ᔫᓂ 11, 2026−ᒥ, ᒪᓕᒐᓕᐅᖅᑎ ᐳᕋᐃᔭᓐ ᑯᓄᒃ, ᒥᓂᔅᑕ ᐊᕙᑎᓕᕆᔨᒃᑯᓐᓄᑦ, ᑐᓴᖅᑎᑦᑎᓚᐅᖅᐳᖅ ᐊᑦᑎᖅᑕᐅᒃᑲᓐᓂᕐᓂᖓᓂᒃ ᓄᓇᕗᒻᒥ ᓯᓚᐅᑉ ᐊᓯᔾᔨᖅᐸᓪᓕᐊᓂᖓᓄᑦ ᐱᓕᕆᔾᔪᑕᐅᕙᒃᑐᖅ ᐆᒧᖓ, ᔮᓱᐊ ᐊᐃᐱᓕ ᖁᒪᖔᐱᒃ ᓯᓚᒧᑦ ᐊᔪᙱᓛᖑᕙᒃᑐᓄᑦ ᐊᑐᖅᑕᐅᔪᓐᓇᖅᑐᑦ ᐅᐱᒋᓪᓗᒍ ᓄᓇᕗᒻᒥ ᓯᓚᐅᑉ ᐊᓯᔾᔨᖅᐸᓪᓕᐊᓂᖓᓄᑦ ᒪᒃᑯᒃᑐᑦ ᐅᖃᐅᔾᔨᒋᐊᖅᑎᑦ ᑲᑎᒪᔨᕋᓛᖏᑦ (NuCCYAC) ᐃᓚᒋᔭᐅᔪᖅ ᔮᓱᐊ ᐊᐃᐱᓕ ᖁᒪᖔᐱᒃ.
ᐅᖃᖅᑎᑦᑎᔩ, ᓄᓇᕗᑦ ᒐᕙᒪᖓ ᐅᐱᒍᓱᒃᐳᖅ ᐃᓕᓴᖅᓯᔪᓐᓇᕋᒥᒃ ᔮᓱᐊ ᖁᒪᖔᐱᐅᑉ ᐃᓅᓯᖓᓂᒃ ᐃᑲᔪᖃᑦᑕᖅᓯᒪᓂᖓᓂᒡᓗ ᐊᑦᑎᖅᑕᐅᒃᑲᓐᓂᕐᓂᖓᓄᑦ ᓄᓇᕗᒻᒥ ᓯᓚᐅᑉ ᐊᓯᔾᔨᖅᐸᓪᓕᐊᓂᖓᓄᑦ ᐱᓕᕆᔾᔪᑕᐅᕙᒃᑐᖅ ᐃᒪᓐᓇ ᔮᓱᐊ ᐊᐃᐱᓕ ᖁᒪᖔᐱᒃ ᓯᓚᐅᑉ ᐊᓯᔾᔨᖅᐸᓪᓕᐊᓂᖓᓄᑦ ᐊᔪᙱᓛᖑᓂᕐᒧᑦ ᐊᑐᖅᑕᐅᔪᓐᓇᖅᑐᖅ.
