You are here

ᓄᓇᕗᒻᒥ ᐆᒻᒪᖅᑯᑎᓕᕆᔨᑦ

ᕿᒥᕐᕈᔭᒃᓴᐃᑦ

ᓄᓇᕗᑦᑕ ᐊᐅᓚᔪᓐᓇᐅᑎᓅᕈᑎᖏᑦ ᐊᔾᔨᐅᖏᒻᒪᑦ ᑲᓇᑕᒥ ᐊᕕᒃᑐᖅᓯᒪᔪᓂᑦ ᓄᓇᓕᕐᔪᐊᓃᓐᓂᖓᓄᑦ ᓄᓇᓕᖕᓃᓐᓂᖓᓄᓪᓘᓐᓃᑦ ᐊᐅᓚᔪᓐᓇᐅᑎᓅᕈᑎᓕᐅᕐᕕᖃᖏᖦᖢᓂ. ᐅᖃᕋᓱᒃᑐᖅ ᓄᓇᕗᑦ ᑕᑎᖃᕐᒪᑦ ᐊᐅᓪᓚᖅᑎᑕᐅᓲᓂᑦ ᑕᒪᐅᖓ ᐅᖅᓱᐊᓗᖕᒥᑦ ᐊᐅᓚᔪᓐᓇᐅᑎᒋᔭᕆᐊᖃᖅᑕᖏᓐᓄᑦ. 2012-2013-ᒥ ᓄᓇᓕᖕᓂ ᐊᕕᒃᑐᖅᓯᒪᔪᓂᑦ ᐱᑎᑦᑎᓚᐅᖅᑐᑦ 180 ᒥᓕᐊᓐ ᐊᖏᓂᖓ ᐅᖅᓱᐊᓗᒃ. ᐃᓚᐅᓪᓗᓂ 44 ᒥᓕᐊᓐ ᐊᖏᓂᖓ ᐅᖅᓱᐊᓗᒃ ᐊᑐᖅᑕᐅᓲᖅ ᖃᐅᒻᒪᖅᑯᑎᓄᑦ ᐊᐅᓚᔾᔪᑎᖓᓄᑦ, 64 ᒥᓕᐊᓐ ᐊᖏᓂᖓ ᐃᖏᕐᕋᒨᓄᑦ ᐅᖅᓱᐊᓗᒃ ᐃᖏᕐᕋᔾᔪᑎᓄᑦ, ᐊᒻᒪᓗ 63 ᒥᓕᐊᓐ ᐊᖏᓂᖓ ᐅᖅᑰᓴᐅᑎᒧᑦ ᐅᖅᓱᐊᓗᒃ.

ᑕᒪᕐᒥᒃ ᓄᓇᕗᑦ ᐅᖅᓱᐊᓗᖏᑦ ᓂᐅᕕᖅᑕᐅᓲᑦ ᐊᒻᒪᓗ ᐅᒥᐊᕐᔪᐊᒃᑯᑦ ᐊᐅᓪᓚᖅᑎᑕᐅᓪᓗᑎᒃ ᓇᐃᑦᑑᑎᓪᓗᒍ ᐊᐅᔭᒃᑯᑦ ᐊᒻᒪᓗ ᑐᖅᑯᖅᑕᐅᓪᓗᑎᒃ ᐅᖅᓱᐊᓗᖃᐅᑎᖏᓐᓄᑦ ᐊᑐᓂ ᓄᓇᓖᑦ. ᓄᓇᓕᖕᓂ ᒐᕙᒪᒃᑯᓐᓂᓗ ᐱᔨᑦᑎᕋᖅᑎᒃᑯᑦ, ᐊᑐᖅᖢᒍ ᐅᖅᓱᐊᓗᓕᕆᔨᒃᑯᑦ (PPD), ᑲᒪᒋᔭᖃᖅᑐᑦ ᓂᐅᕕᕋᓱᖕᓂᕐᒥᑦ, ᐊᐅᓪᓚᖅᑎᑕᐅᓂᕐᒥᑦ, ᐊᒻᒪᓗ ᑐᓂᓯᓂᕐᒥᑦ ᑕᒪᐃᓐᓂᒃ ᐅᖅᓱᐊᓗᖕᒥᑦ. ᐃᖃᓗᖕᓂ ᐃᖃᓗᒃᑑᑦᑎᐊᒥᓗ, ᑐᓂᔭᐅᓂᖅ ᑲᒪᒋᔭᐅᔪᖅ ᓇᖕᒥᓂᖃᖅᑐᓄᑦ ᑯᐊᐳᕇᓴᓄᑦ, ᐊᓯᖏᓪᓕ ᑕᐃᒃᑯᐊ ᓄᓇᓖᑦ ᐅᖅᓱᐊᓗᓕᕆᔨᒃᑯᑦ ᐊᑐᓲᑦ ᓄᓇᓕᖕᓂ ᑳᓐᑐᐊᒃᓯᖃᑦᑕᖅᑐᓂᒃ.

ᖃᐅᒻᒪᖅᑯᑎ ᓄᓇᕗᒻᒥ ᓴᖅᑭᑕᐅᓲᖅ ᐅᖅᓱᐊᓗᖃᕐᕕᒃᑯᑦ. ᖁᓪᓕᖅ ᐅᖅᓱᐊᓗᓕᕆᔨᒃᑯᑦ (QEC) ᑲᒪᒋᔭᖃᖅᑐᑦ ᐊᐅᓚᑕᐅᓂᖓᓂᑦ ᖃᐅᒻᒪᖅᑯᑎ ᓄᓇᓕᖕᓂ ᐊᕕᒃᑐᖅᓯᒪᔪᒥᑦ, ᐊᐅᓚᑦᑎᓪᓗᑎᒃ 26-ᓂᑦ ᐃᓄᑑᓪᓗᑎᒃ-ᓇᖏᖅᑐᑦ ᐅᖅᓱᐊᓗᖃᐅᑎᓂᑦ ᑖᒃᑯᓄᖓ 25 ᓄᓇᓕᖕᓄᑦ (ᒪᕐᕉᒃ ᐅᖅᓱᐊᓗᖃᐅᑎᖃᕐᕖᒃ ᐃᖃᓗᖕᓂ). ᐊᑕᐅᓯᖅ ᓄᓇᓕᒃ ᓄᓇᕗᒻᒥ ᓇᖕᒥᓂᖅ ᐱᖃᖅᑐᑦ ᖃᐅᒻᒪᖅᑯᑎᒧᑦ ᐊᐅᓚᔾᔪᑎᒥᒃ ᐊᒻᒪᓗ   ᓄᐊᑦᑎᕙᓪᓕᐊᔾᔪᑎᒥᒃ. ᐱᑕᖃᖖᒋᑦᑐᖅ ᑭᖑᕝᕕᖅᓯᔪᒃᓴᓂᑦ.

