ᓯᓚᐅᑉ ᐊᓯᔾᔨᕐᓂᖓ FAQ

ᑭᐅᔾᔪᑎᑦᓴᖃᖅᑐᒍᑦ ᐊᐱᖅᑯᑎᑦᓴᓐᓄᑦ ᓯᓚᐅᑉ ᐊᓯᔾᔨᕐᓂᖓᓄᑦ:

ᐊ: ᖃᓄᖅ ᐊᔾᔨᒌᓐᖏᒻᒪᑎᒃ ᓯᓚᐅᑉ ᐱᐅᓯᖓᑕ ᐊᒻᒪᓗ ᓯᓚᐅᑉ?

ᑭ: ᓯᓚᐅᑉ ᐱᐅᓯᖓ ᐅᖃᐅᓯᓕᒃ ᐊᑯᓃᖅᑐᒧᑦ, ᓯᓚᐅᑉ ᐊᐅᓚᓂᕆᒐᔪᑦᑕᖏᓐᓂᒃ ᓄᓇᒥ. ᓯᓚᐅᑉ ᖃᓄᐃᓐᓂᖏᑦ (“ᐱᐅᓯᐅᒐᔪᑦᑐᑦ”) ᓇᓴᐃᔾᔪᑕᐅᕙᑦᑐᑦ ᐊᑯᓃᖅᑐᒥᒃ ᐊᑯᓐᓂᖃᖅᑐᓄᑦ, ᓲᕐᓗ ᓯᓚᐅᑉ ᖃᓄᐃᓐᓂᕆᒐᔪᑦᑕᖏᑦ ᐊᕐᕌᒍᐃᑦ 30 ᐅᖓᑖᓂ. ᓯᓚ ᑕᑯᕙᑦᑕᐃᑦ ᐃᒐᓛᒃᑯᑦ ᐅᓪᓗᒥ, ᐅᕝᕙᓗ ᐊᐅᓚᓂᐅᔪᖅ ᑕᑯᕙᑦᑕᐃᑦ ᑮᑕᑲᐃᓐᓈᖅᑐᒃᑯᑦ (ᓲᕐᓗ, “ᓯᓚᓗᑦᑐᖅ ᐱᓇᓱᐊᕈᓯᖅ”). ᑐᑭᓯᓂᐊᖅᑎᒻᒪᕇᑦ ᓂᕆᐅᑦᑐᑦ ᓯᓚᕐᓂᓗᒻᒪᕆᖃᑦᑕᕐᓂᐊᕆᐊᖓ ᓯᓚᕐᓂᓗᒐᔪᓕᕐᓗᓂ ᐊᑦᓱᐊᓘᕐᓗᓂ ᐱᔾᔪᑕᐅᓪᓗᑎᒃ ᐊᓯᔾᔨᐸᓪᓕᐊᓂᐅᔪᑦ ᓯᓚᒧᑦ.

ᐊ: ᓱᓇᐅᒻᒪᑦ ᓯᓚᐅᑉ ᐊᓯᔾᔨᕐᓂᖓ?

ᑭ: ᓯᓚᐅᑉ ᐊᓯᔾᔨᕐᓂᖓ ᐊᑯᓃᖅᑐᒨᖓᔪᖅ ᐊᓯᔾᔨᕐᓂᐅᔪᖅ ᓄᓇᐅᑉ ᓯᓚᖓᓂ. ᐱᖃᓯᐅᑎᑦᓱᓂ ᓄᓇᕐᔪᐊᓕᒫᑦᓯᐊᖅ ᐊᓯᔾᔨᐸᓪᓕᐊᔪᖅ ᐱᐅᓯᐅᒐᔪᑦᑐᒥᒃ. ᑖᒃᑯᐊ ᐊᓯᔾᔨᕐᓂᐅᔪᑦ ᐱᖃᓯᐅᔾᔨᒍᓐᓇᖅᑐᑦ ᓂᕈᒥᓐᓂᕐᒥᒃ, ᐊᓄᕆᐅᑉ ᐊᐅᓚᓂᖓᓂᒃ, ᖃᐅᓯᕐᓇᒥᓪᓘᓐᓃᑦ (ᓯᓚᓗᒃ ᐊᒻᒪᓗ ᐊᐳᑎ). ᓯᓚᐅᑉ ᐊᓯᔾᔨᕐᓂᖓ ᐊᑑᑎᒐᔪᓲᖅ ᑭᓯᐊᓂ ᐊᒥᓱᓂᒃ ᐊᔾᔨᒌᓐᖏᑦᑐᓂᒃ ᐱᔾᔪᑎᖃᖅᓱᓂ, ᓲᕐᓗ ᐅᖓᓯᓐᓂᖓ ᓄᓇᕐᔪᐊᑉ ᓯᕿᓂᕐᒥᒃ, ᐃᑎᓂᖓ ᓯᕿᓂᐅᑉ ᖃᐅᒪᓂᖓᑕ, ᐊᒻᒪᓗ ᓯᓚᐃᓐᓇᕐᒦᑦᑐᑦ ᐊᐅᓚᑦᓯᔪᑦ ᓯᕿᓂᕐᒦᓐᒑᖅᑐᓂᒃ ᐅᑎᖅᑎᑦᓯᕙᑦᓱᑎᒃ ᓯᓚᐃᓐᓇᕐᒧᑦ. ᐅᓪᓗᒥ, ᑐᑭᓯᓂᐊᖅᑎᒻᒪᕇᑦ ᐊᖏᖃᑎᒌᑦᑐᑦ ᐊᐅᓚᓂᐅᒐᔪᓲᑦ ᓱᑲᓕᐅᒥᑎᑕᐅᒍᓐᓇᕆᐊᖏᑦ ᐃᓄᐃᑦ ᐊᐅᓚᓂᖏᓐᓄᑦ, ᓲᕐᓗ ᐃᑯᒪᑦᓯᓂᖅ ᐅᖅᓱᐊᓗᓐᓂᒃ ᐊᒻᒪᓗ ᓄᓇᒥᒃ ᐊᑐᕐᓂᕐᒧᑦ ᐊᐅᓚᓂᐅᔪᓂᒃ. ᑕᒪᓐᓇ ᖁᑦᓯᓂᖅᓴᒥᒃ ᐃᖏᕐᕋᓂᖃᖅᑎᑦᓯᓲᖅ ᐊᓯᔾᔨᕐᓂᕐᒥᒃ ᑕᑯᓐᓇᖅᓱᒋᑦ ᐊᑑᑎᕙᑦᑑᑦ ᐊᑑᑎᓲᑦ.

ᐊ. ᓱᓇ ᐃᖏᕐᕋᑎᑦᓯᒻᒪᑦ ᓯᓚᐅᑉ ᐊᓯᔾᔨᕐᓂᖓᓂᒃ?

