ᓄᓇᓕᖏᑦ ᑎᑭᕋᕐᔪᐊᖅ, (ᓄᕗᑯᑖᒃ) ᐃᓗᐊᓃᑦᑐᖅ ᑲᖏᖅᓲᑉ, ᐱᖓᓐᓇᖓᑕ ᓯᓈᖓᓂ ᑕᓯᐅᔭᕐᔪᐊᑉ. ᑲᖏᖅᓱᒃ ᐅᐊᓐᓇᖓᓃᑦᑐᖅ ᐊᕐᕕᐊᑦ, ᓂᒋᐊᓂ ᑲᖏᖅᖠᓂᐅᑉ. ᑖᒃᑯᐊ ᓄᓇᓖᑦ (ᒫᓐᓇ ᐃᓄᖃᖅᑐᖅ 392) ᓄᓇᓕᓐᖑᕆᐊᓐᖓᓚᖅᓯᒪᔪᖅ ᐱᖓᓲᓕᖅᑲᖓᔪᓂᒃ ᐃᓄᖃᖅᓱᓂ (ᐊᑕᐅᓯᖅ ᓄᓇᒦᑦᓱᓂ ᒪᕐᕉᓪᓗ ᓯᓈᓂ), ᑖᕗᖓᓚᐅᖅᓯᒪᔪᑦ ᓄᓇᓕᓐᖑᐸᓪᓕᐊᑎᓪᓗᒍ 1950-ᖏᓐᓂ. ᐅᓪᓗᒥ, ᑎᑭᕋᕐᔪᐊᖅ ᓱᓕ ᐱᖅᑯᓯᑐᖃᖅᑎᒍᑦ ᓄᓇᓕᒃ, ᐊᔾᔨᒌᓐᖏᑦᑐᓂᒃ ᐅᖃᕈᓯᖃᖅᓱᑎᒃ ᐱᖅᑯᓯᖃᖅᓱᑎᓪᓗ, ᐱᓯᒪᔪᓂᒃ ᑕᒪᒃᑮᓐᓂᒃ ᓄᓇᒥᒃ ᓯᓈᓂᓪᓗ ᐱᖅᑯᓯᕐᓂᒃ.
ᐊᒥᓲᓂᖏᑦ ᓄᓇᒥ ᑕᕆᐅᕐᒥᓗ ᐆᒪᔪᐃᑦ ᐱᕕᖃᖅᑎᑦᓯᓯᒪᔪᑦ ᐃᓄᓐᓂᒃ ᑎᑭᕋᕐᔪᐊᕐᒥᐅᓂᒃ ᐃᓄᓕᖅᑕᓂᒃ ᓂᕆᕙᑦᓱᑎᒃ. ᓇᑦᓰᑦ, ᐊᐃᕖᑦ, ᕿᓚᓗᒐᐃᓪᓗ ᑕᕝᕙᓪᓗᐊᑕᐅᔪᑦ ᓂᕿᓂ ᐃᓄᓕᖅᑕᓂ. ᑐᑦᑐᖃᓕᐅᒥᔮᖅᐸᑦᑑᒐᓗᐊᖅ ᓇᓄᖃᓚᐅᖅᐸᑦᓱᓂᓗ, ᐊᒻᒪᓗ ᐃᖃᓗᑐᐃᓐᓇᕐᓂᒃ ᐃᖃᓗᑉᐱᓐᓂᓪᓗ ᐃᖃᓗᒐᓱᐊᖅᐸᑦᓱᑎᒃ, ᐊᐅᓚᓂᐅᒐᔪᖃᑕᐅᔪᑦ.