ᐃᓚᒋᐊᕐᓗᒍ ᖁᓪᓕᖅ ᐅᖅᓱᐊᓗᓕᕆᔨᒃᑯᑦ 26-ᖑᔪᑦ ᐅᖅᓱᐊᓗᖕᒧᑦ ᐊᐅᓚᑦᑎᔾᔪᑏᑦ, ᒥᑭᑦᑐᒥᑦ ᐊᓯᔾᔨᖅᐸᓪᓕᐊᔪᓐᓇᖅᑐᒥᒃ ᐆᒻᒪᖁᑎᒧᑦ ᐊᐅᓚᑦᑎᔾᔪᑎᓕᒃ ᓄᓇᕗᒻᒥ. ᑖᓐᓇ ᐃᓚᐅᑎᑦᑎᔪᖅ 3 kW ᖃᐅᒻᒪᖅᑯᑎᒧᑦ ᐊᐅᓚᑦᑎᔾᔪᑎᒥᑦ ᐅᑭᐅᖅᑕᖅᑐᒥ ᓯᓚᑦᑐᖅᓴᕐᕕᖓᓂ ᐃᖃᓗᖕᓂ, ᓴᖅᑭᑕᐅᓂᐊᕐᒥᔪᖅ ᐃᓕᔭᐅᓗᓂ 10 kW ᖃᐅᒻᒪᖅᑯᑎᒧᑦ ᐊᐅᓚᑦᑎᔾᔪᑎ ᐊᕐᕕᐊᓂ ᐱᖖᒍᐊᕐᕕᖓᓂ, ᐊᒻᒪᓗ ᓴᖅᑭᑕᐅᓂᐊᕐᒥᔪᖅ ᐃᓕᔭᐅᓗᓂ 4 kW ᖃᐅᒻᒪᖅᑯᑎᒧᑦ ᐊᐅᓚᑦᑎᔾᔪᑎ ᓄᓇᓕᖓᓂ ᖁᐊᒃᑯᕕᐊᓂ ᑰᒑᕐᔪᖕᒥ. ᐊᓯᖏᑦ ᐊᑐᖅᑕᐅᔪᓐᓇᖅᑐᑦ ᓄᑖᖑᕆᐊᖅᑎᑦᑎᓂᕐᒧᑦ ᖃᐅᒻᒪᖅᑯᑎᒥᑦ ᐃᓚᐅᑎᑦᑎᔪᑦ ᐊᓄᕌᕈᑕᐅᔪᓐᓇᖅᑐᓂᑦ ᐆᒻᒪᖅᑯᑎᒃᓴᐅᔪᓐᓇᖅᑐᓂᑦ ᑭᖖᒐᕐᓂ, ᐊᒻᒪᓗ ᖃᐅᒻᒪᖅᑯᑎᓄᑦ ᐊᐅᓚᐅᑎᖃᕐᕕᖕᓂ ᓯᓚᑖᓂ ᐃᖃᓗᐃᑦ.

ᑕᐃᒪᐃᒃᑲᓗᐊᖅᑎᓪᓗᒍ ᒫᓐᓇ ᐱᖃᖖᒋᓗᐊᕐᓂᖅ ᓇᖕᒥᓂᖅᓱᖅᑐᖅ ᖃᐅᒻᒪᖅᑯᑎᓕᐅᕆᕝᕕᒃ, ᓯᕗᓂᒃᓴᕗᑦ ᐱᓯᒪᔪᑦ ᐱᑕᖃᑦᑎᐊᕈᓐᓇᖅᑐᒥᑦ ᑕᒪᐃᓐᓄᑦ ᑲᑎᖖᒐᔪᓄᑦ ᐊᒻᒪᓗ ᓄᑖᖑᕆᐊᕈᓐᓇᖅᑐᓄᑦ ᖃᐅᒻᒪᖅᑯᑎᓄᑦ ᐱᔪᓐᓇᖅᑐᑦ ᓄᓇᕗᒻᒥ. ᖃᐅᔨᔭᐅᓯᒪᔪᑦ ᐅᒻᓱᐊᓗᐃᑦ ᐊᒻᒪᓗ ᐅᖅᓱᖃᐅᑎᖃᕐᕖᑦ, ᓲᕐᓗ, ᓇᓚᐅᑦᑖᖅᑕᐅᓯᒪᔪᑦ ᑲᑎᖦᖢᒋᑦ 2 ᐱᓕᐊᓐ ᐴᖃᐅᑏᑦ ᐅᖅᓱᐊᓗᖕᒧᑦ ᐊᒻᒪᓗ 27 ᑐᐃᓕᐊᓐ ᐃᓯᒐᒃᑎᒍᑦ ᐅᖅᓱᑦᑎᐊᕙᐃᑦ. ᐊᑐᖅᑕᐅᖔᕈᓐᓇᕐᒥᔪᑎᒍᑦ, ᓄᓇᕗᑦ ᐱᖃᕐᒪᑦ ᐅᖅᓱᐊᓗᖕᒧᑦ ᐊᐅᓚᑦᑎᔾᔪᑎᓂᑦ ᐱᕕᒋᔭᐅᔪᓐᓇᖅᑐᓂᑦ. Hᐋᒻᒪᓚᒃᑯᖏᑦ ᐃᒡᓗᓕᒑᕐᔪᖕᒥ, ᐆᒃᑑᑎᒋᓗᒍ, ᐊᕐᕌᒍᑕᒫᑦ ᐅᖅᓱᐊᓗᖕᒧᑦ ᐊᐅᓚᑦᑎᔾᔪᑎᒥᑦ ᐱᖃᕐᒪᑦ 1158 kWh/kW, ᐊᖏᓂᖅᓴᐅᓪᓗᓂ ᖃᓪᓗᓈᓃᑦᑐᓄᑦ Hᐋᒻᒪᓚᒃᑯᖏᓐᓄᑦ ᐅᑯᓄᖓ ᕕᒃᑑᕆᔭ, ᐳᐃᑎᔅ ᑲᓚᒻᐱᐊ, ᐊᒻᒪᓗ ᓴᐃᓐᑦ ᕚᓐᔅ, ᓂᐅᕙᐅᓐᓛᓐ.