ᑭ: ᐱᕈᖅᓰᕕᒻᒥ ᐳᓪᓚᐃᑦ (GHGs, ᐅᕝᕙᓗ “ᐆᓇᖅᑐᒥᒃ ᐅᓂᑦᑎᑦᓯᓃᑦ” ᐳᓪᓚᐃᑦ) ᐅᓂᑦᑎᑦᓯᓲᖑᒻᒪᑕ ᐆᓇᖅᑐᒥᒃ ᓯᓚᑐᐃᓐᓇᕐᒥ. ᓯᑕᒪᓪᓗᐊᑕᐅᔪᑦ ᐅᑯᐊ GHGs ᐃᒪᕐᒧᑦ ᑭᐊ, ᐳᓪᓚ (CO2), ᐳᓪᓚ (CH4) ᐊᒻᒪᓗ ᐳᓪᓚ (N2O). ᑖᒃᑯᐊ ᐳᓪᓚᐃᑦ ᒥᓗᑦᓯᓲᑦ ᐆᓇᖅᑐᒥᒃ ᐱᓯᒪᔪᒥᒃ ᓄᓇᕐᔪᐊᒥᒃ ᓴᒃᑯᑕᐅᓐᖏᖔᖅᓱᓂ ᐆᓇᖅᑐᖅ ᓯᓚᑐᐃᓐᓇᕐᒧᑦ. ᐱᕈᖅᓰᕕᑦᑎᑐᑦ ᐊᐅᓚᓂᖅ ᓄᓇᕐᔪᐊᕐᒥᒃ ᓇᔪᕋᑦᓴᐅᑎᑦᓯᒻᒪᑦ ᓂᕈᒥᓐᓂᖏᓐᓂᒃ ᓈᒻᒪᓈᕆᓯᒪᑦᓱᓂ ᐃᓅᓯᕐᒧᑦ ᑕᐃᒫᒃ ᖃᐅᔨᒪᒐᑦᑎᒍ. ᐃᓄᐃᑦ ᐊᐅᓚᓂᖏᑦ, ᓲᕐᓗ ᓄᓇᓯᐅᕐᓂᖅ, ᐅᖅᓱᐊᓗᑦᑐᖅᑐᖅ ᐊᒻᒪᓗ ᐊᓂᐊᑦᓯᑦᓱᓂ ᐳᓪᓚᓂᒃ GHGs. GHGs ᓯᓚᐃᓐᓇᕐᒥ ᐊᖏᓪᓕᕚᓪᓕᖅᓯᒪᔪᖅ ᑕᐃᒪᓐᖓᓂᑦ ᓴᓇᔪᖃᖃᑦᑕᐸᓪᓕᐊᓯᓐᓂᕐᒪᓂᑦ (1750). ᒫᓐᓇ ᖁᑦᓯᓐᓂᖏᑦ ᖃᐅᔨᒪᔭᐅᔪᑦ ᐱᕈᖅᓰᕕᑦᑎᑐᑦ ᐳᓚᐃᑦ, ᓲᕐᓗ ᒪᖤᐃᓐ ᐊᒻᒪᓗ ᑳᕙᓐ ᑕᐃᐋᒃᓴᐃᑦ, ᓯᓚᐃᓐᓇᕐᒥ ᖁᑦᓯᓂᖅᐸᐅᓯᒪᔫᒃ ᐊᕐᕌᒍᐃᑦ 650,000 ᐅᖓᑖᓂ. GHGs ᐅᖃᐅᓯᐅᔪᑦ ᐊᔭᐅᕆᐊᖏᑦ
ᓯᓚᐅᑉ ᐊᓯᔾᔨᐸᓪᓕᐊᓂᖓᓄᑦ ᓇᔫᑎᓂᖏᑦ ᓯᓚᐃᓐᓇᕐᒥ ᓄᖅᑲᐅᒥᑎᑦᓯᓲᖅ ᓄᓇᕐᔪᐊᑉ ᐊᐅᓚᖓᑕ ᓇᓕᒧᒌᓐᓂᖓᓂᒃ ᐅᓂᑦᑎᑦᓯᓂᒃᑯᑦ ᐆᓇᖅᑐᒥᒃ ᓯᓚᐃᓐᓇᕐᒥ. ᓄᓇᒥᒃ ᐊᑐᕐᓂᒧᑦ ᐊᐅᓚᓂᐅᔪᑦ ᒪᑯᐊ ᐱᕈᖅᑐᐃᑦᑕᐅᖅ ᐊᓂᐊᑦᓯᒻᒪᑦ GHGs-ᓂᒃ ᐊᒻᒪᓗ ᐆᑦᑑᑎᑦᓴᐅᔪᖅᑕᐅᖅ ᓯᓚᐅᑉ ᐊᓯᔾᔨᕐᓂᖓᓄᑦ ᐊᔭᐅᖅᑎᐅᒋᐊᖓ.

ᐊ. ᓱᓇᐅᕙ ᓄᓇᕐᔪᐊᑉ ᓂᕈᒥᑦᓯᕙᓪᓕᐊᓂᖓ?

ᑭ: ᓄᓇᕐᔪᐊᑉ ᓂᕈᒥᑦᓯᕙᓪᓕᐊᓂᖓ ᐅᖃᐅᓯᖃᖅᑐᖅ ᖁᕝᕙᐸᓪᓕᐊᔪᖅ ᓄᓇᕐᔪᐊᕐᒥ ᓂᕈᒻᒥᓂᕆᔭᐅᒐᔪᖃᑦᑕᖅᓯᒪᔫᑉ. ᐃᓗᐊᓐᓂ ᓄᓇᕐᔪᐊᕐᒥ ᓂᓪᓕᕙᓪᓕᐊᔪᖅ, ᐊᑉᐸᐸᓪᓕᐊᔪᑦ ᓄᓇᕐᔪᐊᕐᒥ ᓂᕈᒥᓐᓂᐅᔪᒧᑦ. ᓄᓇᕐᔪᐊᖅ ᓂᕈᒥᑦᓯᕙᓪᓕᐊᓂᖓᑦ ᑐᑭᖃᓐᖏᑦᑐᖅ ᓄᓇᕐᔪᐊᖅ ᓂᕈᒥᓐᓂᖓ ᐊᑕᐅᑦᓯᒃᑯᐊᓗᒃ ᖁᕝᕙᕐᓂᐊᕆᐊᖓ. ᐃᓚᖏᓐᓂ ᐆᓇᕐᓂᖅᓴᐅᓂᐊᖅᑐᖅ, ᐃᓚᖏᓐᓂ ᓂᓪᓕᓇᕐᓂᖅᓴᐅᓕᕐᓗᓂ; ᑭᓯᐊᓂᓕ, ᐃᓘᓐᓈᒍᑦ ᓂᕈᒥᑦᓯᓂᖃᖅᑐᖅ. ᓄᓇᕐᔪᐊᕐᒥ ᓄᕈᒥᑦᓯᕙᓪᓕᐊᓂᖅ ᐆᑦᑑᑎᑦᓴᐅᕗᖅ ᐊᓯᔾᔨᕐᓂᕐᒥᒃ ᓄᓇᕐᔪᐊᕐᒥ ᓯᓚᒧᑦ. ᓯᓚᐃᓐᓇᕐᒥ ᓂᕈᒥᓐᓂᕐᒥᒃ ᑲᑎᑦᓱᐃᓯᒪᔪᑦ ᓄᐊᑕᐅᓯᒪᔪᑦ ᐊᕐᕌᒍᓂ 120-ᓂ ᐊᓂᒍᖅᑐᓂ ᑕᑯᑦᓴᐅᑎᑦᓯᔪᖅ ᓄᓇᕐᔪᐊᖅ ᓂᕈᒥᑦᓯᕙᓪᓕᐊᒋᐊᖓ. ᓂᕈᒥᓐᓂᐅᔪᓂᒃ ᑲᑎᖅᓱᐃᕕᒃ ᕿᒥᕐᖁᔭᐅᓯᒪᔪᖅ ᑕᑯᓐᓇᖅᓱᑎᒃ ᑲᑎᖅᓱᖅᑕᐅᓯᒪᔪᓂᒃ ᐊᓯᖏᓐᓂᒃ ᓇᓗᓇᐃᕈᑕᐅᔪᓂᒃ ᐱᖃᓯᐅᑎᑦᓱᑎᒃ ᓇᐹᖅᑐᕐᓂ ᐊᒻᒪᓗᑭᑖᖑᓂᖏᑦ, ᓂᓚᐃᑦ ᕿᑎᖏᑦ, ᐃᒪᕕᒻᒥ ᐱᕈᖅᑐᐃᑦ ᐊᒻᒪᓗ ᓄᓇᒥ ᓂᕈᒥᓐᓂᐅᔪᑦ. ᑲᑎᑦᓱᑎᒃ ᑖᒃᑯᐊ ᑲᑎᖅᓱᖅᑕᐅᓯᒪᔪᑦ ᑕᑯᒍᑎᒋᒍᓐᓪᓇᖅᑕᕗᑦ ᓂᕈᒥᓐᓂᐅᔪᑦ ᖃᓄᐃᑦᑐᕐᓂᕐᒪᖔᑕ ᑕᐃᑦᓱᒪᓂ. ᑕᑯᑦᓴᐅᑎᑦᓯᔪᖅ 2000-2010-ᒧᓄᑦ ᓂᕈᒥᓐᓂᖅᐸᐅᓯᒪᔪᑦ ᐊᕐᕌᒍᐃᑦ ᖁᓕᑦ ᐅᓪᓗᒥᐅᓕᖅᑎᓪᓗᒍ. ᐅᑭᐅᖅᑕᖅᑐᖅ ᓂᕈᒥᑦᓯᕙᓪᓕᐊᓯᒪᔪᖅ ᓱ ᑲᓐᓂᖅᓴᒥᒃ ᐊᕐᕌᒍᑕᒫᑦ ᓄᓇᕐᔪᐊᑉ ᓂᕈᒥᑦᓯᕙᓪᓕᐊᓂᖓᓂᒃ.