ᑖᓐᓇ ᐊᑐᖅᑕᐅᔪᓐᓇᖅᑐᖅ ᒪᒃᑯᒃᑐᓄᑦ−ᐊᐅᓚᑕᐅᓪᓗᓂ ᐊᑐᖅᑕᐅᔪᓐᓇᖅᑐᖅ ᐋᖅᑭᒃᓱᖅᑕᐅᓯᒪᓪᓗᓂ ᓴᙱᓂᖅᑖᖅᑎᑦᑎᔪᒪᓪᓗᓂ ᓄᓇᕗᒻᒥᐅᓂᒃ ᓯᓚᐅᑉ ᐊᓯᔾᔨᖅᐸᓪᓕᐊᓂᖓᓄᑦ ᐱᓕᕆᐊᖃᕈᓐᓇᕐᓂᕐᒥᒃ. ᒪᒃᑯᒃᑑᒐᓗᐊᕈᕕᑦ, ᐃᓐᓇᐅᒍᕕᑦ, ᐃᓕᓐᓂᐊᖅᑎᐅᒍᕕᑦ, ᐃᓕᓴᐃᔨᐅᒍᕕᑦ, ᓄᓇᓕᖕᓂ ᓯᕗᓕᖅᑎᐅᒍᕕᑦ, ᐅᕝᕙᓘᓐᓃᑦ ᓄᓇᒥᒃ ᓴᐳᔾᔨᔪᒪᑦᑎᐊᕈᕕᑦ, ᐃᑲᔫᑎᒃᓴᑦ ᐃᑲᔫᑎᒃᓴᐅᕗᑦ ᐊᒻᒪ ᑲᔪᖏᖅᓴᐃᔾᔪᑕᐅᔪᓐᓇᖅᖢᑎᒃ ᐃᓄᖕᓄᑦ ᓯᓚᒧᑦ ᐊᔪᙱᓛᖑᖃᑕᐅᓕᕐᓗᑎᒃ ᓄᓇᖏᓐᓂᒃ.
ᔮᓱᐊ ᐱᒻᒪᕆᐅᒋᔭᐅᓪᓗᓂ ᐃᓚᒋᔭᐅᓚᐅᖅᐳᖅ ᓄᓇᕗᒻᒥ ᓯᓚᐅᑉ ᐊᓯᔾᔨᖅᐸᓪᓕᐊᓂᖓᓄᑦ ᒪᒃᑯᒃᑐᓄᑦ ᐅᖃᐅᔾᔪᐃᔨᑦ ᑲᑎᒪᔨᕋᓛᖏᓐᓄᑦ ᐃᓱᒪᑦᑎᐊᖅᐸᒃᖢᓂᓗ ᓂᐱᒋᔭᐅᕙᒃᖢᓂ ᑲᔪᓰᓐᓇᖅᑐᓄᑦ ᐅᖃᖃᑎᒌᖕᓂᕆᔭᐅᔪᓄᑦ ᓯᓚᐅᑉ ᐊᓯᔾᔨᖅᐸᓪᓕᐊᓂᖓᓄᑦ, ᐊᓂᒍᐃᔪᓐᓇᕐᓂᕐᒧᑦ, ᐱᒻᒪᕆᐅᓂᖓᓄᓪᓗ ᐃᓄᐃᑦ ᖃᐅᔨᒪᓂᕆᔭᖏᑦ ᑕᐅᑐᖅᑰᖅᑕᖏᓪᓗ ᐋᖅᑭᒃᓱᐃᕙᓪᓕᐊᓂᐊᕐᓗᓂ ᓄᓇᕗᑦ ᓯᕗᓂᒃᓴᖓᓂᒃ. ᐃᑲᔪᖅᓯᒪᓂᖓ ᑕᑯᒃᓴᐅᑎᑦᑎᕗᖅ ᓴᙱᔪᒥᒃ ᐃᒃᐱᒍᓱᑦᑎᐊᕐᓂᕐᒥᒃ ᓄᓇᓕᖕᓂᒃ, ᐃᓕᖅᑯᓯᕐᒥᒃ, ᐊᕙᑎᒥᒡᓗ, ᑕᐃᑲᓃᓐᓂᖓᓗ ᑐᑭᖃᑦᑎᐊᖅᑐᒥᒃ ᐊᒃᑐᖅᓯᓂᖃᓚᐅᖅᐳᖅ ᑕᐃᒃᑯᓄᖓ ᐱᓕᕆᖃᑎᒋᔪᓐᓇᓚᐅᖅᑕᖏᓐᓄᑦ.