 

ᐊᑭᖏᑦ ᖃᐅᒻᒪᖅᑯᑏᑦ

ᐸᓴᒍᓱᒃᑐᖃᕋᔭᕐᒪᑦ, ᐊᐅᓪᓚᖅᑎᑦᑎᓂᖅ ᐅᖅᓱᐊᓗᖕᒥᑦ ᐃᓗᐊᓄᑦ ᐊᒻᒪᓗ ᓄᓇᓕᖕᓄᑦ ᐊᕕᒃᑐᖅᓯᒪᔪᓄᑦ ᐊᑭᑐᐊᔪᐊᓘᓇᓱᒋᔭᐅᓗᓂ. 2012-2013-ᒥ, ᐆᒃᑑᑎᒋᓗᒍ, ᓄᓇᕗᒻᒥ ᒐᕙᒪᒃᑯᑦ (ᐊᑐᖅᖢᒍ ᐅᖅᓱᐊᓗᓕᕆᔨᒃᑯᑦ) ᑎᑭᑎᑦᑎᓚᐅᖅᑐᑦ. $195 ᒥᓕᐊᓐ ᐊᑭᖃᓪᓗᐊᖅᑐᒥᑦ ᐅᖅᓱᐊᓗᖕᒥᑦ. ᑖᓐᓇ ᓂᐅᕕᖅᑕᐅᑎᓪᓗᒍ ᐅᖅᓱᐊᓗᒃ ᐊᒻᒪᓗ ᐊᓯᖏᑦ ᑕᒪᕐᒥᒃ ᐅᖅᓱᐊᓗᓕᕆᔨᒃᑯᑦ ᐊᐅᓚᑕᖏᑦ ᐊᑭᓕᕆᐊᓖᑦ ᐊᑭᓕᖅᑕᐅᖃᑦᑕᖅᑐᑦ ᐅᖅᓱᐊᓗᓕᕆᔨᒃᑯᓐᓄᑦ ᑐᓂᔭᐅᓯᒪᔪᓄᑦ ᑮᓇᐅᔭᓄᑦ ᑎᑭᐅᑎᔪᓐᓇᑐᐃᓐᓇᕐᑐᒧᑦ $200 ᒥᓕᐊᓐᓄᑦ.

ᐅᖅᓱᐊᓗᒃ ᑎᑭᑎᑕᐅᒃᐸᑦ, ᐅᖅᓱᐊᓗᓕᕆᔨᒃᑯᑦ ᓂᐅᕕᖅᑎᑦᑎᓕᕐᓗᑎᒃ ᐊᔾᔨᒌᖏᑦᑐᓄᑦ ᓂᐅᕕᕈᒪᔪᓄᑦ (ᑕᐃᑯᖔᑦᑎᐊᕐᓗᒍ ᐅᕝᕙᓘᓐᓃᑦ ᑳᓐᑐᐊᒃᓯᓯᒪᔪᓄᑦ). ᐊᑕᐅᓯᖅ ᓂᐅᕕᓪᓗᐊᑕᓲᖅ ᖁᓪᓕᖅ ᖃᐅᒻᒪᖅᑯᑎᓕᕆᔨᒃᑯᑦ. 2012-2013-ᒥ, ᖁᓪᓕᖅ ᖃᐅᒻᒪᖅᑯᑎᓕᕆᔨᒃᑯᑦ ᓂᐅᕕᓚᐅᖅᑐᑦ $42 ᒥᓕᐊᓐᒧᑦ ᐅᖅᑰᓴᐅᒻᒧᑦ ᖃᐅᒻᒪᖅᑯᑎᒃᓴᒧᓪᓗ. ᑲᑎᒃᑲᓐᓂᕐᓗᒋᑦ ᓄᓇᓕᖕᓂ ᐊᕕᒃᑐᖅᓯᒪᔪᓂᑦ ᑯᐊᐳᕆᓴᑦ, ᓄᓇᕗᒻᒥ ᒐᕙᒪᒃᑯᖏᓪᓗ ᐊᑐᖃᑦᑕᖅᑐᑦ ᑮᓇᐅᔭᓂᑦ ᖃᐅᒻᒪᖅᑯᑎᓄᑦ ᐅᖅᑰᓴᐅᑎᓄᓪᓗ ᒐᕙᒪᒃᑯᑦ ᓇᖕᒥᓂᖓᓄᑦ-ᐃᒡᓗᓄᑦ. 2012-2013-ᒥ ᓄᓇᕗᒻᒥ ᒐᕙᒪᒃᑯᖏᑦ ᐊᑐᓚᐅᖅᑐᑦ 21.6 ᒥᓕᐊᓐᓂᒃ ᖃᐅᒻᒪᖅᑯᑎᒧᑦ, ᐊᒻᒪᓗ ᐃᓚᒃᑲᓐᓂᕐᖢᓂ $6.7 ᒥᓕᐊᓐᓂᒃ ᐅᖅᓱᐊᓗᖕᒧᑦ ᐅᖅᓱᐊᓗᓕᕆᔨᒃᑯᓐᓂᑦ.

ᐃᓚᒃᑲᓐᓂᕐᓗᒍ ᖃᐅᒻᒪᖅᑯᑎᓄᑦ ᐊᑐᕐᓂᖅ, ᓄᓇᕗᒻᒥ ᒐᕙᒪᒃᑯᖏᑦ ᐃᑲᔪᖅᓱᐃᔪᑦ ᐅᓄᖅᑐᓂᑦ ᐊᔾᔨᒌᖏᑦᑐᓂᑦ ᖃᐅᒻᒪᖅᑯᑎᓄᑦ ᐃᑲᔫᓯᐊᕈᑎᓄᑦ. ᐃᓚᖏᑦ ᑖᒃᑯᐊ ᑕᑯᒃᓴᐅᑦᑎᐊᖅᑐᑦ ᓲᕐᓗ ᖃᐅᒻᒪᖅᑯᑎᓄᑦ ᐃᑲᔫᓯᐊᒃᓴᖅ ᐱᓕᕆᐊᒃᓴᖅ, ᐊᒻᒪᓗ ᑭᒃᑯᑐᐃᓐᓇᕐᓄᑦ ᐃᒡᓗᒋᔭᐅᔪᓐᓇᖅᑐᓄᑦ ᐃᑲᔪᖅᑕᐅᔾᔪᑎᒧᑦ ᐱᓕᕆᐊᒃᓴᕐᒥ. ᐊᓯᖏᑦ ᐃᔨᖅᓯᒪᔪᑦ ᐃᓗᐊᓂ ᐊᓯᖏᓐᓂᑦ ᐱᓕᕆᐊᒃᓴᓂᑦ ᓲᕐᓗ ᖃᐅᒻᒪᖅᑯᑎᒧᑦ ᐅᖅᑰᓴᐅᑎᒧᓪᓗ ᐊᑭᓕᐅᑎᑦ ᑕᐃᑲᖖᒐᑦ ᓂᖃᐃᓱᖅᑐᓕᕆᔨᒃᑯᓐᓂᑦ. ᖃᐅᒻᒪᖅᑯᑎᓄᑦ ᐃᑲᔫᓯᐊᑦ ᓇᓚᐅᑦᑖᖅᑕᐅᓯᒪᔪᑦ ᐊᑭᖏᑦ ᓄᓇᕗᒻᒥ ᒐᕙᒪᒃᑯᓐᓄᑦ ᐃᒪᓐᓇᐅᓪᓗᐊᖅᑐᑦ $30 ᒥᓕᐊᓐ ᐊᕐᕌᒍᒧᑦ.