ᐊ. ᖃᓄᖅ ᓯᓚᐅᑉ ᐊᓯᔾᔨᕐᓂᖓ ᐊᑦᑐᐃᓂᖃᕐᓂᐊᖅᑲ ᓄᓇᕗᒻᒥᒃ?

ᑭ: ᐅᑭᐅᖅᑕᖅᑐᒥ ᑕᑯᖃᑦᑕᓕᕇᖅᑐᒍᑦ ᐊᓯᔾᔨᕐᓂᐅᔪᓂᒃ ᐊᕙᑎᑦᑎᓐᓂ, ᐱᖃᓯᐅᑎᑦᓱᑎᒃ:  

  • ᓵᓪᓕᕙᓪᓕᐊᔪᑦ ᐃᔾᔪᓂᖏᑦ ᓯᑯᐃᑦ ᑕᕆᐅᕐᒥ, ᑰᓐᓂ ᑕᓯᕐᓂᓗ
  • ᓂᕈᒥᑦᓯᕙᓪᓕᐊᓂᖅ
  • ᐊᓯᔾᔨᖅᑐᖅ ᐱᕈᖅᑐᐃᑦ ᐆᒪᔪᐃᓪᓗ: ᓄᑖᑦ ᑕᑯᔭᐅᖃᑦᑕᓕᖅᑐᑦ (ᐊᐅᓪᓛᐸᓪᓕᐊᔪᑦ ᐅᐊᓐᓇᒧᑦ), ᐊᒻᒪᓗ ᖃᐅᔨᒪᔭᐅᑦᓯᐊᖅᑐᑦ ᐆᒪᔪᐃᑦ ᑕᑯᔭᐅᖃᑦᑕᓕᖅᑐᑦ ᓇᔪᖃᑦᑕᖅᓯᒪᓐᖏᑕᒥᓐᓂ
  • ᐊᓯᔾᔨᕐᓂᐅᔪᑦ ᐊᐅᔪᐃᑦᑐᒧᑦ ᓄᓇᒧᑦ ᐊᒻᒪᓗ ᐃᒪᐃᑦ ᓇᑎᕐᓇᒦᑦᑐᑦ  
  • ᓯᓚᕐᓂᓗᕐᔪᐊᒐᔪᓐᓂᖅᓴᐅᓕᕐᓗᓂ
  • ᖁᕝᕙᐸᓪᓕᐊᑐᐃᓐᓇᖅᑐᑦ ᐅᓕᓐᓃᑦ
  • ᐊᐅᑉᐸᓪᓕᐊᔪᑦ ᒥᑭᓪᓕᕙᓪᓕᐊᔪᓪᓗ ᐊᐅᔪᐃᑦᑐᐃᑦ

ᐊ: ᖃᓄᕐᓕ ᐃᓄᑐᖃᐃᑦ ᐅᖃᖃᑦᑕᖅᑲᑦ?