ᑖᓐᓇ ᐊᑦᑎᖅᑕᐅᒃᑲᓐᓂᕐᓂᖓ ᓴᖅᑭᑕᐅᓚᐅᖅᐳᖅ ᒪᒃᑯᒃᑐᑦ ᐅᖃᐅᔾᔨᒋᐊᖅᑎᑦ ᑲᑎᒪᔨᕋᓛᖏᓐᓄᑦ ᐅᐱᒋᔪᒪᓪᓗᒍ ᔮᓱᐊ ᐃᖅᑲᐅᒪᔭᐅᓂᖓ ᐊᒻᒪ ᐃᓕᓴᕆᔪᒪᓪᓗᒍ ᐊᑯᓂᐊᓗᒃ ᐊᒃᑐᐃᓯᒪᓂᕆᔭᖓ ᐃᓕᓐᓂᐊᖃᑎᖏᓐᓄᑦ. ᐃᑲᔪᖅᑐᖅᑕᐅᓪᓗᓂ ᐊᖏᖅᑕᐅᓪᓗᓂᓗ ᖃᑕᙳᑎᖏᓐᓄᑦ, ᓄᓇᕗᑦ ᒐᕙᒪᖓ ᐱᒃᑯᒍᓱᒃᐳᖅ ᐊᑎᕐᒥᓂᒃ ᑲᔪᓯᑎᑦᑎᔪᓐᓇᕋᒥ ᐊᑐᖅᑕᐅᔪᓐᓇᖅᑐᑎᒍᑦ ᐱᔪᒃᓯᓕᖅᑎᑦᑎᔪᒪᓪᓗᓂ ᒪᒃᑯᒃᑐᓂᒃ ᓯᕗᓕᖅᑎᐅᓂᕐᒥᒃ, ᐅᔾᔨᕈᓱᖕᓂᕐᒥᒃ, ᐱᓕᕆᐊᖃᕐᓂᕐᒥᒡᓗ ᓯᓚᐅᑉ ᐊᓯᔾᔨᖅᐸᓪᓕᐊᓂᖓᓄᑦ ᓄᓇᕘᓕᒫᒥ.
ᔮᓱᐊ ᐊᐃᐱᓕ ᖁᒪᖔᐱᒃ ᓯᓚᐅᑉ ᐊᓯᔾᔨᖅᐸᓪᓕᐊᓂᖓᓄᑦ ᐊᔪᙱᓛᖑᓂᕐᒧᑦ ᐊᑐᖅᑕᐅᔪᓐᓇᖅᑐᖅ ᑲᔪᓰᓐᓇᕐᓂᐊᖅᐳᖅ ᑎᓕᐅᕆᓂᕐᒥᒃ ᒪᒃᑯᒃᑐᓂᒃ ᓄᓇᕗᒻᒥᐅᓂᒃ ᐃᓚᐅᖁᓪᓗᒋᑦ ᓯᓚᐅᑉ ᐊᓯᔾᔨᖅᐸᓪᓕᐊᓂᖓᓄᑦ ᖃᓄᐃᓕᐅᕆᐊᕐᓂᕐᒧᑦ ᐊᑐᕐᓗᑎᒃ ᑕᑯᒃᓴᐅᑎᑦᑎᔪᓂᒃ ᐃᓄᐃᑦ ᐱᒻᒪᕆᐅᒋᔭᖏᓐᓂᒃ, ᓄᓇᓕᖕᓂ ᓴᙱᓂᕆᔭᐅᔪᓂᒃ, ᑲᒪᒋᔭᖃᕐᓂᕐᒥᒡᓗ ᓄᓇᒥᒃ.
ᑭᒡᒐᖅᑐᖅᖢᒋᑦ ᓄᓇᕗᑦ ᒐᕙᒪᒃᑯᖏᑦ, ᖁᔭᓕᔪᒪᑦᑎᐊᖅᐸᒃᑲ ᔮᓱᐊ ᖃᑕᙳᑎᖏᑦ ᐅᕙᑦᑎᓐᓂᒃ ᐃᓕᓴᖅᓯᔪᓐᓇᖅᑎᑦᑎᓚᐅᕐᒪᑕ ᕿᒪᒃᓯᒪᔭᖏᓐᓂᒃ ᑕᐃᒪᓐᓇ. ᐃᑲᔪᕐᓂᕆᓚᐅᖅᑕᖏᑦ ᐳᐃᒍᖅᑕᐅᔾᔮᖏᑦᑐᑦ.
ᖁᔭᓐᓇᒦᒃ, ᐅᖃᖅᑏ.