ᐃᓚᒍᑦᓯᐅᔾᔭᐅᕙᒻᒥᔪᑦ ᐃᖃᓗᓐᓄᑦ ᐳᐃᔨᓄᓪᓗ, ᓂᕿᑦᓯᐊᕚᓗᐃᑦ ᐸᐅᕐᖓᐃᑦ ᑯᐊᓐᓃᓪᓗ

ᓇᐅᔮᑦ (ᐃᓄᖏᑦ ᒥᑦᓵᓂ 85ᑦ) ᕐᑳᖓᓃᓪᓗᐊᖅᑐᖅ ᐅᑭᐅᖅᑕᖅᑑᑉ ᓇᓗᓇᐃᒃᑯᑕᖓᑕ ᑲᓇᓐᓇᖓᓂ ᓄᓇᕗᑦ. ᑭᖑᓪᓕᖅᐸᐅᓯᒪᔪᖅ ᐅᑭᐅᖅᑕᖅᑐᒥ ᐃᓚᒋᔭᐅᓕᖅᓱᑎᒃ ᐅᓪᓗᒥᓯᐅᑎᓄᑦ ᓄᓇᕐᔪᐊᕐᒥ, ᓇᐅᔮᑦ ᑕᑕᑦᓯᐊᖅᑐᖅ ᐱᖅᑯᓯᑐᖃᖅᑎᒍᑦ ᐃᓄᐃᑦ ᐃᓅᓇᓱᐊᕐᓂᖓᓐᓂᒃ. ᐃᓄᑦᑎᑐᑦ ᐊᑎᖓ ᓇᐅᔮᑦ ᑐᑭᓕᒃ “ᒪᓐᓂᓕᐅᕐᕕᒃ ᓇᐅᔭᕐᓄᑦ.” ᐅᓪᓗᖃᕐᕖᑦ ᐃᓐᓈᕈᖏᓐᓃᑦᑐᑦ ᐅᖓᓯᓐᓂᓕᒻᒥ 5 ᑭᓗᒦᑕᓂᒃ ᐅᐊᓐᓇᖓᓂ ᓄᓇᓖᑦ ᐊᒻᒪᓗ ᔫᓂᑕᒫᑦ ᐊᒥᑕᐅᓵᓗᓐᓂᒃ ᓇᐅᔭᖅᑕᖃᖃᖅᑕᖅᑐᖅ, ᖁᐸᓄᐊᓂᒃ, ᑑᓕᓐᓂᒃ, ᒥᑎᕐᓂᒃ ᐊᒻᒪᓗ ᐃᓲᕋᕐᓂᖅ.
ᓇᐅᔮᑦ ᑐᓴᐅᒪᔭᐅᑦᓯᐊᖅᑐᖅ ᓴᓇᐅᒐᖅᑎᒻᒪᕆᐊᕐᒪᑦ, ᐱᓗᐊᖅᑐᒥᒃ ᐃᓄᓐᓄᑦ ᓴᓇᓐᖑᐊᖅᑎᓄᑦ ᓴᓇᕙᑦᑐᓄᑦ ᓴᐅᓂᕐᓂᒃ, ᑑᒑᕐᓂᒃ ᐅᔭᖅᑲᓂᓪᓗ. ᓄᓇᓕᓖᑦ ᓴᖅᑮᓯᒪᔪᑦ ᐊᐃᑯᓕᒃ ᓴᓇᐅᒐᖅᑏᑦ ᑲᑐᔾᔨᖃᑎᒌᖏᓐᓂᒃ ᖃᐅᔨᒪᔭᐅᑎᑦᓯᑲᓐᓂᕈᒪᓪᓗᑎᒃ ᓇᐅᔮᓂᒃ ᓴᓇᓐᖑᐊᒃᑲᓐᓂᒃ ᓴᓇᐅᒐᕐᓂᓪᓗ ᓄᓇᕐᔪᐊᕐᒥ ᓂᐅᕕᖅᑎᓄᑦ.