ᑭ: ᐃᓄᑐᖃᐃᑦ ᐅᖃᖃᑦᑕᖅᑐᑦ ᑕᐃᒫᑦᓴᐃᓐᓇᖅ ᐊᓯᔾᔨᕐᓂᐅᔪᓂᒃ ᑐᑭᓯᓂᐊᖅᑎᒻᒪᕆᑦᑎᑐᑦ (ᑕᑯᓗᒍ ᐊᐱᖅᑯᑕᐅᔪᖅ ᑕᑉᐱᑲᓂ):
    •    ᓯᑯᐃᑦ ᐊᓯᔾᔨᖅᓯᒪᓕᖅᑐᑦ; ᓯᑯ ᓵᓐᓂᖅᓴᐅᓕᖅᑐᖅ, ᓯᑯᓇᓵᕐᓂᖅᓴᐅᖃᑦᑕᓕᖅᓱᓂ ᐊᐅᓴᕋᐃᓐᓂᖅᓴᐅᑦᓱᓂᓗ. ᑕᐃᒫᑦᓴᐃᓐᓇᖅ ᑕᑯᓐᓇᖅᑕᐅᒻᒥᔪᑦ ᑕᕐᓯᓂ ᓯᑯᐊᑦ.
    •    ᐊᓂᐅᕙᑦ (ᑕᕝᕙᐅᖏᓐᓇᓱᑦ ᐊᐳᑏᑦ) ᒥᑭᓪᓕᕙᓪᓕᐊᑐᐃᓐᓇᖅᑐᑦ. ᓯᓚᓗᓐᓂᖅᓴᐅᓗᖃᑦᑕᓕᖅᓱᓂ, ᐊᐱᖃᑦᑕᓕᖅᓱᓂ ᓯᑯᐊᖃᑦᑕᓕᖅᓱᓂᓗ ᑭᖑᕙᐅᖅᑲᔪᒥᒃ ᐊᐅᓴᕋᐃᓐᓂᖅᓴᐅᑦᓱᑎᓪᓗ (ᐊᖏᓂᖏᑦ ᐊᒻᒪᓗ ᖃᖓᒃᑰᓂᖓ ᖃᐅᓯᕐᓇᐅᑉ ᐊᓯᔾᔨᐸᓪᓕᐊᔪᖅ).
    •    ᓯᓚ ᓇᓗᓇᓕᖅᑐᖅ ᐊᐅᓚᓂᕆᓲᒥᓂᕐᒥᓂᒃ ᐊᐅᓚᓂᖃᕈᓐᓃᖅᓱᓂ ᐃᓄᑐᖃᐃᑦ ᒪᒃᑯᑎᓪᓗᒋᑦ. ᓯᓚ ᐊᓯᔾᔨᓴᕋᐃᓐᓂᖅᓴᐅᓕᖅᑐᖅ, ᓯᓚᕐᓂᕐᓗᖅᔪᐊᓯᑲᓪᓚᖃᑦᑕᖅᓱᓂ.  
    •    ᐃᒪᐃᑦ ᐊᑉᐸᐹᓪᓕᖅᓯᒪᔪᑦ, ᐱᔭᕆᐊᑦᑐᐃᑦᓱᓂ ᐊᔪᕐᓇᓕᖅᓱᓂᓘᓐᓃᑦ ᐅᒥᐊᒃᑯᑦ ᐃᖏᕐᕋᒋᐊᑦᓴᖅ ᐃᓚᖏᓐᓂ (ᐱᔾᔪᑕᐅᓪᓗᓂ ᐃᓚᖓ ᐱᑭᐊᕐᓂᐅ; ᑕᑯᓗᒍ ᐊᑖᓂ ᑐᑭᓯᑎᑦᓯᒋᐊᕈᑎ). ,
    •    ᓂᕈᒥᓐᓂᖅᓴᐅᓕᕐᒪᑦ ᐊᕐᕌᒎᑉ ᐃᓗᐊᓂ.
    •    ᓄᑖᑦ ᖁᐱᕐᕈᐃᑦ, ᑎᒻᒥᐊᑦ, ᐆᒪᔪᐃᓪᓗ ᑕᑯᔭᐅᖃᑦᑐᖅᓯᒪᓕᖅᑐᑦ.
    •    ᓄᓇ ᐅᔾᔨᕆᔭᐅᓯᒪᔪᖅ ᐸᓂᕐᓂᖅᓴᐅᒋᐊᖓ ᐊᒻᒪᓗ ᐊᐅᔪᐃᑦᑐᖅ ᐊᓯᔾᔨᐸᓪᓕᐊᒋᐊᖓ ᓄᓇ.  
    •    ᐊᑯᓂᐅᓂᖏᑦ ᖃᖓᒃᑰᓂᖏᓪᓗ ᐊᕐᕌᒍᒥ ᐊᓯᔾᔨᖅᑕᕐᓂᐅᔪᑦ ᐊᓯᔾᔨᖅᓯᒪᔪᑦ.

ᐊ: ᖃᓄᖅ ᓯᓚᐅᑉ ᐊᓯᔾᔨᕐᓂᖓ ᐊᑦᑐᐃᒍᓐᓇᕐᒪᑦ ᐊᐅᔪᐃᑦᑐᕐᒥᒃ ᓄᓇᒥᒃ?

ᑭ: ᐊᐅᔪᐃᑦᑐᖅ ᖁᐊᖅ ᐃᔾᔪ ᐅᔭᕋᕐᓘᓐᓃᑦ ᖁᐊᖑᓯᒪᔪᖅ ᐊᕐᕌᒎᓐᓂᒃ ᒪᕐᕉᓐᓂᒃ ᑭᖑᓕᕇᓐᓂᒃ. ᐊᐅᔪᐃᑦᑐᖅ ᐊᐅᑉᐸᓪᓕᐊᔪᖅ ᐅᖃᐅᓯᓕᒃ ᐊᐅᑉᐸᓪᓕᐊᔪᒥᒃ ᐊᐅᔪᐃᑦᑐᕐᒥᒃ ᓄᓇᒥᒃ, ᖁᐊᖅ ᐃᔾᔪ ᐊᐅᑉᐸᓪᓕᐊᔪᖅ ᓂᕈᒥᑦᓯᕙᓪᓕᐊᔪᕐᓘᓐᓃᑦ. ᓂᕈᒥᑦᓯᕙᓪᓕᐊᑐᐃᓐᓇᑎᓪᓗᒍ, ᖃᓄᐃᓪᓗᐊᕐᓂᖓ ᐊᒻᒪᓗ ᐃᑎᓂᖓ ᐊᐅᔪᑦᑑᑉ ᐊᑉᐸᐹᓪᓕᕈᓐᓇᖅᑐᖅ. ᐃᓚᖏᑦ ᐊᐅᔪᐃᑦᑐᐃᑦ ᓂᓚᖃᕐᓂᖅᓴᐃᑦ ᐃᓚᖏᓐᓂᒃ. ᓂᓚᒃ ᐃᔾᔪᒦᑦᑐᖅ (ᓲᕐᓗ, ᓂᓚᓪᓛᑦ) ᐊᐅᑉᐸᑕ, ᐃᔾᔪ ᖃᐅᓯᐅᓕᖅᓱᓂ ᑲᑕᒐᑐᐃᓐᓇᕆᐊᓕᒃ. ᖁᐊᖅ ᐃᔾᔪ ᓯᑎᔪᐊᓗᒃ - ᐊᐅᒃᑲᒥ ᐊᕿᑦᑐᕈᓗᕈᓲᖅ. ᐋᖅᑭᐅᒪᔾᔪᑏᑦ ᓄᓇᕗᒻᒥ ᓱᖏᖅᑑᑎᖃᖅᑐᑦ ᐊᐅᔪᐃᑦᑐᕐᒥᒃ ᓄᓇᒥᒃ ᒪᑭᒪᑦᓯᐊᕐᓂᕐᒧᑦ. ᐊᐅᔪᐃᑦᑐᖅ ᐊᐃᑉᐸᓪᓕᐊᓕᕐᒪᑦ, ᐅᖁᒪᐃᑦᓴᕐᓂᕆᒍᓐᓇᖅᑕᖓ ᐊᐅᔪᐃᑦᑑᑉ ᐊᑉᐸᐹᓪᓕᓲᖅ ᐊᒻᒪᓗ ᐃᔾᔪ ᑲᑕᒐᑐᐃᓐᓇᕆᐊᖃᓕᖅᓱᓂ (ᑭᕕᕙᓪᓕᐊᓗᓂ) ᓱᕋᒍᑕᐅᓕᕐᓗᓂ ᐃᓗᓐᓄᑦ, ᐊᖅᑯᑎᓄᑦ, ᒥᑦᑕᕐᕕᓐᓄᑦ ᐊᓯᖏᓐᓄᓪᓗ ᐃᓗᓄᑦ.

ᐊ: ᓱᓇᐅᒻᒪᑦ ᐊᐅᓚᓂᓕᒃ ᕐᑳᕈᕕᐊᒃ?