ᑲᑎᖦᖢᒋᑦ, ᖃᐅᒻᒪᖅᑯᑎᓄᑦ ᐊᑭᓕᒐᒃᓴᑦ ᓄᓇᕗᒻᒥ ᒐᕙᒪᒃᑯᖓᓄᑦ ᐊᒻᒪᓗ ᑕᒪᐃᓐᓄᑦ ᐃᓚᒋᔭᖏᓐᓄᑦ ᐱᓕᕆᖃᑎᒋᔭᖏᓐᓄᑦ ᓇᓚᐅᑦᑖᖅᑕᐅᓯᒪᔪᑦ $338 ᒥᓕᐊᓐ ᐊᕐᕌᒍᓄᑦ 2012/2013 ᐊᕐᕌᒍᖓᓂ. ᐱᔾᔪᑎᒋᓪᓗᒍ ᓄᓇᕗᒻᒥ ᒐᕙᒪᒃᑯᑦ ᑲᔪᓯᖕᒪᑕ ᐊᑐᕐᓂᕐᒥᑦ ᑎᑭᑎᑕᐅᖃᑦᑕᕐᑐᓂᑦ ᐅᖅᓱᐊᓗᖕᓂᑦ, ᑖᒃᑯᐊ ᐊᑮᑦ ᖁᑦᑎᒃᓯᒋᐊᕋᔭᖖᒍᐊᖅᑐᑦ ᓄᓇᓖᑦ ᐊᕕᒃᑐᖅᓯᒪᔪᑦ ᐊᑐᕆᐊᖃᕋᔭᕐᒪᑕ ᐊᔾᔨᒌᖏᑦᑑᓯᒪᔪᓂᑦ ᓄᓇᕐᔪᐊᕐᒥ ᖃᐅᒻᒪᖅᑯᑎᓄᑦ ᑮᓇᐅᔭᓕᐅᕋᓱᒃᑎᓄᑦ ᐊᒻᒪᓗ ᑕᑯᔭᐅᖏᑦᑐᓄᑦ ᓱᕋᒍᑕᐅᕙᒃᑐᓄᑦ. ᑐᑭᓕᐅᕈᑎᑦᑎᐊᕙᐅᔪᖅ ᑖᔅᓱᒧᖓ ᐊᕐᕌᒍᖓᓂ 2008, ᓄᓇᕐᔪᐊᒥ ᖃᐅᒻᒪᖅᑯᑎᓄᑦ ᖁᕝᕙᕆᐊᖅᑎᓪᓗᒋᑦ ᐊᑐᕆᐅᖅᑐᒧᑦ ᖁᕝᕙᓯᒋᐊᕐᖢᓂ $147 ᐊᑕᐅᓯᖅ ᖃᑦᑕᐅᔭᕐᔪᐊᒧᑦ ᐅᖅᓱᐊᓗᖕᒧᑦ. ᑕᐃᒪᐃᓚᐅᖅᑎᓪᓗᒍ, ᖁᓪᓕᖅ ᖃᐅᒻᒪᖅᑯᑎᓕᕆᔨᒃᑯᑦ ᒪᕐᕈᐃᓪᓗᐊᕐᓗᒍ ᐱᔭᕆᐊᖃᖅᑎᑕᐅᓚᐅᖅᑐᑦ ᐅᖅᓱᐊᓗᖕᒧᑦ ᐋᖅᑭᒃᓯᒪᔾᔪᑎᒧᑦ ᐊᐅᓚᑦᑎᕕᖕᒥ ᐱᒋᐊᕐᖢᓂ 6.40 ᓴᕕᕋᔭᑦ/kWh ᐅᕗᖓ 12.52 ᓴᕕᕋᔭᑦ/kWh.

ᑖᓐᓇ ᑕᐃᒪᐃᑦᑐᖅ ᓴᖅᑭᑎᑦᑎᖕᒪᑦ ᐅᓄᖅᑐᓂᑦ ᐊᒃᓱᕈᕐᓇᖅᑐᓂᑦ ᓄᓇᕗᒻᒧᑦ ᑲᔪᓯᑎᓪᓗᒍ. ᖃᐅᒻᒪᖅᑯᑎᒧᑦ ᐊᑭᓕᕆᐊᓖᑦ ᐃᓱᒪᖅᓲᑕᐅᔪᓐᓇᖏᑎᓪᓗᒋᑦ ᑮᓇᐅᔭᖅᑐᕈᑎᒃᓴᓂᑦ, ᑕᐃᒪᐃᓐᓂᖓᓄᑦ, ᖃᓄᐃᑦᑐᑐᐃᓐᓇᑦ ᐊᑭᑦᑐᕆᐊᖅᑐᑦ ᖃᐅᒻᒪᖅᑯᑎᐅᑉ ᐊᑭᖏᓐᓄᑦ ᐊᒃᑑᑎᖃᑲᐅᑎᒋᓲᖅ ᑮᓇᐅᔭᓄᑦ ᐃᑲᔫᑕᐅᔪᓄᑦ ᓯᕗᓪᓕᐅᔾᔭᐅᔭᕆᐊᓕᖕᓄᑦ ᓲᕐᓗ ᐋᓐᓂᐊᖃᕐᓇᖖᖏᑦᑐᓕᕆᓂᖅ, ᐃᓕᓐᓂᐊᕐᓂᓕᕆᓂᖅ, ᐊᒻᒪᓗ ᐃᒡᓗᖃᖅᑐᓕᕆᓂᕐᒥ.