ᑲᖏᖅᖠᓂᖅ (“ᐃᑎᔪᖅ ᑲᖏᖅᓱᖅ” ᐃᓄᑦᑎᑐᑦ) ᐱᓇᓱᐊᕐᕕᓐᓄᑦ ᐃᖏᕐᕋᔾᔪᑎᓄᓪᓗ ᑐᑦᑕᕐᕕᐅᔪᖅ ᑭᕙᓪᓕᕐᒥ ᐃᓄᖃᖅᓱᓂ ᐊᑖᓂ 2700. ᑲᖏᖅᖠᓂᖅ ᐊᖅᑯᑕᐅᕗᖅ ᓄᓇᕗᒻᒥ ᕿᑎᐊᓄᑦ ᐱᖓᓐᓇᖓᓄᓪᓗ ᑲᓇᑕᐅᑉ. ᐊᒥᓲᓂᖏᓐᓄᑦ ᐃᖏᕐᕋᔪᑦ ᑕᕝᕘᓇ, ᐊᒻᒪᓗ ᐱᐅᓯᐅᖃᑦᑕᖅᓯᒪᔪᑦ ᐊᕕᑦᑐᖅᓯᒪᔪᓂ ᒐᕙᒪᓄᑦ, ᐅᔭᕋᓐᓂᐊᓂᕐᒧᓪᓗ, ᑲᖏᖅᖠᓂᖅ ᐱᕙᓪᓕᐊᓯᒪᕗᖅ ᓴᓐᖏᔪᒻᒪᕆᓐᓂᒃ ᓇᒻᒥᓂᖅ ᐱᓇᓱᐊᖅᑎᖃᖅᓱᑎᒃ. ᐅᓯᔨᓂᒃ, ᓱᓇᒃᑯᑎᖃᖅᑎᑦᓯᔨᓂᒃ ᐊᒻᒪᓗ ᓅᑎᑦᓯᓖᑦ ᒪᓂᒪᑎᑦᓯᕙᑉᐳᑦ ᐳᓚᖃᑦᑎᓄᑦ ᑲᒻᒪᕆᐅᔪᓄᓪᓗ ᐱᓇᓱᐊᖃᑎᖃᕈᒪᔪᓄᑦ ᑲᓄᐃᑦᑐᑐᐃᓐᓇᖅᑎᒍᑦ ᐱᔨᑦᓯᕋᐅᑎᒃᑯᑦ.
ᐃᔨᕋᓕᒃ ᑰ ᒥᓐᖑᐃᕐᓯᕐᕕᒃ ᐅᐸᑦᑕᐅᒐᓐᓈᖑᕗᖅ ᐱᓱᕋᔮᑦᑎᓄᑦ, ᐃᖃᓗᓪᓕᓂᐊᖅᑎᓄᑦ, ᑎᒻᒥᐊᓂᓪᓗ ᑕᑯᓐᓇᖅᑎᓄᑦ. ᐃᑦᓴᕐᓂᑕᐃᑦ, ᓲᕐᓗ ᑕᕆᐅᑉ ᐊᑭᐊᓂᒃ ᐊᕐᕙᓂᐊᖅᑎᒥᓃᑦ ᐅᒥᐊᕐᔪᐊᒥᓂᖓᑦ ᓴᓂᐊᓂ Marble ᕿᑭᖅᑕᐅᑉ ᐊᒻᒪᓗ ᑐᓂᖅᑲᐃᑦ ᐃᔨᕋᓕᒃ ᑰᖓᓂ ᑕᑯᒍᑎᒋᕙᕗᑦ ᑕᐃᑦᓱᒪᓂ ᐊᑑᑎᖃᖅᑕᖅᓯᒪᔪᒻᒪᕆᐊᓗᓐᓂᒃ.