ᔮᓱᐊ ᐱᒻᒪᕆᐅᓪᓗᓂ ᓂᐱᒋᔭᐅᓚᐅᖅᐳᖅ NuCCYAC−ᑯᓐᓄᑦ, ᐃᒃᐱᒍᓱᑦᑎᐊᖅᖢᓂ ᓄᓇᓕᖕᓂ, ᐃᓕᖅᑯᓯᕆᔭᐅᔪᒥᒃ, ᐊᒻᒪ ᐊᕙᑎᒥᒃ ᑲᑎᒪᓂᑕᒫᑦ. ᑲᑎᒪᔨᕋᓛᑦ ᓯᓚᑖᒍᑦ, ᔮᓱᐊ ᑐᑭᖃᑦᑎᐊᖅᑐᓂᒃ ᐃᑲᔪᖃᑦᑕᖅᓯᒪᕗᖅ ᐅᖃᖃᑎᒌᒃᑎᓪᓗᒋᑦ ᓯᓚᐅᑉ ᐊᓯᔾᔨᖅᐸᓪᓕᐊᓂᖓᓄᑦ ᐱᒻᒪᕆᐅᓂᖓᓄᓪᓗ ᐃᓄᐃᑦ ᖃᐅᔨᒪᓂᕆᔭᖏᑦ ᑕᐅᑐᖅᑰᖅᑕᖏᓪᓗ ᐋᖅᑭᒃᓱᐃᕙᓪᓕᐊᓂᐊᕐᓗᓂ ᓄᓇᕗᑦ ᓯᕗᓂᒃᓴᖓᓂᒃ.
ᓄᓇᕗᒻᒥ ᓯᓚᒧᑦ ᐊᔪᙱᓛᖑᕙᒃᑐᓄᑦ ᐊᑐᖅᑕᐅᔪᓐᓇᖅᑐᖅ ᐱᔪᒃᓯᑎᑦᑎᔾᔪᑕᐅᓇᓱᒃᐳᖅ ᓄᓇᕗᒻᒥᐅᓂᒃ ᑕᒫᓂᓕᒫᖅ ᐅᑭᐅᖅᑕᖅᑐᒥ ᐊᕕᒃᓯᒪᓂᕆᔭᐅᔪᒥ ᓯᓚᒧᑦ ᐊᔪᙱᓛᖑᓕᖁᓪᓗᒋᑦ ᓇᖕᒥᓂᖅ ᓄᓇᓕᒋᔭᒥᓂ. ᑕᐃᒪᐃᓐᓂᖓᓄᑦ, ᐃᓚᒋᔭᐅᔪᑦ ᓄᓇᕗᒻᒥ ᓯᓚᐅᑉ ᐊᓯᔾᔨᖅᐸᓪᓕᐊᓂᖓᓄᑦ ᒪᒃᑯᒃᑐᑦ ᐅᖃᐅᔾᔪᐃᒋᐊᕐᑎᑦ ᑲᑎᒪᔨᕋᓛᖏᑦ ᑐᒃᓯᕋᓚᐅᖅᐳᑦ ᐊᑎᖅᑖᒃᑲᓐᓂᖁᔨᓪᓗᑎᒃ ᐃᑲᔫᑎᒃᓴᓂᒃ ᐱᔪᒃᓯᑎᑦᑎᔪᒪᓂᕐᒧᑦ ᖃᓄᐃᓕᐅᕆᐊᕐᓂᕐᒥᒃ ᐅᐱᒋᓗᒍᓗ ᔮᓱᐊ ᐃᖅᑲᐅᒪᔭᖓ ᐊᔪᙱᓛᖑᓂᖓᓄᑦ ᓯᓚᐅᑉ ᐊᓯᔾᔨᖅᐸᓪᓕᐊᓂᖓᓄᑦ ᓄᓇᕗᒻᒥ.