ᑭ: ᐊᐅᓚᓂᓕᒃ ᕐᑳᕈᕕᐊᒃ ᕐᑳᖓᓃᑦᑐᖅ ᐃᔾᔫᑉ (ᐅᕝᕙᓗ ᓱᓇᐃᑦ ᕐᑳᖓᓂ), ᐊᐅᓲᖅ ᐊᐅᔭᒃᑯᑦ ᖁᐊᒃᑲᓂᑦᑕᖅᑯᖅ ᐅᑭᐊᕐᒪᑦ. ᐃᑎᓂᖏᑦ ᐊᐅᓚᓂᓖᑦ ᕐᑳᕈᕕᐊᑦ ᐊᔾᔨᒌᓐᖏᑦᑐᑦ ᓄᓇᕗᒻᒥ, ᐊᓪᓛᑦ ᓄᓇᓖᑦ ᐃᓗᐊᓐᓂ. ᑐᓐᖓᕕᖃᖅᑐᖅ ᐃᓗᓕᕆᔭᐅᔪᓂᒃ ᒪᑯᓄᖓ ᐃᔾᔫᑉ ᖃᓄᐃᑦᑑᓂᖓᓂᒃ ᓇᒦᓐᓂᖓᓂᓪᓗ (ᓲᕐᓗ, ᖃᓄᑦᓴᖅᑐᖅ ᑰᒻᒥᒃ).

ᐊ: ᓱᓇᐅᕙ ᐃᓗᖅᓴᐃᑦ?

ᑭ: ᐃᓗᖅᓴᐃᑦ ᓇᓗᓇᐃᔭᐃᔪᑦ ᐊᐅᔪᐃᑦᑐᖅ ᐃᔾᔪ ᒪᑭᑕᑎᑕᐅᔪᒥᓂᖅ ᓂᓚᒻᒧᑦ ᑲᑕᒪᒻᒪᑦ ᓂᓚ ᐊᐅᒻᒪᑦ. ᑕᒪᓐᓇ ᑕᑯᑦᓴᐅᔪᖅ ᕐᑳᖏᑦ ᐊᔾᔨᒌᓐᖏᑦᑐᓂ - ᓲᕐᓗ ᓇᑎᕐᓇᒥ. ᐃᓗᖅᓴᕋᓛᑦ ᓴᖅᑭᖅᑕᐅᓯᒪᔪᑦ ᐃᒪᑦᑎᓐᓂᐅᓲᑦ. ᐃᑎᖅᓴᐃᑦ ᐃᓱᒫᓗᓐᓇᖅᑑᒍᓐᓇᖅᑐᖅ ᓴᓇᓂᕐᒨᖓᔪᓄᑦ (ᓲᕐᓗ ᐊᑐᕆᐊᑦ, ᐃᓪᓗᐃᑦ, ᒥᑦᑕᕐᕖᑦ), ᐊᒻᒪᓗ ᑎᑭᐅᑎᒍᑕᐅᒍᓐᓇᖅᓱᑎᒃ ᓴᖅᑭᐸᓪᓕᐊᓂᖏᓐᓄᑦ ᐃᑎᖅᓴᕈᖅᐸᓪᓕᐊᔪᑦ.

ᐊ: ᑐᑭᓯᓇᓱᐊᖅᑎᒻᒪᕇᑦ ᖃᓄᐃᒐᓱᐊᓲᖑᒻᒪᑕ ᐃᒪᐃᓕᒐᐃᒻᒪᑕ “ᓄᓇ ᐱᑭᐊᖅᐸᓪᓕᐊᔪᖅ ᓱᑲᓐᓂᖅᓴᒥᒃ ᑲᕆᐅᑉ ᐅᓕᓐᓂᖓᓂᒃ ᐱᑭᐊᖅᐸᓪᓕᐊᓂᖅ ᐱᔾᔪᑎᒋᓪᓗᒍ ᑭᖑᓪᓕᖅᐹᒥ ᐅᑭᐅᖅᔪᐊᓚᐅᖅᓯᒪᑎᓪᓗᒍ”?

ᑭ: ᐱᑭᐊᖅᐸᓪᓕᐊᓲᖅ ᓄᓇ ᓇᕿᑕᐅᓯᒪᔪᒥᓂᖅ ᑭᖑᓪᓕᖅᐹᒥ ᐅᑭᐅᖅᔪᐊᖅᑎᓪᓗᒍ ᐊᐅᔪᐃᑦᑐᕐᓄᑦ ᖁᕝᕙᐸᓪᓕᐊᓕᖅᐸᑦ ᓂᓚᐃᕈᑉᐸᓪᓕᐊᓂᖓᓄᑦ. ᓇᕿᒻᒥᔭᐅᓯᒪᔪᖅ ᓄᓇ “ᐅᑎᖅᐸᓪᓕᐊᔪᖅ” - ᐊᐅᓚᓂᐅᔪᖅ ᑕᐃᔭᐅᔪᖅ ᐱᑭᐊᖅᐸᓪᓕᐊᔪᖅ. ᐃᓚᖏᓐᓂ ᓄᓇᕗᒻᒥ, ᓄᓇ ᐱᑭᐊᖅᐸᓪᓕᐊᔪᖅ ᓱᑲᓐᓂᖅᓴᒥᒃ ᐃᒪᐅᑉ ᐅᓕᓐᖓᓂᓂᒃ ᖁᕝᕙᐸᓪᓕᐊᔪᒥᒃ. ᑕᐃᒪᐃᑦᑎᓪᓗᒍ ᐅᓕᓐᓂᖅ ᐊᑉᐸᐸᓪᓕᐊᔪᕐᔫᔮᖅᑐᖅ, ᓄᓇᕐᔪᐊᕐᒥ ᑐᑭᓯᓇᓯᐊᖅᑎᒻᒪᕇᑦ ᓇᓗᓇᐃᖅᓯᓯᒪᔪᑦ ᐅᓕᓐᓃᑦ ᖁᕝᕙᐸᓪᓕᐊᒋᐊᖏᑦ.

ᐊ: ᑐᓴᖃᑦᑕᖅᓯᒪᔪᖓ ᐅᓂᒃᑲᓂᒃ ᓯᑰᑉ ᒥᑦᓵᓄᑦ ᐅᑭᐅᖅᑕᖅᑐᒥ. ᓱᔪᖃᓕᖅᑲ?

