗ ᐆᒪᔪᐃᑦ ᖃᐅᔨᔭᐅᖃᑦᑕᖅᓯᒪᓕᕇᖅᑐᑦ ᐱᔾᔪᑕᐅᓪᓗᓂ ᓯᓚᐅᑉ ᐊᓯᔾᔨᐸᓪᓕᐊᓂᖓ.
ᐃᓘᓐᓈᒍᑦ, ᖃᑦᓯᐅᓂᖏᑦ ᐆᒪᔪᐃᑦ ᓄᓇᕗᒻᒥ ᓂᕆᐅᖏᔭᐅᔪᑦ ᖁᕝᕙᐸᓪᓕᐊᓂᐊᕆᐊᖏᑦ ᖃᓪᓗᓈᓃᓐᖔᖅᑐᑦ ᐆᒪᔪᐃᑦ ᐅᑭᐅᖅᑕᖅᑐᓕᐊᖅᐸᓪᓕᐊᑐᐃᓐᓇᑎᓪᓗᒋᑦ ᐊᓯᔾᔨᐸᓪᓕᐊᓂᖓᓄᑦ ᓯᓚ. ᒫᓐᓇ ᐅᑭᐅᖅᑕᖅᑐᒥᐅᑕᐃᑦ  ᐆᒪᔪᐃᑦ ᖃᐅᔨᕙᓪᓕᐊᓂᐊᖅᑐᑦ ᐊᓯᔾᔨᖅᑐᓂᒃ ᐃᓂᒋᕙᑦᑕᖏᓐᓂ ᐱᖃᓯᐅᑎᑦᓱᑎᒃ ᓄᑖᑦ ᐱᕈᖅᑐᐃᑦ, ᓯᑯᖃᓐᖏᓂᖅᓴᒥᒃ, ᐊᓯᔾᔨᐸᓪᓕᐊᔪᓂᒃ ᐊᐳᑏᑦ ᐊᐅᓚᓂᖏᓐᓂᒃ, ᐊᓯᔾᔨᐸᓪᓕᐊᔪᒥᒃ ᑕᕆᐅᖑᓂᖓᓂᒃ ᐃᒪᐅᑉ ᐆᑎᕐᓇᖅᑐᖃᕐᓂᖅᓴᐅᓗᓂᓗ. ᑕᒪᓐᓇ ᐊᑦᑐᐃᒍᓐᓇᖅᑐᖅ ᐆᒪᔪᕐᓂᒃ ᖃᑦᓯᐅᓂᖏᓐᓂᒃ ᓇᒦᓐᓂᖏᓐᓂᓪᓗ.
ᓲᕐᓗ, ᓇᓄᐃᑦ ᓯᓚᑐᔪᓪᓚᕆᐊᓘᒻᒪᑕ ᓱᖏᐅᑎᓱᐊᖑᑦᓱᑎᓪᓗ ᐊᓯᔾᔨᐊᓪᓕᐊᔪᓄᑦ. ᐆᒪᖃᑦᑕᖅᓯᒪᔪᑦ ᐊᒥᓱᐊᖅᑎᖅᓱᑎᒃ ᓯᓚ ᐊᓯᔾᔨᖃᑦᑕᑎᓪᓗᒍ ᐊᓂᒍᖅᑐᓂ ᑕᐃᑲᓂᒋᐊᖅ, ᑕᐃᒪᐃᓐᓂᖓᓄᑦ ᐊᑑᑎᒍᓐᓇᕋᔭᖅᑑᔮᖅᑐᑦ ᐊᓯᔾᔨᕐᓂᐅᑐᐃᓐᓇᕆᐊᓕᓐᓄᑦ. ᑭᓯᐊᓂᓕ, ᐊᓯᔾᔨᕐᓂᖅᑕᖃᑐᐃᓐᓇᕆᐊᓕᒃ ᓇᔪᒐᕆᕙᑦᑕᖏᓐᓂ. ᐃᓚᖏᓐᓂ ᐃᓄᐃᓴᓪᓕᕙᓪᓕᓂᐊᖅᑐᖅ ᓇᓄᖏᑦ. ᐃᓚᖏᓐᓂ ᓇᓄᖃᕈᓐᓃᑦᓯᐊᒻᒪᕆᓐᓂᐊᖅᑐᖅ ᐅᖅᑰᓇᕐᓂᖅᐸᐅᑎᓪᓗᒍ. ᐊᓯᖏᓐᓂ ᓄᓇᓂ ᓇᓄᖃᕐᓂᖅᓴᐅᑐᐃᓐᓇᕆᐊᓕᒃ ᐊᓯᔾᔨᐸᓪᓕᐊᔪᖅ ᓯᓚ ᐱᕚᓪᓕᑎᑦᓯᑎᓪᓗᒍ ᓇᓄᖃᕐᕕᓐᓂᒃ ᐃᓄᐃᓴᓪᓕᒋᐊᖅᑎᓪᓗᒋᑦ ᖃᕝᕙᐃᑦ. ᐊᓯᖏᓐᓂᓪᓕ, ᓇᓄᐃᑦ ᖃᑦᓯᐅᓂᖏᑦ ᐊᒻᒪᓗ ᐊᐅᓚᓂᖏᑦ ᑕᐃᒪᐃᑦᓴᐃᓐᓇᕐᓂᐊᖅᑐᑦ.
ᓂᕐᔪᑏᑦ ᐱᒻᒪᕆᐅᖃᑦᑕᖅᓯᒪᒐᒥᒃ ᐱᒻᒪᕆᐅᖏᓐᓇᕐᓂᐊᖅᓱᑎᓪᓗ ᐱᖅᑯᓯᕐᓅᖓᔪᓄᑦ, ᖃᑭᒪᓇᓱᐊᕐᓂᒧᑦ, ᓂᕆᕙᑦᑕᖏᓐᓂᓪᓗ ᓄᓇᕗᒻᒥᐅᑦ. ᐱᒻᒪᕆᐊᓘᓂᐊᖅᑐᖅ ᓄᓴᕗᒻᒥ ᑲᔪᓯᑎᑦᓯᓂᖓᑦ ᖃᐅᔨᕐᓴᕐᓂᕐᒥᒃ ᓂᕐᔪᑏᑦ ᖃᑦᓯᐅᓂᖏᓐᓂᒃ ᐊᒻᒪᓗ ᐃᕕᖅᑎᓂᕐᒥᒃ ᓂᕐᔪᑎᓂᒃ ᐊᐅᓚᑦᓯᓂᕐᒧᑦ ᑐᓐᖓᕕᒋᓗᒋᑦ.