ᔮᓱᐊ ᐊᐃᐱᓕ ᖁᒪᖔᐱᒃ ᓯᓚᐅᑉ ᐊᓯᔾᔨᖅᐸᓪᓕᐊᓂᖓᓄᑦ ᐱᓕᕆᔨᒻᒪᕆᐅᑉ ᐊᑐᕈᓐᓇᖅᑕᖓ
ᔮᓱᐊ ᐊᐃᐱᓕ ᖁᒪᖔᐱᒃ ᓯᓚᒧᑦ ᐊᔪᙱᓛᖑᕙᒃᑐᓄᑦ ᐊᑐᖅᑕᐅᔪᓐᓇᖅᑐᖅ ᐊᑭᖃᙱᖦᖢᓂ ᖃᕆᑕᐅᔭᒃᑯᑦ ᐱᔭᐅᔪᓐᓇᖅᖢᓂ ᐊᑐᖅᑕᐅᔪᓐᓇᖅᑐᖅ ᓴᙱᓂᖅᑖᖅᑎᑦᑎᕙᒃᖢᓂ ᓄᓇᕗᒻᒥᐅᓂᒃ ᓇᑭᙶᕈᓘᔭᖅᑐᓂᒃ ᐱᓕᕆᐊᖃᕈᓐᓇᕐᓂᕐᒥᒃ ᓯᓚᐅᑉ ᐊᓯᔾᔨᖅᐸᓪᓕᐊᓂᖓᓄᑦ ᐱᓕᕆᐊᖃᕐᓂᕐᒥᒃ ᓄᓇᓕᖏᓐᓂ. ᓴᖅᑭᑕᐅᓯᒪᔪᖅ ᑲᑐᔾᔨᖃᑎᖃᖅᖢᑎᒃ ᓄᓇᕗᒻᒥ ᓯᓚᐅᑉ ᐊᓯᔾᔨᖅᐸᓪᓕᐊᓂᖓᓄᑦ ᒪᒃᑯᒃᑐᑦ ᐅᖃᐅᔾᔨᒋᐊᖅᑎᑦ ᑲᑎᒪᔨᕋᓛᖏᓐᓂᒃ, ᐃᑲᔫᑎᒃᓴᑦ ᐊᑐᐃᓐᓇᐅᑎᑦᑎᕗᑦ ᐊᑐᕈᓐᓇᑦᑎᐊᖅᑐᓂᒃ ᐱᓕᕆᔾᔪᑎᓂᒃ ᐊᒻᒪ ᐃᑲᔫᑎᒃᓴᓂᒃ ᐃᑲᔪᖅᓱᐃᔾᔪᑎᒃᓴᓂᒃ ᓄᓇᓕᖕᓂ ᓯᓚᐅᑉ ᐊᓯᔾᔨᖅᐸᓪᓕᐊᓂᖓᓄᑦ ᓯᕗᓕᖅᑎᐅᓂᕐᒧᑦ, ᐅᔾᔨᕈᓱᒃᑎᑦᑎᓂᕐᒧᑦ, ᐊᒻᒪ ᐱᓕᕆᓂᕐᒧᑦ.