ᑭ: 1970-ᖏᓐᓂᓂᑦ, ᑐᑭᓯᓇᓱᐊᖅᑎᒻᒪᕇᑦ ᖃᐅᔨᓴᖅᓯᒪᔪᑦ ᐅᑭᐅᖅᑕᖅᑐᒥ ᑕᕆᐅᑉ ᓯᑯᖓᓂᒃ ᐊᑐᖅᓱᑎᒃ ᖃᖓᑦᑕᖅᑎᑕᐅᓯᒪᔪᓂᒃ. ᐊᑐᕐᓂᖅ ᑖᒃᑯᓇᓐᖓᑦ ᑲᑎᖅᓱᖅᑕᐅᓯᒪᔪᓂᒃ ᓇᓗᓇᐃᖅᓯᒍᑎᒋᓯᒪᔭᖓᑦ ᓯᑯᐃᕈᑉᐸᓪᓕᐊᑐᐃᓐᓇᕆᐊᖓ ᐊᕐᕌᒍᑕᒫᑦ. ᐅᑭᐅᖅᑕᖅᑐᒥ ᓯᑯ ᓄᖑᑉᐸᓪᓕᐊᑐᐃᓐᓇᖅᓯᒪᔪᖅ 1950-ᖏᓐᓂᓂᑦ. ᑐᑭᓯᓇᓱᐅᖅᑎᒻᒪᕇᑦ ᓂᕆᐅᑦᑐᑦ ᐅᑭᐅᖅᑕᖅᑐᖅ ᓯᑯᖃᕈᓐᓃᓛᕆᐊᖓ ᐊᐅᔭᖓᓂ 2030. ᖃᓄᖅ ᑐᑭᖃᖅᑲ ᓯᑯᐃᕈᑉᐊᓪᓕᐊᓂᖅ ᐃᑎᓂᖓᓂᓪᓗ ᓄᓇᕗᒻᒥᐅᓄᑦ? ᓯᑯᐃᕈᑉᐸᓪᓕᐊᓂᖅ ᐊᑦᑐᐃᓂᖃᖅᑐᖅ ᐃᖏᕐᕋᖃᑦᑕᕐᓂᖏᓐᓂᒃ ᐊᑯᕐᖓᓐᓂ ᓄᓇᓖᑦ ᐅᐱᕐᖔᒃᑯᑦ ᐅᑭᐊᒃᑯᓪᓗ, ᑮᑕᑲᐃᓐᓇᐅᓂᖅᓴᖅ ᐊᑐᕋᑦᓴᐅᖃᑦᑕᕐᓂᐊᓕᕐᒪᑦ ᓯᑯ. ᑕᒪᓐᓇᑑᓐᖏᑦᑐᖅ, ᑐᑭᖓᑦᑕᐅᖅ ᐱᖅᑯᓯᑐᖃᖅᑎᒍᑦ ᐊᖑᓇᓱᖃᑦᑕᕐᓂᖅ ᐊᑦᑕᕐᓇᑐᐃᓐᓇᕆᐊᖃᓕᖅᑐᖅ. ᒪᑐᐃᖅᓯᒍᑕᐅᒻᒥᔪᖅ ᐊᖅᑯᑎᓂᒃ ᐊᑐᕋᑦᓴᐅᖃᑦᑕᖅᓯᒪᓐᖏᑦᑐᓂᒃ ᖃᐅᔨᓴᖅᑎᓂᑦ, ᐳᓚᕋᑦᑐᓕᕆᓂᕐᒧᑦ ᐊᒻᒪᓗ ᐅᒥᐊᕐᔪᐊᓄᑦ, ᑎᑭᐅᑎᒍᑕᐅᒍᓐᓇᖅᓱᓂ ᐊᒥᓲᓂᖅᓴᓄᑦ ᖃᑭᒪᓇᓱᐊᕐᓂᐅᔪᓄᑦ ᓄᓇᕗᒻᒥ. ᐃᓪᓗᐊᓂᓗ, ᐊᒥᓱᓐᖑᐹᓪᓕᕈᑕᐅᓂᐊᖅᑐᖅ ᐅᓗᕆᐊᓇᐊᖅᑐᓄᑦ ᐊᕙᑎᒧᑦ, ᐱᓗᐊᓐᖑᐊᖅᑐᒥᒃ ᑯᕕᔪᖃᕋᔭᕐᓂᖅᐸᑦ ᓱᕈᓐᓇᖅᑐᓅᖓᔪᓄᓪᓘᓐᓃᑦ. ᖃᐅᔨᓴᕐᓂᖅᑕᖃᑦᓯᐊᕆᐊᒃᑲᓐᓂᕆᐊᖃᕐᓂᐊᖅᑐᖅ, ᑐᐊᕕᕐᓇᖅᑐᓕᕆᒍᓐᓇᕐᓂᖅᑕᖃᕐᓗᓂᓗ.

ᐊ: ᐅᑭᐅᖅᑕᖅᑐᒥ ᐆᒪᔪᕗᑦ ᐊᑦᑐᖅᑕᐅᓂᐊᖅᑲᑦ ᓯᓚᐅᑉ ᐊᓯᔾᔨᕐᓂᖓᓄᑦ?