 

ᐱᓕᕆᐊᒃᓴᑦ ᐊᒻᒪ ᐱᔾᔪᑎᑦ

ᐊᒥᓱᐊᓘᕗᑦ ᐆᒻᒪᖅᑯᒻᒥᒃ ᐊᑐᓗᐊᖅᑕᐃᓕᒪᓂᐊᕐᓗᓂ ᐱᕚᓪᓕᖅᓯᒪᔾᔪᑕᐅᔪᓐᓇᖅᑐᑦ. ᓄᓇᕗᒻᒥᐅᑦ ᐅᑯᓂᖓ
ᓴᖅᑭᔮᓕᖅᑎᑦᑎᔪᓐᓇᖅᐳᑦ ᒥᑭᒡᓕᒋᐊᖅᑎᑦᑎᓂᐊᕈᑎᒃ ᐆᒻᒪᖅᑯᒻᒥᒃ ᐊᑐᖅᐸᒃᑕᒥᓂᒃ:

  • ᑮᓇᐅᔭᓂᒃ ᐊᑐᙱᓐᓂᖅᓴᐅᓂᖅ – ᒥᑭᒡᓕᒋᐊᖅᑎᑦᑐᓐᓇᖅᑕᑎᑦ ᐊᑭᓕᖅᓱᕆᐊᖃᖅᐸᒃᑕᑎᑦ ᐅᖅᑰᓴᐅᑎᖕᓄᑦ, ᐆᒻᒪᖅᑯᒻᒧᑦ ᐅᖅᓱᐊᓗᖕᒧᓪᓗ ᐊᑭᓕᖅᓱᕆᐊᖃᖅᐸᒃᑕᑎᑦ. ᑮᓇᐅᔭᓂᒃᑕᐅᖅ ᐊᑐᙱᓐᓂᖅᓴᐅᔪᓐᓇᕋᔭᕐᒥᔪᑎᑦ ᑲᒪᒋᔭᐅᓂᖏᓐᓄᑦ ᐊᓯᔾᔨᖅᑕᐅᓂᖏᓐᓄᓪᓗ ᐆᒻᒪᖅᑯᑎᑐᖅᐸᓪᓕᐊᕙᒃᑐᑦ ᐱᖁᑏᑦ ᐊᑐᙱᓐᓂᖅᓴᐅᒍᕕᒋᑦ.
  • ᓄᓇ ᐊᒃᑐᖅᑕᐅᙱᓐᓂᖅᓴᐅᓇᔭᖅᑐᖅ ᐊᕙᑎᕗᓪᓗ ᖃᓄᐃᙱᑦᑎᐊᕐᓂᖅᓴᐅᓗᓂ – ᐆᒻᒪᖅᑯᑦ ᐊᑐᖅᑕᐅᙱᓐᓂᖅᓴᐅᒑᖓᑦ ᓴᖅᑭᑎᑦᑎᓕᖅᐸᒃᑐᖅ ᓱᕈᖅᓴᐃᙱᓐᓂᖅᓴᐅᓂᕐᒥᒃ. ᐅᓄᙱᓐᓂᖅᓴᐃᑦ ᓱᕈᖅᓴᐃᔪᑦ ᐳᔫᖅᑐᑦ ᐊᓯᖏᓪᓗ ᒥᑭᑦᑑᑎᒻᒪᕆᑯᓗᐃᑦ ᓯᓚᒧᐊᖅᑕᐅᕙᓪᓕᐊᕙᒃᐳᑦ ᓲᖃᐃᒻᒪ ᓂᕐᔪᑎᑐᖃᕕᓂᕐᓂᙶᖅᑐᑦ ᐅᖅᓱᐊᓗᐃᑦ ᒥᑭᓐᓂᖅᓴᐃᑦ ᐃᑯᒪᑎᑕᐅᔭᕆᐊᖃᕋᔭᖅᑐᑦ ᐆᒻᒪᖅᑯᓯᐅᕈᑕᐅᓂᐊᕐᓗᑎᒃ. ᓄᓇᕗᑦ, ᐃᒪᖅᐳᑦ ᓯᓚᕗᓪᓗ ᓴᓗᒪᓂᖅᓴᐅᓇᔭᖅᑐᖅ ᖃᓄᐃᙱᑦᑎᐊᕐᓂᖅᓴᐅᓗᓂᓗ.
  • ᓯᓚᐅᑉ ᐊᓯᔾᔨᖅᐸᓪᓕᐊᓂᖓᓄᑦ – ᐆᒻᒪᖅᑯᒻᒥᒃ ᐊᑐᕐᓂᖅᓴᐅᓕᕌᖓᑦᑕ, ᐅᖅᓱᐊᓗᖕᒥᒃ ᓂᕐᔪᑎᑐᖃᕕᓂᙶᖅᑐᒥᒃ ᐊᑐᕐᓂᖅᓴᐅᓕᖅᐸᒃᑐᒍᑦ ᐃᑯᐊᓚᑎᑉᐸᓪᓕᐊᓪᓗᒍ. ᓂᕐᔪᑎᑐᖃᕕᓂᙶᖅᑐᑦ ᐅᖅᓱᐊᓗᐃᑦ ᐃᑲᔪᖅᐸᒃᐳᑦ ᓄᓇᕐᔪᐊᓕᒫᒥ ᓯᓚᐅᑉ ᐊᓯᔾᔨᖅᐸᓪᓕᐊᓂᖓᓄᑦ, ᑕᒪᓐᓇᓗ ᐊᒃᑐᖅᓯᓯᑲᐅᑎᒋᓯᒪᓪᓗᓂ ᓄᓇᕗᒻᒥᐅᓂᒃ. ᑕᒪᑦᑕᑦᑎᐊᖅ ᐱᓕᕆᕝᕕᖃᕈᓐᓇᖅᑐᐃᓐᓇᐅᔪᒍᑦ ᐊᑐᓗᐊᙱᓐᓂᖅᓴᐅᓗᑕ ᐆᒻᒪᖅᑯᒻᒥᒃ ᒥᑭᒡᓕᒋᐊᖅᑎᑦᑎᓇᓱᒡᓗᑕ ᐃᓯᐊᕿᑎᑕᐅᕙᒃᑐᓂᒃ ᓯᓚᒥ ᐊᓯᔾᔨᖅᓯᕙᓪᓕᐊᑎᑦᑎᕙᒃᑐᓂᒃ .