ᑭᓇᑐᐃᓐᓇᖅ ᓯᓚᐅᑉ ᐊᓯᔾᔨᖅᐸᓪᓕᐊᓂᖓᓄᑦ ᐊᔪᙱᓛᖑᔪᓐᓇᖅᐳᖅ ᓄᓇᓕᖏᓐᓂ. ᓯᓚᐅᑉ ᐊᓯᔾᔨᐸᓪᓕᐊᓂᖓ ᐱᓪᓗᒍ ᐱᓕᕆᔨᒻᒪᕆᐅᔪᖅ ᓄᓇᓕᕐᒥᐅᑕᐅᔪᖅ ᐱᓕᕆᐊᖃᖅᐸᑦᑐᓂ ᐃᑲᔪᕐᓱᐃᕙᑦᑐᖅ ᐊᒻᒪ ᐱᓇᓱᐊᖅᑎᐅᕙᑦᑐᖅ ᐊᐅᓚᔾᔭᒋᐊᖁᔨᔾᔪᑎᓂᒃ ᐊᒻᒪ ᐊᑐᐊᒐᑦᓴᓂᒃ ᐱᓕᕆᔾᔪᑎᐅᔪᓐᓇᖅᑐᓂᒃ ᓯᓚᐅᑉ ᐊᓯᔾᔨᐸᓪᓕᐊᓂᖓᓄᑦ ᑐᕌᖓᔪᓂᒃ. ᐱᓕᕆᔨᒻᒪᕆᐅᔪᑦ ᐱᔨᑦᓯᕋᖅᐸᑦᑐᑦ ᓄᓇᓕᕐᒥᐅᑕᐅᓗᑎᒃ ᓯᕗᓕᖅᑎᐅᓂᒃᑯᑦ, ᐱᓕᕆᐊᕆᕙᑦᑕᖏᒍᑦ ᐊᔪᕆᑕᐅᔪᒪᓕᕐᓗᑎᒃ, ᐊᒻᒪ ᑭᒡᒐᖅᑐᐃᔨᐅᓗᑎᒃ ᐊᕙᑎᓕᕆᓂᕐᒨᖓᔪᓂᒃ ᐅᔾᔨᕈᓱᒋᐊᖃᔨᔾᔪᑎᓂᒃ ᐊᒻᒪ ᐊᐅᓚᔾᔭᐃᒋᐊᖁᔨᔾᔪᑎᓂᒃ.
ᓯᓚᐅᑉ ᐊᓯᔾᔨᖅᐸᓪᓕᐊᓂᖓᓄᑦ ᐱᓕᕆᔨᒻᒪᕇᑦ ᓯᕗᒡᒍᔾᔨᑦᑎᐊᕐᓗᑎᒃ, ᐅᔾᔨᕈᓱᓕᖅᑎᑦᑎᓗᑎᒃ, ᐱᓕᕆᖃᑎᖃᕐᓗᑎᒡᓗ ᐊᓯᒥᓂᒃ ᓴᙱᒃᑎᒋᐊᖅᑎᑦᑎᔪᒪᓪᓗᑎᒃ ᐊᓐᓇᒍᓐᓇᕐᓂᖏᓐᓂᒃ ᓄᓇᓕᖏᑦ. ᐱᓕᕆᔨᓪᓗᐊᑕᐅᒋᕗᑦ ᓇᓗᓇᐃᖅᓯᓪᓗᑎᒃ ᓄᓇᓕᖏᑦ ᑐᓴᐅᒪᑎᑕᐅᒐᓗᐊᕐᒪᖔᑕ, ᐃᓚᐅᑎᑕᐅᒐᓗᐊᕐᒪᖔᑕ, ᐊᒻᒪ ᐱᕙᒌᔭᖅᓯᒪᓗᑎᒃ ᐊᒃᓱᕈᕐᓇᖅᑐᓂᒃ ᑲᒪᔪᓐᓇᕐᓗᑎᒃ ᓯᓚᐅᑉ ᐊᓯᔾᔨᖅᐸᓪᓕᐊᓂᖓᓄᑦ ᓄᓇᕗᒻᒥ.
ᓯᓚᐅᑉ ᐊᓯᔾᔨᖅᐸᓪᓕᐊᓂᖓᓄᑦ ᐊᐅᓚᔾᔭᐃᒋᐊᕐᓂᖅ ᐱᒋᐊᓲᖑᕗᖅ ᓄᓇᓕᑦᑎᓐᓂ. ᖃᕆᓴᐅᔭᒃᑯᑦ ᐱᓗᒍ ᔮᓱᐊ ᐊᐃᐱᓕ ᖁᒪᖔᐱᒃ ᓯᓚᒧᑦ ᐊᔪᙱᓛᖑᕙᒃᑐᓄᑦ ᐊᑐᖅᑐᒃᓴᑦ ᐅᓪᓗᒥ ᐃᓕᑦᑎᓗᑎᓪᓗ ᖃᓄᖅ ᓯᓚᐅᑉ ᐊᓯᔾᔨᖅᐸᓪᓕᐊᓂᖓᓄᑦ ᐊᔪᙱᓛᖑᔪᓐᓇᕐᒪᖔᖅᐱᑦ ᐅᓪᓗᒥ.