ᑭ: ᓯᓚᐅᑉ ᐊᓯᔾᔨᕐᓂᖓ ᐊᑦᑐᐃᔪᖅ ᐅᑭᐅᖅᑕᖅᑐᒥ ᐱᕈᖅᑐᓂᒃ ᐆᒪᔪᕐᓂᓪᓗ ᐊᔾᔨᒌᓐᖏᑦᑐᑎᒍᑦ ᐊᑦᑐᐃᓂᖏᑦᑎᒍᑦ. ᐊᓯᔾᔨᕐᓂᐅᔪᑦ ᐃᓂᒋᔭᐅᔪᓂ, ᐆᒪᔪᖃᕐᕕᐅᔪᓂ, ᐊᒥᓲᓂᖏᓐᓄᑦ, ᖃᓄᐃᑦᑐᑐᐃᓐᓇᐅᓂᖏᓐᓄᑦ, ᐊᒻᒪᓗ ᐱᐅᓯᖏᓐᓄᑦ ᑐᓛᔪᑦ ᑐᓛᓐᖏᑦᑐᓪᓗ ᐆᓴ)ᐃᑦ ᑕᑯᔭᐅᖃᖅᑕᖅᓯᒪᓕᕇᖅᑐᑦ. ᐃᓘᓐᓈᒍᑦ ᖃᑦᓯᐅᓂᖏᑦ ᐆᒪᔪᐃᑦ ᓄᓇᕗᒻᒥ ᓂᕆᐅᒋᔭᐅᔪᑦ ᐊᒥᓱᓐᖑᐹᓪᓕᕐᓂᐊᕆᐊᖏᑦ ᖃᓪᓗᓈᓃᓐᖔᖅᑐᑦ ᐅᑭᐅᖅᑕᖅᑐᒨᖅᐸᓪᓕᐊᑐᐃᓐᓇᑎᓪᓗᒋᑦ ᓯᓚ ᐊᓯᔾᔨᐸᓪᓕᐊᑎᓪᓗᒍ. ᒫᓐᓇ ᐅᑭᐅᖅᑕᖅᑐᒥ ᐆᒪᔪᐃᑦ ᑕᑯᓂᐊᖅᑐᖅ ᐊᓯᔾᔨᕐᓂᐅᔪᓂᒃ ᓇᔪᒐᖏᓐᓂ ᐱᖃᓯᐅᑎᓗᑎᒃ ᓄᑖᑦ ᐱᕈᖅᑐᐃᑦ, ᓯᑯᖃᓐᖏᓂᖅᓴᖅ, ᐊᓯᔾᔨᕐᓂᖏᓐᓂᒃ ᐊᐳᑏᑦ, ᐊᓯᔾᔨᕐᓂᖅ ᑕᕆᐅᑉ ᑕᕆᐅᖃᕐᓂᖓᑕ ᐊᒻᒪᓗ ᐆᑎᕐᓇᖅᑐᖃᕐᓂᖅᓴᐅᓗᓂ. ᑕᒪᓐᓇ ᐊᑦᑐᐃᓂᖃᕈᓐᓇᖅᑐᖅ ᐆᒪᔪᕐᓂᒃ ᖃᑦᓯᐅᓂᖏᓐᓂᒃ ᓇᒦᓐᖏᓐᓂᓪᓗ. ᓲᕐᓗ ᓇᓄᐃᑦ ᓯᓚᑐᔪᒻᒪᕆᐅᒻᒪᑦ ᓱᖏᐅᑎᓴᕋᐃᑦᑑᑦᓱᑎᓪᓗ ᐊᓯᔾᔨᐸᓪᓕᐊᔪᓄᑦ. ᐆᒪᖃᑦᑕᖅᓯᒪᔪᑦ ᐊᒥᓱᐊᖅᑎᖅᓱᑎᒃ ᓯᓚ ᐊᓯᔾᔨᖃᑦᑕᑎᓪᓗᒍ ᑕᐃᑲᓂᒋᐊᖅ, ᑕᐃᒪᐃᒻᒪᑦ ᓇᓗᓇᓗᐊᓐᖏᑦᑐᖅ ᐊᑑᑎᒍᓐᓇᕐᓂᐊᖅᑐᑦ ᐊᓯᔾᔨᕐᓂᐅᔪᓂᒃ. ᑭᓯᐊᓂᓕ, ᐊᓯᔾᔨᕐᓂᖅᑕᖃᑐᐃᓐᓇᕆᐊᓕᒃ ᓇᔪᒐᖏᓐᓂ. ᐃᓚᖏᓐᓂᒃ ᓇᓄᖃᓐᖏᓂᖅᓴᐅᓕᕐᓂᐊᖅᑐᑦ. ᐃᓚᖏᓐᓂ ᓇᓄᖃᕈᓐᓃᑦᓯᐊᒻᒪᕆᓂᐊᖅᑐᖅ ᓂᕈᒥᓐᓇᓂᖅᐸᐅᓂᖓᓂ. ᐊᓯᖏᓐᓂ ᓇᓄᖃᖅᓂᖅᓴᐅᑐᐃᓐᓇᕆᐊᓕᒃ ᓯᓚ ᐊᓯᔾᐸᓪᓕᐊᓂᖓᑦ ᐱᕚᓪᓕᕈᑕᐅᑉᐸᑦ ᓇᓄᖃᕐᕕᐅᔪᓄᑦ ᑲᕝᕙᖃᓐᖏᓂᖅᓴᐅᓕᕐᓗᓂ. ᐊᓯᖏᓐᓂ, ᓇᓄᐃᑦ ᖃᑦᓯᐅᓂᖏᑦ ᕿᑐᕐᖏᐅᕐᓂᖏᓪᓗ ᑕᐃᒪᐃᑦᓴᐃᓐᓇᑐᐃᓐᓇᕆᐊᓖᑦ.

ᐊ: ᓱᓇᐅᒻᒪᑦ ᓯᓚᕐᓂᓪᓗᓯᑲᓪᓚᓐᓂᖅ?

ᑭ: ᓯᓚᕐᓂᓗᓯᑲᓪᓚᓂᖅ ᑐᑭᖃᖅᑐᖅ ᖁᕝᕙᐹᓪᓕᑲᓪᓚᑎᓪᓗᒍ ᐅᓕᓐᓂᖅ ᑕᕆᐅᕐᒧᑦ ᓯᓈᓂ. ᑕᐃᒪᐃᑦᑐᖅ ᒪᓕᖓᓗᒃ ᐃᖏᕐᕋᖃᑎᖃᓲᖅ, ᐊᐅᓚᑕᐅᑦᓱᓂᓗ, ᐊᓄᕆᕐᔪᐊᓄᑦ ᐅᓚᓗᔭᓕᓐᓄᑦ.

ᐊ: ᓱᓇᐅᕙ ᓯᓚᐅᑉ ᐊᓯᔾᔨᕐᓂᖓᓄᑦ ᓱᖏᐅᑎᓂᑦ: ?

ᑭ: ᓯᓚᐅᑉ ᐊᓯᔾᔨᕐᓂᖓᓄᑦ ᓱᖏᐅᑎᓂᖅ ᐅᖃᐅᓯᖃᖅᑐᖅ ᓇᐅᑐᐃᓐᓇᖅ ᐊᐅᓚᔾᔭᒋᐊᕐᓂᖅ ᐅᓇᑕᖅᑐᖅ ᐊᑦᑐᐃᓂᕐᓗᓐᓂᕆᔭᖏᓐᓂᒃ ᓯᓚᐅᑉ ᐊᓯᔾᔨᕐᓂᖓᑕ ᐅᕝᕙᓗ ᐊᑑᑎᒍᑕᐅᑦᓱᓂ ᓄᑖᓂᒃ ᐱᕕᑦᓴᖃᕐᓂᐅᒧᓂᒃ. ᓱᖏᐅᑎᓂᖅ ᑕᕝᕙᓴᐃᓐᓇᐅᒍᓐᓇᖅᑐᖅ, ᐸᕐᓇᑕᐅᒪᓗᓂ, ᐊᐅᓚᔾᔭᒋᐊᕈᑕᐅᓗᓂᓘᓐᓃᑦ.

ᐊ: ᖃᓄᖅ ᑐᑭᖃᕐᒪᑦ “ᓱᖏᐅᑎᕕᒋᒍᓐᓇᖅᑕᖓᑦ”?

ᑭ: ᓯᖏᐅᑎᕕᒋᒍᓐᓇᖅᑕᖓᑦ ᓄᓇᐅᑉ ᓄᓇᓖᓪᓘᓐᓃᑦ ᐊᐅᓚᑦᓯᓂᕆᒍᓐᓇᖅᑕᖓᑦ ᐊᑦᑐᐃᓂᐅᔪᓂᒃ ᐅᓗᕆᐊᓇᕐᓂᖏᓐᓂᓪᓗ ᓯᓚᐅᑉ ᐊᓯᔾᔨᕐᓂᖓᑕ.

ᐊ: ᓱᓇᐅᕙ ᓯᓚᐅᑉ ᐊᓯᔾᔨᕐᓂᖓᓂᒃ ᒥᑭᓪᑎᓕᕆᓂᖅ?

ᑭ: ᓯᓚᐅᑉ ᐊᓯᔾᔨᕐᓂᖓᓂᒃ ᒥᑭᓪᓕᑎᕆᓂᖅ ᒥᑭᓪᓕᑎᕆᓂᐅᕗᖅ ᐱᕈᖅᓰᕕᒻᒥᑎᑐᑦ ᐳᓚᓂᒃ (GHGs) ᓯᓚᐃᓐᓇᖅᒨᖅᑲᑐᓂᒃ. ᐊᔾᔨᒋᓐᖏᑕᖓ ᓱᖏᐅᑎᓂᐅᑉ, ᐊᐅᓚᔾᔭᒋᐊᕈᑕᐅᔪᖅ ᐊᓯᔾᔨᕐᓂᐅᔪᓄᑦ ᓴᖅᑭᖅᑕᐅᔪᓄᑦ ᐊᓂᐊᓂᖏᓐᓄᑦ ᐱᕈᖅᓰᕕᒻᒥᑎᑐᑦ ᐳᓪᓚᐃᑦ.