  • ᐱᐅᓂᖅᓴᐅᓇᔭᖅᑐᖅ ᑮᓇᐅᔭᓕᐅᕈᓐᓇᕐᓂᖅ – ᐆᒻᒪᖅᑯᒻᒥᒃ ᐊᑐᙱᓐᓂᖅᓴᐅᓂᖅ ᓴᖅᑭᑎᑦᑎᓕᖅᐸᒃᐳᖅ ᑮᓇᐅᔭᓂᒃ ᐊᑐᙱᓐᓂᖅᓴᐅᓂᕐᒥᒃ ᑖᒃᑯᐊᓗ ᐊᓯᖔᖏᓐᓄᑦ ᐊᑐᖅᑕᐅᔪᓐᓇᓕᖅᐸᒃᖢᑎᒃ ᓴᖅᑭᑎᑦᑎᓕᕋᔭᖅᖢᑎᒡᓗ ᐃᖅᑲᓇᐃᔭᕐᓂᕐᒥᒃ ᐊᖏᒡᓕᒋᐊᖅᑎᑦᑎᓂᕐᒥᒃ. ᒐᕙᒪᒃᑯᑦ ᐊᑐᙱᓐᓂᖅᓴᐅᒑᖓᑕ ᐆᒻᒪᖅᑯᑎᓄᑦ, ᐆᒻᒪᖅᑯᑎᒧᓪᓗ ᐃᑲᔪᖅᑐᐃᓂᕐᒥᒃ, ᑮᓇᐅᔭᖅᑕᖃᕐᓂᖅᓴᐅᓕᖅᐸᒃᐳᖅ ᐊᑐᖅᑕᐅᔪᓐᓇᓕᖅᑐᓂᒃ ᐊᓯᖏᓐᓄᑦ ᐱᓕᕆᐊᒃᓴᓄᑦ ᐱᔨᑦᑎᕋᕐᓂᕆᔭᐅᕙᒃᑐᓄᓪᓗ.
  • ᐃᖅᑲᓇᐃᔭᕐᓂᕐᒧᑦ ᐱᕕᒃᓴᐃᑦ – ᐊᑕᙱᓪᓗᓂ, ᐃᖅᑲᓇᐃᔮᒃᓴᐃᑦ ᐅᓄᖅᓯᒋᐊᕋᔭᖅᐳᑦ, ᐱᓗᐊᙳᐊᖅᖢᓂ ᐃᒡᓗᓕᐅᕐᓂᕐᒧᑦ, ᑭᓱᓕᐅᕐᓂᕐᒧᑦ ᖃᐅᔨᓴᖅᑐᓕᕆᓂᕐᒧᓪᓗ. ᓱᕐᓗ ᐃᒪᓐᓇ, ᓴᓇᒍᑦᑕ ᓯᓚᒧᐊᖅᑎᕆᕙᓪᓕᐊᖏᓐᓂᖅᓴᐅᔪᓂᒃ ᐊᑐᖅᑕᖃᓗᐊᙱᓐᓂᖅᓴᐅᔪᓂᒡᓗ ᐃᒡᓗᕐᔪᐊᓂᒃ, ᑎᓕᐅᕆᓂᖅᓴᐅᓇᔭᖅᑐᒍᑦ ᓯᓚᒧᐊᖅᑎᕆᙱᓐᓂᖅᓴᐅᔪᓂᒃ ᐃᖅᑲᓇᐃᔮᓂᑦ ᓴᖅᑭᑎᑦᑎᓂᕐᒥᒃ.
  • ᒥᑭᓐᓂᖅᓴᐅᓕᕋᔭᖅᑐᖅ ᑲᒪᔭᕆᐊᖃᖅᐸᖕᓂᖅ ᓇᑉᐸᖅᑎᒃᓯᒪᔪᓂᒃ – ᓄᓇᕗᒻᒥᐅᑦ ᐅᓄᖅᓯᕙᓪᓕᐊᑐᐃᓐᓇᖅᑎᓪᓗᒋᑦ, ᐊᖏᓂᖅᓴᒥᒃ ᐊᑐᖅᑕᐅᔪᒪᓂᖅᓴᐅᓕᖅᐸᒃᐳᑦ ᓴᖅᑭᑎᓯᒪᕙᒌᖅᑕᕗᑦ ᐆᒻᒪᖅᑯᒻᒧᑦ ᓇᑉᐸᖅᑎᖅᓯᒪᔭᕗᑦ. ᐊᑐᖅᑕᐅᔪᒪᓂᖅᓴᐅᓕᕌᖓᑕ ᓇᑉᐸᖅᑎᖅᑕᐅᓯᒪᔪᑦ, ᑲᒪᒋᔭᐅᓂᖅᓴᐅᓕᕆᐊᖃᖅᐸᒃᐳᑦ ᐊᐅᓚᑏᓐᓇᕈᒪᓪᓗᒋᑦ. ᑭᓯᐊᓂᑦᑕᐅᖅ, ᑭᒃᑯᑐᐃᓐᓇᑦᑎᐊᑦ ᐱᓕᕆᐊᖃᖅᐸᑕ ᐆᒻᒪᖅᑯᒻᒥᒃ ᐊᑐᓗᐊᖅᑕᐃᓕᒪᕙᒡᓗᑎᒃ, ᑲᒪᒋᔭᕆᐊᖃᖃᑦᑕᕋᔭᙱᓐᓂᖅᓴᐅᔪᑦ ᑕᒪᒃᑯᐊ ᐆᒻᒪᖅᑯᓯᐅᕈᑕᐅᕙᒃᑐᑦ.
  • ᒥᑭᒡᓕᒋᐊᖅᑎᑦᑎᓇᔭᖅᑐᖅ ᐊᑐᕆᐊᖃᕐᓂᕐᒥᒃ ᐊᑭᑐᔪᓂᒃ ᓄᑖᓂᒃ ᐆᒻᒪᖅᑯᓯᐅᕐᕕᖕᓂᒃ – ᓄᓇᕗᒻᒥᐅᑦ ᐊᑐᖅᐸᓪᓕᐊᑐᐃᓐᓇᖅᑎᓪᓗᒋᑦ ᐆᒻᒪᖅᑯᒻᒥᒃ, ᐊᖏᒡᓕᕙᓪᓕᐊᑎᑦᑎᔭᕆᐊᖃᖅᑐᒍᑦ ᐆᒻᒪᖅᑯᑎᒧᑦ ᐊᑐᖅᐸᒃᑕᑦᑎᓐᓂᑦ ᓇᑉᐸᖅᑎᖅᓯᒪᔪᓂᒃ ᐊᖑᒻᒪᑎᔪᒪᓂᕐᒧᑦ ᐊᖏᒡᓕᕙᓪᓕᐊᑐᐃᓐᓇᖅᑐᒧᑦ ᐱᔭᐅᔪᒪᕙᒃᑐᒧᑦ. ᑕᒪᓐᓇ ᐊᑭᑐᔪᒻᒪᕆᐊᓘᕗᖅ ᐊᖏᓪᓕᒋᐊᖅᑎᑦᑎᓇᔭᖅᖢᓂᓗ ᐆᒻᒪᖅᑯᒻᒧᑦ ᓄᓇᕗᒻᒥᐅᑦ ᐊᑭᓕᖅᓱᕆᐊᖃᖅᐸᒃᑕᖏᓐᓂᒃ. ᐊᑐᙱᓐᓂᖅᓴᐅᙱᓐᓇᖅᐸᓪᓕᐊᒍᑦᑕ, ᐊᑯᓂᐅᓂᖅᓴᖅ ᐊᑐᕈᓐᓇᕋᔭᖅᑐᒍᑦ ᓴᖅᑭᑎᑕᐅᓯᒪᕙᒌᖅᑐᓂᒃ ᓇᑉᐸᖅᑎᖅᑕᐅᓯᒪᔪᓂᒃ ᐊᖏᒡᓕᑎᒋᐊᕆᐊᖃᙱᓪᓗᒋᑦ.

