ᑐᑭᓯᓂᖅ ᓯᓚᐅᑉ ᐊᓯᔾᔨᐸᓪᓕᐊᓂᖓᓂᒃ

ᓱᓇᐅᕙ?

ᓯᓚᐅᑉ ᐊᓯᔾᔨᐊᓪᓕᐊᓂᖓ ᐊᓯᔾᔨᕐᓂᐅᔪᖅ ᓯᓚᒧᑦ ᐊᑯᓂ ᐊᓯᔾᔨᐸᓪᓕᐊᑦᓱᓂ. ᐊᓯᔾᔨᕐᓂᕆᓐᖏᑦᑕᖓ ᓯᓚᐅᑉ ᖃᐅᑕᒫᑦ.
ᖃᐅᔨᓴᕐᓂᐅᔪᖅ ᑕᑯᑦᓴᐅᑎᑦᓯᔪᖅ ᐅᑭᐅᖅᑕᖅᑐᖅ ᒪᕐᕈᐊᖅᑎᓪᓗᐊᖅᑐᒥᒃ ᓂᕈᒥᑦᓯᕙᓪᓕᐊᓂᖓᓂᒃ ᑕᑯᓐᓇᖅᓱᒍ ᓄᓇᕐᔪᐊᓕᒫᖅ. ᓯᓚᐅᑉ ᐊᓯᔾᔨᐸᓪᓕᐊᓂᖓ ᐊᐅᓚᓂᐅᒐᔪᓲᖑᒐᓗᐊᖅᓱᓂ, ᐃᓄᐃᑦ ᐊᐅᓚᓂᖏᑦ ᓱᑲᓕᖅᐹᓪᓕᑎᑦᓯᓯᒪᒻᒪᑕ ᐃᖏᕐᕋᓂᕆᒐᔪᓲᖓᓂᒃ.

ᖃᓄᖅ ᐊᔾᔨᒌᓐᖏᒻᒪᑎᑦ ᓯᓚᐅᑉ ᖃᓄᐃᑦᑑᓂᖓ ᓯᓚᓗ?

ᓯᓚᐅᑉ ᖃᓄᐃᑦᑑᓂᖓ ᐅᖃᐅᓯᖃᖅᑐᖅ ᐊᑯᓃᖅᑐᒧᑦ ᓯᓚᐅᑉ ᐊᐅᓚᓂᖏᓐᓂᒃ ᓇᓗᓇᐃᖅᑕᐅᓯᒪᔪᒥ ᓄᓇᒥ. ᓯᓚᐅᑉ ᖃᓄᐃᓐᓂᖏᑦ (“ᐱᐅᓯᐅᒐᔪᑦᑐᑦ”) ᐋᖅᑭᑦᑕᐅᔪᓲᑦ 30-ᓄᑦ ᐊᕐᕌᒍᓄᑦ ᐊᑯᓐᓂᖃᖅᓱᑎᒃ. ᓯᓚᑕᒡᒐ ᐃᒐᓛᒃᑯᑦ ᑕᑯᔭᐃᑦ ᐅᓪᓗᒥ, ᐅᕝᕙᓘᓐᓃᑦ ᐊᐅᓚᓂᐅᕙᑦᑐᖅ ᑕᑯᕙᑦᑕᐃᑦ ᑮᑕᑲᐃᓐᓈᕐᓂᖅᓴᓂ (ᓲᕐᓗ ᐱᓇᓱᐊᕈᓯᖅ ᓯᓚᓗᑦᑐᖅ”).
ᑐᑭᓯᓂᐊᖅᑎᒻᒪᕇᑦ ᓂᕆᐅᑦᑐᑦ ᓯᓚᕐᓂᓪᓗᓪᓚᕆᖃᑦᑕᕐᓂᐊᕆᐊᖓ ᐱᕙᓪᓕᐊᑐᐃᓐᓇᓚᖓᑦᓱᓂᓗ ᑕᒪᒃᑮᓐᓂ ᐊᑯᓐᓂᖃᕐᓂᖏᓐᓂ ᐊᒻᒪᓗ ᐊᑦᓱᐊᓘᕐᓂᖏᓐᓂ ᐱᔾᔪᑕᐅᓪᓗᓂ ᓯᓚᐅᑉ ᐊᓯᔾᔨᐸᓪᓕᐊᓂᖓ.

ᖃᓄᕐᓕ ᐃᓄᐃᑦ ᐊᓐᖑᑎᓯᒪᕙᑦ ᓯᓚᐅᑉ ᐊᓯᔾᔨᐸᓪᓕᐊᓂᖓᓄᑦ?