ᐊ: ᓱᓇᐅᕙ ᒪᓂᑦᓯᐅᑎᓯᒪᓂᖅ?

ᑭ: ᒪᓐᓂᐅᑎᓯᒪᓂᖅ ᑐᑭᖃᖅᑐᑦ ᖃᓄᑎᒋ ᐊᑑᑎᓲᑦ ᐅᕝᕙᓗ ᐃᓄᓐᓄᑦ ᑕᐃᒪᐃᑦᑎᑕᐅᔪᑦ ᐊᑑᑎᒍᓐᓇᕐᓂᖏᓐᓂᒃ, ᐊᑑᑎᒍᓐᓇᖏᓐᓂᖏᓐᓂᓘᓐᓃᑦ, ᐊᑦᑐᖅᑕᐅᓂᐅᔪᓂᒃ ᐊᓯᔾᔨᕐᓂᕐᒧᑦ.

ᐊ: ᖃᓄᖅ ᐸᕐᓇᐃᕈᓐᓇᖅᑭᑕ ᓯᓚ ᐊᓯᔾᔨᐸᓪᓕᐊᑎᓪᓗᒍ? ᓱᒍᓐᓇᖅᑯᖓ?

ᑭ: ᓄᓇᕗᒻᒥᐅᑦ ᐊᓂᐊᑦᓯᒡᒐᐃᓐᓇᖃᑦᑕᕋᓗᐊᖅᑎᓪᓗᒋᑦ GHGs-ᒥᒃ ᑲᑎᑦᓱᑎᒃ, ᐃᓚᒋᔭᐅᔪᒍᑦ ᖁᑦᓯᓂᖅᐹᓂᒃ ᐊᓂᐊᑦᓯᔪᓂ GHGs-ᓂᒃ ᐊᑐᓂᑦ ᐃᓄᒃ ᑲᓇᑕᒥ ᓄᓇᕐᔪᐊᕐᒥᓗ. ᒥᑭᓪᓕᑎᕆᓂᐅᒐᓗᐊᖅᑎᓪᓗᖑ ᓯᓚᐳᑉ ᐊᓯᔾᔨᐸᓕᐊᓂᖓᓂᒃ ᐊᓂᐊᑦᓯᖏᓐᓂᖅᓴᐅᖓᓗᓂ GHGs-ᒥᒃ ᐱᒻᒪᕆᐹᓗᒃ (ᑕᒪᓐᓇ ᐊᑑᑎᒍᓐᓇᖅᑐᖅ ᐊᐅᒪᓕᐅᕈᑎᓅᖓᔪᓂᒃ ᓯᓚᑐᔪᓂᒃ ᖃᓄᖅᑑᕈᑎᖃᖃᑦᑕᕐᓂᒃᑯᑦ), ᒫᓐᓇ ᑐᑭᓯᓂᐊᖅᑎᒻᒪᕆᓐᓄᑦ ᓂᕆᐅᒋᔭᐅᔪᑦ ᐅᖃᖅᓯᒪᔪᑦ ᓄᖅᑲᐅᔾᔨᑦᓯᐊᒪᕆᖁᔭᐅᑦᓱᑕ ᐅᓪᓗᒥ ᐊᓂᐊᑦᓯᓂᕐᒥᒃ GHG ᐅᓪᓚᓂᒃ, ᓄᓇᕐᔪᐊᕐᒥ ᓂᕆᒥᓐᓂᐅᒐᔪᓲᑦ ᖁᕝᕙᐸᓪᓕᐊᖏᓐᓇᖅᑐᖅ ᐊᓯᔾᔨᕐᑕᕐᓂᖓᓄᑦ ᓯᓚᐅᑉ ᐊᐅᓚᓂᖓ. ᐊᓯᐊᒍᑦ ᐅᖃᕐᓗᒍ, ᓱᖏᐅᑎᒋᐊᖃᕐᓂᐊᖅᑐᒍᑦ ᒫᓐᓇ ᐊᒻᒪᓗ ᓂᕆᐅᒋᔭᐅᔪᓄᑦ ᐊᓯᔾᔨᕐᓂᐅᒐᔭᖅᑐᓄᑦ ᐊᕙᑎᑦᑎᓐᓂ.
ᒐᕙᒪᒃᑯᑦ ᓄᓇᕗᑦ ᑲᑐᔾᔨᖃᑎᖃᖅᓯᒪᔪᑦ ᓄᓇᓕᓐᓂᒃ, ᑲᓇᑕᒥ ᑎᒥᐅᔪᒥᒃ ᐸᕐᓇᑦᑎᓄᑦ, ᐃᓄᓕᕆᔨᑐᖃᒃᑯᑦ ᑲᓇᑕᒥ, ᐊᒻᒪᓗ ᓄᓇᒥᐅᑕᓕᕆᔩᑦ ᑲᓇᑕᒥ ᓴᖅᑮᓪᓗᑎᒃ ᐆᑦᑐᕋᐅᑕᐅᔪᓂᒃ ᓄᓇᓕᓐᓂ ᓯᓚᐅᑉ ᐊᓯᔾᔨᕐᓂᖓᓄᑦ ᓱᖏᐅᑎᓂᕐᒧᑦ ᐊᐅᓚᔾᔭᒋᐊᕈᑎᓄᑦ ᐸᕐᓇᐅᑎᓂᒃ ᐊᒻᒪᓗ ᐊᐅᓚᓂᐅᔪᓂᒃ ᓇᓗᓇᐃᖅᓯᒍᑎᑦᓴᓂᒃ ᐊᑦᑐᐃᓂᖑᓐᓂᒃ ᐊᓯᔾᔨᐸᓪᓕᐊᔪᑦ ᓄᓇᐃᑦ ᐊᐅᔪᐃᑦᑐᑦ ᐊᒻᒪᓗ ᖁᕝᕙᐸᓪᓕᐊᔪᖅ ᑕᕆᐅᑉ ᐅᓕᓐᓂᖓ ᓄᓇᕗᒻᒥ ᓄᓇᓕᓐᓂ. ᑲᑐᔾᔨᖃᑎᖃᕐᓂᒃᑯᑦ ᑲᑐᓯᐅᔾᔨᓂᒃᑯᓪᓗ ᖃᐅᔨᒪᔭᐅᔪᓂᒃ ᐊᑦᑐᖅᑕᐅᓂᐅᔪᓂᒃ ᓯᓚᐅᑉ ᐊᓯᕐᓂᖓᒍᑦ ᖃᓄᖅᑑᓂᑦᑎᓐᓄᑦ ᐸᕐᓇᓂᑦᑎᓐᓄᓪᓗ ᖁᑦᓯᓕᕇᓐᓂᓕᒫᓂ, ᐸᕐᓇᓯᒪᓂᐊᖅᑐᒍᑦ ᓵᓐᖓᑦᓯᒍᓐᓇᕐᓂᕐᒧᑦ ᐊᓯᔾᔨᐸᓪᓕᐊᔪᒥᒃ ᓯᓚᒥᒃ.