 

ᓇᖕᒥᓂᖃᕐᕕᖕᓅᖓᔪᑦ

ᓄᓇᕗᑦ ᒐᕙᒪᖓ ᒫᓐᓇᐅᔪᖅ ᐊᔭᐅᕆᒋᐊᕈᑎᓂᒃ ᐱᓕᕆᐊᒃᓴᓂᓪᓘᓐᓃᑦ ᐱᑕᖃᙱᑦᑐᑦ ᐃᑲᔪᖅᓱᓂᕐᒥᑦ ᐊᑐᓕᖅᑭᑦᑕᐅᔪᓐᓇᖅᑐᓂᑦ ᐆᒻᒪᖅᑯᑎᓂᑦ ᐅᕝᕙᓘᓐᓃᑦ ᐆᒻᒪᖅᑯᑎᓂᑦ ᐊᑐᓗᐊᖅᑕᐃᓕᒪᔾᔪᑎᓂᒃ.

ᐃᑲᔪᖅᑕᐅᔾᔪᑎᒃᓴᑦ ᐊᑐᓕᖅᑭᑦᑕᐅᔪᓐᓇᖅᑐᓂᑦ ᐆᒻᒪᖅᑯᑎᓂᑦ ᐱᓕᕆᐊᖑᑲᐃᓐᓇᕈᓐᓇᖅᑐᓄᑦ ᐊᑐᐃᓐᓇᐅᑎᑕᐅᔪᑦ ᐊᔾᔨᒌᙱᑦᑐᓂᑦ ᒐᕙᒪᑐᖃᒃᑯᓐᓂᙶᖅᑐᓂᒃ ᐱᓕᕆᐊᒃᓴᓂᑦ, ᑕᒪᒃᑯᓂᖓ ᐃᓚᖃᖅᑐᑎᒃ:

ᐊᑦᑕᕐᓇᙱᑦᑐᒃᑯᑦ ᐊᕙᑎᒧᑦ ᐆᒻᒪᖅᑯᑏᑦ ᓄᓇᖃᖅᑳᖅᓯᒪᔪᓄᑦ ᐅᑭᐅᖅᑕᖅᑐᒥᓪᓗ ᓄᓇᓕᓐᓄᑦ

ᑖᓐᓇ ᐊᑦᑕᕐᓇᙱᑦᑐᒃᑯᑦ ᐊᕙᑎᒧᑦ ᐆᒻᒪᖅᑯᑏᑦ ᓄᓇᖃᖅᑳᖅᓯᒪᔪᓄᑦ ᐅᑭᐅᖅᑕᖅᑐᒥᓪᓗ ᓄᓇᓕᓐᓄᑦ ᐱᓕᕆᐊᒃᓴᐅᔪᖅ 2011-2016 ᑐᕌᒐᖃᓪᓗᐊᑕᖅᑐᑦ ᐊᑐᐃᓐᓇᐃᓂᕐᒥᑦ ᑮᓇᐅᔭᑎᒍᑦ ᐃᑲᔪᖅᓱᓂᕐᒥᑦ ᓄᓇᖃᖅᑳᖅᓯᒪᔪᓄᑦ ᐅᑭᐅᖅᑕᖅᑐᒥᓪᓗ ᓄᓇᓕᐅᔪᓂᑦ ᐊᑐᓕᖅᑭᑦᑕᐅᔪᓐᓇᖅᑐᓂᑦ ᐆᒻᒪᖅᑯᑎᓂᑦ ᐱᓕᕆᐊᖑᔪᓐᓇᖅᑐᓂᑦ. ᑲᒪᒋᔭᐅᕙᒃᑐᖅ ᓄᓇᖃᖅᑳᖅᑐᓕᕆᔨᒃᑯᓐᓄ ᑲᓇᑕᒥ ᐃᓚᒋᔭᐅᓪᓗᓂᓗ ᓴᓗᒪᔪᒥᒃ ᐆᒻᒪᖅᑯᑎᓕᕆᓂᕐᒧᑦ ᐱᓕᕆᐊᖑᕙᒃᑐᓂᑦ ᑮᓇᐅᔭᖃᖅᑎᑕᐅᔪᑦ ᑲᓇᑕᐅᑉ ᒐᕙᒪᖓᓄᑦ ᑲᒪᒋᔭᖃᓲᖑᓪᓗᑎ ᖃᓄᐃᓕᐅᕈᑎᓂᑦ ᓯᓚᐅᑉ ᐊᓯᔾᔨᖅᐸᓪᓕᐊᓂᖓᓄᑦ.

ᑐᕌᒐᓪᓗᐊᑕᕆᓪᓗᓂᐅᒃ ᐊᑦᑕᕐᓇᙱᑦᑐᒃᑯᑦ ᐊᕙᑎᒧᑦ ᐆᒻᒪᖅᑯᑏᑦ ᓄᓇᖃᖅᑳᖅᓯᒪᔪᓄᑦ ᐅᑭᐅᖅᑕᖅᑐᒥᓪᓗ ᓄᓇᓕᓐᓄᑦ ᐱᓕᕆᐊᕆᕙᒃᑕᖓ ᓴᖅᑭᔮᙱᓐᓂᖅᓴᐅᑎᑦᑎᓂᕐᒥᑦ ᓯᓚᕐᔪᐊᑉ ᐅᔅᓯᒃᓯᕙᓪᓕᐊᔾᔪᑎᖏᓐᓂ ᓴᖅᑭᕙᒃᑐᑦ ᐆᒻᒪᖅᑯᑎᓂᑦ ᐅᖅᑰᓴᐅᑎᒥᙶᖅᑐᓂᓪᓗ ᓄᓇᖃᖅᑳᖅᓯᒪᔪᑦ ᐅᑭᐅᖅᑕᖅᑐᒥᓪᓗ ᓄᓇᓕᐅᔪᓂᒃ ᐃᑲᔪᖅᓱᓂᒃᑯᑦ ᓴᖅᑭᑦᑎᕆᓂᕐᒥᑦ ᐊᑐᓕᖅᑎᑦᑎᓂᕐᒥᓪᓗ ᐊᑐᓕᖅᑭᑦᑕᐅᔪᓐᓇᖅᑐᓂᑦ ᐆᒻᒪᖅᑯᑎᓂᑦ ᐱᓕᕆᐊᖑᔪᓐᓇᖅᑐᓂᑦ. ᐊᑦᑕᕐᓇᙱᑦᑐᒃᑯᑦ ᐊᕙᑎᒧᑦ ᐆᒻᒪᖅᑯᑏᑦ ᓄᓇᖃᖅᑳᖅᓯᒪᔪᓄᑦ ᐅᑭᐅᖅᑕᖅᑐᒥᓪᓗ ᓄᓇᓕᓐᓄᑦ ᐱᓕᕆᐊᒃᓴᐅᔪᖅ ᑮᓇᐅᔭᑎᒍᑦ ᐃᑲᔪᖅᓱᐃᓲᑦ ᐋᖅᑭᒃᓱᐃᕙᓪᓕᐊᑎᑦᑎᓂᕐᒧᑦ ᐊᑐᓕᖅᑭᑦᑕᐅᔪᓐᓇᖅᑐᓂᑦ ᐆᒻᒪᖅᑯᑎᓂᑦ ᐱᓕᕆᐊᖑᔪᓐᓇᖅᑐᓂᑦ ᐊᒻᒪ ᑎᑎᕋᐅᔭᖅᑕᐅᑎᑦᑎᓗᑎ ᐊᑐᓕᖅᑎᑦᑎᓗᑎᓗ ᐊᑐᓕᖅᑭᑦᑕᐅᔪᓐᓇᖅᑐᓂᑦ ᐆᒻᒪᖅᑯᑎᓂᑦ ᐱᓕᕆᐊᖑᔪᓐᓇᖅᑐᓂᑦ ᐊᑐᖅᑕᐅᓕᕐᓗᑎ ᓄᓇᓕᐅᑉ ᐃᒡᓗᐊᓗᖏᓐᓂ.