ᓄᓇᕐᔪᐊᕗᑦ ᓱᖏᖅᑑᑎᖃᕐᒪᑦ ᐅᖅᓱᐊᓗᑦᓴᓂᒃ, ᐅᖅᓱᐊᓗᓐᓂ ᐊᐅᒫᓗᓐᓂᓪᓗ. ᓄᓇᕗᒻᒥ, ᐆᒪᔾᔪᑎᒋᒐᓱᐊᖅᑕᓕᒫᕗᑦ ᐅᖅᓱᐊᓗᖅᓴᐃᑦ.
ᐃᓱᒪᑦᓴᖅᓯᐅᒐᓛᑲᐃᓐᓇᕆᑦ ᓱᖃᑦᑕᕐᒪᖔᖅᐱᑦ ᐅᓪᓘᑉ ᐃᓗᐊᓂ. ᐊᖁᓲᖑᕕᑦ ᓄᓇᓯᐅᑎᒥᒃ, ᐊᐅᒪᓕᐅᖃᑦᑕᖅᑭᑦ ᖃᕆᑕᐅᔭᕋᓛᕐᒥᒃ ᐊᑐᖅᐸᑉᐱᓘᓐᓃᑦ ᑭᐊᑦᓴᐅᑎᒥᒃ? ᐄᖑᑉᐸᑦ, ᐅᖅᓱᐊᓗᑦᓴᓂᒃ ᐃᑯᒪᑦᓯᔪᑎᑦ. ᐃᓄᖃᖅᑎᓪᓗᒍ ᒥᑦᓵᓃᑦᑐᓂᒃ 7 ᕕᓕᐊᓐᓂᒃ ᐃᓄᓐᓂᒃ, ᑖᒃᑯᐊ ᐊᐅᓚᔾᔭᒋᐊᕐᓂᐅᔪᑦ ᑲᑎᑉᐸᒻᒪᑕ ᑕᑯᑦᓴᐅᑎᑦᓱᓪᓗ ᐊᑦᑐᐃᓂᕆᔭᖏᑦ ᓄᓇᕐᔪᐊᕐᒥᒃ.

ᑕᑯᓐᓇᓐᖑᐊᕆᑦ ᐱᕈᖅᓰᕕᒻᒥᒃ. ᓯᕿᓂᖅᓱᓂ ᐃᒐᓛᒃᑯᑦ ᐃᓗᐊᓄᓪᓗ ᐃᑖᒪᓕᖅᓱᓂ. ᑕᒪᓐᓇ ᓂᕈᒥᑦᓯᒍᑕᐅᓲᖅ ᐱᕈᖅᓰᕕᐅᑉ ᐃᓗᐊᓂ ᖁᕝᕙᐸᓪᓕᐊᓕᖅᓱᓂ. ᐃᑯᒪᑦᓯᓕᕋᐃᒐᑦᑕ ᐅᖅᓱᐊᓗᑦᓴᓂᒃ, ᑕᐃᒪᐃᑉᐸᒻᒥᔪᖅ ᓄᓇᕐᔪᐊᖅ; ᐳᓪᓚᐃᑦ (ᖃᐅᔨᒪᔭᐅᔪᑦ ᐱᕈᖅᓰᕕᓐᓄᑦ ᐳᓪᓚᐃᑦ) ᓴᒃᑯᑕᐅᕙᒻᒪᑕ ᐅᓂᑦᑎᑦᓯᓕᖅᓱᑎᓪᓗ ᐆᓇᕐᓂᖓᓂᒃ ᓯᕿᓂᐅᑉ ᓄᓇᕐᔪᐊᑉ ᐊᕙᑖᓄᑦ. ᑕᐃᒪᐃᑦᑎᓪᓗᒍ ᓄᓇᕐᔪᐊᖅ ᓂᕈᒥᑦᓯᓂᖅᓴᐅᓲᖅ.
ᐊᑐᓂᑦ ᐃᓄᒃ ᐊᑐᓲᖅ ᐅᖅᓱᐊᓗᑦᓴᓂᒃ - ᐱᖃᓯᐅᑎᑦᓱᑎᒃ ᐃᓘᓐᓇᑲᓴᑦᓯᐊᑎᒃ ᐃᓄᐃᑦ ᓄᓇᕐᔪᐊᕐᒦᑦᑐᑦ, ᐃᑲᔪᖅᓯᔪᑦ ᑕᒪᑦᓱᒧᖓ. ᑭᓯᐊᓂ ᓄᓇᓕᑦᑎᒍᑦ ᐊᐅᓚᓂᖃᕈᓐᓇᖅᑐᒍᑦ ᐃᒥᒃᑯᓪᓗ ᐅᕙᕈᒍᑦ ᐃᑲᔪᕋᓱᐊᕐᓗᑕ ᑕᒪᓐᓇ ᓄᖅᑲᐅᒥᑎᓪᓗᒍ.
ᑐᓴᒃᑯᓐᓂᕈᒪᕖᑦ?