ᓴᓕ ᓂᒋᐊᓃᖅᑐᖅ ᓴᓪᓕᐅᑉ ᕿᑭᖅᑕᖓᑕ, ᐅᐊᓐᓇᖓᓂ ᑕᓯᐅᔭᕐᔪᐊᑉ. ᐃᓄᑦᑎᑐᑦ ᐊᑎᖓ ᓄᓇᓖᑦ ᓴᓪᓕᖅ, “ᓵᑦᑐᔮ ᕿᑭᖅᑕ ᓯᕗᕌᓂ ᓄᓇᐅᑉ,” ᖃᓪᓗᓈᑎᑐᑦ ᐊᑎᖓ ᑐᑭᖃᖅᑎᓪᓗᒍ ᓴᐅᓂᕈᖅᓯᒪᔪᑦ ᐃᒪᕐᒥᒃ ᐱᕈᖅᑐᐃᑦ ᑲᖏᖅᓱᖓᓂ.
ᓴᓪᓕᖅ ᐱᐅᓂᖅᐸᐅᖃᑕᐅᕗᖅ ᓄᓇᕗᒻᒥ ᓂᕐᔪᑎᓂᒃ ᑕᑯᒋᐊᕐᕕᒋᓗᒍ. ᖃᓂᑦᑐᖅ ᑐᔾᔮᑦ ᑕᖃᐃᕐᓯᕐᕕᐅᓲᖑᒻᒪᑦ ᐊᐃᕕᕋᓵᓗᓐᓄᑦ. ᒪᕐᕉᒃ ᑎᒻᒥᐊᖃᕐᕕᐅᑦᓱᑎᒃ, East Bay-ᒥ ᑐᓛᔪᓂᒃ ᑎᒻᒥᐊᖃᕐᕕᒃ ᐊᒻᒪᓗ Harry Gibbons ᑐᓛᔪᓂᒃ ᑎᒻᒥᐊᖃᕐᕕᒃ ᖃᐅᔨᒪᔭᐅᒻᒪᕆᑦᑐᑦ ᑎᒻᒥᐊᓂᒃ ᑕᐅᑐᒐᓱᐊᖅᑎᓄᑦ. ᐊᒥᓱᑦᑕᐅᓴᐃᑦ ᑲᖑᐃᑦ, ᐊᒻᒪᓗ ᓇᑎᕐᓇᕐᒥᐅᑦ ᖁᔾᔪᐃᑦ, ᖁᔾᔪᐃᑦ ᐊᒻᒪᓗ ᐊᓯᖏᑦ ᑎᒻᒥᐊᑦ ᑐᓛᕙᒻᒪᑕ ᐅᐱᕐᖔᒃᑯᑦ ᑕᒪᐅᖓ. ᓄᓇᓕᓐᓂ ᓅᑎᑦᓯᔩᑦ ᒪᓂᒪᑎᑦᓯᕙᑦᑐᑦ ᐅᒥᐊᒃᑯᑦ ᓅᑎᑦᓯᓂᕐᒥᒃ ᕿᒥᕐᖁᒋᐊᖅᑐᖅᓱᑎᒃ ᐆᒪᔪᕐᓂᒃ ᑖᕙᓂ.

ᐃᒡᓗᓕᒑᕐᔪᒃ ᐅᐊᓐᓇᖅᐸᓯᖓᓂ ᐱᖓᓐᓇᖅᐸᓯᖓᓃᑦᑐᖅ ᓯᓈᖓᓂ ᑕᓯᐅᔭᕐᔪᐊᑉ, ᐅᐊᓐᓇᖓᓂ ᑲᖏᖅᖠᓂᐅᑉ. ᐊᑎᑯᑐᖃᖓ ᐃᒡᓗᓕᒑᕐᔪᒃ, ᑐᑭᓕᒃ “ᓄᓇ ᐃᒡᓗᑕᕐᑳᕐᔪᑦᑐᖅ.”