ᐱᓇᔪᖃᑕᐅᔪᓐᓇᕐᓂᕐᒧᑦ ᐱᓯᒪᔭᐅᔭᕆᐊᓕᓐᓂ ᑐᑭᓯᒋᐊᒃᑲᓐᓂᕈᑎᓄᓪᓗ, ᐃᑭᐊᖅᑭᕕᒃᑯᑦ ᑐᑭᓯᒋᐊᕐᕕᖓᓄ ᐃᑭᐊᖅᑭᕕᒃᑯᑦ ᑐᑭᓯᒋᐊᕐᕕᖓᓄ ᖃᐅᔨᒋᐊᕐᓗᑎᑦ.

ᐅᐸᓗᖓᐃᔭᕐᓂᕐᒧᑦ ᑮᓇᐅᔾᔭᒃᓴᓇᓱᐊᕈᑎᒃᓴᑦ ᐅᑭᐅᖅᑕᖅᑐᒥ ᐱᕙᓪᓕᐊᑎᑦᑎᓂᕐᒧᑦ

ᑲᒪᒋᔭᐅᓲᖑᓪᓗᓂ ᑲᓇᑕᒥ ᐅᑭᐅᖅᑕᖅᑐᒥ ᐱᕙᓪᓕᐊᔪᓕᕆᔨᒃᑯᖏᓐᓄ, ᐅᐸᓗᖓᐃᔭᕐᓂᕐᒧᑦ ᑮᓇᐅᔾᔭᒃᓴᓇᓱᐊᕈᑎᒃᓴᑦ ᐅᑭᐅᖅᑕᖅᑐᒥ ᐱᕙᓪᓕᐊᔪᓕᕆᔨᒃᑯᑦ ᐱᓕᕆᐊᒃᓴᖓ ᑐᕌᒐᖃᓲᖅ ᓴᙱᒃᑎᒋᐊᖅᑎᑦᑎᓂᕐᒥᑦ ᑎᒥᒋᔭᐅᓪᓗᐊᑕᖅᑐᓂᑦ ᐅᑭᐅᖅᑕᖅᑑᑉ ᐊᕕᒃᑐᖅᓯᒪᓂᖏᑦᑕ, ᑮᓇᐅᔭᓕᐅᕋᓱᐊᕐᓂᕐᒧᑦ ᖃᓄᐃᓕᐅᕈᓘᔭᖅᑎᑦᑎᓂᕐᒥᑦ, ᑲᔪᖏᖅᓴᐃᓂᕐᒥᓪᓗ ᐃᓚᐅᑎᑦᑎᓂᕐᒥᑦ ᐅᑭᐅᖅᑕᖅᑐᒥᐅᑕᓂ ᒪᑭᒪᔾᔪᑎᒃᓴᓕᕆᓂᕐᒥᑦ. ᐱᓕᕆᐊᖑᔪᖅ ᑎᓴᒪᓕᖅᑲᖓᔪᓂ ᐊᕕᑦᑐᖅᓯᒪᔪᖅ: ᑎᑭᓐᓇᓱᒃᑕᖓᓐᓄᑦ ᑮᓇᐅᔭᓕᐅᕈᑕᐅᔪᒪᔪᒧᑦ ᐱᓕᕆᐊᒃᓴᖅ, ᐃᓱᒪᒃᓴᖅᓯᐅᑦᑎᐊᕐᓂᕐᒧᑦ ᖃᐅᔨᒪᓂᖃᕐᓂᕐᒧᓪᓗ ᑮᓇᐅᔭᒃᓴᑦ, ᑲᑐᔾᔨᖃᑎᒌᓂᕐᒧᑦ ᖃᐅᔨᒪᔨᒋᔭᐅᓂᕐᒧᓪᓗ ᑲᑎᓐᓃᑦ ᐊᒻᒪᓗ  ᐅᑭᐅᖅᑕᖅᑐᒥᐅᓕᒫᑦ ᐊᕕᒃᑐᖅᓯᒪᓂᖏᓐᓂ ᑮᓇᐅᔭᒃᓴᑦ. 2009 ᐊᒻᒪ 2014 ᐊᑯᓐᓂᖏᓐᓂ, ᐅᐸᓗᖓᐃᔭᕐᓂᕐᒧᑦ ᑮᓇᐅᔾᔭᒃᓴᓇᓱᐊᕈᑎᒃᓴᑦ ᐅᑭᐅᖅᑕᖅᑐᒥ ᐱᕙᓪᓕᐊᔪᓕᕆᔨᒃᑯᑦ ᑮᓇᐅᔭᖃᓚᐅᖅᑐᑦ $90 ᒥᓕᐊᓐᓂᒃ, ᐊᕕᑦᑐᖅᑕᐅᑦᑎᐊᓚᐅᖅᑐᖅ ᐊᔾᔨᒌᑦᑎᐊᒥᒃ ᐱᖓᓱᓄᑦ ᐅᑭᐅᖅᑕᖅᑐᒥ ᐊᕕᑦᑐᖅᓯᒪᓂᐅᔪᓄᑦ.

ᑐᑭᓯᒋᐊᒃᑲᓐᓂᕈᑎᓄᑦ ᐊᑐᓂ ᐊᕕᑦᑐᖅᓯᒪᔪᓄᑦ, ᑕᑯᒋᐊᕐᓗᒍ  ᐃᑭᐊᖅᑭᕕᒃᑯᑦ ᑐᑭᓯᒋᐊᕐᕕᖓᓄ.