ᐃᒡᓗᓕᒑᕐᔪᒃ, ᐃᓄᑐᖃᖅᓱᓂ 390-ᓂᒃ, ᑕᑯᓐᓇᖅᑕᐅᔪᖅ “ᓄᓇᓕᑐᖃᐅᓂᖅᐸᐅᒋᐊᖓ” ᐅᑭᐅᖅᑕᖅᑐᒥ, ᑖᕙᓐᖓᓂᑕᐅᑦᓱᓂ 1920-ᖏᓐᓂ. ᑭᓯᐊᓂᓕ, ᖃᓪᓗᓈᑦ ᐊᓪᓛᑦ ᑕᒪᐅᓐᖓᓚᐅᖅᑎᓐᓇᒋᑦ, ᓄᓇᓖᑦ ᐊᑯᓂᐊᓗᒃ ᓄᓇᒋᔭᐅᓯᒪᓕᖅᑐᒥᓂᖅ ᐃᒡᓗᓕᒑᕐᔪᒃ. ᐊᒥᐊᒃᑯᐃᑦ ᐃᓗᓕᖅᑐᔪᓂᒃ ᖃᕐᒪᒥᓂᕐᓂᒃ ᐱᑕᓕᒃ ᓯᓚᑖᓂ ᓄᓇᓖᑦ, ᐅᑉᐱᔭᐅᓪᓗᓂ ᐃᓄᖃᕐᓂᕆᐊᖓ ᐅᖓᑖᓃᑦᑐᓂᒃ 700 ᖃᓪᓗᓈᑦ ᑎᑭᓚᐅᖅᑎᓐᓇᒋᑦ. ᐅᓪᓗᒥ, ᐃᒡᓗᓕᒑᕐᔪᒃ ᐊᖅᑯᑎᑐᖃᖓ ᓇᓗᓇᐃᔭᐃᔪᖅ ᐱᐅᓯᐅᖃᑦᑕᖅᓯᒪᔪᒻᒪᕆᒻᒥᒃ ᑖᕙᓂᒐᓚᒃ. ᑐᑭᓯᒋᐊᒃᑲᓐᓂᕕᑦᓴᖅ ᐅᕙᓂ www.chesterfieldinlet.net.

ᖃᒪᓂᑦᑐᐊᖅ, ᓄᓇᒦᑦᑐᖅ, ᓯᕕᑐᓕᕐᓂᐊᓗᐊᓂ ᑏᓛᓐ ᑰᖓᑕ, ᑲᓂᑦᑑᑦᓴᓂ ᓄᓇᓐᖑᐊᖅᑎᒍᑦ ᕿᑎᖓᓄᑦ ᑲᓇᑕᐅᑉ. ᖃᒪᓂᑦᑐᐊᖅ (ᐃᓄᖏᑦ 1950) ᖃᐅᔨᒪᔭᐅᑦᓯᐊᖅᑐᖅ ᓴᓇᐅᒐᕐᓄᑦ ᓄᓇᓕᓐᓂ. ᓴᓇᐅᒐᕐᓂᕐᒧᑦ ᑎᑎᖅᑐᒐᕐᕖᓪᓗ ᖃᐅᔨᒪᔭᐅᑎᑦᓯᑲᓐᓂᕈᑕᐅᖅᓱᑎᒃ ᓄᓇᓕᓐᓂ ᓴᓇᐅᒐᕐᓂᒃ, ᓲᕐᓗ ᐃᓄᐃᑦ ᐃᑦᓴᕐᓂᑕᒃᑯᕕᖏᑦ, ᔨᐊᓯ ᐅᓇᖅ ᐱᓐᖑᐊᕐᕕᒃ, ᐊᒻᒪᓗ ᒪᑭᒪᑦᓯᐊᖅᑐᑦ ᐃᒻᒥᒃᑯᑦ ᓴᓇᐅᒐᕐᓂᒥᒃ ᑕᑯᔭᒐᖃᕐᕖᑦ, ᐃᑲᔪᖅᓯᒪᓪᓚᕆᑦᑐᑦ ᓄᓇᓕᓐᓂᒃ. ᓄᓇᒥᐅᑕᓕᕆᓂᕐᒧᑦ ᐊᐅᓚᓂᐅᔪᑦ ᐊᑦᑐᐃᓂᖃᓪᓚᕆᖑᓐᓇᕐᒥᔪᑦ ᖃᑭᒪᓇᓱᐊᕐᓂᕐᒥᒃ ᐱᕙᓪᓕᐊᓂᒃᑯᑦ ᖃᒪᓂᑦᑐᐊᕐᒥ. ᐱᕙᓪᓕᐊᒋᐊᒃᑲᓐᓂᕐᓂᐊᕐᒥᔪᖅ ᒪᑐᕚᖕᒃ ᒎᓗᓐᓂᐊᕐᕕᒻᒥ ᓴᖅᑮᒍᑕᐅᓯᒪᒌᖅᓱᓂ ᐊᒥᓱᓂᒃ ᓄᓇᓕᓐᓂ ᐃᖅᑲᓇᔭᐃᖅᑎᓂᒃ. ᑐᑭᓯᒋᐊᒃᑲᓐᓂᕈᒪᒍᑦᓯ ᖃᒪᓂᑦᑐᐊᑉ ᒥᑦᓵᓄᑦ, ᑕᑯᒋᐊᕈᒃ www.bakerlake.ca.

ᐊᑎᖓ ᐊᕐᕕᐊᑦ ᐱᓯᒪᔪᖅ ᐊᕐᕕᒻᒥᒃ, ᐃᓄᑦᑎᑐᑦ ᐊᑎᖓ ᐊᕐᕕᒃ. ᓄᓇᓖᑦ (ᐃᓄᖏᑦ 2500 ᒥᑦᓵᓃᑦᑐᑦ) ᐱᖓᓐᓇᖓᓃᑦᑐᑦ ᓯᓈᖓᑕ ᑕᓯᐅᔭᕐᔪᐊᑉ, ᐅᐊᓐᓇᖓᓂ ᑰᔾᔪᐊᕌᓗᒃ, ᒫᓂᑑᕙ. ᐊᕐᕕᐊᑦ ᓄᓇᖓ ᐃᒪᖏᓪᓗ ᐆᒪᔪᖃᑦᓯᐊᖅᑐᑦ. ᒪᑳᓄᓪ ᑰᖓᑕ ᑐᓛᔪᓄᑦ ᑎᒻᒥᐊᓄᑦ ᓇᔪᒐᖅ, ᓂᒋᐊᓂ ᓄᓇᓖᑦ, ᑕᑕᑦᑐᖅ ᐊᒥᓱᑦᑕᐅᓵᓗᓐᓂᒃ ᑎᒻᒥᐊᓂᒃ ᐃᒪᕐᒥᐅᑕᕐᓂᒃ. ᐅᑭᐊᒃᑯᑦ, ᕿᓚᓗᒐᐃᑦ ᑕᑯᔭᐅᒐᔪᑉᐸᒻᒥᔪᑦ ᑲᖏᖅᓱᖏᓐᓂ ᓄᓇᓖᑦ ᑐᑦᑐᐃᓪᓗ ᑕᑯᔭᐅᒐᔪᑉᐸᒻᒥᑦᓱᑎᒃ ᓄᓇᓖᑦ ᓴᓂᐊᓐᓂ. ᐊᕐᕕᐊᑦ ᐊᔾᔨᐅᓐᖏᑦᑐᖅ ᓄᓇᓖᑦ ᖃᐅᓕᒪᓂᖅ ᐊᒻᒪᓗ ᐊᑐᖅᑐᖁᑎᑎᒋᔭᐅᔪᑦ ᑲᔪᓯᑎᑕᐅᑦᓱᑎᒃ ᐊᑕᐅᓯᒃᑯᑦ ᖃᑭᒪᓇᓱᐊᕐᓂᒃᑯᑦ ᐃᖏᕐᕋᓂᖃᖅᓱᑎᒃ. ᐃᓄᑦᑎᑐᑦ ᐅᖃᐅᓯᖅ ᓴᓐᖏᔪᒻᒪᕆᐊᓗᒃ ᓄᓇᓕᓐᓂ.